ਲੁਧਿਆਣਾ ਜੇਲ੍ਹ ‘ਚ ਨਸ਼ਾ ਸਪਲਾਈ ਰੈਕੇਟ ਦਾ ਪਰਦਾਫਾਸ਼, ਮੈਡਿਕਲ ਅਫ਼ਸਰ ਤੇ ਟੈਕਨੀਸ਼ੀਅਨ ਗ੍ਰਿਫ਼ਤਾਰ

ਲੁਧਿਆਣਾ ‘ਚ ਸੈਂਟ੍ਰਲ ਜੇਲ੍ਹ ‘ਚ ਤੈਨਾਤ ਇੱਕ ਮੈਡਿਕਲ ਅਧਿਕਾਰੀ ਤੇ ਇੱਕ ਟੈਕਨੀਸ਼ੀਅਨ ਨੂੰ ਪੁਲਿਸ ਨੇ ਬੁੱਧਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਇਲਜ਼ਾਮ ਹੈ ਕਿ ਦੋਵੇਂ ਜੇਲ੍ਹ ਅੰਦਰ ਹਵਾਲਾਤੀਆਂ ਦੀ ਮਦਦ ਨਾਲ ਨਸ਼ਾ ਸਪਲਾਈ ਦਾ ਰੈਕੇਟ ਚਲਾ ਰਹੇ ਸਨ। ਇਸ ਤੇ ਬਦਲੇ ਉਹ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਤੋਂ ਯੂਪੀਆਈ ਜਰੀਏ ਪੈਸੇ ਵਸੂਲਦੇ ਸਨ। ਥਾਣਾ ਡਿਵੀਜ਼ਨ ਨੰਬਰ-7 ਦੀ ਪੁਲਿਸ ਹੁਣ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਇਸ ਗ੍ਰਿਫ਼ਤਾਰੀ ਤੋਂ ਬਾਅਦ ਜੇਲ੍ਹ ਦਾ ਅੱਧਾ ਮੈਡਿਕਲ ਸਟਾਫ਼ ਫ਼ਰਾਰ ਦੱਸਿਆ ਜਾ ਰਿਹਾ ਹੈ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਹਿਚਾਣ ਡਾ. ਪ੍ਰਿੰਸ (ਮੈਡਿਕਲ ਅਫ਼ਸਰ) ਤੇ ਜਸਪਾਲ ਸ਼ਰਮਾ (ਟੀਵੀ ਟੈਕਨੀਸ਼ੀਅਨ) ਵਜੋਂ ਹੋਈ ਹੈ। ਇਹ ਕਾਰਵਾਈ ਇੱਕ ਮਹੀਨੇ ਦੀ ਜਾਂਚ ਤੋਂ ਬਾਅਦ ਕੀਤੀ ਗਈ ਹੈ। ਜਾਂਚ ਅਧਿਕਾਰੀ ਏਐਸਆਈ ਦਿਨੇਸ਼ ਕੁਮਾਰ ਮੁਤਾਬਕ, 27 ਅਕਤੂਬਰ ਨੂੰ ਜੇਲ੍ਹ ਸਟਾਫ਼ ਨੇ ਹਵਾਲਾਤੀਆਂ ਤੋਂ 117 ਨਸ਼ੀਲੇ ਕੈਪਸੂਲ ਤੇ ਤਿੰਨ ਮੋਬਾਇਲ ਫੋਨ ਬਰਾਮਦ ਕੀਤੇ ਸਨ। ਇਸ ਤੋਂ ਬਾਅਦ ਡਿਪਟੀ ਸੁਪਰਡੈਂਟ ਜਗਜੀਤ ਸਿੰਘ ਦੀ ਸ਼ਿਕਾਇਤ ‘ਤੇ ਐਨਡੀਪੀਐਸ ਐਕਟ ਦੀ ਧਾਰਾ 21 ਤੇ ਜੇਲ੍ਹ ਐਕਟ ਤੀ ਧਾਰਾ 52(A)(1) ਤਹਿਤ ਐਫਆਈਆਰ ਦਰਜ ਕੀਤੀ ਗਈ ਸੀ।

ਪੁਲਿਸ ਨੇ ਹਵਾਲਾਤੀ ਰਵੀ ਕੁਮਾਰ, ਅਮਨਦੀਪ ਕੁਮਾਰ, ਅਜੇ ਕੁਮਾਰ, ਉਬੈਦ ਮਸੀਹ ਤੇ ਗੁਲਸ਼ਨ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਹਵਾਲਾਤੀਆਂ ਤੋਂ ਪੁੱਛਗਿੱਛ ਦੌਰਾਨ ਡਾ. ਪ੍ਰਿੰਸ ਤੇ ਟੈਕਨੀਸ਼ੀਅਨ ਜਸਪਾਲ ਸ਼ਰਮਾ ਦਾ ਨਾਮ ਸਾਹਮਣੇ ਆਇਆ ਸੀ। ਪੁਲਿਸ ਨੇ ਦੋਵਾਂ ‘ਤੇ ਨਿਗਰਾਨੀ ਰੱਖਦੇ ਹੋਏ, ਉਨ੍ਹਾਂ ਬੁੱਧਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।

ਇਲਜ਼ਾਮ ਹੈ ਕਿ ਦੋਵੇਂ ਹਵਾਲਾਤੀਆਂ ਨੂੰ ਨਸ਼ਾ ਪਹੁੰਚਾਉਣ ਦੇ ਬਦਲੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਤੋਂ ਪੈਸੇ ਵਸੂਲਦੇ ਸਨ ਤੇ ਕਈ ਵਾਰ ਇਲਾਜ਼ ‘ਤੇ ਉਨ੍ਹਾਂ ਨੂੰ ਸਿਵਲ ਹਸਪਤਾਲ ਰੈਫਰ ਕਰ ਕੇ ਪੈਸੇ ਵਸੂਲਦੇ ਹਨ। ਜਾਂਚ ਅਧਿਕਾਰੀ ਨੇ ਦੱਸਿਆ ਕਿ ਮੁਲਜ਼ਮਾਂ ਦੇ ਬੈਂਕ ਖਾਤਿਆਂ ‘ਚੋਂ ਸ਼ੱਕੀ ਲੈਣ-ਦੇਣ ਮਿਲੇ ਹਨ। ਜਾਂਚ ਦੇ ਦੌਰਾਨ ਹੋਰ ਲੋਕਾਂ ਦੇ ਵੀ ਇਸ ਮਾਮਲੇ ‘ਚ ਸ਼ਾਮਲ ਹੋਣ ਦਾ ਸ਼ੱਕ ਹੈ।