ਐਕਸੀਡੈਂਟ ਤੋਂ ਬਾਅਦ ਕੈਨੇਡਾ ਤੋਂ ਫ਼ਰਾਰ, ਭਾਰਤ ਤੋਂ ਪਹੁੰਚਿਆ ਕੈਲੀਫ਼ੋਰਨੀਆ; ਹੁਣ ਅਦਾਲਤ ਸੁਣਾਏਗੀ ਸਜ਼ਾ

ਕੈਨੇਡਾ ‘ਚ ਪੰਜਾਬੀ ਮੂਲ ਦੇ ਟਰੱਕ ਡਰਾਈਵਰ ਬਲਜੀਤ ਸਿੰਘ (29) ਨੇ ਸੜਕ ਹਾਦਸੇ ‘ਚ ਆਪਣਾ ਗੁਨਾਹ ਕਬੂਲ ਕਰ ਲਿਆ ਹੈ। ਕਿਊਬਕ ‘ਚ ਹੋਏ ਹਾਦਸੇ ‘ਚ ਇੱਕ ਮਾਂ ਅਤੇ ਉਸ ਦੇ ਪੁੱਤਰ ਦੀ ਮੌਤ ਹੋ ਗਈ ਸੀ, ਜਦਕਿ ਇਸ ਹਾਦਸੇ ‘ਚ ਪਿਤਾ ਗੰਭੀਰ ਜ਼ਖ਼ਮੀ ਹੋ ਗਿਆ। ਇਹ ਘਟਨਾ ਕਿਊਬਕ ਦੇ ਬ੍ਰੋਸਾਰਡ ਹਾਈਵੇਅ ‘ਤੇ 19 ਜੁਲਾਈ, 2022 ਨੂੰ ਵਾਪਰੀ ਸੀ। ਬਲਜੀਤ ਸਿੰਘ 53 ਫੁੱਟ ਲੰਬਾ ਟਰੈਕਟਰ-ਟ੍ਰੇਲਰ ਚਲਾ ਰਿਹਾ ਸੀ।

ਹਾਲ ਹੀ ‘ਚ ਇੱਕ ਅਦਾਲਤੀ ਸੁਣਵਾਈ ਦੌਰਾਨ, ਬਲਜੀਤ ਨੇ ਮੰਨਿਆ ਕਿ ਉਹ ਟਰੱਕ ਚਲਾਉਂਦੇ ਸਮੇਂ ਇੱਕ ਮੋਬਾਈਲ ਗੇਮ ਖੇਡ ਰਿਹਾ ਸੀ, ਜਿਸ ਕਾਰਨ ਇਹ ਘਾਤਕ ਟੱਕਰ ਹੋਈ। ਵਕੀਲਾਂ ਦੇ ਅਨੁਸਾਰ, ਉਸ ਦੇ ਧਿਆਨ ਭਟਕਣ ਕਾਰਨ ਟਰੱਕ ਨੇ ਕਈ ਵਾਹਨਾਂ ਨੂੰ ਟੱਕਰ ਮਾਰੀ। ਇਸ ਹਾਦਸੇ ‘ਚ 42 ਸਾਲਾ ਨੈਨਸੀ ਲੈਫ੍ਰਾਂਕੋਇਸ ਤੇ ਉਸਦੇ 11 ਸਾਲਾ ਪੁੱਤਰ, ਲੋਇਕ ਸ਼ੈਵਲੀਅਰ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਸੀ, ਜਦੋਂ ਕਿ ਪਤੀ ਦੀ ਹੱਡੀਆਂ ਫ੍ਰੈਕਚਰ ਹੋ ਗਈਆਂ ਸਨ। ਇਸ ਹਾਦਸੇ ‘ਚ ਲਗਭਗ 10 ਹੋਰ ਗੰਭੀਰ ਜ਼ਖਮੀ ਹੋ ਗਏ।

18 ਵਾਰ ਫ਼ੋਨ ਦੀ ਵਰਤੋਂ

ਜਾਂਚ ‘ਚ ਪਤਾ ਚਲਿਆ ਕਿ ਟਰੱਕ ਡਰਾਈਵਰ ਬਲਜੀਤ ਸਿੰਘ ਨੇ ਹਾਦਸੇ ਤੋਂ ਪਹਿਲਾਂ ਦੇ ਘੰਟੇ ‘ਚ ਘੱਟੋ-ਘੱਟ 18 ਵਾਰ ਆਪਣੇ ਫ਼ੋਨ ਦੀ ਵਰਤੋਂ ਕੀਤੀ ਸੀ। ਟਰੱਕ ਦੇ ਡੈਸ਼ਕੈਮ ਫੁਟੇਜ ‘ਚ ਉਹ ਟੱਕਰ ਦੇ ਸਮੇਂ ਵੀ ਗੇਮ ਖੇਡ ਰਿਹਾ ਸੀ, ਹਾਲਾਂਕਿ ਪੁਲਿਸ ਨੇ ਇਹ ਵੀਡੀਓ ਡਾਰੀ ਨਹੀਂ ਕੀਤੀ ਹੈ। ਸੜਕ ‘ਤੇ ਚੱਲ ਰਹੇ ਕੰਮ ਕਾਰਨ, ਆਵਾਜਾਈ ਹੌਲੀ ਚੱਲ ਰਹੀ ਸੀ। ਬਲਜੀਤ ਇਸ ਦੌਰਾਨ ਸਮੇਂ ਸਿਰ ਬ੍ਰੇਕ ਲਗਾਉਣ ‘ਚ ਅਸਫਲ ਰਿਹਾ। ਇੱਕ ਫੋਰੈਂਸਿਕ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਟੱਕਰ ਤੋਂ ਪਹਿਲਾਂ ਉਸ ਕੋਲ ਪ੍ਰਤੀਕਿਰਿਆ ਕਰਨ ਲਈ ਸਿਰਫ 0.35 ਸਕਿੰਟ ਸਨ, ਜਿਸ ‘ਚ ਉਹ ਪੂਰੀ ਤਰ੍ਹਾਂ ਅਸਫ਼ਲ ਰਿਹਾ।

ਬਲਜੀਤ ਮਾਂਟਰੀਅਲ ਦੀ ਲੌਂਗੂਇਲ ‘ਚ ਇੱਕ ਅਦਾਲਤ ਵਿੱਚ ਪੇਸ਼ ਹੋਇਆ, ਜਿੱਥੇ ਉ ਸਨੇ ਖਤਰਨਾਕ ਡਰਾਈਵਿੰਗ ਕਰਨ ਦੀ ਗੱਲ ਕਬੂਲ ਕੀਤੀ, ਜਿਸ ਕਾਰਨ ਦੋ ਲੋਕਾਂ ਦੀ ਮੌਤ ਹੋਈ ਤੇ ਕਈ ਗੰਭੀਰ ਜ਼ਖ਼ਮੀ ਹੋਏ ਸਨ। ਇਸ ਮਾਮਲੇ ‘ਚ ਉਸ ਨੂੰ ਸਜ਼ਾ 4 ਜੂਨ, 2026 ਨੂੰ ਸੁਣਾਈ ਜਾਵੇਗੀ।

ਹਾਦਸੇ ਤੋਂ ਬਾਅਦ ਕੈਨੇਡਾ ਤੋਂ ਫ਼ਰਾਰ

ਅਧਿਕਾਰੀਆਂ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਬਲਜੀਤ ਹਾਦਸੇ ਤੋਂ ਥੋੜ੍ਹੀ ਦੇਰ ਬਾਅਦ ਕੈਨੇਡਾ ਛੱਡ ਗਿਆ ਸੀ। ਉਸ ਨੂੰ ਹਾਦਸੇ ਦੀ ਅਗਲੀ ਸਵੇਰ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਤੇ ਉਸੇ ਦਿਨ ਬਾਅਦ ‘ਚ ਇੱਕ ਫਲਾਈਟ ਬੁੱਕ ਕੀਤੀ ਤੇ ਭਾਰਤ ਭੱਜ ਗਿਆ। ਭਾਰਤ ‘ਚ ਲੰਬਾ ਸਮਾਂ ਰਹਿਣ ਤੋਂ ਬਾਅਦ ਉਹ ਕੈਲੀਫੋਰਨੀਆ ਗਿਆ। ਜੁਲਾਈ 2023 ‘ਚ ਉਸਦੇ ਵਿਰੁੱਧ ਇੱਕ ਅੰਤਰਰਾਸ਼ਟਰੀ ਵਾਰੰਟ ਜਾਰੀ ਕੀਤਾ ਗਿਆ।

ਇਹ ਵੀ ਪੜ੍ਹੋ

ਜਰਮਨੀ ਦੇ ਗੁਰਦੁਆਰੇ 'ਚ ਹਿੰਸਕ ਝੜਪ, ਕਿਰਪਾਨਾਂ ਤੇ ਪੈਪਰ ਸਪਰੇਅ ਨਾਲ ਹਮਲਾ

ਗੱਲਬਾਤ ਲਈ ਉਤਸੁਕ ਅਮਰੀਕਾ, ਪਰ ਈਰਾਨ ਦਾ ਇਨਕਾਰ; ਕੀ ਸ਼ਰਤਾਂ ਅੱਗੇ ਝੁਕਣਗੇ ਟਰੰਪ?

ਹੁਣ ਹੋਰ ਗੱਲਬਾਤ ਦਾ ਪਲਾਨ ਨਹੀਂ... ਈਰਾਨੀ ਵਿਦੇਸ਼ ਮੰਤਰਾਲੇ ਦਾ ਬਿਆਨ

ਉਸ ਨੂੰ ਆਖਰਕਾਰ 21 ਅਗਸਤ, 2025 ਨੂੰ ਕੈਲੀਫੋਰਨੀਆ ‘ਚ ਅਮਰੀਕੀ ਸਟੇਟ ਏਜੰਟਾਂ ਨੇ ਗ੍ਰਿਫ਼ਤਾਰ ਕਰ ਲਿਆ ਤੇ ਉਸ ਨੂੰ ਸਤੰਬਰ 2025 ‘ਚ ਕੈਨੇਡਾ ਲਿਆਂਦਾ ਗਿਆ। ਬਲਜੀਤ ਸਿੰਘ ਕੋਲ ਕੈਨੇਡੀਅਨ ਨਾਗਰਿਕਤਾ ਵੀ ਹੈ ਤੇ ਘਟਨਾ ਦੇ ਸਮੇਂ ਉਹ ਓਨਟਾਰੀਓ ‘ਚ ਰਹਿ ਰਿਹਾ ਸੀ।