Zepto Delivery Viral Video: ਪਾਣੀ ਦੀ ਬੋਤਲ ਤੋਂ ਸ਼ੁਰੂ ਹੋਇਆ ਮਾਮਲਾ, ਬੈਂਗਲੁਰੂ ਦੀ ਮਹਿਲਾ ਨੇ ਦੱਸੀ ਜ਼ੈਪਟੋ ਡਿਲੀਵਰੀ ਏਜੰਟ ਦੀ ਡਰਾ ਦੇਣ ਵਾਲੀ ਹਰਕਤ

ਜ਼ੈਪਟੋ ਨੇ ਮਹਿਲਾ ਤੋਂ ਮੰਗੀ ਮੁਆਫ਼ੀ

ਇਹ ਘਟਨਾ ਇੱਕ ਆਮ ਆਨਲਾਈਨ ਡਿਲੀਵਰੀ ਨਾਲ ਸ਼ੁਰੂ ਹੋਈ ਸੀ, ਪਰ ਕੁਝ ਹੀ ਮਿੰਟਾਂ ਵਿੱਚ ਇੱਕ ਮਹਿਲਾ ਲਈ ਡਰਾਉਣੇ ਤਜਰਬੇ ਵਿੱਚ ਬਦਲ ਗਈ। ਬੈਂਗਲੁਰੂ ਦੀ ਰਹਿਣ ਵਾਲੀ ਇੱਕ ਮਹਿਲਾ ਨੇ ਦਾਅਵਾ ਕੀਤਾ ਕਿ ਉਸ ਦੇ ਘਰ ਸਮਾਨ ਪਹੁੰਚਾਉਣ ਆਏ ਜ਼ੈਪਟੋ ਦੇ ਇੱਕ ਡਿਲੀਵਰੀ ਪਾਰਟਨਰ ਨੇ ਅਜਿਹੀ ਹਰਕਤ ਕੀਤੀ, ਜਿਸ ਕਾਰਨ ਉਹ ਆਪਣੇ ਆਪ ਨੂੰ ਅਸੁਰੱਖਿਅਤ ਮਹਿਸੂਸ ਕਰਨ ਲੱਗੀ। ਮਹਿਲਾ ਨੇ ਇਸ ਪੂਰੀ ਘਟਨਾ ਨੂੰ ਸੋਸ਼ਲ ਮੀਡੀਆ ‘ਤੇ ਸਾਂਝਾ ਕੀਤਾ, ਜਿਸ ਤੋਂ ਬਾਅਦ ਇਹ ਮਾਮਲਾ ਤੇਜ਼ੀ ਨਾਲ ਵਾਇਰਲ ਹੋ ਗਿਆ।

ਮਹਿਲਾ, ਜੋ ਇੰਸਟਾਗ੍ਰਾਮ ‘ਤੇ ‘thatamethystgirl’ ਨਾਮ ਨਾਲ ਮੌਜੂਦ ਹੈ, ਨੇ ਇੱਕ ਵੀਡੀਓ ਪੋਸਟ ਕਰਕੇ ਪੂਰੀ ਘਟਨਾ ਬਿਆਨ ਕੀਤੀ। ਉਸ ਦੇ ਮੁਤਾਬਕ, ਸਮਾਨ ਡਿਲੀਵਰ ਕਰਨ ਤੋਂ ਬਾਅਦ ਡਿਲੀਵਰੀ ਏਜੰਟ ਨੇ ਉਸ ਤੋਂ ਪੀਣ ਲਈ ਪਾਣੀ ਮੰਗਿਆ। ਮਹਿਲਾ ਨੂੰ ਲੱਗਿਆ ਕਿ ਗਰਮੀ ਅਤੇ ਲਗਾਤਾਰ ਕੰਮ ਕਰਨ ਕਾਰਨ ਉਸ ਨੂੰ ਪਿਆਸ ਲੱਗੀ ਹੋਵੇਗੀ, ਇਸ ਲਈ ਉਸ ਨੇ ਏਜੰਟ ਨੂੰ ਪਾਣੀ ਦੀ ਪੂਰੀ ਬੋਤਲ ਦੇ ਦਿੱਤੀ ਅਤੇ ਕਿਹਾ ਕਿ ਉਹ ਇਸ ਨੂੰ ਆਪਣੇ ਨਾਲ ਲੈ ਜਾਵੇ। ਪਰ ਮਹਿਲਾ ਦਾ ਕਹਿਣਾ ਹੈ ਕਿ ਮਾਮਲਾ ਇੱਥੇ ਖਤਮ ਨਹੀਂ ਹੋਇਆ। ਉਸ ਦਾ ਆਰੋਪ ਹੈ ਕਿ ਕੁਝ ਸਮੇਂ ਬਾਅਦ ਡਿਲੀਵਰੀ ਏਜੰਟ ਨੇ ਕਿਹਾ ਕਿ ਉਹ ਬੋਤਲ ਦਾ ਪਾਣੀ ਖਤਮ ਕਰ ਚੁੱਕਾ ਹੈ ਅਤੇ ਹੁਣ ਉਸ ਨੂੰ ਹੋਰ ਪਾਣੀ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਉਸ ਨੇ ਵਾਰ-ਵਾਰ ਮਹਿਲਾ ਨੂੰ ਬੇਨਤੀ ਕਰਨੀ ਸ਼ੁਰੂ ਕਰ ਦਿੱਤੀ ਕਿ ਉਸ ਨੂੰ ਕੁਝ ਮਿੰਟਾਂ ਲਈ ਘਰ ਦੇ ਅੰਦਰ ਆਉਣ ਦਿੱਤਾ ਜਾਵੇ।

ਜ਼ੈਪਟੋ ਨੇ ਮੰਗੀ ਮੁਆਫ਼ੀ

ਮਹਿਲਾ ਦੇ ਮੁਤਾਬਕ, ਡਿਲੀਵਰੀ ਏਜੰਟ ਦੀ ਇਹ ਗੱਲ ਉਸ ਨੂੰ ਅਜੀਬ ਲੱਗੀ ਅਤੇ ਉਸ ਨੇ ਸਾਫ਼ ਇਨਕਾਰ ਕਰ ਦਿੱਤਾ। ਉਸ ਨੇ ਦਰਵਾਜ਼ਾ ਬੰਦ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਆਰੋਪ ਹੈ ਕਿ ਡਿਲੀਵਰੀ ਏਜੰਟ ਲਗਾਤਾਰ ਘਰ ਦੇ ਅੰਦਰ ਆਉਣ ਦੀ ਜ਼ਿੱਦ ਕਰਦਾ ਰਿਹਾ। ਇੰਨਾ ਹੀ ਨਹੀਂ, ਜਦੋਂ ਮਹਿਲਾ ਨੇ ਗੇਟ ਬੰਦ ਕਰਨਾ ਚਾਹਿਆ ਤਾਂ ਉਸ ਨੇ ਕਈ ਵਾਰ ਡੋਰਬੈਲ ਵਜਾਈ ਅਤੇ ਦਰਵਾਜ਼ੇ ‘ਤੇ ਜ਼ੋਰ-ਜ਼ੋਰ ਨਾਲ ਦਸਤਕ ਵੀ ਦਿੱਤੀ। ਮਹਿਲਾ ਦਾ ਕਹਿਣਾ ਹੈ ਕਿ ਉਸ ਸਮੇਂ ਉਹ ਕਾਫ਼ੀ ਘਬਰਾ ਗਈ ਸੀ, ਕਿਉਂਕਿ ਸਾਹਮਣੇ ਵਾਲਾ ਵਿਅਕਤੀ ਲਗਾਤਾਰ ਘਰ ਦੇ ਅੰਦਰ ਆਉਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ।

ਇਸ ਪੂਰੀ ਘਟਨਾ ਤੋਂ ਬਾਅਦ ਮਹਿਲਾ ਨੇ ਆਪਣਾ ਤਜਰਬਾ ਸੋਸ਼ਲ ਮੀਡੀਆ ‘ਤੇ ਸਾਂਝਾ ਕੀਤਾ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਜ਼ੈਪਟੋ ਨੇ ਉਸ ਨਾਲ ਸੰਪਰਕ ਕੀਤਾ ਅਤੇ ਪੂਰੇ ਮਾਮਲੇ ਦੀ ਜਾਣਕਾਰੀ ਲਈ। ਮਹਿਲਾ ਦੇ ਮੁਤਾਬਕ, ਕੰਪਨੀ ਨੇ ਇਸ ਸ਼ਿਕਾਇਤ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਤੁਰੰਤ ਕਾਰਵਾਈ ਕੀਤੀ। ਉਸ ਨੇ ਦੱਸਿਆ ਕਿ ਜ਼ੈਪਟੋ ਨੇ ਸੰਬੰਧਿਤ ਡਿਲੀਵਰੀ ਪਾਰਟਨਰ ਦਾ ਅਕਾਊਂਟ ਬੰਦ ਕਰ ਦਿੱਤਾ ਹੈ। ਨਾਲ ਹੀ ਲਿਖਤੀ ਰੂਪ ਵਿੱਚ ਇਹ ਭਰੋਸਾ ਵੀ ਦਿੱਤਾ ਕਿ ਭਵਿੱਖ ਵਿੱਚ ਉਸ ਨੂੰ ਮਹਿਲਾ ਦੇ ਘਰ ਜਾਂ ਉਸ ਦੀ ਲੋਕੇਸ਼ਨ ਦੇ ਆਸ-ਪਾਸ ਕਿਸੇ ਵੀ ਡਿਲੀਵਰੀ ਲਈ ਨਹੀਂ ਭੇਜਿਆ ਜਾਵੇਗਾ।

ਮਹਿਲਾ ਦੇ ਮੁਤਾਬਕ, ਜ਼ੈਪਟੋ ਨੇ ਉਸ ਨੂੰ ਇੱਕ ਲਿਖਤੀ ਮੁਆਫ਼ੀਨਾਮਾ ਵੀ ਭੇਜਿਆ, ਜਿਸ ਵਿੱਚ ਇਸ ਘਟਨਾ ‘ਤੇ ਅਫ਼ਸੋਸ ਜਤਾਇਆ ਗਿਆ। ਇਸ ਤੋਂ ਇਲਾਵਾ ਕੰਪਨੀ ਨੇ ਉਸ ਨੂੰ ਸੰਬੰਧਿਤ ਡਿਲੀਵਰੀ ਪਾਰਟਨਰ ਦਾ ਅਸਤੀਫ਼ਾ ਵੀ ਉਪਲਬਧ ਕਰਵਾਇਆ। ਮਹਿਲਾ ਦਾ ਕਹਿਣਾ ਹੈ ਕਿ ਕੰਪਨੀ ਨੇ ਸਪੱਸ਼ਟ ਤੌਰ ‘ਤੇ ਦੱਸਿਆ ਕਿ ਜੇਕਰ ਭਵਿੱਖ ਵਿੱਚ ਉਹ ਵਿਅਕਤੀ ਉਸ ਦੇ ਘਰ ਜਾਂ ਆਸ-ਪਾਸ ਨਜ਼ਰ ਆਉਂਦਾ ਹੈ, ਤਾਂ ਜ਼ੈਪਟੋ ਉਸ ਦੇ ਨਾਲ ਮਿਲ ਕੇ ਉਸ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕਰਨ ਦਾ ਅਧਿਕਾਰ ਰੱਖਦਾ ਹੈ।

ਮਹਿਲਾ ਨੇ ਆਪਣੇ ਵੀਡੀਓ ਵਿੱਚ ਇਹ ਵੀ ਕਿਹਾ ਕਿ ਕੰਪਨੀ ਨੇ ਇਸ ਮਾਮਲੇ ਨੂੰ ਜਿਸ ਤੇਜ਼ੀ ਅਤੇ ਗੰਭੀਰਤਾ ਨਾਲ ਸੰਭਾਲਿਆ, ਉਸ ਨਾਲ ਉਸ ਨੂੰ ਕਾਫ਼ੀ ਰਾਹਤ ਮਿਲੀ। ਉਸ ਨੇ ਜ਼ੈਪਟੋ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਕੰਪਨੀ ਨੇ ਨਾ ਸਿਰਫ਼ ਉਸ ਦੀ ਸ਼ਿਕਾਇਤ ਸੁਣੀ, ਸਗੋਂ ਉਸ ‘ਤੇ ਤੁਰੰਤ ਕਾਰਵਾਈ ਵੀ ਕੀਤੀ। ਇਸ ਤੋਂ ਇਲਾਵਾ ਕੰਪਨੀ ਵੱਲੋਂ ਮੁਆਫ਼ੀ ਦੇ ਪ੍ਰਤੀਕ ਵਜੋਂ ਉਸ ਨੂੰ ਇੱਕ ਛੋਟਾ ਜਿਹਾ ਤੋਹਫ਼ਾ ਵੀ ਦਿੱਤਾ ਗਿਆ। ਹਾਲਾਂਕਿ, ਇਸ ਘਟਨਾ ਨੇ ਇੱਕ ਵਾਰ ਫਿਰ ਆਨਲਾਈਨ ਡਿਲੀਵਰੀ ਦੌਰਾਨ ਗਾਹਕਾਂ ਦੀ ਸੁਰੱਖਿਆ ਨੂੰ ਲੈ ਕੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਇੱਥੇ ਦੇਖੋ ਵੀਡੀਓ