ਸ਼ਰਾਬ ਦੇ ਪਿਆਲੇ ਤੋਂ ਭੜਕੀ ਚਿੰਗਾਰੀ ਨੇ ਰੈਸਟੋਰੈਂਟ ਵਿੱਚ ਲਗਾ ਦਿੱਤੀ ਅੱਗ

ਬਰਮਿੰਘਮ : ਇਥੇ ਦੇ ਇੱਕ ਇਟਾਲੀਅਨ ਰੈਸਟੋਰੈਂਟ ਵਿੱਚ ਖਾਣਾ ਖਾ ਰਹੇ ਲੋਕਾਂ ਵਿੱਚ ਓਸ ਵੇਲੇ ਭੱਜ ਨੱਠ ਮਚ ਗਈ ਜਦੋਂ ਉਥੇ ਸ਼ਰਾਬ ਦੀਆਂ ਪਿਆਲੀਆਂ ਦੇ ਆਲੇ ਦੁਆਲੇ ਸਜਾਵਟ ਵਾਸਤੇ ਸਪਾਰਕਲਰ ਦੀਆਂ ਚਿੰਗਾਰੀਆਂ ਨੇ ਰੈਸਟੋਰੈਂਟ ਵਿੱਚ ਇੱਕ ਹੈਂਗਿੰਗ ਵਾਲ ਡੈਕੋਰੇਸ਼ਨ ਨੂੰ ਆਪਣੀ ਚਪੇਟ ਵਿੱਚ ਲੈ ਲਿਆ ਅਤੇ ਉਥੇ ਅੱਗ ਭੜਕ ਗਈ। ਇਹ ਵਾਕਿਆ ਸ਼ਨੀਵਾਰ ਰਾਤ ਬਰਮਿੰਘਮ ਸਥਿਤ ‘ਦ ਆਰਕੇਡਿਯਨ ਸੈਂਟਰ’ ਵਿਚ ਬਣੇ ਇਕ ਇਟਾਲੀਅਨ ਰੈਸਟੋਰੈਂਟ ਵਿੱਚ ਵਾਪਰਿਆ ਸੀ ਅਤੇ ਉਸ ਤੋਂ ਬਾਅਦ ਉਥੇ ਖਾਣਾ ਖਾ ਰਹੇ ਲੋਕਾਂ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਅਤੇ ਉਹ ਜਾਨ ਬਚਾਉਣ ਵਾਸਤੇ ਬਾਹਰਲੇ ਪਾਸੇ ਭੱਜਣ ਲੱਗੇ। ਖੁਸ਼ਕਿਸਮਤੀ ਨਾਲ ਇਸ ਦੌਰਾਨ ਕੋਈ ਜ਼ਖਮੀ ਨਹੀਂ ਹੋਇਆ।

ਸਟਾਫ ਵੱਲੋਂ ਪਾਣੀ ਦੀਆਂ ਬਾਲਟੀਆਂ ਸੁੱਟੀਆਂ ਗਈਆਂ :

‘ਕੈਫ਼ੇ ਡੀ ਮਿਲਾਨੋ’ ਰੈਸਟੋਰੈਂਟ ਦੇ ਸਟਾਫ ਵੱਲੋਂ ਅੱਗ ਬੁਝਾਉਣ ਵਾਸਤੇ ਪਾਣੀ ਦੀਆਂ ਬਾਲਟੀਆਂ ਸੁੱਟੀਆਂ ਗਈਆਂ ਅਤੇ ਦਮਕਲ ਕਰਮਚਾਰੀਆਂ ਦੇ ਮੌਕੇ ਤੇ ਪੁੱਜਣ ਤੋਂ ਪਹਿਲਾਂ ਹੀ ਅੱਗ ਤੇ ਕਾਬੂ ਪਾ ਲਿਆ ਗਿਆ ਸੀ। ਇਸ ਘਟਨਾ ਦਾ ਇੱਕ ਫੁਟੇਜ ਟਿਕ-ਟਾਕ ਤੇ ਅਪਲੋਡ ਕੀਤਾ ਗਿਆ ਹੈ ਜਿਸ ਵਿੱਚ ਰੈਸਟੋਰੈਂਟ ਵਿੱਚ ਬੈਠ ਕੇ ਖਾਣਾ ਖਾ ਰਹੇ ਲੋਕਾਂ ਨੂੰ ਅੱਗ ਲੱਗਣ ਮਗਰੋਂ ਹੜਬੜਾਹਟ ਵਿੱਚ ਆਪਣਾ ਸਮਾਨ ਚੁੱਕ ਕੇ ਰੈਸਟੋਰੈਂਟ ਦੇ ਬਾਹਰਲੇ ਪਾਸੇ ਭੱਜਦੇ ਨਜ਼ਰ ਆ ਰਹੇ ਹਨ। ਇਸ 13 ਸੈਕਿੰਡ ਦੀ ਵੀਡੀਓ ਕਲਿਪ ਵਿੱਚ ਉੱਥੇ ਲੋਕਾਂ ਦੀ ਭੱਜ ਨੱਠ ਵੀ ਨਜ਼ਰ ਆਉਂਦੀ ਹੈ।

ਵਾਲ ਡੈਕੋਰੇਸ਼ਨ ਨੂੰ ਆਪਣੀ ਚਪੇਟ ਵਿੱਚ ਲੈ ਲਿਆ ਸੀ :

ਦੱਸਿਆ ਜਾਂਦਾ ਹੈ ਕਿ ਰੈਸਟੋਰੈਂਟ ਵਿੱਚ ਅੱਗ ਦਰਅਸਲ ਉਸ ਵੇਲੇ ਲੱਗੀ ਜਦੋਂ ਉਥੇ ਇੱਕ ਕੌਕਟੇਲ ਵਿੱਚ ਰੱਖੇ ਸਪਾਰਕਲਰ ਨੂੰ ਜਲਾਏ ਜਾਣ ਮਗਰੋਂ ਉਸ ਦੀਆਂ ਚਿੰਗਾਰਿਆਂ ਨੇ ਉਥੇ ਟੰਗੇ ਹੈਂਗਿੰਗ ਵਾਲ ਡੈਕੋਰੇਸ਼ਨ ਨੂੰ ਆਪਣੀ ਚਪੇਟ ਵਿੱਚ ਲੈ ਲਿਆ ਸੀ। ‘ਵੈਸਟ ਮਿਡਲੈਂਡਸ ਫਾਇਰ ਐਂਡ ਰੇਸਕਿਊ ਸਰਵਿਸ’ ਦੇ ਪ੍ਰਵਕਤਾ ਵੱਲੋਂ ਦਿੱਤੀ ਗਈ ਜਾਣਕਾਰੀ ਵਿੱਚ ਦੱਸਿਆ ਗਿਆ, ਹਰਸ ਸਟ੍ਰੀਟ ਤੇ ਬਣੇ ਇਸ ‘ਕੈਫ਼ੇ ਡੀ ਮਿਲਾਨੋ’ ਰੈਸਟੋਰੈਂਟ ਵਿੱਚ ਰਾਤ 11 ਵਜੇ ਸੱਦਿਆ ਗਿਆ ਸੀ। ਅਸੀਂ ਆਪਣੇ ਦੋ ਕਰਮਚਾਰੀਆਂ ਨੂੰ ਮੌਕੇ ਤੇ ਭੇਜਿਆ ਸੀ ਪਰ ਉਨ੍ਹਾਂ ਦੇ ਉੱਥੇ ਪੁੱਜਣ ਤੋਂ ਪਹਿਲਾਂ ਹੀ ਰੈਸਟੋਰੈਂਟ ਦੇ ਸਟਾਫ਼ ਵੱਲੋਂ ਅੱਗ ਤੇ ਕਾਬੂ ਪਾ ਲਿਆ ਗਿਆ ਸੀ। ਅਸੀਂ ਉੱਥੇ ਮੌਕੇ ਤੇ ਅਜਿਹਾ ਹਰ ਉਹ ਸਮਾਨ ਉੱਥੋਂ ਚੁਕਵਾ ਦਿੱਤਾ ਸੀ ਜਿਸ ਦੇ ਨਾਲ ਅੱਗ ਲੱਗਣ ਦਾ ਸ਼ਕ ਸੀ। ਰਾਤ ਕਰੀਬ 11.30 ਵਜੇ ਤੱਕ ਰੈਸਟੋਰੈਂਟ ਵਿੱਚ ਹਲਾਤ ਕਾਬੂ ਵਿੱਚ ਆ ਗਏ ਸਨ।