Travel Vlogger: ਖੂਬਸੂਰਤ ਝਰਨੇ ਦੀ ਲੋਕੇਸ਼ਨ ਲੁਕਾ ਕੇ ਚਰਚਾ ‘ਚ ਆਈ ਟ੍ਰੈਵਲ ਵਲੌਗਰ, ਜਾਣੋ ਕੀ ਹੈ ਕਾਰਨ
Travel Vlogger: ਹਿਮਾਚਲ ਦੇ ਇੱਕ ਖੂਬਸੂਰਤ ਝਰਨੇ ਦੀ ਲੋਕੇਸ਼ਨ ਲੁਕਾ ਕੇ ਟ੍ਰੈਵਲ ਵਲੌਗਰ ਚੈਨਿਕਾ ਸ਼ਰਮਾ ਸੋਸ਼ਲ ਮੀਡੀਆ 'ਤੇ ਚਰਚਾ ਵਿੱਚ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਇਸ ਜਗ੍ਹਾ ਦੀ ਜਾਣਕਾਰੀ ਸਾਰਿਆਂ ਨੂੰ ਦੇ ਦਿੱਤੀ ਜਾਵੇ, ਤਾਂ ਲੋਕ ਉੱਥੇ ਗੰਦਗੀ ਫੈਲਾ ਦੇਣਗੇ। ਉਨ੍ਹਾਂ ਦੀ ਇਸ ਪਹਿਲ ਦੀ ਇੰਟਰਨੈੱਟ 'ਤੇ ਖੂਬ ਸਰਾਹਨਾ ਹੋ ਰਹੀ ਹੈ ਅਤੇ ਲੋਕ ਇਸ ਨੂੰ ਕੁਦਰਤ ਦੀ ਸੰਭਾਲ ਲਈ ਜ਼ਿੰਮੇਵਾਰ ਸੋਚ ਮੰਨ ਰਹੇ ਹਨ।
ਅੱਜਕੱਲ੍ਹ ਕੰਟੈਂਟ ਕ੍ਰੀਏਸ਼ਨ ਦਾ ਕਾਫ਼ੀ ਕ੍ਰੇਜ਼ ਹੈ ਅਤੇ ਲੋਕ ਵੱਖ-ਵੱਖ ਤਰ੍ਹਾਂ ਦਾ ਕੰਟੈਂਟ ਦਰਸ਼ਕਾਂ ਸਾਹਮਣੇ ਲਿਆ ਰਹੇ ਹਨ। ਖ਼ਾਸ ਕਰਕੇ ਟ੍ਰੈਵਲਿੰਗ ਕੰਟੈਂਟ ਦੀ ਗੱਲ ਕਰੀਏ ਤਾਂ ਹਰ ਰੋਜ਼ ਕੋਈ ਨਾ ਕੋਈ ਨਵਾਂ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੁੰਦਾ ਰਹਿੰਦਾ ਹੈ। ਜ਼ਿਆਦਾਤਰ ਲੋਕ ਜਿੱਥੇ ਵੀ ਘੁੰਮਣ ਜਾਂਦੇ ਹਨ, ਉੱਥੋਂ ਦੀਆਂ ਖੂਬਸੂਰਤ ਥਾਵਾਂ ਦਿਖਾਉਣ ਦੇ ਨਾਲ-ਨਾਲ ਉੱਥੇ ਪਹੁੰਚਣ ਦਾ ਪੂਰਾ ਰਸਤਾ ਵੀ ਦੱਸਦੇ ਹਨ, ਜਿਸ ਨਾਲ ਹੋਰ ਲੋਕ ਵੀ ਆਸਾਨੀ ਨਾਲ ਉੱਥੇ ਜਾਣ ਦੀ ਯੋਜਨਾ ਬਣਾ ਲੈਂਦੇ ਹਨ। ਪਰ ਇਨ੍ਹੀਂ ਦਿਨੀਂ ਇੱਕ ਟ੍ਰੈਵਲ ਵਲੌਗਰ ਨੇ ਕੁਝ ਅਜਿਹਾ ਕੀਤਾ ਹੈ, ਜਿਸ ਨੇ ਹਰ ਕਿਸੇ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ ਹੈ।
ਵਾਇਰਲ ਹੋ ਰਹੇ ਇੱਕ ਵੀਡੀਓ ਵਿੱਚ ਟ੍ਰੈਵਲ ਵਲੌਗਰ ਚੈਨਿਕਾ ਸ਼ਰਮਾ ਇੱਕ ਬੇਹੱਦ ਖੂਬਸੂਰਤ ਝਰਨੇ ਦੇ ਸਾਹਮਣੇ ਵੀਡੀਓ ਬਣਾਉਂਦੀ ਨਜ਼ਰ ਆ ਰਹੀ ਹੈ। ਵੀਡੀਓ ਜਿੰਨੀ ਖੂਬਸੂਰਤ ਹੈ, ਉਸ ਤੋਂ ਕਈ ਗੁਣਾ ਵੱਧ ਚਰਚਾ ਉਸ ਦੇ ਕੈਪਸ਼ਨ ਦੀ ਹੋ ਰਹੀ ਹੈ। ਉਨ੍ਹਾਂ ਨੇ ਸਾਫ਼ ਸ਼ਬਦਾਂ ਵਿੱਚ ਲਿਖਿਆ, “ਮੈਂ ਲੋਕੇਸ਼ਨ ਨਹੀਂ ਦੱਸਾਂਗੀ, ਤੁਸੀਂ ਸਭ ਉੱਥੇ ਗੰਦਗੀ ਫੈਲਾ ਦਿਓਗੇ।” ਬਸ ਫਿਰ ਕੀ ਸੀ, ਲੋਕਾਂ ਦਾ ਧਿਆਨ ਪਹਿਲਾਂ ਝਰਨੇ ਦੀ ਖੂਬਸੂਰਤੀ ਨਾਲੋਂ ਵੱਧ ਇਸ ਕੈਪਸ਼ਨ ਵੱਲ ਗਿਆ। ਸੋਸ਼ਲ ਮੀਡੀਆ ‘ਤੇ ਇਸ ਗੱਲ ਨੂੰ ਲੈ ਕੇ ਖੂਬ ਚਰਚਾ ਸ਼ੁਰੂ ਹੋ ਗਈ। ਕਈ ਲੋਕਾਂ ਨੇ ਉਨ੍ਹਾਂ ਦੇ ਇਸ ਫ਼ੈਸਲੇ ਦੀ ਜ਼ੋਰਦਾਰ ਸਰਾਹਨਾ ਕੀਤੀ ਅਤੇ ਕਿਹਾ ਕਿ ਸ਼ਾਇਦ ਇਹੀ ਤਰੀਕਾ ਹੈ, ਜਿਸ ਨਾਲ ਕੁਝ ਖੂਬਸੂਰਤ ਕੁਦਰਤੀ ਥਾਵਾਂ ਨੂੰ ਗੰਦਗੀ ਅਤੇ ਨੁਕਸਾਨ ਤੋਂ ਬਚਾਇਆ ਜਾ ਸਕਦਾ ਹੈ।
ਲੋਕਾਂ ਨੇ ਕੀ ਕਿਹਾ?
ਵੀਡੀਓ ਦੇ ਕਮੈਂਟ ਸੈਕਸ਼ਨ ਵਿੱਚ ਵੀ ਲੋਕਾਂ ਨੇ ਦਿਲਚਸਪ ਪ੍ਰਤੀਕਿਰਿਆਵਾਂ ਦਿੱਤੀਆਂ। ਇੱਕ ਯੂਜ਼ਰ ਨੇ ਲਿਖਿਆ ਕਿ ਇਹ ਹੁਣ ਤੱਕ ਦਾ ਸਭ ਤੋਂ ਸਮਝਦਾਰੀ ਭਰਿਆ ਫ਼ੈਸਲਾ ਹੈ। ਦੂਜੇ ਨੇ ਕਿਹਾ ਕਿ ਆਖ਼ਿਰਕਾਰ ਕਿਸੇ ਨੇ ਤਾਂ ਅਜਿਹੀ ਪਹਿਲ ਕੀਤੀ, ਜਿਸ ਦੀ ਲੋੜ ਕਾਫ਼ੀ ਸਮੇਂ ਤੋਂ ਮਹਿਸੂਸ ਕੀਤੀ ਜਾ ਰਹੀ ਸੀ। ਉੱਥੇ ਹੀ ਇੱਕ ਹੋਰ ਵਿਅਕਤੀ ਨੇ ਦੁੱਖ ਜ਼ਾਹਿਰ ਕਰਦੇ ਹੋਏ ਲਿਖਿਆ ਕਿ ਇਸ ਜਗ੍ਹਾ ‘ਤੇ ਹੁਣ ਹੌਲੀ-ਹੌਲੀ ਲੋਕਾਂ ਦੀ ਭੀੜ ਵਧਣ ਲੱਗੀ ਹੈ ਅਤੇ ਇਹ ਇੱਕ ਪਿਕਨਿਕ ਸਪਾਟ ਬਣਦੀ ਜਾ ਰਹੀ ਹੈ। ਇੱਕ ਹੋਰ ਯੂਜ਼ਰ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਲਿਖਿਆ ਕਿ ਉਸ ਨੂੰ ਵੀ ਇਸ ਜਗ੍ਹਾ ਬਾਰੇ ਪਤਾ ਹੈ, ਪਰ ਉਹ ਵੀ ਕਿਸੇ ਨੂੰ ਇਸ ਦੀ ਲੋਕੇਸ਼ਨ ਨਹੀਂ ਦੱਸੇਗਾ।
ਦਿਲਚਸਪ ਗੱਲ ਇਹ ਹੈ ਕਿ ਲੋਕਾਂ ਨੇ ਇਸ ਕੁੜੀ ਦੇ ਫ਼ੈਸਲੇ ਦਾ ਸਨਮਾਨ ਕੀਤਾ। ਅਕਸਰ ਦੇਖਿਆ ਜਾਂਦਾ ਹੈ ਕਿ ਕਈ ਲੋਕ ਘੁੰਮਣ ਜਾਂਦੇ ਸਮੇਂ ਆਪਣੇ ਨਾਲ ਖਾਣ-ਪੀਣ ਦਾ ਸਮਾਨ ਤਾਂ ਲੈ ਜਾਂਦੇ ਹਨ, ਪਰ ਵਾਪਸੀ ਵੇਲੇ ਪਲਾਸਟਿਕ ਦੀਆਂ ਬੋਤਲਾਂ, ਚਿਪਸ ਦੇ ਪੈਕੇਟ ਅਤੇ ਹੋਰ ਕੂੜਾ-ਕਰਕਟ ਉੱਥੇ ਹੀ ਛੱਡ ਜਾਂਦੇ ਹਨ। ਇਸ ਕਾਰਨ ਕੁਝ ਹੀ ਸਮੇਂ ਵਿੱਚ ਕੁਦਰਤੀ ਥਾਵਾਂ ਦੀ ਖੂਬਸੂਰਤੀ ਖ਼ਰਾਬ ਹੋਣ ਲੱਗਦੀ ਹੈ। ਪਹਾੜੀ ਇਲਾਕਿਆਂ ਵਿੱਚ ਇਹ ਸਮੱਸਿਆ ਹੋਰ ਵੀ ਗੰਭੀਰ ਬਣਦੀ ਜਾ ਰਹੀ ਹੈ। ਜਿੱਥੇ ਪਹਿਲਾਂ ਹਰਿਆਲੀ ਅਤੇ ਸਾਫ਼-ਸੁਥਰਾ ਵਾਤਾਵਰਣ ਨਜ਼ਰ ਆਉਂਦਾ ਸੀ, ਉੱਥੇ ਹੁਣ ਕਈ ਥਾਵਾਂ ‘ਤੇ ਕੂੜੇ ਦੇ ਢੇਰ ਦਿਖਾਈ ਦੇਣ ਲੱਗ ਪਏ ਹਨ।
ਅਸਲ ਸਮੱਸਿਆ ਸਿਰਫ਼ ਸੈਰ-ਸਪਾਟਾ ਨਹੀਂ, ਸਗੋਂ ਲੋਕਾਂ ਵਿੱਚ ਨਾਗਰਿਕ ਜ਼ਿੰਮੇਵਾਰੀ (ਸਿਵਿਕ ਸੈਂਸ) ਦੀ ਕਮੀ ਵੀ ਹੈ। ਅੱਜ ਵੀ ਬਹੁਤ ਸਾਰੇ ਲੋਕ ਇਹ ਨਹੀਂ ਸਮਝਦੇ ਕਿ ਕੁਦਰਤ ਦਾ ਆਨੰਦ ਲੈਣ ਦਾ ਮਤਲਬ ਉਸ ਨੂੰ ਨੁਕਸਾਨ ਪਹੁੰਚਾਉਣਾ ਨਹੀਂ ਹੁੰਦਾ। ਜੇਕਰ ਅਸੀਂ ਕਿਸੇ ਖੂਬਸੂਰਤ ਜਗ੍ਹਾ ਨੂੰ ਦੇਖਣ ਜਾਂਦੇ ਹਾਂ, ਤਾਂ ਉਸ ਨੂੰ ਉਸੇ ਤਰ੍ਹਾਂ ਸਾਫ਼-ਸੁਥਰਾ ਛੱਡ ਕੇ ਵਾਪਸ ਆਉਣਾ ਵੀ ਸਾਡੀ ਜ਼ਿੰਮੇਵਾਰੀ ਹੈ। ਸ਼ਾਇਦ ਇਹੀ ਸੋਚ ਟ੍ਰੈਵਲ ਵਲੌਗਰ ਚੈਨਿਕਾ ਸ਼ਰਮਾ ਦੇ ਇਸ ਫ਼ੈਸਲੇ ਦੇ ਪਿੱਛੇ ਵੀ ਰਹੀ ਹੋਵੇਗੀ। ਉਨ੍ਹਾਂ ਨੇ ਲੋਕੇਸ਼ਨ ਲੁਕਾ ਕੇ ਇਹ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਕੀਤੀ ਕਿ ਹਰ ਖੂਬਸੂਰਤ ਥਾਂ ਨੂੰ ਵਾਇਰਲ ਕਰਨਾ ਜ਼ਰੂਰੀ ਨਹੀਂ ਹੁੰਦਾ।
ਇਹ ਵੀ ਪੜ੍ਹੋ
ਇੱਥੇ ਦੇਖੋ ਵੀਡੀਓ
View this post on Instagram
