ਟਰੰਪ ਦੇ ਟੈਲੀਪ੍ਰੋਂਪਟਰ ਆਪਰੇਟਰ ਨੂੰ ਛੁੱਟੀ ‘ਤੇ ਭੇਜਿਆ ਗਿਆ, ਰਾਸ਼ਟਰਪਤੀ ਦੇ ਭਾਸ਼ਣਾਂ ‘ਤੇ ਲਗਾਇਆ ਸੀ ਸੱਟਾ!

ਵੀਰਵਾਰ, 16 ਜੁਲਾਈ ਨੂੰ ਵ੍ਹਾਈਟ ਹਾਊਸ ਵੱਲੋਂ ਦੱਸਿਆ ਗਿਆ ਕਿ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਟੈਲੀਪ੍ਰੋਂਪਟਰ ਆਪਰੇਟਰ ਨੂੰ ਬਿਨਾਂ ਤਨਖਾਹ ਦੀ ਛੁੱਟੀ ‘ਤੇ ਭੇਜ ਦਿੱਤਾ ਗਿਆ ਹੈ। ਉਸ ‘ਤੇ ਇਲਜ਼ਾਮ ਹੈ ਕਿ ਉਸ ਨੇ ਔਨਲਾਈਨ ਪ੍ਰਡਿਕਸ਼ਨ ਮਾਰਕੀਟ ‘ਕਾਲਸ਼ੀ’ ਰਾਹੀਂ ਰਾਸ਼ਟਰਪਤੀ ਦੇ ਭਾਸ਼ਣਾਂ ‘ਤੇ ਸੱਟਾ ਲਗਾਉਣ ਲਈ ਅੰਦਰੂਨੀ ਵ੍ਹਾਈਟ ਹਾਊਸ ਦੀ ਜਾਣਕਾਰੀ ਦੀ ਵਰਤੋਂ ਕੀਤੀ।

ਕੰਪਨੀ ਦੇ ਇਨਫੋਰਸਮੈਂਟ ਮੁਖੀ ਨੇ ਕਿਹਾ ਕਿ ਕਾਲਸ਼ੀ ਨੇ ਇਸ ਮਾਮਲੇ ਸੰਬੰਧੀ ਫੈਡਰਲ ਰੈਗੂਲੇਟਰਾਂ ਨਾਲ ਸੰਪਰਕ ਕੀਤਾ ਸੀ। ਕਾਲਸ਼ੀ ਨੇ ਅਧਿਕਾਰੀਆਂ ਨੂੰ ਰਾਸ਼ਟਰਪਤੀ ਦੇ ਜਨਤਕ ਭਾਸ਼ਣਾਂ ‘ਚ ਜ਼ਿਕਰ ਕੀਤੇ ਜਾਣ ਵਾਲੇ ਵਿਸ਼ਿਆਂ ਸੰਬੰਧੀ ਆਪਣੇ ਪੋਰਟਲ ‘ਤੇ ਹੋ ਰਹੀ ਸੱਟੇਬਾਜ਼ੀ ਬਾਰੇ ਜਾਣਕਾਰੀ ਦਿੱਤੀ।

ਵ੍ਹਾਈਟ ਹਾਊਸ ਦੀ ਪ੍ਰੈਸ ਸਕੱਤਰ ਕੈਰੋਲੀਨ ਲੇਵਿਟ ਨੇ ਕਿਹਾ ਕਿ ਰਾਸ਼ਟਰਪਤੀ ਟਰੰਪ ਸਥਿਤੀ ਤੋਂ ਜਾਣੂ ਹਨ। ਉਨ੍ਹਾਂ ਨੇ ਇਸ ਘਟਨਾ ਨੂੰ ਮੰਦਭਾਗਾ ਤੇ ਸ਼ਰਮਨਾਕ ਦੱਸਿਆ। ਲੇਵਿਟ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਵ੍ਹਾਈਟ ਹਾਊਸ ਦੇ ਅਜਿਹੇ ਮਾਮਲਿਆਂ ਸੰਬੰਧੀ ਬਹੁਤ ਸਖ਼ਤ ਨਿਯਮ ਹਨ ਤੇ ਸ਼ਾਮਲ ਕਰਮਚਾਰੀ ਨੂੰ ਬਿਨਾਂ ਤਨਖਾਹ ਦੀ ਛੁੱਟੀ ‘ਤੇ ਰੱਖਿਆ ਗਿਆ ਹੈ।

ਭਾਸ਼ਣਾਂ ‘ਚ ਵਰਤੇ ਗਏ ਸ਼ਬਦਾਂ ਦੀ ਭਵਿੱਖਬਾਣੀ ਕਰਕੇ 100,000 ਡਾਲਰ ਜਿੱਤੇ

ਏਬੀਸੀ ਨਿਊਜ਼ ਨੇ ਵੀਰਵਾਰ ਨੂੰ ਰਿਪੋਰਟ ਦਿੱਤੀ ਕਿ ਗੈਬਰੀਅਲ ਪੇਰੇਜ਼, ਜੋ 2016 ਤੋਂ ਟਰੰਪ ਦੇ ਟੈਲੀਪ੍ਰੋਂਪਟਰ ਨੂੰ ਚਲਾ ਰਿਹਾ ਹੈ, ਉਸ ਨੇ ਵ੍ਹਾਈਟ ਹਾਊਸ ਤੋਂ ਅੰਦਰੂਨੀ ਜਾਣਕਾਰੀ ਦਾ ਲਾਭ ਉਠਾ ਕੇ 100,000 ਡਾਲਰ ਤੋਂ ਵੱਧ ਰਕਮ ਜਿੱਤੀ। ਉਸ ਨੇ ਟਰੰਪ ਦੇ ਵੱਡੇ ਭਾਸ਼ਣਾਂ ਦੌਰਾਨ ਕਹੇ ਜਾਣ ਵਾਲੇ ਖਾਸ ਸ਼ਬਦਾਂ ‘ਤੇ ਦਾਅ ਲਗਾਇਆ ਸੀ, ਜਿਸ ‘ਚ ਇਸ ਸਾਲ ਦੇ ਸ਼ੁਰੂ ‘ਚ ਦਿੱਤਾ ਗਿਆ ‘ਸਟੇਟ ਆਫ਼ ਦ ਯੂਨੀਅਨ’ ਸੰਬੋਧਨ ਵੀ ਸ਼ਾਮਲ ਹੈ।

ਕਾਲਸ਼ੀ ਦੇ ਬਿਆਨ ‘ਚ ਟੈਲੀਪ੍ਰੋਂਪਟਰ ਆਪਰੇਟਰ ਦਾ ਨਾਮ ਨਹੀਂ ਦੱਸਿਆ ਗਿਆ

ਕਾਲਸ਼ੀ ਦੇ ਵਕੀਲ ਤੇ ਇਨਫੋਰਸਮੈਂਟ ਦੇ ਮੁਖੀ ਰੌਬਰਟ ਡੇਨੌਲਟ ਨੇ X ‘ਤੇ ਲਿਖਿਆ, “ਕਾਲਸ਼ੀ ਦੀ ਨਿਗਰਾਨੀ ਟੀਮ ਨੇ ਤੁਰੰਤ ਇਨ੍ਹਾਂ ਟ੍ਰੈਂਡਸ ਦੀ ਪਛਾਣ ਕੀਤੀ, ਉਨ੍ਹਾਂ ਦੀ ਜਾਂਚ ਕੀਤੀ ਤੇ ਉਨ੍ਹਾਂ ਨੂੰ ਯੂਐਸ ਕਮੋਡਿਟੀ ਫਿਊਚਰਜ਼ ਟ੍ਰੇਡਿੰਗ ਕਮਿਸ਼ਨ ਨੂੰ ਭੇਜ ਦਿੱਤਾ।”

ਇਹ ਵੀ ਪੜ੍ਹੋ

ਰੰਪ ਦਾ ਫੋਨ ਨਹੀਂ ਚੁੱਕ ਰਹੇ ਕਿਮ ਜੋਂਗ ਉਨ, ਜਾਣੋ ਕਿਉਂ ਕੀਤਾ ਮੋਬਾਈਲ ਬੰਦ?

ਹੋਰਮੁਜ਼ ਤੋਂ ਤੇਲ ਦੀ ਇੱਕ ਬੂੰਦ ਵੀ ਨਹੀਂ ਜਾਣ ਦੇਵਾਂਗੇ, ਈਰਾਨ ਦੀ ਆਖਰੀ ਚੇਤਾਵਨੀ

ਲਸ਼ਕਰ ਦੀ ਨਵੀਂ ਯੋਜਨਾ! ਨੌਜਵਾਨਾਂ ਨੂੰ ਜੋੜਨ ਲਈ ਸਿੰਧ 'ਚ ਵਧਾਈ ਗਤੀਵਿਧੀ

ਡੇਨੌਲਟ ਨੇ ਅੱਗੇ ਕਿਹਾ, “ਅਸੀਂ ਇਸ ਮਾਮਲੇ ‘ਚ ਰੈਗੂਲੇਟਰਾਂ ਦੀ ਸਹਾਇਤਾ ਕਰ ਰਹੇ ਹਾਂ ਤੇ ਸਾਡੇ ਦੁਆਰਾ ਇਕੱਠੇ ਕੀਤੇ ਗਏ ਸਾਰੇ ਸਬੂਤ ਸੌਂਪ ਦਿੱਤੇ ਹਨ, ਜਿਵੇਂ ਕਿ ਅਸੀਂ ਕਿਸੇ ਵੀ ਰੈਫਰਲ ਨਾਲ ਕਰਦੇ ਹਾਂ।” ਇਸ ਦੌਰਾਨ, ਏਬੀਸੀ ਨੇ ਹੁਣ ਕੇਸ ਦੇ ਪੂਰੇ ਵੇਰਵਿਆਂ ਦਾ ਖੁਲਾਸਾ ਕੀਤਾ ਹੈ, ਜਿਸ ‘ਚ ਵਿਅਕਤੀ ਦਾ ਨਾਮ ਵੀ ਸ਼ਾਮਲ ਹੈ।

ਏਬੀਸੀ ਰਿਪੋਰਟ ‘ਚ ਕਾਲਸ਼ੀ ਪਲੇਟਫਾਰਮ ‘ਤੇ ਸ਼ੱਕੀ ਗਤੀਵਿਧੀ ਨੂੰ ਜ਼ਿਕਰ

ਏਬੀਸੀ ਨੇ ਆਪਣੀ ਰਿਪੋਰਟ ਮਾਮਲੇ ਤੋਂ ਜਾਣੂ ਸਰੋਤਾਂ ਤੋਂ ਪ੍ਰਾਪਤ ਜਾਣਕਾਰੀ ‘ਤੇ ਆਧਾਰਿਤ ਕੀਤੀ ਹੈ ਜਿਨ੍ਹਾਂ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਗੱਲ ਕੀਤੀ। ਰਿਪੋਰਟ ਕਾਲਸ਼ੀ ਦੇ ਮਾਰਕੀਟ ‘ਤੇ ਸ਼ੱਕੀ ਗਤੀਵਿਧੀ ਨੂੰ ਉਜਾਗਰ ਕਰਦੀ ਹੈ, ਜਿੱਥੇ ਉਪਭੋਗਤਾ ਸੱਟਾ ਲਗਾ ਸਕਦੇ ਹਨ ਕਿ ਜਨਤਕ ਭਾਸ਼ਣਾਂ ‘ਚ ਕਿਹੜੇ ਵਾਕਾਂਸ਼ ਤੇ ਖਾਸ ਸ਼ਬਦਾਂ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।

ਤਿੰਨ ਮਹੀਨਿਆਂ ‘ਚ ਇੱਕ ਦਰਜਨ ਤੋਂ ਵੱਧ ਭਾਸ਼ਣਾਂ ‘ਤੇ ਸੱਟਾ

ਸੂਤਰਾਂ ਦੇ ਅਨੁਸਾਰ, ਇਸ ਸਾਲ ਫਰਵਰੀ ‘ਚ ਦਿੱਤੇ ਗਏ ‘ਸਟੇਟ ਆਫ਼ ਦ ਯੂਨੀਅਨ’ ਸੰਬੋਧਨ ਤੋਂ ਇਲਾਵਾ, ਸੀਐਫਟੀਸੀ ਜਾਂਚਕਰਤਾਵਾਂ ਨੇ ਪਾਇਆ ਕਿ ਪੇਰੇਜ਼ ਨੇ ਤਿੰਨ ਮਹੀਨਿਆਂ ਦੀ ਮਿਆਦ ਵਿੱਚ ਟਰੰਪ ਦੇ ਇੱਕ ਦਰਜਨ ਤੋਂ ਵੱਧ ਭਾਸ਼ਣਾਂ ‘ਤੇ ਸੱਟਾ ਲਗਾਇਆ ਸੀ। ਇਨ੍ਹਾਂ ‘ਚ ਦਸੰਬਰ 2025 ਵਿੱਚ ਇੱਕ ਪ੍ਰਾਈਮ-ਟਾਈਮ ਸੰਬੋਧਨ, ਜਨਵਰੀ ‘ਚ ਸਵਿਟਜ਼ਰਲੈਂਡ ਦੇ ਦਾਵੋਸ ‘ਚ ਵਿਸ਼ਵ ਆਰਥਿਕ ਫੋਰਮ ‘ਚ ਦਿੱਤਾ ਗਿਆ ਭਾਸ਼ਣ ਤੇ ਮਾਰਚ’ਚ ਇੱਕ ‘ਮੈਡਲ ਆਫ਼ ਆਨਰ’ ਸਮਾਰੋਹ ਦੌਰਾਨ ਟਰੰਪ ਦੁਆਰਾ ਕੀਤੀਆਂ ਗਈਆਂ ਟਿੱਪਣੀਆਂ ਸ਼ਾਮਲ ਸਨ।

ਮਾਰਚ ‘ਚ ਪੇਰੇਜ਼ ਵਿਰੁੱਧ ਅੰਦਰੂਨੀ ਮੈਮੋ ਜਾਰੀ ਕੀਤਾ ਗਿਆ

ਮਾਰਚ ‘ਚ, ਵ੍ਹਾਈਟ ਹਾਊਸ ਨੇ ਸਟਾਫ ਨੂੰ ਇੱਕ ਅੰਦਰੂਨੀ ਮੈਮੋ ਜਾਰੀ ਕੀਤਾ ਸੀ, ਜਿਸ ‘ਚ ਉਨ੍ਹਾਂ ਨੂੰ ਭਵਿੱਖਬਾਣੀ ਬਾਜ਼ਾਰਾਂ ‘ਤੇ ਸੱਟਾ ਲਗਾਉਣ ਲਈ ਗੈਰ-ਜਨਤਕ ਜਾਣਕਾਰੀ ਦੀ ਵਰਤੋਂ ਕਰਨ ਵਿਰੁੱਧ ਚੇਤਾਵਨੀ ਦਿੱਤੀ ਗਈ ਸੀ। ਪੇਰੇਜ਼ ਟਰੰਪ ਦੇ ਪਹਿਲੇ ਰਾਸ਼ਟਰਪਤੀ ਚੋਣ ਪ੍ਰਚਾਰ ਤੋਂ ਹੀ ਉਨ੍ਹਾਂ ਦੇ ਟੈਲੀਪ੍ਰੋਂਪਟਰ ਸੰਚਾਲਕਾਂ ‘ਚੋਂ ਇੱਕ ਰਿਹਾ ਹੈ।

ਸੂਤਰਾਂ ਦਾ ਕਹਿਣਾ ਹੈ ਕਿ ਟਰੰਪ ਦੇ ਸਾਰੇ ਨਜ਼ਦੀਕੀ ਸਹਿਯੋਗੀਆਂ ‘ਚੋਂ, ਪੇਰੇਜ਼ ਆਮ ਤੌਰ ‘ਤੇ ਰਾਸ਼ਟਰਪਤੀ ਦੇ ਤਿਆਰ ਕੀਤੇ ਭਾਸ਼ਣਾਂ ਦੇ ਅੰਤਿਮ ਸੰਸਕਰਣਾਂ ਦੀ ਸਮੀਖਿਆ ਕਰਦਾ ਹੈ। ਉਹ ਅਕਸਰ ਟਰੰਪ ਦੁਆਰਾ ਖੁਦ ਬੇਨਤੀ ਕੀਤੇ ਗਏ ਆਖਰੀ-ਮਿੰਟ ਦੇ ਬਦਲਾਅ ਕਰਵਾਉਂਦਾ ਹੈ। ਇਸ ਤੋਂ ਪਹਿਲਾਂ, ਕਾਂਗਰਸ ਤੇ ਸੰਘੀ ਜਾਂਚਕਰਤਾਵਾਂ ਦੁਆਰਾ ਉਸ ਤੋਂ 6 ਜਨਵਰੀ, 2021 ਨੂੰ ਯੂਐਸ ਕੈਪੀਟਲ ‘ਤੇ ਹਮਲੇ ਦੇ ਸਮੇਂ ਟਰੰਪ ਦੇ ਭਾਸ਼ਣਾਂ ‘ਚ ਕੀਤੇ ਗਏ ਬਦਲਾਵਾਂ ਬਾਰੇ ਪੁੱਛਗਿੱਛ ਕੀਤੀ ਗਈ ਸੀ। Source: TV9Hindi.com