2 AK-47, 350 ਕਿਲੋ RDX… ਫਰੀਦਾਬਾਦ ‘ਚ ਡਾਕਟਰ ਦੇ ਕਮਰੇ ਤੋਂ ਵੱਡੀ ਮਾਤਰਾ ‘ਚ ਵਿਸਫੋਟਕ ਬਰਾਮਦ
ਜੰਮੂ-ਕਸ਼ਮੀਰ ਪੁਲਿਸ ਨੇ ਫਰੀਦਾਬਾਦ 'ਚ ਇੱਕ ਡਾਕਟਰ ਦੇ ਘਰ ਤੋਂ 300 ਕਿਲੋ RDX, ਇੱਕ AK-47 ਰਾਈਫਲ ਤੇ 84 ਕਾਰਤੂਸ ਬਰਾਮਦ ਕੀਤੇ ਹਨ। ਜਾਂਚ 'ਚ ਪਤਾ ਲੱਗਿਆ ਹੈ ਕਿ ਡਾਕਟਰ ਅੰਸਾਰ ਗਜ਼ਵਤ-ਉਲ-ਹਿੰਦ ਅੱਤਵਾਦੀ ਸੰਗਠਨ ਨਾਲ ਜੁੜਿਆ ਹੋਇਆ ਸੀ।
ਜੰਮੂ ਪੁਲਿਸ ਨੇ ਹਰਿਆਣਾ ਦੇ ਫਰੀਦਾਬਾਦ ‘ਚ ਇੱਕ ਡਾਕਟਰ ਦੇ ਘਰ ਤੋਂ ਵੱਡੀ ਮਾਤਰਾ ‘ਚ ਵਿਸਫੋਟਕ ਤੇ ਹਥਿਆਰ ਬਰਾਮਦ ਕੀਤੇ ਹਨ। ਅਧਿਕਾਰੀਆਂ ਦੇ ਅਨੁਸਾਰ, ਡਾਕਟਰ ਨੇ ਕਮਰਾ ਕਿਰਾਏ ‘ਤੇ ਲਿਆ ਸੀ। ਪੁਲਿਸ ਨੂੰ ਉਸ ਦੇ ਕਮਰੇ ‘ਚੋਂ ਲਗਭਗ 300 ਕਿਲੋ ਆਰਡੀਐਕਸ, 2 ਏਕੇ-47 ਰਾਈਫਲਾਂ, 84 ਕਾਰਤੂਸ ਤੇ ਰਸਾਇਣ ਮਿਲੇ। ਇਹ ਕਾਰਵਾਈ ਇੱਕ ਸੂਚਨਾ ਦੇ ਆਧਾਰ ‘ਤੇ ਕੀਤੀ ਗਈ ਸੀ, ਜਿਸ ‘ਚ ਜੰਮੂ-ਕਸ਼ਮੀਰ ਪੁਲਿਸ ਦੀ ਇੱਕ ਵਿਸ਼ੇਸ਼ ਟੀਮ ਨੇ ਸਥਾਨਕ ਪੁਲਿਸ ਨਾਲ ਮਿਲ ਕੇ ਛਾਪਾ ਮਾਰਿਆ।
ਸੂਤਰਾਂ ਅਨੁਸਾਰ, ਇਹ ਕਾਰਵਾਈ ਅੱਤਵਾਦੀ ਸੰਗਠਨ ਅੰਸਾਰ ਗਜ਼ਵਤ-ਉਲ-ਹਿੰਦ (ਏਜੀਐਚ) ਦੀ ਜਾਂਚ ਦਾ ਹਿੱਸਾ ਹੈ। ਜਾਂਚ ‘ਚ ਸਾਹਮਣੇ ਆਇਆ ਕਿ ਤਿੰਨ ਡਾਕਟਰ ਇਸ ਸੰਗਠਨ ਨਾਲ ਜੁੜੇ ਹੋਏ ਸਨ। ਇਨ੍ਹਾਂ ‘ਚੋਂ ਦੋ ਡਾਕਟਰ, ਅਦੀਲ ਅਹਿਮਦ ਰਾਥਰ (ਨਿਵਾਸੀ ਅਨੰਤਨਾਗ) ਤੇ ਮੁਜ਼ਮਿਲ ਸ਼ਕੀਲ (ਨਿਵਾਸੀ ਪੁਲਵਾਮਾ) ਨੂੰ ਸਹਾਰਨਪੁਰ ਤੇ ਫਰੀਦਾਬਾਦ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜਦੋਂ ਕਿ ਤੀਜਾ ਡਾਕਟਰ ਅਜੇ ਵੀ ਫਰਾਰ ਹੈ।
GMC ‘ਚ ਕੰਮ ਕਰਦਾ ਹੈ ਅਦੀਲ
ਜ਼ਿਕਰਯੋਗ ਹੈ ਕਿ ਅਦੀਲ ਰਾਥਰ ਉਹੀ ਡਾਕਟਰ ਹੈ ਜਿਸ ਦਾ ਨਾਮ ਹਾਲ ਹੀ ‘ਚ ਇੱਕ ਹੋਰ ਸਨਸਨੀਖੇਜ਼ ਘੁਟਾਲੇ ‘ਚ ਸ਼ਾਮਲ ਪਾਇਆ ਗਿਆ ਸੀ। ਜੰਮੂ-ਕਸ਼ਮੀਰ ਦੇ ਅਨੰਤਨਾਗ ਮੈਡੀਕਲ ਕਾਲਜ (ਜੀਐਮਸੀ) ‘ਚ ਉਸ ਦੇ ਨਿੱਜੀ ਲਾਕਰ ‘ਚੋਂ ਇੱਕ ਏਕੇ-47 ਰਾਈਫਲ ਬਰਾਮਦ ਕੀਤੀ ਗਈ ਸੀ। ਪੁਲਿਸ ਨੇ ਇਹ ਕਾਰਵਾਈ ਅਨੰਤਨਾਗ ਦੇ ਸੰਯੁਕਤ ਪੁੱਛਗਿੱਛ ਕੇਂਦਰ (ਜੇਆਈਸੀ) ਦੀ ਸਹਾਇਤਾ ਨਾਲ ਕੀਤੀ। ਉਸ ਸਮੇਂ, ਅਦੀਲ ਰਾਥਰ ਕਾਲਜ ਵਿੱਚ ਇੱਕ ਸੀਨੀਅਰ ਰੈਜ਼ੀਡੈਂਟ ਡਾਕਟਰ ਵਜੋਂ ਕੰਮ ਕਰ ਰਿਹਾ ਸੀ, ਪਰ ਉਸ ਨੇ 24 ਅਕਤੂਬਰ, 2024 ਨੂੰ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ।
ਜਾਂਚ ਏਜੰਸੀਆਂ ਦਾ ਮੰਨਣਾ ਹੈ ਕਿ ਅਦੀਲ ਤੇ ਉਸਦੇ ਸਾਥੀ ਡਾਕਟਰ ਅੱਤਵਾਦੀ ਸੰਗਠਨ ਅੰਸਾਰ ਗਜ਼ਵਤ-ਉਲ-ਹਿੰਦ ਦੇ ਨੈੱਟਵਰਕ ਨੂੰ ਮੁੜ ਸਰਗਰਮ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਹ ਸੰਗਠਨ 2017 ‘ਚ ਹਿਜ਼ਬੁਲ ਮੁਜਾਹਿਦੀਨ ਦੇ ਸਾਬਕਾ ਕਮਾਂਡਰ ਜ਼ਾਕਿਰ ਮੂਸਾ ਦੁਆਰਾ ਬਣਾਇਆ ਗਿਆ ਸੀ ਤੇ ਇਸ ਦਾ ਉਦੇਸ਼ ਕਸ਼ਮੀਰ ਵਿੱਚ ਸ਼ਰੀਆ ਕਾਨੂੰਨ ਅਧੀਨ ਇੱਕ ਇਸਲਾਮੀ ਰਾਜ ਸਥਾਪਤ ਕਰਨਾ ਤੇ ਭਾਰਤ ਵਿਰੁੱਧ ਜਿਹਾਦ ਛੇੜਨਾ ਹੈ।
ਆਰਡੀਐਕਸ ਕਿੱਥੋਂ ਆਇਆ?
ਪੁਲਿਸ ਇਸ ਸਮੇਂ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਇੰਨੀ ਵੱਡੀ ਮਾਤਰਾ ‘ਚ ਆਰਡੀਐਕਸ ਤੇ ਹਥਿਆਰ ਫਰੀਦਾਬਾਦ ਕਿਵੇਂ ਪਹੁੰਚੇ ਤੇ ਅੱਤਵਾਦੀਆਂ ਨਾਲ ਇਨ੍ਹਾਂ ਡਾਕਟਰਾਂ ਦੀ ਅਸਲ ਭੂਮਿਕਾ ਕੀ ਸੀ। ਅਧਿਕਾਰੀਆਂ ਨੇ ਕਿਹਾ ਕਿ ਮੁੱਢਲੀ ਜਾਂਚ ਤੋਂ ਪਤਾ ਚੱਲਦਾ ਹੈ ਕਿ ਕਈ ਰਾਜਾਂ ‘ਚ ਫੈਲਿਆ ਇੱਕ ਨੈੱਟਵਰਕ ਹੈ ਤੇ ਏਜੰਸੀਆਂ ਕਸ਼ਮੀਰ ਘਾਟੀ, ਉੱਤਰ ਪ੍ਰਦੇਸ਼ ਤੇ ਹਰਿਆਣਾ ਨਾਲ ਇਸ ਦੇ ਸਬੰਧਾਂ ਦਾ ਪਤਾ ਲਗਾ ਰਹੀਆਂ ਹਨ।
