ਦੋ ਮਹਿਲਾਵਾਂ ਨਾਲ ਅਫੇਅਰ, ਚੀਨ ਨਾਲ ਕਨੈਕਸ਼ਨ ਕੀ ਖ਼ਤਰੇ ‘ਚ ਹੈ Nvidia ਦੇ CEO ਜੇਨਸਨ ਹੁਆਂਗ ਦੀ ਕੁਰਸੀ?

ਦੁਨੀਆ ਦੀ ਸਭ ਤੋਂ ਵੱਡੀ ਚਿੱਪ ਬਣਾਉਣ ਵਾਲੀਆਂ ਕੰਪਨੀਆਂ ਵਿੱਚੋਂ ਇੱਕ Nvidia ਦੇ CEO ਜੇਨਸਨ ਹੁਆਂਗ ਦੀ ਕੁਰਸੀ ਖ਼ਤਰੇ ਵਿੱਚ ਦਿਖਾਈ ਦੇ ਰਹੀ ਹੈ। ਕੰਪਨੀ ਦਾ ਬੋਰਡ ਮੀਟਿੰਗ ਕਰਕੇ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਬਾਰੇ ਫੈਸਲਾ ਲੈ ਸਕਦਾ ਹੈ। ਉਨ੍ਹਾਂ ਦੇ ਨਿੱਜੀ ਸਬੰਧਾਂ ਅਤੇ ਚੀਨ ਦੀ ਇੱਕ ਕਾਰੋਬਾਰੀ ਮਹਿਲਾ ਨਾਲ ਕਥਿਤ ਰਿਸ਼ਤਿਆਂ ਨੂੰ ਲੈ ਕੇ ਵਿਵਾਦ ਵਧ ਗਿਆ ਹੈ। Reuters ਨੇ ਕੰਪਨੀ ਨਾਲ ਜੁੜੇ ਇੱਕ ਵਿਅਕਤੀ ਦੇ ਹਵਾਲੇ ਨਾਲ ਇਹ ਜਾਣਕਾਰੀ ਦਿੱਤੀ ਹੈ।

63 ਸਾਲਾ ਜੇਨਸਨ ਹੁਆਂਗ ਨੇ 1993 ਵਿੱਚ Nvidia ਦੀ ਸ਼ੁਰੂਆਤ ਕੀਤੀ ਸੀ। ਉਨ੍ਹਾਂ ਨੇ ਇਸ ਨੂੰ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਲਈ ਚਿੱਪਾਂ ਬਣਾਉਣ ਵਾਲੀ ਦੁਨੀਆ ਦੀ ਸਭ ਤੋਂ ਵੱਡੀ ਕੰਪਨੀ ਬਣਾ ਦਿੱਤਾ। ਕੰਪਨੀ ਦੀ ਕੀਮਤ ਕਰੀਬ 4 ਲੱਖ ਕਰੋੜ ਡਾਲਰ ਹੈ। ਅਜਿਹੇ ਵਿੱਚ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਨਾਲ ਕੰਪਨੀ ਵਿੱਚ ਲੀਡਰਸ਼ਿਪ ਦਾ ਸੰਕਟ ਪੈਦਾ ਹੋ ਸਕਦਾ ਹੈ।

ਦੋ ਮਹਿਲਾਵਾਂ ਨਾਲ ਸਬੰਧਾਂ ਨੂੰ ਲੈ ਕੇ ਵਿਵਾਦ

ਵਿਵਾਦ ਦੀ ਸ਼ੁਰੂਆਤ ਚੀਨੀ ਕਾਰੋਬਾਰੀ ਮਹਿਲਾ ਐਲਿਸ ਹੁਆਂਗ ਨਾਲ ਜੇਨਸਨ ਦੇ ਕਥਿਤ ਸਬੰਧਾਂ ਦੀਆਂ ਖ਼ਬਰਾਂ ਤੋਂ ਹੋਈ। ਅਮਰੀਕੀ ਖੁਫੀਆ ਏਜੰਸੀਆਂ ਨੂੰ ਸ਼ੱਕ ਹੈ ਕਿ ਐਲਿਸ ਨੇ Nvidia ਦੀਆਂ ਚਿੱਪਾਂ ਚੀਨੀ ਕੰਪਨੀਆਂ ਤੱਕ ਪਹੁੰਚਾਉਣ ਵਿੱਚ ਮਦਦ ਕੀਤੀ ਸੀ।

ਬੁੱਧਵਾਰ ਨੂੰ New York Times ਨੇ ਇੱਕ ਹੋਰ ਰਿਪੋਰਟ ਪ੍ਰਕਾਸ਼ਿਤ ਕੀਤੀ। ਇਸ ਵਿੱਚ ਦਾਅਵਾ ਕੀਤਾ ਗਿਆ ਕਿ ਜੇਨਸਨ ਦੇ Nvidia ਦੇ ਹੈਲਥਕੇਅਰ ਵਿਭਾਗ ਦੀ ਵਾਈਸ ਪ੍ਰੈਜ਼ੀਡੈਂਟ ਕਿੰਬਰਲੀ ਪਾਵੇਲ ਨਾਲ ਵੀ ਕਥਿਤ ਸਬੰਧ ਸਨ। ਰਿਪੋਰਟ ਵਿੱਚ ਕੰਪਨੀ ਵਿੱਚ ਕੰਮ ਕਰ ਚੁੱਕੇ ਪੰਜ ਲੋਕਾਂ ਦੇ ਹਵਾਲੇ ਨਾਲ ਇਹ ਦਾਅਵਾ ਕੀਤਾ ਗਿਆ। ਹਾਲਾਂਕਿ, Reuters ਇਸ ਦੀ ਸੁਤੰਤਰ ਤੌਰ ‘ਤੇ ਪੁਸ਼ਟੀ ਨਹੀਂ ਕਰ ਸਕਿਆ। ਜੇਨਸਨ ਨੇ ਇਸ ਮਾਮਲੇ ‘ਤੇ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। Nvidia ਅਤੇ ਪਾਵੇਲ ਵੱਲੋਂ ਵੀ ਕੋਈ ਜਵਾਬ ਨਹੀਂ ਦਿੱਤਾ ਗਿਆ।

ਜੇਨਸਨ ਨੇ ਐਤਵਾਰ ਨੂੰ ਕਰਮਚਾਰੀਆਂ ਨੂੰ ਭੇਜੇ ਇੱਕ ਸੰਦੇਸ਼ ਵਿੱਚ ਆਪਣੀ ਪਤਨੀ ਨਾਲ ਬੇਵਫ਼ਾਈ ਕਰਨ ਦੀ ਗੱਲ ਸਵੀਕਾਰ ਕੀਤੀ ਸੀ ਅਤੇ ਇਸ ਦੀ ਪੂਰੀ ਜ਼ਿੰਮੇਵਾਰੀ ਲਈ ਸੀ। ਹਾਲਾਂਕਿ, ਉਨ੍ਹਾਂ ਨੇ ਕਿਸੇ ਦਾ ਨਾਮ ਨਹੀਂ ਲਿਆ। ਇਸੇ ਦਿਨ ਕੰਪਨੀ ਦੇ ਬੋਰਡ ਨੇ ਜਾਂਚ ਸ਼ੁਰੂ ਕੀਤੀ ਕਿ ਕਿਤੇ ਕਿਸੇ ਵਿਦੇਸ਼ੀ ਖੁਫੀਆ ਏਜੰਸੀ ਨੇ ਜੇਨਸਨ ਨੂੰ ਨਿਸ਼ਾਨਾ ਤਾਂ ਨਹੀਂ ਬਣਾਇਆ। ਇਸ ਜਾਂਚ ਦੀ ਜ਼ਿੰਮੇਵਾਰੀ ਸੁਤੰਤਰ ਡਾਇਰੈਕਟਰਾਂ ਅਤੇ ਬਾਹਰੀ ਵਕੀਲਾਂ ਨੂੰ ਸੌਂਪੀ ਗਈ ਹੈ।

ਇਹ ਵੀ ਪੜ੍ਹੋ

ਅਰਬ ਤੋਂ US ਦੇ ਬੋਰੀਆ-ਬਿਸਤਰਾ ਸਮੇਟਣ ਦਾ ਆ ਗਿਆ ਸਮਾਂ? ਈਰਾਨ ਨੇ ਪਲਟੀ ਬਾਜ਼ੀ

ਨਿਊਜ਼ੀਲੈਂਡ 'ਚ ਦੀਵਾਲੀ ਦੀ ਰਾਤ ਭਿਆਨਕ ਹਾਦਸਾ, 3 ਪੰਜਾਬੀ ਨੌਜਵਾਨਾਂ ਦੀ ਮੌਤ

ਹੋਰਮੁਜ਼ 'ਚ ਸਮੁੰਦਰੀ ਮਾਈਨਜ਼ ਨਾਲ ਟਕਰਾਏ 3 ਤੇਲ ਟੈਂਕਰ, ਈਰਾਨ ਨੇ ਦੱਸਿਆ ਕਾਰਨ

ਸ਼ੇਅਰਾਂ ਵਿੱਚ ਗਿਰਾਵਟ, 600 ਅਰਬ ਡਾਲਰ ਦਾ ਨੁਕਸਾਨ

Wall Street Journal ਦੀ ਰਿਪੋਰਟ ਤੋਂ ਬਾਅਦ ਕਾਰੋਬਾਰ ਦੇ ਘੰਟਿਆਂ ਤੋਂ ਬਾਅਦ Nvidia ਦੇ ਸ਼ੇਅਰਾਂ ਵਿੱਚ ਕਰੀਬ 8 ਫ਼ੀਸਦੀ ਦੀ ਗਿਰਾਵਟ ਆਈ। ਇਸ ਹਫ਼ਤੇ ਕੰਪਨੀ ਦੇ ਬਾਜ਼ਾਰ ਮੁੱਲ ਵਿੱਚ ਕਰੀਬ 600 ਅਰਬ ਡਾਲਰ ਦੀ ਕਮੀ ਆਈ ਹੈ। ਇਸ ਦੇ ਉਲਟ, ਵਿਰੋਧੀ ਕੰਪਨੀਆਂ AMD ਅਤੇ Broadcom ਦੇ ਸ਼ੇਅਰਾਂ ਵਿੱਚ ਕ੍ਰਮਵਾਰ 4 ਫ਼ੀਸਦੀ ਅਤੇ 3 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ।

ਜੇਨਸਨ ਕੋਲ Nvidia ਦੇ ਕਰੀਬ 3.6 ਫ਼ੀਸਦੀ ਸ਼ੇਅਰ ਹਨ। ਕੰਪਨੀ ਦੇ ਕਈ ਵੱਡੇ ਅਧਿਕਾਰੀ ਸਿੱਧੇ ਉਨ੍ਹਾਂ ਨੂੰ ਰਿਪੋਰਟ ਕਰਦੇ ਹਨ। ਫਿਲਹਾਲ ਉਨ੍ਹਾਂ ਦਾ ਕੋਈ ਸਪੱਸ਼ਟ ਉੱਤਰਾਧਿਕਾਰੀ ਵੀ ਨਹੀਂ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਜੇਨਸਨ ਦਾ ਸਮਰਥਨ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਸਨਮਾਨਿਤ ਵਿਅਕਤੀ ਦੱਸਿਆ ਹੈ। ਉੱਥੇ ਹੀ, ਚੀਨ ਨੂੰ ਚਿੱਪਾਂ ਭੇਜਣ ਦੇ ਆਰੋਪਾਂ ਨੂੰ ਲੈ ਕੇ ਅਮਰੀਕੀ ਸੰਸਦ ਉਨ੍ਹਾਂ ਤੋਂ ਬੰਦ ਕਮਰੇ ਵਿੱਚ ਪੁੱਛਗਿੱਛ ਕਰ ਸਕਦੀ ਹੈ।