ਦੇਸ਼ ਵਿੱਚ ਦੁਗਣੀ ਤੇਜੀ ਨਾਲ ਫੈਲ ਰਿਹਾ ਬ੍ਰੈਸਟ ਕੈਂਸਰ, 2050 ਤੱਕ ਇੰਨੀਆਂ ਔਰਤਾਂ ਹੋ ਸਕਦੀਆਂ ਹਨ ਸ਼ਿਕਾਰ

ਭਾਰਤ ਵਿੱਚ ਔਰਤਾਂ ਲਈ ਬ੍ਰੈਸਟ ਕੈਂਸਰ ਵੱਡੀ ਚਿੰਤਾ ਬਣਦਾ ਜਾ ਰਿਹਾ ਹੈ। ਇਸ ਕੈਂਸਰ ਦੇ ਮਾਮਲੇ ਦੇਸ਼ ਵਿੱਚ ਦੁਗਣੇ ਹੋਣ ਦੀ ਦਰ ਨਾਲ ਵੱਧ ਰਹੇ ਹਨ। ਹਾਲ ਹੀ ਵਿੱਚ ਪ੍ਰਕਾਸ਼ਿਤ ਇੱਕ ਅੰਤਰਰਾਸ਼ਟਰੀ ਅਧਿਐਨ ਦੇ ਅਨੁਸਾਰ, ਪਿਛਲੇ ਤਿੰਨ ਦਹਾਕਿਆਂ ਵਿੱਚ ਦੇਸ਼ ਵਿੱਚ ਬ੍ਰੈਸਟ ਕੈਂਸਰ ਦੀ ਦਰ ਦੁਗਣੀ ਤੋਂ ਵੀ ਵੱਧ ਹੋ ਗਈ ਹੈ। ਛੋਟੀ ਉਮਰ ਦੀਆਂ ਔਰਤਾਂ ਨੂੰ ਵੀ ਬ੍ਰੈਸਟ ਕੈਂਸਰ ਹੋ ਰਿਹਾ ਹੈ। ਜੇਕਰ ਇਸ ਦਰ ਨਾਲ ਕੇਸ ਵਧਦੇ ਰਹੇ, ਤਾਂ 2050 ਤੱਕ ਭਾਰਤ ਵਿੱਚ ਲਗਭਗ 4.5 ਮਿਲੀਅਨ ਔਰਤਾਂ ਇਸ ਕੈਂਸਰ ਤੋਂ ਪ੍ਰਭਾਵਿਤ ਹੋ ਜਾਣਗੀਆਂ।

ਇਸ ਰਿਸਰਚ ਨੂੰ ਲੈਂਸੇਟ ਓਨਕੋਲੋਜੀ ਵਿੱਚ ਪ੍ਰਕਾਸ਼ਿਤ ਕੀਤਾ ਗਿਆ ਹੈ। ਸਟਡੀ ਮੁਤਾਬਕ, 1990 ਵਿੱਚ, ਭਾਰਤ ਵਿੱਚ ਪ੍ਰਤੀ 100,000 ਔਰਤਾਂ ਵਿੱਚ ਬ੍ਰੈਸਟ ਕੈਂਸਰ ਦੇ 13 ਮਾਮਲੇ ਸਨ। 2024 ਵਿੱਚ, ਇਹ ਗਿਣਤੀ ਪ੍ਰਤੀ 100,000 ਔਰਤਾਂ ਵਿੱਚ 29.4 ਕੇਸਾਂ ਤੱਕ ਵਧ ਗਈ ਹੈ, ਜਿਸਦਾ ਅਰਥ ਹੈ ਕਿ ਕੈਂਸਰ ਦੇ ਮਾਮਲੇ ਦੁਗਣੇ ਤੋਂ ਵੱਧ ਹੋ ਗਏ ਹਨ।

ਛੋਟੀ ਉਮਰ ਦੀਆਂ ਔਰਤਾਂ ਵਿੱਚ ਵੀ ਵੱਧ ਮਾਮਲੇ

ਅਧਿਐਨ ਦੇ ਅਨੁਸਾਰ, 2023 ਵਿੱਚ 55 ਸਾਲ ਤੋਂ ਵੱਧ ਉਮਰ ਦੀਆਂ ਔਰਤਾਂ ਵਿੱਚ ਬ੍ਰੈਸਟ ਕੈਂਸਰ ਦੇ ਮਾਮਲੇ ਵਧੇਰੇ ਆਮ ਹਨ। ਇਸ ਉਮਰ ਸਮੂਹ ਵਿੱਚ ਪ੍ਰਤੀ 100,000 ਔਰਤਾਂ ਵਿੱਚ ਲਗਭਗ 161 ਕੇਸ ਦਰਜ ਕੀਤੇ ਗਏ ਸਨ। ਖੋਜ ਵਿੱਚ ਇਹ ਵੀ ਖੁਲਾਸਾ ਹੋਇਆ ਹੈ ਕਿ 1990 ਤੋਂ ਬਾਅਦ 20 ਤੋਂ 54 ਸਾਲ ਦੀ ਉਮਰ ਦੀਆਂ ਔਰਤਾਂ ਵਿੱਚ ਕੈਂਸਰ ਦੇ ਮਾਮਲਿਆਂ ਵਿੱਚ ਲਗਭਗ 30 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਬ੍ਰੈਸਟ ਕੈਂਸਰ 20 ਤੋਂ 54 ਸਾਲ ਦੀ ਉਮਰ ਦੀਆਂ ਔਰਤਾਂ ਨੂੰ ਤੇਜੀ ਨਾਲ ਆਪਣਾ ਸ਼ਿਕਾਰ ਬਣਾ ਰਿਹਾ ਹੈ। ਕੁਝ ਦਹਾਕੇ ਪਹਿਲਾਂ ਤੱਕ, 60 ਸਾਲ ਦੀ ਉਮਰ ਤੋਂ ਬਾਅਦ ਬ੍ਰੈਸਟ ਕੈਂਸਰ ਦੇ ਮਾਮਲੇ ਵਧੇਰੇ ਆਮ ਸਨ।

ਇਨ੍ਹਾਂ ਕਾਰਨਾਂ ਕਰਕੇ ਔਰਤਾਂ ਨੂੰ ਹੋ ਰਿਹਾ ਬ੍ਰੈਸਟ ਕੈਂਸਰ

ਰਿਸਰਚ ਵਿੱਚ ਇਹ ਵੀ ਪਤਾ ਲੱਗਾ ਹੈ ਕਿ ਔਰਤਾਂ ਵਿੱਚ ਬ੍ਰੈਸਟ ਕੈਂਸਰ ਦੇ ਮੁੱਖ ਕਾਰਨਾਂ ਦਾ ਵੀ ਖੁਲਾਸਾ ਕੀਤਾ ਹੈ। ਖੋਜ ਵਿੱਚ ਦੱਸਿਆ ਗਿਆ ਹੈ ਕਿ ਤੰਬਾਕੂ ਦੀ ਵਰਤੋਂ, ਜਿਵੇਂ ਕਿ ਸਿਗਰਟ ਪੀਣਾ, ਬਲੱਡ ਸ਼ੂਗਰ ਵਿੱਚ ਵਾਧਾ, ਮੋਟਾਪਾ, ਫਾਸਟ ਫੂਡ, ਰੈੱਡ ਮੀਟ ਦੀ ਬਹੁਤ ਜ਼ਿਆਦਾ ਵਰਤੋਂ ਅਤੇ ਮਾੜੀ ਜੀਵਨ ਸ਼ੈਲੀ ਔਰਤਾਂ ਵਿੱਚ ਬ੍ਰੈਸਟ ਕੈਂਸਰ ਦੇ ਮੁੱਖ ਕਾਰਨ ਹਨ। ਖੋਜ ਵਿੱਚ ਸ਼ਾਮਲ ਇੱਕ ਓਨਕੋਲੋਜਿਸਟ ਡਾ. ਡੀਨੂ ਅਲਫੋਰਡ ਦੇ ਅਨੁਸਾਰ, ਇਹ ਮੁੱਦੇ ਚਿੰਤਾਵਾਂ ਵਧਾ ਰਹੇ ਹਨ। ਇਸ ਲਈ, ਬ੍ਰੈਸਟ ਕੈਂਸਰ ਨੂੰ ਰੋਕਣ ਲਈ ਕਦਮ ਚੁੱਕਣਾ ਜਰੂਰੀ ਹੈ।

ਬ੍ਰੈਸਟ ਕੈਂਸਰ ਦੇ ਬਚਾਅ ਲਈ ਕੀ ਕਰੀਏ:

• 20 ਸਾਲ ਦੀ ਉਮਰ ਤੋਂ ਬਾਅਦ ਬ੍ਰੈਸਟ ਕੈਂਸਰ ਦੀ ਜਾਂਚ ਕਰਵਾਓ।
• ਰੋਜ਼ਾਨਾ ਕਸਰਤ ਕਰੋ
• ਆਪਣੀ ਖੁਰਾਕ ਦਾ ਧਿਆਨ ਰੱਖੋ
• ਤੰਬਾਕੂ ਦੇ ਸੇਵਨ ਤੋਂ ਬਚੋ।