ਨਹੀਂ ਹੋਈ ਫਾਈਰਿੰਗ… ਨਾ ਦਿਓ ਅਫਵਾਹਾਂ ‘ਤੇ ਧਿਆਨ… ਐਮੀ ਵਿਰਕ ਦੀ ਕਾਰ ‘ਤੇ ਗੋਲੀਬਾਰੀ ਦੀਆਂ ਖ਼ਬਰਾਂ ਨੂੰ ਪਿਤਾ ਨੇ ਨਕਾਰਿਆ
Firing on Ammy Virk Car News: ਖਬਰ ਆਈ ਸੀ ਕਿ ਕੈਨੇਡਾ ਦੇ ਐਬਟਸਫੋਰਡ 'ਚ ਪੰਜਾਬੀ ਗਾਇਕ ਐਮੀ ਵਿਰਕ ਦੇ ਪ੍ਰੋਗਰਾਮ ਤੋਂ ਬਾਅਦ ਉਨ੍ਹਾਂ ਦੇ ਕਾਫ਼ਲੇ 'ਤੇ ਕਥਿਤ ਤੌਰ 'ਤੇ ਫਾਈਰਿੰਗ ਹੋਈ ਹੈ। ਜਾਣਕਾਰੀ ਮੁਤਾਬਕ 5 ਸਤੰਬਰ ਦੀ ਰਾਤ ਰੋਜਰਸ ਫੋਰਮ ਹਾਲ 'ਚ ਐਮੀ ਵਿਰਕ ਦਾ ਪ੍ਰੋਗਰਾਮ ਸੀ। ਪ੍ਰੋਗਰਾਮ ਖ਼ਤਮ ਹੋਣ ਤੋਂ ਬਾਅਦ ਉਹ ਕਾਫ਼ਲੇ ਸਮੇਤ ਸ਼ਹਿਰ ਵੱਲ ਰਵਾਨਾ ਹੋਏ। ਇਸ ਦੌਰਾਨ ਕਾਫ਼ਲੇ 'ਚ ਸ਼ਾਮਲ ਇੱਕ ਰੋਲਸ ਰੌਇਸ 'ਤੇ ਕਈ ਗੋਲੀਆਂ ਚਲਾਈਆਂ ਗਈਆਂ। ਪਰ ਹੁਣ ਵਿਰਕ ਦੇ ਪਿਤਾ ਨੇ ਇਸ ਖਬਰ ਦਾ ਖੰਡਨ ਕੀਤਾ ਹੈ।
ਪ੍ਰਸਿੱਧ ਪੰਜਾਬੀ ਗਾਇਕ ਅਤੇ ਫਿਲਮ ਅਦਾਕਾਰ ਐਮੀ ਵਿਰਕ ਦੇ ਪਿਤਾ ਨੇ ਕੈਨੇਡਾ ਵਿੱਚ ਉਨ੍ਹਾਂ ਦੀ ਕਾਰ ‘ਤੇ ਫਾਈਰਿੰਗ ਦੀਆਂ ਰਿਪੋਰਟਾਂ ਨੂੰ ਝੂਠਾ ਕਰਾਰ ਦਿੱਤਾ ਹੈ। ਨਾਭਾ ਤਹਿਸੀਲ ਦੇ ਪਿੰਡ ਲੋਹਰਮਾਜਰਾ ਦੇ ਸਰਪੰਚ ਅਤੇ ਐਕਟਰ ਦੇ ਪਿਤਾ ਕੁਲਜੀਤ ਸਿੰਘ ਨੇ ਪੱਤਰਕਾਰਾਂ ਨੂੰ ਫ਼ੋਨ ‘ਤੇ ਦੱਸਿਆ ਕਿ ਐਮੀ ਵਿਰਕ ਦੀ ਕਾਰ ‘ਤੇ ਕਥਿਤ ਗੋਲੀਬਾਰੀ ਸਿਰਫ਼ ਇੱਕ ਅਫਵਾਹ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਅੱਜ ਸਵੇਰੇ ਵਿਰਕ ਨਾਲ ਗੱਲ ਕੀਤੀ ਅਤੇ ਉਹ ਟੋਰਾਂਟੋ, ਕੈਨੇਡਾ ਵਿੱਚ ਆਪਣੇ ਘਰ ਵਿੱਚ ਬਿਲਕੁਲ ਠੀਕ ਅਤੇ ਸੁਰੱਖਿਅਤ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਕੈਨੇਡਾ ਵਿੱਚ ਫਾਈਰਿੰਗ ਹੋਣਾ ਆਮ ਗੱਲ ਹੈ। ਪਰ, ਐਮੀ ਵਿਰਕ ਦੀ ਕਾਰ ‘ਤੇ ਕੋਈ ਗੋਲੀਬਾਰੀ ਨਹੀਂ ਹੋਈ। ਵਿਰਕ ਦਾ 5 ਸਤੰਬਰ ਨੂੰ ਕੈਨੇਡਾ ਵਿੱਚ ਇੱਕ ਸ਼ੋਅ ਸੀ ਅਤੇ ਉਦੋਂ ਤੋਂ ਉਹ ਘਰ ਵਿੱਚ ਸੁਰੱਖਿਅਤ ਹੈ।
ਕੈਨੇਡਾ ਵਿੱਚ ਫਾਈਰਿੰਗ ਦੀ ਆਈ ਸੀ ਖਬਰ
ਇਹ ਰਿਪੋਰਟ ਮਿਲੀ ਸੀ ਕਿ ਪੰਜਾਬੀ ਸੰਗੀਤ ਅਤੇ ਫਿਲਮ ਇੰਡਸਟਰੀ ਦੇ ਮਸ਼ਹੂਰ ਗਾਇਕ ਅਤੇ ਅਦਾਕਾਰ ਐਮੀ ਵਿਰਕ ਦੇ ਕਾਫਲੇ ‘ਤੇ ਕੈਨੇਡਾ ਦੇ ਐਬਟਸਫੋਰਡ ਵਿੱਚ ਗੋਲੀਬਾਰੀ ਕੀਤੀ ਗਈ ਸੀ।
5 ਸਤੰਬਰ ਦੀ ਰਾਤ ਨੂੰ “ਯੂਨਿਟੀ ਟੂਰ” ਕੰਸਰਟ ਤੋਂ ਬਾਅਦ ਮੈਕਕੈਲਮ ਰੋਡ ‘ਤੇ ਵਾਪਰੀ ਇਸ ਘਟਨਾ ਵਿੱਚ, ਹਮਲਾਵਰਾਂ ਨੇ ਕਾਫਲੇ ਵਿੱਚ ਇੱਕ ਲਗਜ਼ਰੀ ਗੱਡੀ ‘ਤੇ ਲਗਭਗ ਸੱਤ ਗੋਲੀਆਂ ਚਲਾਈਆਂ। ਐਮੀ ਵਿਰਕ ਅਤੇ ਹੋਰ ਸਵਾਰ ਵਾਲ-ਵਾਲ ਬਚ ਗਏ ਕਿਉਂਕਿ ਗੱਡੀ ਬੁਲੇਟਪਰੂਫ ਸੀ।
ਪੁਲਿਸ ਨੇ ਕੀਤੀ ਫਾਈਰਿੰਗ ਦੀ ਪੁਸ਼ਟੀ
ਐਬਟਸਫੋਰਡ ਪੁਲਿਸ ਨੇ ਮੈਕਕਲਮ ਰੋਡ ਦੇ 2500-ਬਲਾਕ ‘ਚ ਹੋਈ ਫਾਈਰਿੰਗ ਦੀ ਤਸਦੀਕ ਕੀਤੀ ਹੈ। ਪੁਲਿਸ ਮੁਤਾਬਕ ਰਾਤ ਕਰੀਬ 11 ਵਜੇ ਤੋਂ ਬਾਅਦ ਇੱਕ ਐਸਯੂਵੀ ‘ਚ ਸਵਾਰ ਲੋਕਾਂ ਨੇ ਇੱਕ ਕਿਸੇ ਵਾਹਨ ‘ਤੇ ਕਈ ਗੋਲੀਆਂ ਚਲਾਈਆਂ। ਇਸ ਘਟਨਾ ‘ਚ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਸੂਚਨਾ ਨਹੀਂ ਹੈ। ਹਾਲਾਂਕਿ, ਪੁਲਿਸ ਨੇ ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਮੁਲਜ਼ਮਾਂ ਦਾ ਨਿਸ਼ਾਨਾ ਕੌਣ ਸੀ ਤੇ ਐਮੀ ਵਿਰਕ ਉਸ ਵਾਹਨ ‘ਚ ਮੌਜੂਦ ਸਨ ਜਾਂ ਨਹੀਂ।
View this post on Instagram
ਫਾਈਰਿੰਗ ਤੋਂ ਬਾਅਦ SUV ਨੂੰ ਲਗਾਈ ਅੱਗ
ਫਾਈਰਿੰਗ ਦੀ ਘਟਨਾ ਤੋਂ ਕੁਝ ਸਮੇਂ ਬਾਅਦ ਸਨੀਸਾਈਡ ਪਲੇਸ ਦੇ 2400-ਬਲਾਕ ‘ਚ ਇੱਕ ਐਸਯੂਵਨੀ ਨੂੰ ਅੱਗ ਲਗਾਏ ਜਾਣ ਦੀ ਸੂਚਨਾ ਪੁਲਿਸ ਨੂੰ ਮਿਲੀ। ਮੌਕੇ ‘ਤੇ ਪਹੁੰਚੀ ਪੁਲਿਸ ਨੇ ਵਾਹਨ ਨੂੰ ਪੂਰੀ ਤਰ੍ਹਾਂ ਸੜੀ ਹੋਈ ਹਾਲਤ ‘ਚ ਬਰਾਮਦ ਕੀਤਾ। ਹੁਣ ਜਾਂਚਕਰਤਾ ਇਹ ਪਤਾ ਲਗਾ ਰਹੇ ਹਨ ਕਿ ਸੜੀ ਹੋਈ ਐਸਯੂਵਨੀ ਦਾ ਗੋਲੀਬਾਰੀ ਦੀ ਘਟਨਾ ਨਾਲ ਕੋਈ ਸਬੰਧ ਹੈ ਜਾਂ ਨਹੀਂ। ਪੁਲਿਸ ਵੱਲੋਂ ਦੋਵੇਂ ਘਟਨਾਵਾਂ ਨੂੰ ਜੋੜ ਕੇ ਵੀ ਜਾਂਚ ਕੀਤੀ ਜਾ ਰਹੀ ਹੈ।
