ਈਦ ‘ਤੇ ਖਾ ਲਏ ਏਨੇ ਗੋਲਗੱਪੇ ਕਿ ਹਸਪਤਾਲ ਚ ਭਰਤੀ ਹੋ ਗਏ 213 ਬੰਗਲਾਦੇਸ਼ੀ, 14 ਦੀ ਹਾਲਤ ਗੰਭੀਰ
Bangladesh : ਬੰਗਲਾਦੇਸ਼ ਦੇ ਅਭਿਹੈਅਨਗਰ ਵਿੱਚ ਈਦ ਮੇਲੇ ਵਿੱਚ ਗੋਲਗੱਪੇ ਖਾਣ ਤੋਂ ਬਾਅਦ 213 ਲੋਕ ਬਿਮਾਰ ਹੋ ਗਏ ਹਨ, ਜਿਨ੍ਹਾਂ ਵਿੱਚੋਂ 14 ਦੀ ਹਾਲਤ ਗੰਭੀਰ ਹੈ। ਫੰਗਲ ਇਨਫੈਕਸ਼ਨ ਕਾਰਨ ਹੋਣ ਵਾਲੇ ਇਸ ਫੂਡ ਪੋਇਜ਼ਨਿੰਗ ਤੋਂ ਪੀੜਤ ਲੋਕਾਂ ਨੂੰ ਪੇਟ ਦਰਦ, ਉਲਟੀਆਂ ਅਤੇ ਦਸਤ ਦੀ ਸ਼ਿਕਾਇਤ ਕਰਦੇ ਹੈ। ਜ਼ਿਆਦਾਤਰ ਮਰੀਜ਼ ਅਭਿਹੈਅਨਗਰ ਹਸਪਤਾਲ ਵਿੱਚ ਦਾਖਲ ਹਨ, ਜਦੋਂ ਕਿ ਗੰਭੀਰ ਮਰੀਜ਼ਾਂ ਨੂੰ ਖੁਲਨਾ ਮੈਡੀਕਲ ਕਾਲਜ ਰੈਫਰ ਕੀਤਾ ਗਿਆ ਹੈ। ਫਿਲਹਾਲ ਗੋਲਗੱਪਾ ਵੇਚਣ ਵਾਲਾ ਮੌਕੇ ਤੋਂ ਫਰਾਰ ਹੋ ਗਿਆ ਹੈ।
ਬੰਗਲਾਦੇਸ਼ ਦੇ ਇੱਕ ਜ਼ਿਲ੍ਹੇ ਵਿੱਚ ਈਦ ਦੇ ਮੌਕੇ ‘ਤੇ ਲਗਾਏ ਗਏ ਮੇਲੇ ਵਿੱਚ ਗੋਲਗੱਪੇ ਖਾਣ ਤੋਂ ਬਾਅਦ 213 ਲੋਕ ਬਿਮਾਰ ਹੋ ਗਏ, ਜਿਨ੍ਹਾਂ ਵਿੱਚੋਂ 14 ਦੀ ਹਾਲਤ ਗੰਭੀਰ ਹੈ। ਇਹ ਘਟਨਾ ਅਭਿਹੈਅਨਗਰ ਉਪਜਿਲ੍ਹੇ ਦੇ ਦੱਖਣ ਦਿਆਪਾਰਾ ਪਿੰਡ ਵਿੱਚ ਵਾਪਰੀ, ਜਿੱਥੇ ਈਦ ਮੇਲੇ ਵਿੱਚ ਇੱਕ ਸਟਾਲ ਤੋਂ ਗੋਲਗੱਪੇ ਖਾਣ ਤੋਂ ਬਾਅਦ ਲੋਕਾਂ ਨੇ ਪੇਟ ਦਰਦ, ਉਲਟੀਆਂ, ਦਸਤ ਅਤੇ ਬੁਖਾਰ ਦੀ ਸ਼ਿਕਾਇਤ ਕੀਤੀ। ਡਾਕਟਰਾਂ ਅਨੁਸਾਰ ਇਹ ਫੂਡ ਪੋਇਜ਼ਨਿੰਗ ਫੰਗਸ ਇਨਫੈਕਸ਼ਨ ਕਾਰਨ ਹੋਈ ਹੈ।
ਈਦ ਦੇ ਮੌਕੇ ‘ਤੇ, ਦੱਖਣ ਦਿਆਪਾਰਾ ਸਰਕਾਰੀ ਪ੍ਰਾਇਮਰੀ ਸਕੂਲ ਦੇ ਮੈਦਾਨ ਵਿੱਚ ਚਾਰ ਦਿਨਾਂ ਮੇਲਾ ਲਗਾਇਆ ਗਿਆ ਸੀ। ਈਦ ਵਾਲੇ ਦਿਨ ਦੁਪਹਿਰ ਤੋਂ ਲੈ ਕੇ ਦੇਰ ਰਾਤ ਤੱਕ ਹਜ਼ਾਰਾਂ ਲੋਕ ਇੱਥੇ ਪਹੁੰਚੇ ਅਤੇ ਕਈ ਦੁਕਾਨਾਂ ਤੋਂ ਖਾਣ-ਪੀਣ ਦੀਆਂ ਚੀਜ਼ਾਂ ਖਾਧੀਆਂ। ਇਸ ਦੌਰਾਨ, ਰੂਪਾਡੀਆ ਇਲਾਕੇ ਦੇ ਫੁਚਕਾ ਵੇਚਣ ਵਾਲੇ ਮੋਨੀਰ ਹੁਸੈਨ ਦੇ ਸਟਾਲ ਤੋਂ ਗੋਲਗੱਪੇ ਖਾਣ ਤੋਂ ਬਾਅਦ ਲੋਕ ਬਿਮਾਰ ਹੋਣ ਲੱਗ ਪਏ। ਪਹਿਲਾਂ ਪੇਟ ਦਰਦ ਅਤੇ ਉਲਟੀਆਂ ਦੀਆਂ ਸ਼ਿਕਾਇਤਾਂ ਆਈਆਂ, ਫਿਰ ਹਾਲਤ ਵਿਗੜਨ ਲੱਗੀ।
213 ਲੋਕ ਹਸਪਤਾਲ ਵਿੱਚ ਦਾਖਲ
ਅਭਿਹੈਅਨਗਰ ਉਪਜਿਲਾ ਸਿਹਤ ਅਧਿਕਾਰੀ ਡਾ. ਅਲੀਮੂਰ ਰਾਜੀਬ ਦੇ ਅਨੁਸਾਰ, 213 ਮਰੀਜ਼ਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ, ਜਿਨ੍ਹਾਂ ਵਿੱਚੋਂ 53 ਨੂੰ ਦਵਾਈ ਦੇ ਕੇ ਘਰ ਭੇਜ ਦਿੱਤਾ ਗਿਆ, ਜਦੋਂ ਕਿ 146 ਲੋਕ ਅਜੇ ਵੀ ਹਸਪਤਾਲ ਵਿੱਚ ਦਾਖਲ ਹਨ। 14 ਮਰੀਜ਼ਾਂ ਦੀ ਹਾਲਤ ਨਾਜ਼ੁਕ ਹੋਣ ਕਾਰਨ ਉਨ੍ਹਾਂ ਨੂੰ ਖੁਲਨਾ ਮੈਡੀਕਲ ਕਾਲਜ ਹਸਪਤਾਲ ਰੈਫਰ ਕੀਤਾ ਗਿਆ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਇਹ ਫੰਗਲ ਇਨਫੈਕਸ਼ਨ ਕਾਰਨ ਹੋਇਆ ਹੈ, ਜਿਸ ਨਾਲ ਵੱਡੀ ਗਿਣਤੀ ਵਿੱਚ ਲੋਕ ਪ੍ਰਭਾਵਿਤ ਹੋਏ।
ਕਈ ਲੋਕਾਂ ਦੀ ਹਾਲਤ ਗੰਭੀਰ
ਪ੍ਰੋਫੈਸਰਪਾਰਾ ਦੇ ਅਬਦੁਲ ਰਉਫ ਗਾਜ਼ੀ ਨੇ ਕਿਹਾ ਕਿ ਉਹ ਆਪਣੀ ਮਾਂ, ਪਤਨੀ ਅਤੇ ਬੱਚਿਆਂ ਨਾਲ ਮੇਲੇ ਵਿੱਚ ਗਿਆ ਸੀ। ਉਸਦੇ ਪਰਿਵਾਰ ਦੇ ਪੰਜ ਮੈਂਬਰਾਂ ਨੇ ਫੁਚਕਾ ਖਾਧਾ ਅਤੇ ਕੁਝ ਘੰਟਿਆਂ ਵਿੱਚ ਹੀ ਉਨ੍ਹਾਂ ਦੀ ਸਿਹਤ ਵਿਗੜ ਗਈ। ਉਸਨੂੰ ਪਹਿਲਾਂ ਅਭਿਹੈਅਨਗਰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ, ਫਿਰ ਖੁਲਨਾ ਸਿਟੀ ਮੈਡੀਕਲ ਕਾਲਜ ਹਸਪਤਾਲ ਵਿੱਚ ਸ਼ਿਫਟ ਕਰ ਦਿੱਤਾ ਗਿਆ। ਇਸੇ ਤਰ੍ਹਾਂ, ਬੁਇਕਰਾ ਪਿੰਡ ਦੇ ਮੋਹਿਨੂਰ ਇਸਲਾਮ ਅਤੇ ਉਸਦੇ ਪਰਿਵਾਰ ਦੇ ਤਿੰਨ ਹੋਰ ਮੈਂਬਰ ਵੀ ਬਿਮਾਰ ਹੋ ਗਏ ਅਤੇ ਉਨ੍ਹਾਂ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ।
ਘਟਨਾ ਤੋਂ ਬਾਅਦ, ਗੋਲਗੱਪਾ ਵੇਚਣ ਵਾਲਾ ਮੋਨੀਰ ਹੁਸੈਨ ਸਟਾਲ ਛੱਡ ਕੇ ਭੱਜ ਗਿਆ। ਅਭਿਹੈਅਨਗਰ ਪੁਲਿਸ ਸਟੇਸ਼ਨ ਦੇ ਇੰਚਾਰਜ ਅਬਦੁਲ ਅਲੀਮ ਨੇ ਕਿਹਾ ਕਿ ਹੁਣ ਤੱਕ ਕਿਸੇ ਨੇ ਵੀ ਅਧਿਕਾਰਤ ਸ਼ਿਕਾਇਤ ਦਰਜ ਨਹੀਂ ਕਰਵਾਈ ਹੈ ਪਰ ਜੇਕਰ ਕੋਈ ਸ਼ਿਕਾਇਤ ਆਉਂਦੀ ਹੈ ਤਾਂ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
