FIFA World Cup Final ਦੇਖਣ ਲਈ ਕਰਮਚਾਰੀ ਨੇ ਬੋਲਿਆ ਝੂਠ, ਇੱਕ ਰੀਲ ਨੇ ਖੋਲ੍ਹ ਦਿੱਤੀ ਪੋਲ; ਛੁੱਟੀ ਰੱਦ ਕਰ ਬੌਸ ਬੋਲਿਆ- ‘ਕਿਸੇ ਹੋਰ ਨੂੰ ਬੇਵਕੂਫ ਬਣਾਈਂ’
FIFA World Cup Final ਮੈਚ ਦੇਖਣ ਲਈ ਇੱਕ ਕਰਮਚਾਰੀ ਨੇ ਜ਼ਬਰਦਸਤ ਬਹਾਨਾ ਬਣਾਕੇ ਦਫ਼ਤਰ ਤੋਂ ਛੁੱਟੀ ਲੈ ਲਈ, ਪਰ ਇੰਸਟਾਗ੍ਰਾਮ ਦੀ ਇੱਕ ਵਾਇਰਲ ਰੀਲ ਨੇ ਉਸ ਦਾ ਝੂਠ ਬੌਸ ਦੇ ਸਾਹਮਣੇ ਬੇਨਕਾਬ ਕਰ ਦਿੱਤਾ। ਆਖ਼ਿਰ ਪੂਰਾ ਮਾਮਲਾ ਕੀ ਹੈ, ਆਓ ਜਾਣਦੇ ਹਾਂ।
ਫੀਫਾ ਵਰਲਡ ਕੱਪ ਦਾ ਖੁਮਾਰ ਫੁੱਟਬਾਲ ਫੈਨਸ ਦੇ ਸਿਰ ਚੜ੍ਹ ਕੇ ਬੋਲਦਾ ਹੈ, ਪਰ ਕਈ ਵਾਰ ਇਹ ਜਨੂੰਨ ਨੌਕਰੀ ‘ਤੇ ਵੀ ਭਾਰੀ ਪੈ ਜਾਂਦਾ ਹੈ। ਅਜਿਹਾ ਹੀ ਇੱਕ ਦਿਲਚਸਪ ਅਤੇ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਕਰਮਚਾਰੀ ਨੇ FIFA World Cup Final 2026 ਦੇਖਣ ਲਈ ਮਹੀਨਾ ਪਹਿਲਾਂ ਹੀ ਜ਼ਬਰਦਸਤ ਪਲਾਨ ਬਣਾਇਆ ਸੀ। ਉਸ ਨੇ ਬੌਸ ਨੂੰ ਝੂਠ ਬੋਲ ਕੇ ਛੁੱਟੀ ਵੀ ਮਨਜ਼ੂਰ ਕਰਵਾ ਲਈ, ਪਰ ਸੋਸ਼ਲ ਮੀਡੀਆ ਦੀ ਇੱਕ ਰੀਲ ਨੇ ਆਖ਼ਰੀ ਵੇਲੇ ਉਸ ਦੀ ਸਾਰੇ ਪਲਾਨ ‘ਤੇ ਪਾਣੀ ਫੇਰ ਦਿੱਤਾ। ਇੰਸਟਾਗ੍ਰਾਮ ਦੀ ਇਹ ਵਾਇਰਲ ਰੀਲ ਸਿੱਧੀ ਬੌਸ ਦੇ ਸਾਹਮਣੇ ਪਹੁੰਚ ਗਈ ਅਤੇ ਕਰਮਚਾਰੀ ਦਾ ਝੂਠ ਬੇਨਕਾਬ ਹੋ ਗਿਆ। ਇਸ ਤੋਂ ਬਾਅਦ ਨਾ ਸਿਰਫ਼ ਉਸ ਦੀ ਛੁੱਟੀ ਰੱਦ ਹੋ ਗਈ, ਸਗੋਂ ਉਸ ਨੂੰ ਬੌਸ ਦੀ ਡਾਂਟ ਵੀ ਸੁਣਨੀ ਪਈ। Reddit ‘ਤੇ ਸਾਂਝਾ ਕੀਤਾ ਗਿਆ ਇਹ ਮਾਮਲਾ ਹੁਣ ਇੰਟਰਨੈੱਟ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ।
ਫੀਫਾ ਮੈਚਾਂ ਲਈ ਦਫ਼ਤਰ ਤੋਂ ਇੰਝ ਮਾਰਦਾ ਸੀ ਬੰਕ
Reddit ‘ਤੇ ਕੀਤੀ ਗਈ ਪੋਸਟ ਮੁਤਾਬਕ, ਇਹ ਕਰਮਚਾਰੀ ਪਿਛਲੇ ਇੱਕ ਮਹੀਨੇ ਤੋਂ ਲਗਾਤਾਰ ਦਫ਼ਤਰ ਤੋਂ ਛੁੱਟੀਆਂ ਲੈ ਰਿਹਾ ਸੀ। ਜਦੋਂ ਮੈਨੇਜਰ ਨੇ ਵਾਰ-ਵਾਰ ਛੁੱਟੀ ਲੈਣ ਬਾਰੇ ਸਵਾਲ ਕੀਤੇ ਤਾਂ ਉਸ ਨੇ ਇੱਕ ਨਵਾਂ ਤਰੀਕਾ ਅਪਣਾਇਆ। ਉਸ ਨੇ ਛੁੱਟੀਆਂ ਲੈਣੀਆਂ ਤਾਂ ਘੱਟ ਕਰ ਦਿੱਤੀਆਂ, ਪਰ ਦਫ਼ਤਰ ਦੇਰ ਨਾਲ ਆਉਣਾ ਸ਼ੁਰੂ ਕਰ ਦਿੱਤਾ। ਜਦੋਂ ਵੀ ਬੌਸ ਉਸ ਤੋਂ ਦੇਰ ਨਾਲ ਆਉਣ ਦਾ ਕਾਰਨ ਪੁੱਛਦਾ, ਤਾਂ ਉਹ ਹਰ ਵਾਰ ਟ੍ਰੈਫਿਕ ਜਾਮ ਦਾ ਉਹੀ ਪੁਰਾਣਾ ਬਹਾਨਾ ਬਣਾ ਦਿੰਦਾ ਸੀ।
ਬੌਸ ਨੇ ਫੀਫਾ ਦੇ ਸ਼ਡਿਊਲ ਨਾਲ ਮਿਲਾਇਆ ਰਿਕਾਰਡ, ਖੁੱਲ੍ਹ ਗਈ ਸਾਰੀ ਪੋਲ
ਕਹਾਣੀ ਵਿੱਚ ਮੋੜ ਉਸ ਵੇਲੇ ਆਇਆ ਜਦੋਂ ਇੱਕ ਹੋਰ ਮੈਨੇਜਰ ਨੇ ਮਜ਼ਾਕ ਵਿੱਚ ਕਿਹਾ ਕਿ ਸ਼ਾਇਦ ਇਹ ਕਰਮਚਾਰੀ ਰਾਤ ਭਰ ਜਾਗ ਕੇ ਫੀਫਾ ਵਰਲਡ ਕੱਪ ਦੇ ਮੈਚ ਦੇਖਦਾ ਹੈ, ਇਸ ਲਈ ਸਵੇਰੇ ਇਸ ਦੀ ਅੱਖ ਨਹੀਂ ਖੁੱਲ੍ਹਦੀ। ਪਰ ਬੌਸ ਨੇ ਇਸ ਗੱਲ ਨੂੰ ਗੰਭੀਰਤਾ ਨਾਲ ਲਿਆ ਅਤੇ ਕਰਮਚਾਰੀ ਦਾ ਪੁਰਾਣਾ ਰਿਕਾਰਡ ਖੰਗਾਲਣਾ ਸ਼ੁਰੂ ਕਰ ਦਿੱਤਾ। ਜਦੋਂ ਬੌਸ ਨੇ ਉਸ ਦੀਆਂ ਛੁੱਟੀਆਂ ਅਤੇ ਦੇਰ ਨਾਲ ਆਉਣ ਵਾਲੇ ਦਿਨਾਂ ਦਾ ਮਿਲਾਨ ਫਰਾਂਸ, ਪੁਰਤਗਾਲ ਅਤੇ ਅਰਜਨਟੀਨਾ ਵਰਗੀਆਂ ਵੱਡੀਆਂ ਟੀਮਾਂ ਦੇ ਮੈਚਾਂ ਦੇ ਸ਼ਡਿਊਲ ਨਾਲ ਕੀਤਾ, ਤਾਂ ਸੱਚ ਸਾਹਮਣੇ ਆ ਗਿਆ। ਕਰਮਚਾਰੀ ਨੇ ਠੀਕ ਉਨ੍ਹਾਂ ਹੀ ਦਿਨਾਂ ਛੁੱਟੀ ਲਈ ਸੀ ਜਾਂ ਉਹ ਦੇਰ ਨਾਲ ਦਫ਼ਤਰ ਪਹੁੰਚਿਆ ਸੀ, ਜਦੋਂ ਫੀਫਾ ਦੇ ਵੱਡੇ ਮੁਕਾਬਲੇ ਖੇਡੇ ਜਾ ਰਹੇ ਸਨ। ਇਸ ਤੋਂ ਬਾਅਦ ਉਸ ਨੂੰ ਸਖ਼ਤ ਚੇਤਾਵਨੀ ਦਿੱਤੀ ਗਈ।
ਇੱਕ ਮਹੀਨੇ ਪਹਿਲਾਂ ਬਣਾਈ ਯੋਜਨਾ ਨੂੰ ਇੰਸਟਾਗ੍ਰਾਮ ਰੀਲ ਨੇ ਕੀਤਾ ਫੇਲ
ਕਰਮਚਾਰੀ ਨੇ ਫੀਫਾ ਵਰਲਡ ਕੱਪ ਦਾ ਫਾਈਨਲ ਮੈਚ ਦੇਖਣ ਲਈ ਇੱਕ ਮਹੀਨਾ ਪਹਿਲਾਂ ਹੀ ਸੋਮਵਾਰ ਦੀ ਛੁੱਟੀ ਮਨਜ਼ੂਰ ਕਰਵਾ ਲਈ ਸੀ। ਛੁੱਟੀ ਦੀ ਅਰਜ਼ੀ ਵਿੱਚ ਉਸ ਨੇ ਕਾਰਨ ਪਰਿਵਾਰਕ ਸਮਾਗਮ ਲਿਖਿਆ ਸੀ। ਸਭ ਕੁਝ ਯੋਜਨਾ ਮੁਤਾਬਕ ਚੱਲ ਰਿਹਾ ਸੀ, ਪਰ ਵੀਕੈਂਡ ਦੌਰਾਨ ਮੈਨੇਜਰ ਦੇ ਸਾਹਮਣੇ ਇੰਸਟਾਗ੍ਰਾਮ ਦੀ ਇੱਕ ਰੀਲ ਆ ਗਈ। ਇਸ ਰੀਲ ਵਿੱਚ ਇੱਕ ਸਕੂਲ ਦੀ ਹੈੱਡਮਿਸਟ੍ਰੈੱਸ ਨੇ ਫੀਫਾ ਵਰਲਡ ਕੱਪ ਫਾਈਨਲ ਕਾਰਨ ਸੋਮਵਾਰ ਨੂੰ ਸਕੂਲ ਬੰਦ ਰੱਖਣ ਦਾ ਐਲਾਨ ਕੀਤਾ ਸੀ। ਇਹ ਵੀਡੀਓ ਦੇਖਦੇ ਹੀ ਮੈਨੇਜਰ ਨੂੰ ਆਪਣੇ ਕਰਮਚਾਰੀ ਦੀ ਸੋਮਵਾਰ ਵਾਲੀ ਛੁੱਟੀ ‘ਤੇ ਸ਼ੱਕ ਹੋ ਗਿਆ।
ਮੈਨੇਜਰ ਨੇ ਮੰਗਿਆ ਸਬੂਤ, ਰੀਲ ਭੇਜ ਕੇ ਕਿਹਾ- ‘ਕਿਸੇ ਹੋਰ ਨੂੰ ਬੇਵਕੂਫ ਬਣਾਈਂ’
ਮੈਨੇਜਰ ਨੇ ਤੁਰੰਤ ਕਰਮਚਾਰੀ ਨੂੰ ਸੁਨੇਹਾ ਭੇਜ ਕੇ ਦੱਸਿਆ ਕਿ ਸੋਮਵਾਰ ਦੀ ਛੁੱਟੀ ਰੱਦ ਕਰ ਦਿੱਤੀ ਗਈ ਹੈ। ਜਦੋਂ ਕਰਮਚਾਰੀ ਨੇ ਦਾਅਵਾ ਕੀਤਾ ਕਿ ਉਹ ਸੱਚਮੁੱਚ ਪਰਿਵਾਰਕ ਸਮਾਗਮ ਵਿੱਚ ਸ਼ਾਮਲ ਹੋਣ ਜਾ ਰਿਹਾ ਹੈ, ਤਾਂ ਮੈਨੇਜਰ ਨੇ ਉਸ ਤੋਂ ਰੇਲ ਦੀ ਟਿਕਟ ਜਾਂ ਵਿਆਹ ਦਾ ਕਾਰਡ ਦਿਖਾਉਣ ਲਈ ਕਿਹਾ। ਪਰ ਕਰਮਚਾਰੀ ਕੋਲ ਆਪਣੇ ਦਾਅਵੇ ਨੂੰ ਸਾਬਤ ਕਰਨ ਲਈ ਕੋਈ ਸਬੂਤ ਨਹੀਂ ਸੀ। ਇਸ ਤੋਂ ਬਾਅਦ ਮੈਨੇਜਰ ਨੇ ਉਸ ਨੂੰ ਉਹੀ ਵਾਇਰਲ ਇੰਸਟਾਗ੍ਰਾਮ ਰੀਲ ਦਾ ਲਿੰਕ ਭੇਜਦਿਆਂ ਲਿਖਿਆ, ‘ਕਿਸੇ ਹੋਰ ਨੂੰ ਬੇਵਕੂਫ ਬਣਾਈਂ।’ ਨਾਲ ਹੀ ਉਸ ਨੂੰ ਸਖ਼ਤ ਹਦਾਇਤ ਦਿੱਤੀ ਕਿ ਉਹ ਸੋਮਵਾਰ ਸਵੇਰੇ ਠੀਕ 9 ਵਜੇ ਦਫ਼ਤਰ ਪਹੁੰਚੇ।
ਇਹ ਵੀ ਪੜ੍ਹੋ
ਇਹ ਹੈ ਉਹ ਵਾਇਰਲ ਵੀਡੀਓ
View this post on Instagram
