AFG vs SA: T20 World Cup ਇਤਿਹਾਸ ‘ਚ ਪਹਿਲੀ ਵਾਰ ਹੋਇਆ ਅਜਿਹਾ; SA vs AFG ਮੈਚ ‘ਚ ਦੇਖਣ ਨੂੰ ਮਿਲੇ 2 ਸੁਪਰ ਓਵਰ
AFG vs SA, T20 World Cup 2026: ਟੀ-20 ਵਰਲਡ ਕੱਪ 2026 ਵਿੱਚ ਅਹਿਮਦਾਬਾਦ ਦੇ ਮੈਦਾਨ 'ਤੇ ਸਾਊਥ ਅਫ਼ਰੀਕਾ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਖੇਡਿਆ ਗਿਆ ਮੁਕਾਬਲਾ ਕ੍ਰਿਕਟ ਇਤਿਹਾਸ ਦੇ ਸਭ ਤੋਂ ਰੋਮਾਂਚਕ ਮੈਚਾਂ ਵਿੱਚ ਦਰਜ ਹੋ ਗਿਆ ਹੈ। ਇਹ ਮੈਚ ਨਾ ਸਿਰਫ਼ ਟਾਈ ਰਿਹਾ, ਸਗੋਂ ਇਸ ਦਾ ਫ਼ੈਸਲਾ ਕਰਵਾਉਣ ਲਈ ਦੋ ਸੁਪਰ ਓਵਰ ਖੇਡਣੇ ਪਏ।
ਟੀ-20 ਵਰਲਡ ਕੱਪ 2026 ਵਿੱਚ ਅਹਿਮਦਾਬਾਦ ਦੇ ਮੈਦਾਨ ‘ਤੇ ਸਾਊਥ ਅਫ਼ਰੀਕਾ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਖੇਡਿਆ ਗਿਆ ਮੁਕਾਬਲਾ ਕ੍ਰਿਕਟ ਇਤਿਹਾਸ ਦੇ ਸਭ ਤੋਂ ਰੋਮਾਂਚਕ ਮੈਚਾਂ ਵਿੱਚ ਦਰਜ ਹੋ ਗਿਆ ਹੈ। ਇਹ ਮੈਚ ਨਾ ਸਿਰਫ਼ ਟਾਈ ਰਿਹਾ, ਸਗੋਂ ਇਸ ਦਾ ਫ਼ੈਸਲਾ ਕਰਵਾਉਣ ਲਈ ਦੋ ਸੁਪਰ ਓਵਰ ਖੇਡਣੇ ਪਏ। ਟੀ-20 ਵਰਲਡ ਕੱਪ ਦੇ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਇੱਕ ਮੈਚ ਵਿੱਚ ਦੋ ਸੁਪਰ ਓਵਰ ਦੇਖਣ ਨੂੰ ਮਿਲੇ ਹਨ।
ਦੋ ਸੁਪਰ ਓਵਰਾਂ ਦਾ ਪੂਰਾ ਹਾਲ
ਮੁਕਾਬਲੇ ਵਿੱਚ ਸਾਊਥ ਅਫ਼ਰੀਕਾ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 20 ਓਵਰਾਂ ਵਿੱਚ 6 ਵਿਕਟਾਂ ਗੁਆ ਕੇ 187 ਦੌੜਾਂ ਬਣਾਈਆਂ ਸਨ। ਜਵਾਬ ਵਿੱਚ ਅਫ਼ਗਾਨਿਸਤਾਨ ਦੀ ਟੀਮ ਵੀ 20 ਓਵਰਾਂ ਵਿੱਚ 187 ਦੌੜਾਂ ਬਣਾ ਕੇ ਆਲਆਊਟ ਹੋ ਗਈ, ਜਿਸ ਕਾਰਨ ਮੈਚ ਟਾਈ ਹੋ ਗਿਆ।
ਰੋਮਾਂਚ ਉਦੋਂ ਵਧ ਗਿਆ ਜਦੋਂ ਪਹਿਲਾ ਸੁਪਰ ਓਵਰ ਵੀ ਟਾਈ ਰਿਹਾ। ਅਫ਼ਗਾਨਿਸਤਾਨ ਨੇ ਪਹਿਲੇ ਸੁਪਰ ਓਵਰ ਵਿੱਚ 17 ਦੌੜਾਂ ਬਣਾਈਆਂ ਅਤੇ ਸਾਊਥ ਅਫ਼ਰੀਕਾ ਨੇ ਵੀ ਜਵਾਬ ਵਿੱਚ 17 ਦੌੜਾਂ ਹੀ ਬਣਾਈਆਂ। ਇਸ ਤੋਂ ਬਾਅਦ ਮੈਚ ਦੂਜੇ ਸੁਪਰ ਓਵਰ ਵਿੱਚ ਪਹੁੰਚਿਆ। ਇੱਥੇ ਸਾਊਥ ਅਫ਼ਰੀਕਾ ਨੇ ਪਹਿਲਾਂ ਖੇਡਦਿਆਂ 23 ਦੌੜਾਂ ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ। ਅਫ਼ਗਾਨਿਸਤਾਨ ਨੂੰ ਜਿੱਤ ਲਈ 24 ਦੌੜਾਂ ਦੀ ਲੋੜ ਸੀ। ਆਖ਼ਰੀ ਗੇਂਦ ‘ਤੇ 5 ਦੌੜਾਂ ਚਾਹੀਦੀਆਂ ਸਨ, ਪਰ ਗੁਰਬਾਜ਼ ਆਊਟ ਹੋ ਗਏ ਅਤੇ ਸਾਊਥ ਅਫ਼ਰੀਕਾ ਨੇ ਇਹ ਇਤਿਹਾਸਕ ਜਿੱਤ ਆਪਣੇ ਨਾਂ ਕਰ ਲਈ।
ਗੁਰਬਾਜ਼ ਦੀ ਰਿਕਾਰਡ ਤੋੜ ਪਾਰੀ ਗਈ ਅਜਾਈਂ
ਅਫ਼ਗਾਨਿਸਤਾਨ ਲਈ ਸਲਾਮੀ ਬੱਲੇਬਾਜ਼ ਰਹਿਮਾਨੁੱਲ੍ਹਾ ਗੁਰਬਾਜ਼ ਨੇ ਟੀ-20 ਵਰਲਡ ਕੱਪ ਦੀ ਆਪਣੀ ਸਭ ਤੋਂ ਸ਼ਾਨਦਾਰ ਪਾਰੀ ਖੇਡੀ। ਉਨ੍ਹਾਂ ਨੇ ਮਹਿਜ਼ 42 ਗੇਂਦਾਂ ਵਿੱਚ 84 ਦੌੜਾਂ ਜੜੀਆਂ। 200 ਦੀ ਸਟ੍ਰਾਈਕ ਰੇਟ ਨਾਲ ਖੇਡੀ ਗਈ ਇਸ ਪਾਰੀ ਵਿੱਚ 7 ਗਗਨਚੁੰਬੀ ਛੱਕੇ ਸ਼ਾਮਲ ਸਨ। ਉਨ੍ਹਾਂ ਤੋਂ ਇਲਾਵਾ ਰਾਸ਼ਿਦ ਖਾਨ ਅਤੇ ਅਜ਼ਮਤੁੱਲ੍ਹਾ ਜ਼ਜ਼ਈ ਨੇ ਵੀ ਤੇਜ਼ੀ ਨਾਲ ਦੌੜਾਂ ਬਣਾਈਆਂ। ਅਫ਼ਗਾਨਿਸਤਾਨ ਦੀ ਟੀਮ 20ਵਾਂ ਓਵਰ ਖ਼ਤਮ ਹੋਣ ਤੋਂ 2 ਗੇਂਦਾਂ ਪਹਿਲਾਂ ਹੀ ਆਲਆਊਟ ਹੋ ਗਈ, ਪਰ ਉਦੋਂ ਤੱਕ ਉਹ ਸਕੋਰ ਬਰਾਬਰ ਕਰ ਚੁੱਕੀ ਸੀ।
ਡਿਕੌਕ ਅਤੇ ਰਿਕਲਟਨ ਦੇ ਦਮ ‘ਤੇ ਅਫ਼ਰੀਕਾ ਦਾ ਵੱਡਾ ਸਕੋਰ
ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਸਾਊਥ ਅਫ਼ਰੀਕਾ ਦੀ ਟੀਮ ਨੂੰ ਕੁਇੰਟਨ ਡਿਕੌਕ ਅਤੇ ਰਾਇਨ ਰਿਕਲਟਨ ਨੇ ਮਜ਼ਬੂਤ ਸ਼ੁਰੂਆਤ ਦਿੱਤੀ। ਦੋਵਾਂ ਬੱਲੇਬਾਜ਼ਾਂ ਨੇ ਆਪਣੇ-ਆਪਣੇ ਅਰਧ-ਸੈਂਕੜੇ ਪੂਰੇ ਕੀਤੇ। ਡਿਕੌਕ ਨੇ 41 ਗੇਂਦਾਂ ‘ਤੇ 59 ਦੌੜਾਂ ਬਣਾਈਆਂ, ਜਦਕਿ ਰਾਇਨ ਰਿਕਲਟਨ ਨੇ ਤੂਫ਼ਾਨੀ ਬੱਲੇਬਾਜ਼ੀ ਕਰਦਿਆਂ ਸਿਰਫ਼ 28 ਗੇਂਦਾਂ ਵਿੱਚ 217 ਦੀ ਸਟ੍ਰਾਈਕ ਰੇਟ ਨਾਲ 61 ਦੌੜਾਂ ਦੀ ਪਾਰੀ ਖੇਡੀ। ਇਨ੍ਹਾਂ ਦੋਵਾਂ ਦੀਆਂ ਪਾਰੀਆਂ ਸਦਕਾ ਹੀ ਸਾਊਥ ਅਫ਼ਰੀਕਾ 187 ਦੌੜਾਂ ਦੇ ਚੁਣੌਤੀਪੂਰਨ ਸਕੋਰ ਤੱਕ ਪਹੁੰਚ ਸਕਿਆ।
