ਹੋਟਲ Wi-Fi ਬਣਿਆ ਹੈਕਰਾਂ ਦਾ ਹਥਿਆਰ! Microsoft ਨੇ ਯਾਤਰੀਆਂ ਨੂੰ ਕੀਤਾ ਅਲਰਟ, ਇੰਝ ਹੋ ਰਹੀ ਜਾਸੂਸੀ
Hotel Wi-Fi: ਹੋਟਲ ਦਾ Wi-Fi ਵਰਤਣ ਵਾਲੇ ਯਾਤਰੀਆਂ ਲਈ ਮਾਈਕ੍ਰੋਸਾਫਟ ਨੇ ਵੱਡਾ ਅਲਰਟ ਜਾਰੀ ਕੀਤਾ ਹੈ। ਹੈਕਰ ਫਰਜ਼ੀ ਲੌਗਇਨ ਅਤੇ ਸਾਫਟਵੇਅਰ ਅਪਡੇਟ ਦੇ ਜ਼ਰੀਏ ਯੂਜ਼ਰਜ਼ ਨੂੰ ਨਿਸ਼ਾਨਾ ਬਣਾ ਰਹੇ ਹਨ।
ਹੋਟਲ Wi-Fi ਬਣਿਆ ਹੈਕਰਾਂ ਦਾ ਹਥਿਆਰ!
ਜੇਕਰ ਤੁਸੀਂ ਹੋਟਲ ਜਾਂ ਕਿਸੇ ਪਬਲਿਕ ਥਾਂ ਦਾ Wi-Fi ਵਰਤਦੇ ਹੋ ਤਾਂ ਸਾਵਧਾਨ ਰਹਿਣ ਦੀ ਲੋੜ ਹੈ। ਮਾਈਕ੍ਰੋਸਾਫਟ ਨੇ ਯਾਤਰੀਆਂ ਨੂੰ ਇੱਕ ਨਵੇਂ ਸਾਈਬਰ ਹਮਲੇ ਨੂੰ ਲੈ ਕੇ ਚੇਤਾਵਨੀ ਦਿੱਤੀ ਹੈ। ਕੈਪਟਿਵਕ੍ਰੰਚ ਨਾਮ ਦੇ ਇਸ ਕੈਂਪੇਨ ਵਿੱਚ ਹੈਕਰ ਹੋਟਲ ਅਤੇ ਹੋਰ ਸਾਂਝੇ Wi-Fi ਨੈੱਟਵਰਕਾਂ ਰਾਹੀਂ ਯੂਜ਼ਰਜ਼ ਨੂੰ ਫਰਜ਼ੀ ਲੌਗਇਨ ਪੇਜ ਅਤੇ ਖਤਰਨਾਕ ਵੈੱਬਸਾਈਟਾਂ ‘ਤੇ ਭੇਜ ਸਕਦੇ ਹਨ। ਇਸ ਨਾਲ ਪਾਸਵਰਡ, ਅਕਾਊਂਟ ਅਤੇ ਜ਼ਰੂਰੀ ਜਾਣਕਾਰੀ ਚੋਰੀ ਹੋਣ ਦਾ ਖ਼ਤਰਾ ਰਹਿੰਦਾ ਹੈ। ਮਾਈਕ੍ਰੋਸਾਫਟ ਮੁਤਾਬਕ, ਕੁਝ ਮਾਮਲਿਆਂ ਵਿੱਚ ਹਮਲਾਵਰ ਡਿਵਾਈਸ ਵਿੱਚ ਮੈਲਵੇਅਰ ਇੰਸਟਾਲ ਕਰਕੇ ਉਸ ਦਾ ਰਿਮੋਟ ਕੰਟਰੋਲ ਵੀ ਹਾਸਲ ਕਰ ਸਕਦੇ ਹਨ।
ਹੋਟਲ Wi-Fi ਰਾਹੀਂ ਇਸ ਤਰ੍ਹਾਂ ਹੋ ਰਿਹਾ ਸਾਈਬਰ ਹਮਲਾ
ਮਾਈਕ੍ਰੋਸਾਫਟ ਥ੍ਰੈਟ ਇੰਟੈਲੀਜੈਂਸ ਮੁਤਾਬਕ, ਇਹ ਹਮਲਾ ਮਈ 2026 ਦੀ ਸ਼ੁਰੂਆਤ ਤੋਂ ਹੌਸਪਿਟੈਲਿਟੀ ਨੈੱਟਵਰਕਾਂ ‘ਤੇ ਦੇਖਿਆ ਗਿਆ ਹੈ। ਇਨ੍ਹਾਂ ਵਿੱਚ ਹੋਟਲ, ਕਾਨਫਰੰਸ ਸੈਂਟਰ ਅਤੇ ਹੋਰ ਜਨਤਕ ਥਾਵਾਂ ਦੇ ਅਜਿਹੇ Wi-Fi ਨੈੱਟਵਰਕ ਸ਼ਾਮਲ ਹਨ, ਜਿੱਥੇ ਇੰਟਰਨੈੱਟ ਚਲਾਉਣ ਤੋਂ ਪਹਿਲਾਂ ਯੂਜ਼ਰ ਨੂੰ ਲੌਗਇਨ ਕਰਨਾ ਜਾਂ ਕੁਝ ਨਿਯਮ ਸਵੀਕਾਰ ਕਰਨੇ ਪੈਂਦੇ ਹਨ। ਹਮਲਾਵਰ ਅਜਿਹੇ ਨੈੱਟਵਰਕਾਂ ਦੇ DNS ਅਤੇ ਵੈੱਬ ਟ੍ਰੈਫਿਕ ਨਾਲ ਹੇਰਾਫੇਰੀ ਕਰ ਸਕਦੇ ਹਨ। ਇਸ ਤੋਂ ਬਾਅਦ ਯੂਜ਼ਰ ਨੂੰ ਬਿਨਾਂ ਤੁਰੰਤ ਪਤਾ ਲੱਗੇ ਫਰਜ਼ੀ ਮਾਈਕ੍ਰੋਸਾਫਟ ਲੌਗਇਨ ਪੇਜ ਜਾਂ ਕਿਸੇ ਖਤਰਨਾਕ ਵੈੱਬਸਾਈਟ ‘ਤੇ ਭੇਜਿਆ ਜਾ ਸਕਦਾ ਹੈ। ਇਸ ਕਾਰਨ ਲੌਗਇਨ ਜਾਣਕਾਰੀ ਅਤੇ ਹੋਰ ਅਕਾਊਂਟ ਵੀ ਖ਼ਤਰੇ ਵਿੱਚ ਪੈ ਸਕਦੇ ਹਨ।
ਫਰਜ਼ੀ ਅਪਡੇਟ ਬਣਾ ਕੇ ਡਿਵਾਈਸ ਵਿੱਚ ਦਾਖਲ ਹੋ ਰਹੇ ਹੈਕਰ
ਸਟੌਰਮ-2945 ਯੂਜ਼ਰਜ਼ ਨੂੰ ਫਰਜ਼ੀ ਸਾਫਟਵੇਅਰ ਅਤੇ ਬ੍ਰਾਊਜ਼ਰ ਅਪਡੇਟ ਸਕ੍ਰੀਨ ਰਾਹੀਂ ਵੀ ਨਿਸ਼ਾਨਾ ਬਣਾ ਰਿਹਾ ਹੈ। ਸਕ੍ਰੀਨ ‘ਤੇ ਅਜਿਹਾ ਦਿਖਾਇਆ ਜਾਂਦਾ ਹੈ ਕਿ ਕੰਪਿਊਟਰ ਵਿੱਚ ਵਿੰਡੋਜ਼, ਬ੍ਰਾਊਜ਼ਰ, ਸਕਿਓਰਿਟੀ ਜਾਂ ਕਿਸੇ ਹੋਰ ਸਾਫਟਵੇਅਰ ਦਾ ਅਪਡੇਟ ਕਰਨਾ ਜ਼ਰੂਰੀ ਹੈ। ਯੂਜ਼ਰ ਵੱਲੋਂ ਦਿੱਤੇ ਗਏ ਨਿਰਦੇਸ਼ਾਂ ਦੀ ਪਾਲਣਾ ਕਰਨ ‘ਤੇ ਉਸ ਦੇ ਡਿਵਾਈਸ ਵਿੱਚ ਖਤਰਨਾਕ ਸਾਫਟਵੇਅਰ ਇੰਸਟਾਲ ਹੋ ਸਕਦਾ ਹੈ। ਮਾਈਕ੍ਰੋਸਾਫਟ ਨੇ ਦੱਸਿਆ ਕਿ ਇਸ ਮੁਹਿੰਮ ਵਿੱਚ ਕੌਰਨਫਲੈਕ ਨਾਮ ਦਾ ਵਿੰਡੋਜ਼-ਆਧਾਰਿਤ ਰਿਮੋਟ ਐਕਸੈਸ ਟ੍ਰੋਜਨ ਵੀ ਪਾਇਆ ਗਿਆ ਹੈ, ਜਿਸ ਨੂੰ Go ਪ੍ਰੋਗਰਾਮਿੰਗ ਭਾਸ਼ਾ ਵਿੱਚ ਲਿਖਿਆ ਗਿਆ ਹੈ।
ਕੌਰਨਫਲੇਕਸ ਤੋਂ ਚੋਰੀ ਹੋ ਸਕਦਾ ਹੈ ਨਿੱਜੀ ਡੇਟਾ
ਕੌਰਨਫਲੇਕ ਮਾਲਵੇਅਰ ਹਮਲਾਵਰਾਂ ਨੂੰ ਪ੍ਰਭਾਵਿਤ ਕੰਪਿਊਟਰ ‘ਤੇ ਕਾਫ਼ੀ ਹੱਦ ਤੱਕ ਕੰਟਰੋਲ ਦੇ ਸਕਦਾ ਹੈ। ਮਾਈਕ੍ਰੋਸਾਫਟ ਮੁਤਾਬਕ, ਇਹ ਫਾਈਲਾਂ, ਪਾਸਵਰਡ ਅਤੇ ਸੈਸ਼ਨ ਨਾਲ ਜੁੜੀ ਜਾਣਕਾਰੀ ਇਕੱਠੀ ਕਰ ਸਕਦਾ ਹੈ, ਕੀਬੋਰਡ ‘ਤੇ ਦਬਾਈਆਂ ਜਾਣ ਵਾਲੀਆਂ ਕੀਜ਼ ਨੂੰ ਰਿਕਾਰਡ ਕਰ ਸਕਦਾ ਹੈ ਅਤੇ ਜੁੜੇ ਹੋਏ ਡਿਵਾਈਸਾਂ ਦੀ ਨਿਗਰਾਨੀ ਕਰ ਸਕਦਾ ਹੈ। ਇਹ ਆਡੀਓ ਅਤੇ ਵੀਡੀਓ ਦੀ ਨਿਗਰਾਨੀ ਦੇ ਨਾਲ ਸਿਸਟਮ ਤੱਕ ਰਿਮੋਟ ਐਕਸੈੱਸ ਵੀ ਦੇ ਸਕਦਾ ਹੈ। ਮਾਲਵੇਅਰ ਕੰਪਿਊਟਰ ਵਿੱਚ ਬਣੇ ਰਹਿਣ ਲਈ ਆਪਣੇ ਆਪ ਸ਼ੁਰੂ ਹੋਣ ਦੇ ਕਈ ਤਰੀਕੇ ਬਣਾਉਂਦਾ ਹੈ ਅਤੇ ਵੈਧ ਵਿੰਡੋਜ਼ ਸਰਵਿਸ ਤੇ ਪ੍ਰੋਸੈਸ ਵਾਂਗ ਦਿਖਣ ਦੀ ਕੋਸ਼ਿਸ਼ ਵੀ ਕਰ ਸਕਦਾ ਹੈ।
ਐਂਡਰਾਇਡ ਯੂਜ਼ਰ ਵੀ ਰਹਿਣ ਸਾਵਧਾਨ
ਮਾਈਕ੍ਰੋਸਾਫਟ ਨੂੰ ਅਜਿਹੇ ਸੰਕੇਤ ਵੀ ਮਿਲੇ ਹਨ ਕਿ ਇਸੇ ਤਰ੍ਹਾਂ ਦੀ ਤਕਨੀਕ ਐਂਡਰਾਇਡ ਯੂਜ਼ਰਾਂ ਖ਼ਿਲਾਫ਼ ਵੀ ਵਰਤੀ ਜਾ ਸਕਦੀ ਹੈ। ਕੁਝ ਖ਼ਤਰਨਾਕ ਪੇਜ ਐਂਡਰਾਇਡ ਯੂਜ਼ਰਾਂ ਨੂੰ APK ਫਾਈਲ ਡਾਊਨਲੋਡ ਅਤੇ ਇੰਸਟਾਲ ਕਰਨ ਲਈ ਕਹਿ ਸਕਦੇ ਹਨ। ਮਾਈਕ੍ਰੋਸਾਫਟ ਮੁਤਾਬਕ, ਇਹ ਮੁਹਿੰਮ ਖ਼ਾਸ ਤੌਰ ‘ਤੇ ਕਾਰਪੋਰੇਟ ਯਾਤਰੀਆਂ ਨੂੰ ਨਿਸ਼ਾਨਾ ਬਣਾਉਂਦੀ ਦਿਖਾਈ ਦਿੰਦੀ ਹੈ, ਕਿਉਂਕਿ ਹੋਟਲ ਅਤੇ ਸਾਂਝੇ Wi-Fi ਨੈੱਟਵਰਕਾਂ ਰਾਹੀਂ ਹਮਲਾਵਰ ਕੰਮ ਨਾਲ ਜੁੜੇ ਅਕਾਊਂਟ ਅਤੇ ਡਿਵਾਈਸ ਵਰਤਣ ਵਾਲੇ ਲੋਕਾਂ ਤੱਕ ਪਹੁੰਚ ਬਣਾ ਸਕਦੇ ਹਨ। ਕੰਪਨੀ ਨੇ ਯਾਤਰੀਆਂ ਅਤੇ ਸੰਗਠਨਾਂ ਨੂੰ ਪਬਲਿਕ Wi-Fi ਦੀ ਵਰਤੋਂ ਕਰਦੇ ਸਮੇਂ ਸਾਵਧਾਨ ਰਹਿਣ ਅਤੇ ਅਚਾਨਕ ਦਿਖਾਈ ਦੇਣ ਵਾਲੇ ਅਪਡੇਟ ਜਾਂ ਲੌਗਇਨ ਮੈਸੇਜ ਤੋਂ ਸੁਚੇਤ ਰਹਿਣ ਦੀ ਸਲਾਹ ਦਿੱਤੀ ਹੈ। ਮਾਈਕ੍ਰੋਸਾਫਟ ਇਸ ਮੁਹਿੰਮ ਦੀ ਜਾਂਚ ਐਂਥਰੋਪਿਕ ਅਤੇ ਓਪਨਏਆਈ ਸਮੇਤ ਸੁਰੱਖਿਆ ਭਾਈਵਾਲਾਂ ਨਾਲ ਮਿਲ ਕੇ ਕਰ ਰਿਹਾ ਹੈ।