Assembly Elections 2027

Assembly Elections 2027: ਪੰਜ ਸੂਬਿਆਂ ਵਿੱਚ ਵਿਧਾਨ ਸਭਾ ਚੋਣਾਂ ਬਾਰੇ ਪੂਰੀ ਜਾਣਕਾਰੀ

Assembly Elections 2027 : 2027 ਵਿੱਚ ਪੰਜ ਸੂਬਿਆਂ ਉੱਤਰ ਪ੍ਰਦੇਸ਼, ਪੰਜਾਬ, ਉਤਰਾਖੰਡ, ਗੋਆ ਅਤੇ ਮਨੀਪੁਰ ਵਿੱਚ ਵਿਧਾਨ ਸਭਾ ਚੋਣਾਂ ਹੋਣੀਆਂ ਹਨ। ਸਾਰਿਆਂ ਦੀਆਂ ਨਜ਼ਰਾਂ ਸਿਆਸੀ ਪਾਰਟੀਆਂ ਦੀਆਂ ਤਿਆਰੀਆਂ, ਚੋਣ ਰਣਨੀਤੀਆਂ, ਉਮੀਦਵਾਰਾਂ ਦੇ ਐਲਾਨਾਂ ਅਤੇ ਚੋਣ ਮੁੱਦਿਆਂ ਨਾਲ ਸਬੰਧਤ ਖ਼ਬਰਾਂ ‘ਤੇ ਰਹਿਣਗੀਆਂ।

ਚੋਣ ਕਮਿਸ਼ਨ ਦੁਆਰਾ ਅਧਿਕਾਰਤ ਐਲਾਨ ਤੋਂ ਬਾਅਦ, ਵਿਧਾਨ ਸਭਾ ਚੋਣਾਂ ਦੀਆਂ ਤਰੀਕਾਂ, ਚੋਣਾਂ ਦਾ ਸ਼ੈਡਿਊਲ, ਉਮੀਦਵਾਰਾਂ ਦੀ ਲਿਸਟ, ਪਾਰਟੀ-ਵਾਰ ਸੀਟਾਂ ਦੀ ਵੰਡ, ਚੋਣ ਮੁਹਿੰਮ, ਵੋਟਿੰਗ ਫੀਸਦ, ਐਗਜ਼ਿਟ ਪੋਲ ਅਤੇ ਵਿਧਾਨ ਸਭਾ ਚੋਣ ਨਤੀਜਿਆਂ ਬਾਰੇ ਲੈਟੇਸਟ ਅਪਡੇਟਸ, ਚੋਣਾਂ ਅਤੇ ਨਤੀਜੇ ਐਲਾਨੇ ਜਾਣ ਦੀਆਂ ਤਰੀਕਾਂ ਅਤੇ ਹੋਰ ਜਾਣਕਾਰੀ ਅਪਡੇਟ ਕੀਤੀ ਜਾਵੇਗੀ।

2022 ਵਿਧਾਨ ਸਭਾ ਚੋਣਾਂ: 5 ਰਾਜਾਂ ਲਈ ਸੀਟਾਂ ਦਾ ਪੂਰਾ ਗਣਿਤ

2022 ਵਿੱਚ ਪੰਜਾਬ, ਉੱਤਰ ਪ੍ਰਦੇਸ਼, ਗੋਆ, ਮਨੀਪੁਰ ਅਤੇ ਉੱਤਰਾਖੰਡ ਵਿੱਚ ਵਿਧਾਨ ਸਭਾ ਚੋਣਾਂ ਹੋਈਆਂ ਸਨ। ਇਨ੍ਹਾਂ ਪੰਜਾਂ ਸੂਬਿਆਂ ਵਿੱਚ ਵਿਧਾਨ ਸਭਾ ਸੀਟਾਂ ਦੀ ਕੁੱਲ ਗਿਣਤੀ, ਸਰਕਾਰ ਬਣਾਉਣ ਲਈ ਲੋੜੀਂਦੇ ਮੈਜਿਕ ਨੰਬਰ ਅਤੇ ਚੋਣਾਂ ਵਿੱਚ ਹਰੇਕ ਵੱਡੀ ਰਾਜਨੀਤਿਕ ਪਾਰਟੀ ਦੁਆਰਾ ਜਿੱਤੀਆਂ ਗਈਆਂ ਸੀਟਾਂ ਦੀ ਗਿਣਤੀ ਦਾ ਵੇਰਵਾ ਦਿੱਤਾ ਗਿਆ ਹੈ।

ਪੰਜਾਬ – ਪੰਜਾਬ ਵਿੱਚ ਵਿਧਾਨਸਭਾ ਦੀਆਂ ਕੁੱਲ੍ਹ 117 ਸੀਟਾਂ ਹਨ। ਬਹੁਮਤ ਦਾ ਅੰਕੜਾ 59 ਹੈ। 2022 ਵਿੱਚ ਆਮ ਆਦਮੀ ਪਾਰਟੀ (AAP) ਨੇ 117 ਚੋਂ 92 ਸੀਟਾਂ ਜਿੱਤੀਆਂ ਸਨ, ਕਾਂਗਰਸ ਦੇ ਖਾਤੇ ਵਿੱਚ 18 ਸੀਟਾਂ ਗਈਆਂ ਸਨ, ਸ਼੍ਰੋਮਣੀ ਅਕਾਲੀ ਦਲ ਨੂੰ 3 ਅਤੇ ਭਾਰਤੀ ਜਨਤਾ ਪਾਰਟੀ ਨੂੰ 2 ਸੀਟਾਂ ਮਿਲੀਆਂ ਸਨ। ਆਮ ਆਦਮੀ ਪਾਰਟੀ ਨੇ ਭਗਵੰਤ ਮਾਨ ਦੀ ਅਗੁਵਾਈ ਹੇਠ ਸਰਕਾਰ ਬਣਾਈ ਸੀ।

ਉੱਤਰ ਪ੍ਰਦੇਸ਼ – ਉੱਤਰ ਪ੍ਰਦੇਸ਼ ਵਿੱਚ ਵਿਧਾਨਸਭਾ ਦੀਆਂ ਕੁੱਲ੍ਹ 403 ਸੀਟਾਂ ਹਨ, ਜਿਨ੍ਹਾਂ ਚੋਂ ਮੈਜਿਕ ਨੰਬਰ 202 ਸੀਟਾਂ ਦਾ ਹੈ। 2022 ਵਿੱਚ ਭਾਰਤੀ ਜਨਤਾ ਪਾਰਟੀ (BJP) ਨੂੰ 255 ਸੀਟਾਂ ਮਿਲੀਆਂ ਸਨ, ਸਮਾਜਵਾਦੀ ਪਾਰਟੀ (SP) ਨੂੰ 111, ਅਪਨਾ ਦਲ (ਸੋਨੇਲਾਲ) ਨੂੰ 12, ਰਾਸ਼ਟਰੀ ਲੋਕ ਦਲ (RLD) ਨੂੰ 8, ਨਿਸ਼ਾਦ ਪਾਰਟੀ ਨੂੰ 6, ਸੁਹੇਲਦੇਵ ਭਾਰਤੀ ਸਮਾਜ ਪਾਰਟੀ ਨੂੰ 6, ਕਾਂਗਰਸ ਨੂੰ 2, ਜਨਸੱਤਾ ਦਲ ਲੋਕਤਾਂਤ੍ਰਿਕ ਨੂੰ 2, ਬਹੁਜਨ ਸਮਾਜ ਪਾਰਟੀ (BSP) ਨੂੰ 1 ਸੀਟ ਮਿਲੀ ਸੀ।

ਉਸ ਵੇਲ੍ਹੇ ਬੀਜੇਪੀ ਦੀ ਅਗੁਵਾਈ ਵਾਲੀ ਐਨਡੀਏ ਨੇ 273 ਸੀਟਾਂ ਜਿੱਤੀਆਂ ਸਨ। ਸਮਾਜਵਾਦੀ ਪਾਰਟੀ ਦੇ ਗਠਜੋੜ ਨੇ 125 ਸੀਟਾਂ ਅਤੇ ਹੋਰਨਾਂ ਨੇ 5 ਸੀਟਾਂ ਤੇ ਕਬਜਾ ਕੀਤਾ ਸੀ। ਯੋਗੀ ਆਦਿਤਿਆਨਾਥ ਦੀ ਅਗੁਵਾਈ ਹੇਠ ਬੀਜੇਪੀ ਨੇ ਦੂਜੀ ਵਾਰ ਸਰਕਾਰ ਬਣਾਈ ਸੀ।

ਗੋਆ – ਸਮੁੰਦਰੀ ਸ਼ਹਿਰ ਗੋਆ ਵਿੱਚ ਕੁੱਲ੍ਹ ਸੀਟਾਂ 40 ਹਨ, ਜਿਨ੍ਹਾਂ ਦਾ ਮੈਜਿਕ ਨੰਬਰ 21 ਬਣਦਾ ਹੈ। 2022 ਦੀਆਂ ਵਿਧਾਨਸਭਾ ਚੋਣਾਂ ਵਿੱਚ ਬੀਜੇਪੀ ਨੇ 20 ਸੀਟਾਂ ਜਿੱਤੀਆਂ ਸਨ। ਕਾਂਗਰਸ ਨੇ 11, ਮਹਾਰਾਸ਼ਟਰਵਾਦੀ ਗੋਮਾਂਤਕ ਪਾਰਟੀ (MGP) ਨੂੰ 2, ਆਮ ਆਦਮੀ ਪਾਰਟੀ (AAP) ਨੂੰ 2, ਗੋਆ ਫਾਰਵਰਡ ਪਾਰਟੀ (GFP) ਨੂੰ 1, ਰਿਵੋਲਿਊਸ਼ਨਰੀ ਗੋਅੰਸ ਪਾਰਟੀ (RGP) 1, ਆਜ਼ਾਦ ਉਮੀਦਵਾਰਾਂ ਨੂੰ 3 ਸੀਟਾਂ ਮਿਲੀਆਂ ਸਨ। ਬੀਜੇਪੀ ਨੇ ਆਜ਼ਾਦ ਉਮੀਦਵਾਰਾਂ ਅਤੇ MGP ਦੇ ਸਮਰਥਨ ਨਾਲ ਸੂਬੇ ਵਿੱਚ ਸਰਕਾਰ ਬਣਾਈ ਸੀ।

ਮਣੀਪੁਰ – ਮਣੀਪੁਰ ਵਿੱਚ ਕੁੱਲ੍ਹ ਸੀਟਾਂ 60 ਹਨ, ਜਿਨ੍ਹਾਂ ਦਾ ਮੈਜਿਕ ਨੰਬਰ 31 ਬਣਦਾ ਹੈ। 2022 ਦੀਆਂ ਚੋਣਾਂ ਦੌਰਾਨ ਇੱਥੇ ਬੀਜੇਪੀ ਨੂੰ 32 ਸੀਟਾਂ ਮਿਲੀਆਂ ਸਨ। ਕਾਂਗਰਸ ਨੂੰ 5, ਜਨਤਾ ਦਲ (ਯੂਨਾਇਟੇਡ) (JD(U)) ਨੂੰ 6, ਨੈਸ਼ਨਲ ਪੀਪੁਲਸ ਪਾਰਟੀ (NPP) ਨੂੰ 7, ਨਾਗਾ ਪੀਪੁਲਸ ਫਰੰਟ (NPF) ਨੂੰ 5, ਕੁਕੀ ਪੀਪੁਲਸ ਫਰੰਟ (KPA) ਨੂੰ 2 ਅਤੇ ਆਜ਼ਾਦ ਉਮੀਦਵਾਰਾਂ ਨੂੰ 3 ਸੀਟਾਂ ਮਿਲੀਆਂ ਸਨ। ਬੀਜੇਪੀ ਨੇ 32 ਸੀਟਾਂ ਜਿੱਤ ਕੇ ਬਹੁਮਤ ਹਾਸਿਲ ਕੀਤਾ ਸੀ ਅਤੇ ਆਪਣੇ ਦਮ ਤੇ ਸਰਕਾਰ ਬਣਾਈ ਸੀ।

ਉੱਤਰਾਖੰਡ – ਪਹਾੜੀ ਸੂਬੇ ਉੱਤਰਾਖੰਡ ਵਿੱਚ ਕੁੱਲ੍ਹ ਵਿਧਾਨਸਭਾ ਸੀਟਾਂ 70 ਹਨ, ਇਨ੍ਹਾਂ ਦਾ ਮੈਜਿਕ ਨੰਬਰ 36 ਬਣਦਾ ਹੈ। 2022 ਦੀਆਂ ਚੋਣਾਂ ਵਿੱਚ ਬੀਜੇਪੀ ਨੂੰ 47 ਸੀਟਾਂ ਮਿਲੀਆਂ ਸਨ, ਕਾਂਗਰਸ ਨੂੰ 19, ਬਹੁਜਨ ਸਮਾਜ ਪਾਰਟੀ ਨੂੰ 2 ਅਤੇ ਆਜ਼ਾਦ ਉਮੀਦਵਾਰਾਂ ਨੇ ਵੀ 2 ਸੀਟਾਂ ਹਾਸਿਲ ਕੀਤੀਆਂ ਸਨ। ਬੀਜੇਪੀ ਨੇ 47 ਸੀਟਾਂ ਜਿੱਤ ਕੇ ਬਹੁਮਤ ਨਾਲ ਸਰਕਾਰ ਬਣਾਈ ਸੀ।

2022 ਵਿੱਚ, ਇਨ੍ਹਾਂ ਪੰਜਾਂ ਵਿੱਚੋਂ ਚਾਰ ਰਾਜਾਂ ਵਿੱਚ ਭਾਜਪਾ ਦੀ ਅਗਵਾਈ ਵਾਲੀਆਂ ਸਰਕਾਰਾਂ ਬਣੀਆਂ, ਜਦੋਂ ਕਿ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਨੇ ਸਰਕਾਰ ਬਣਾਈ। ਗੋਆ ਵਿੱਚ, ਭਾਜਪਾ 21 ਸੀਟਾਂ ਦੇ ਬਹੁਮਤ ਤੋਂ ਇੱਕ ਸੀਟ ਘੱਟ ਰਹਿ ਗਈ, ਪਰ ਗੱਠਜੋੜ ਦੇ ਸਮਰਥਨ ਨਾਲ ਸਰਕਾਰ ਬਣਾਈ ਸੀ।