Bangladesh Election Voting: BNP ਜਾਂ ਜਮਾਤ ਕਿਸ ਦੀ ਬਣੇਗੀ ਸਰਕਾਰ? ਬੰਗਲਾਦੇਸ਼ ‘ਚ ਅੱਜ ਵੋਟਿੰਗ
Bangladesh Election Result: ਬੰਗਲਾਦੇਸ਼ ਵੀਰਵਾਰ ਨੂੰ ਸੰਸਦੀ ਚੋਣਾਂ ਤੇ ਜੁਲਾਈ ਚਾਰਟਰ ਰੈਫਰੈਂਡਮ ਲਈ ਵੋਟਿੰਗ ਕਰੇਗਾ। ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਅਵਾਮੀ ਲੀਗ 'ਤੇ ਪਾਬੰਦੀ ਤੋਂ ਬਾਅਦ, ਮੁੱਖ ਮੁਕਾਬਲਾ ਬੀਐਨਪੀ (ਤਾਰਿਕ ਰਹਿਮਾਨ) ਤੇ ਜਮਾਤ (ਸ਼ਫੀਕੁਰ ਰਹਿਮਾਨ) ਵਿਚਕਾਰ ਹੈ। ਵੋਟਰ ਸਰਕਾਰ ਚੁਣਨ ਦੇ ਨਾਲ-ਨਾਲ ਸੰਵਿਧਾਨਕ ਸੁਧਾਰਾਂ 'ਤੇ ਵੋਟ ਪਾਉਣਗੇ। ਚੋਣ ਨਤੀਜੇ ਸ਼ੁੱਕਰਵਾਰ ਨੂੰ ਐਲਾਨੇ ਜਾਣਗੇ।
Bangladesh Election Result 2026 Date: ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਸਰਕਾਰ ਦੇ ਪਤਨ ਤੋਂ ਬਾਅਦ, ਬੰਗਲਾਦੇਸ਼ ਵੀਰਵਾਰ ਨੂੰ ਆਪਣੀਆਂ ਪਹਿਲੀਆਂ ਸੰਸਦੀ ਚੋਣਾਂ ਕਰਵਾਏਗਾ। ਵੋਟਿੰਗ ਸਵੇਰੇ 7:30 ਵਜੇ ਤੋਂ ਸ਼ਾਮ 4:30 ਵਜੇ ਤੱਕ ਹੋਵੇਗੀ। ਸੰਸਦੀ ਚੋਣਾਂ ਲਈ ਵੋਟਿੰਗ ਦੇ ਨਾਲ, ਜੁਲਾਈ ਚਾਰਟਰ ‘ਤੇ ਰੈਫਰੈਂਡਮ ਵੀ ਹੋਵੇਗਾ। ਵੋਟਰ ਇੱਕੋ ਸਮੇਂ ਦੋ ਵੋਟਾਂ ਪਾਉਣਗੇ: ਇੱਕ ਚੋਣ ਲਈ ਤੇ ਇੱਕ ਰੈਫਰੈਂਡਮ (ਜਨਮਤ ਸੰਗ੍ਰਹਿ) ਲਈ। ਵੋਟਿੰਗ ਬੈਲਟ ਪੇਪਰ ‘ਤੇ ਕੀਤੀ ਜਾਵੇਗੀ।
ਸੰਸਦੀ ਚੋਣਾਂ ਲਈ ਚਿੱਟੇ ਬੈਲਟ ਤੇ ਜੁਲਾਈ ਚਾਰਟਰ ਰੈਫਰੈਂਡਮ ਲਈ ਰੰਗੀਨ ਬੈਲਟ ਵਰਤੇ ਜਾਣਗੇ। ਫਿਰ ਗਿਣਤੀ ਸ਼ੁਰੂ ਹੋਵੇਗੀ। ਚੋਣ ਨਤੀਜੇ ਸ਼ੁੱਕਰਵਾਰ ਨੂੰ ਐਲਾਨੇ ਜਾਣਗੇ।
ਬੰਗਲਾਦੇਸ਼ ਸੰਸਦ ਦੀਆਂ 300 ਸੀਟਾਂ ‘ਚੋਂ 299 ਲਈ ਵੀਰਵਾਰ ਨੂੰ ਵੋਟਿੰਗ ਹੋਵੇਗੀ। ਸ਼ੇਰਪੁਰ-3 ਹਲਕੇ ‘ਚ ਇੱਕ ਉਮੀਦਵਾਰ ਦੀ ਮੌਤ ਕਾਰਨ ਵੋਟਿੰਗ ਰੋਕ ਦਿੱਤੀ ਗਈ ਹੈ। ਇਸ ਹਲਕੇ ‘ਚ ਵੋਟਿੰਗ ਨਹੀਂ ਹੋਵੇਗੀ।
ਮੈਦਾਨ ‘ਚ 2,028 ਉਮੀਦਵਾਰ
ਕੁੱਲ 50 ਰਜਿਸਟਰਡ ਤੇ ਮਾਨਤਾ ਪ੍ਰਾਪਤ ਰਾਜਨੀਤਿਕ ਪਾਰਟੀਆਂ ਚੋਣਾਂ ਲੜ ਰਹੀਆਂ ਹਨ। ਕੁੱਲ 2,028 ਉਮੀਦਵਾਰ ਮੈਦਾਨ ‘ਚ ਹਨ। ਇਨ੍ਹਾਂ ਸਾਰੇ ਉਮੀਦਵਾਰਾਂ ਦੀ ਕਿਸਮਤ ਦਾ ਫੈਸਲਾ ਵੀਰਵਾਰ ਨੂੰ ਵੋਟਿੰਗ ਤੋਂ ਬਾਅਦ ਕੀਤਾ ਜਾਵੇਗਾ।
ਯੂਨਸ ਸਰਕਾਰ ਨੇ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਪਾਰਟੀ, ਅਵਾਮੀ ਲੀਗ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਨਤੀਜੇ ਵਜੋਂ, ਅਵਾਮੀ ਲੀਗ ਇਹ ਚੋਣ ਨਹੀਂ ਲੜ ਰਹੀ ਹੈ। ਇਹ ਚੋਣ ਅਵਾਮੀ ਲੀਗ ਤੋਂ ਬਿਨਾਂ ਹੋ ਰਹੀ ਹੈ।
ਇਹ ਵੀ ਪੜ੍ਹੋ
ਚੋਣਾਂ ਦੇ ਮੱਦੇਨਜ਼ਰ, ਚੋਣ ਕਮਿਸ਼ਨ ਨੇ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਹਨ ਤੇ ਬੰਗਲਾਦੇਸ਼ ਦੇ ਵੱਖ-ਵੱਖ ਖੇਤਰਾਂ ‘ਚ ਫੌਜ ਦੇ ਨਾਲ-ਨਾਲ ਵੱਡੀ ਗਿਣਤੀ ‘ਚ ਪੁਲਿਸ ਬਲ ਤਾਇਨਾਤ ਕੀਤੇ ਗਏ ਹਨ।
ਹਾਲਾਂਕਿ, ਚੋਣਾਂ ਤੋਂ ਪਹਿਲਾਂ, ਵੋਟਿੰਗ ਵਾਲੇ ਦਿਨ ਹਿੰਸਾ ਦਾ ਡਰ ਪੈਦਾ ਹੋ ਗਿਆ ਹੈ। ਸੰਯੁਕਤ ਰਾਜ ਨੇ ਵੀ ਚੋਣਾਂ ਵਾਲੇ ਦਿਨ ਕੱਟੜਪੰਥੀ ਤਾਕਤਾਂ ਦੁਆਰਾ ਹਮਲਿਆਂ ਬਾਰੇ ਚਿੰਤਾ ਪ੍ਰਗਟ ਕੀਤੀ ਹੈ। ਹਾਲਾਂਕਿ, ਚੋਣਾਂ ਦੌਰਾਨ ਵੱਖ-ਵੱਖ ਦੇਸ਼ਾਂ ਦੇ ਨਿਰੀਖਕਾਂ ਨੂੰ ਤਾਇਨਾਤ ਕੀਤਾ ਗਿਆ ਹੈ।
ਬੀਐਨਪੀ ਤੇ ਜਮਾਤ ਮੁਕਾਬਲਾ
ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਅਸਤੀਫ਼ੇ ਤੋਂ ਬਾਅਦ, ਦੋ ਉਮੀਦਵਾਰ ਪ੍ਰਧਾਨ ਮੰਤਰੀ ਅਹੁਦੇ ਲਈ ਚੋਣ ਲੜ ਰਹੇ ਹਨ। ਇੱਕ ਹੈ ਤਾਰਿਕ ਰਹਿਮਾਨ, ਸਾਬਕਾ ਪ੍ਰਧਾਨ ਮੰਤਰੀ ਖਾਲਿਦਾ ਜ਼ਿਆ ਦਾ ਪੁੱਤਰ ਅਤੇ ਸਾਬਕਾ ਸੱਤਾਧਾਰੀ ਬੀਐਨਪੀ ਦਾ ਮੁਖੀ; ਦੂਜਾ ਹੈ ਸ਼ਫੀਕੁਰ ਰਹਿਮਾਨ, ਕੱਟੜਪੰਥੀ ਇਸਲਾਮੀ ਸੰਗਠਨ ਜਮਾਤ-ਏ-ਇਸਲਾਮੀ (ਬੰਗਲਾਦੇਸ਼’ਚ ‘ਜਮਾਤ’ ਵਜੋਂ ਜਾਣਿਆ ਜਾਂਦਾ ਹੈ) ਦੇ ਅਮੀਰ ਹਨ, ਜਿਨ੍ਹਾਂ ਨੇ ਆਜ਼ਾਦੀ ਸੰਘਰਸ਼ ਦਾ ਵਿਰੋਧ ਕੀਤਾ ਸੀ।
ਹਾਲਾਂਕਿ ਸਾਬਕਾ ਰਾਸ਼ਟਰਪਤੀ ਹੁਸੈਨ ਮੁਹੰਮਦ ਇਰਸ਼ਾਦ ਦੀ ਜਾਤੀਯ ਪਾਰਟੀ, ਚਾਰ ਲੈਫਟਿਸਟ ਪਾਰਟੀਆਂ ਤੇ ਸਈਦ ਮੁਹੰਮਦ ਰੇਜ਼ਾਉਲ ਕਰੀਮ ਦੀ ਇਸਲਾਮਿਕ ਮੂਵਮੈਂਟ, ਜਿਸ ਨੂੰ ‘ਚਾਰਮੋਨੇਅਰ ਪੀਰ’ ਵਜੋਂ ਜਾਣਿਆ ਜਾਂਦਾ ਹੈ, ਚੋਣ ਮੈਦਾਨ ‘ਚ ਹਨ, ਲਗਭਗ ਸਾਰੇ ਓਪੀਨੀਅਨ ਪੋਲਰ ਭਵਿੱਖਬਾਣੀ ਕਰਦੇ ਹਨ ਕਿ ਮੁੱਖ ਮੁਕਾਬਲਾ ਬੀਐਨਪੀ ਗੱਠਜੋੜ ਤੇ ਜਮਾਤ ਦੀ ਅਗਵਾਈ ਵਾਲੇ 11-ਪਾਰਟੀ ਗੱਠਜੋੜ (ਜਿਸ ‘ਚ ਨਾਹਿਦ ਇਸਲਾਮ ਤੇ ਜੁਲਾਈ ਮੂਵਮੈਂਟ ਦੇ ਨੇਤਾਵਾਂ ਦੇ ਇੱਕ ਹਿੱਸੇ ਦੁਆਰਾ ਬਣਾਈ ਗਈ ਨਵੀਂ ਨੈਸ਼ਨਲ ਸਿਟੀਜ਼ਨਜ਼ ਪਾਰਟੀ, ਜਾਂ ਐਨਸੀਪੀ ਸ਼ਾਮਲ ਹੈ) ਤੱਕ ਸੀਮਿਤ ਰਹੇਗਾ।
ਜਨਮਤ ਸੰਗ੍ਰਹਿ ਕੀ ਫੈਸਲਾ ਕਰੇਗਾ?
13ਵੀਂ ਰਾਸ਼ਟਰੀ ਸੰਸਦ ਚੋਣਾਂ ਦੇ ਨਾਲ, ਬੰਗਲਾਦੇਸ਼ ਵੀਰਵਾਰ ਨੂੰ ਜੁਲਾਈ ਚਾਰਟਰ ‘ਤੇ ਰੈਫਰੈਂਡਮ ਵੀ ਕਰਵਾ ਰਿਹਾ ਹੈ। ਪਿਛਲੇ ਨਵੰਬਰ ‘ਚ ਮੁਹੰਮਦ ਯੂਨਸ ਦੀ ਅੰਤਰਿਮ ਸਰਕਾਰ ਵੱਲੋਂ ਜਾਰੀ ਕੀਤੇ ਗਏ ਇੱਕ ਆਰਡੀਨੈਂਸ ਦੇ ਅਨੁਸਾਰ, ਜਨਮਤ ਸੰਗ੍ਰਹਿ ਚਾਰ ਮੁੱਦਿਆਂ ‘ਤੇ ਇੱਕ ਸਵਾਲ ‘ਤੇ ਅਧਾਰਤ ਹੋਵੇਗਾ:
- ਚੋਣਾਂ ਤੋਂ ਪਹਿਲਾਂ, ਜੁਲਾਈ ਚਾਰਟਰ ‘ਚ ਦੱਸੇ ਗਏ ਪ੍ਰੋਸੈਸ ਦੇ ਹਿਸਾਬ ਤੋਂ ਕੇਅਰ ਟੇਕਰ ਸਰਕਾਰ, ਇਲੈਕਸ਼ਨ ਕਮੀਸ਼ਨ ਤੇ ਦੂਸਰੀ ਸੰਵਿਧਾਨਕ ਸੰਸਥਾਵਾਂ ਬਣਾਈਆਂ ਜਾਣਗੀਆਂ।
- ਅਗਲੀ ਸੰਸਦ ਦੋ-ਸਦਨ ਵਾਲੀ ਹੋਵੇਗੀ। ਰਾਸ਼ਟਰੀ ਚੋਣਾਂ ‘ਚ ਪਾਰਟੀਆਂ ਦੁਆਰਾ ਪ੍ਰਾਪਤ ਵੋਟਾਂ ਦੇ ਅਧਾਰ ‘ਤੇ 100 ਮੈਂਬਰਾਂ ਦਾ ਇੱਕ ਉੱਚ ਸਦਨ ਬਣਾਇਆ ਜਾਵੇਗਾ ਤੇ ਸੰਵਿਧਾਨ ‘ਚ ਸੋਧਾਂ ਲਈ ਉੱਚ ਸਦਨ ਦੇ ਬਹੁਮਤ ਮੈਂਬਰਾਂ ਦੀ ਪ੍ਰਵਾਨਗੀ ਦੀ ਲੋੜ ਹੋਵੇਗੀ।
- ਅਗਲੀਆਂ ਚੋਣਾਂ ‘ਚ ਜਿੱਤਣ ਵਾਲੀ ਪਾਰਟੀ ਜਾਂ ਗੱਠਜੋੜ ਨੂੰ ਜੁਲਾਈ ਦੇ ਰਾਸ਼ਟਰੀ ਚਾਰਟਰ’ਚ ਰਾਜਨੀਤਿਕ ਪਾਰਟੀਆਂ ਦੁਆਰਾ ਸਹਿਮਤ ਹੋਏ ਵੱਖ-ਵੱਖ ਮੁੱਦਿਆਂ ‘ਤੇ 30 ਪ੍ਰਸਤਾਵਾਂ ਨੂੰ ਲਾਗੂ ਕਰਨ ਦੀ ਲੋੜ ਹੋਵੇਗੀ, ਜਿਸ ‘ਚ ਸੰਸਦ ਵਿੱਚ ਔਰਤਾਂ ਦੀ ਪ੍ਰਤੀਨਿਧਤਾ ਵਧਾਉਣਾ, ਵਿਰੋਧੀ ਧਿਰ ਤੋਂ ਡਿਪਟੀ ਸਪੀਕਰਾਂ ਤੇ ਸੰਸਦੀ ਕਮੇਟੀ ਦੇ ਚੇਅਰਪਰਸਨਾਂ ਦੀ ਚੋਣ ਕਰਨਾ, ਪ੍ਰਧਾਨ ਮੰਤਰੀ ਦੇ ਕਾਰਜਕਾਲ ਨੂੰ ਸੀਮਤ ਕਰਨਾ, ਰਾਸ਼ਟਰਪਤੀ ਦੀਆਂ ਸ਼ਕਤੀਆਂ ਨੂੰ ਵਧਾਉਣਾ, ਬੁਨਿਆਦੀ ਅਧਿਕਾਰਾਂ ਨੂੰ ਵਧਾਉਣਾ ਤੇ ਨਿਆਂਪਾਲਿਕਾ ਤੇ ਸਥਾਨਕ ਸਰਕਾਰ ਦੀ ਆਜ਼ਾਦੀ ਨੂੰ ਮਜ਼ਬੂਤ ਕਰਨਾ ਸ਼ਾਮਲ ਹੈ।
- ਜੁਲਾਈ ਚਾਰਟਰ ‘ਚ ਦਰਸਾਏ ਗਏ ਹੋਰ ਸੁਧਾਰ ਰਾਜਨੀਤਿਕ ਪਾਰਟੀਆਂ ਦੁਆਰਾ ਵਾਅਦੇ ਅਨੁਸਾਰ ਲਾਗੂ ਕੀਤੇ ਜਾਣਗੇ।
