IPL 2026: ਰੋਹਿਤ ਦੀ ਵਾਪਸੀ ਨੇ ਬਦਲੀ ਮੁੰਬਈ ਦੀ ਕਿਸਮਤ, ਲਖਨਊ ਦੀ ਲਗਾਤਾਰ ਛੇਵੀਂ ਹਾਰ

ਮੁੰਬਈ ਇੰਡੀਅਨਜ਼ ਨੇ ਲਗਾਤਾਰ ਚਾਰ ਹਾਰਾਂ ਦਾ ਸਿਲਸਿਲਾ ਤੋੜਦਿਆਂ ਆਪਣੇ ਘਰੇਲੂ ਮੈਦਾਨ ਵਾਨਖੇੜੇ ਸਟੇਡੀਅਮ ਵਿੱਚ ਸ਼ਾਨਦਾਰ ਜਿੱਤ ਦਰਜ ਕੀਤੀ ਹੈ। ਆਈਪੀਐਲ 2026 ਦੇ ਇਸ ਕਰੋ ਜਾਂ ਮਰੋ ਵਾਲੇ ਅਹਿਮ ਮੁਕਾਬਲੇ ਵਿੱਚ ਮੁੰਬਈ ਨੇ ਲਖਨਊ ਸੁਪਰ ਜਾਇੰਟਸ ਨੂੰ ਮਾਤ ਦਿੱਤੀ। ਕਪਤਾਨ ਹਾਰਦਿਕ ਪਾਂਡਿਆ ਦੀ ਗੈਰ-ਹਾਜ਼ਰੀ ਵਿੱਚ ਮੈਦਾਨ ਵਿੱਚ ਉਤਰੀ ਮੁੰਬਈ ਦੀ ਟੀਮ ਨੂੰ ਸਾਬਕਾ ਕਪਤਾਨ ਰੋਹਿਤ ਸ਼ਰਮਾ ਦੀ ਵਾਪਸੀ ਦਾ ਵੱਡਾ ਫ਼ਾਇਦਾ ਮਿਲਿਆ। ਰੋਹਿਤ ਨੇ ਜ਼ਬਰਦਸਤ ਅਰਧ ਸੈਂਕੜਾ ਜੜਿਆ ਅਤੇ ਰਾਇਨ ਰਿਕਲਟਨ ਦੇ ਨਾਲ ਮਿਲ ਕੇ ਸੈਂਕੜੇ ਦੀ ਸਾਂਝੇਦਾਰੀ ਕੀਤੀ, ਜਿਸ ਦੇ ਦਮ ‘ਤੇ ਮੁੰਬਈ ਨੇ 229 ਦੌੜਾਂ ਦਾ ਵੱਡਾ ਟੀਚਾ 8 ਗੇਂਦਾਂ ਪਹਿਲਾਂ ਹੀ ਹਾਸਲ ਕਰ ਲਿਆ।

ਤੇਜ਼ ਸ਼ੁਰੂਆਤ ਤੋਂ ਬਾਅਦ ਸੁਸਤ ਪਈ ਲਖਨਊ ਦੀ ਪਾਰੀ

ਵਾਨਖੇੜੇ ਸਟੇਡੀਅਮ ਵਿੱਚ ਇੱਕ ਵਾਰ ਫਿਰ ਬੱਲੇਬਾਜ਼ਾਂ ਦਾ ਦਬਦਬਾ ਰਿਹਾ ਅਤੇ ਗੇਂਦਬਾਜ਼ਾਂ ਦੀ ਸਖ਼ਤ ਪ੍ਰੀਖਿਆ ਹੋਈ। ਇਸ ਸੀਜ਼ਨ ਦੇ ਹੋਰਨਾਂ ਮੈਚਾਂ ਵਾਂਗ ਇੱਥੇ ਵੀ ਦੋਵਾਂ ਪਾਰੀਆਂ ਵਿੱਚ 200 ਤੋਂ ਵੱਧ ਦੌੜਾਂ ਬਣੀਆਂ। ਲਖਨਊ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 20 ਓਵਰਾਂ ਵਿੱਚ 228 ਦੌੜਾਂ ਬਣਾਈਆਂ, ਪਰ ਇੱਕ ਸਮੇਂ ਇਹ ਸਕੋਰ ਹੋਰ ਵੀ ਵੱਡਾ ਹੁੰਦਾ ਜਾਪ ਰਿਹਾ ਸੀ। ਲਖਨਊ ਲਈ ਮਿਸ਼ੇਲ ਮਾਰਸ਼ (44), ਨਿਕੋਲਸ ਪੂਰਨ ਅਤੇ ਜੌਸ਼ ਇੰਗਲਿਸ ਨੇ ਵਿਸਫੋਟਕ ਬੱਲੇਬਾਜ਼ੀ ਕਰਦਿਆਂ ਪਹਿਲੇ 10 ਓਵਰਾਂ ਵਿੱਚ ਹੀ 141 ਦੌੜਾਂ ਬਣਾ ਲਈਆਂ ਸਨ।

ਖ਼ਰਾਬ ਫਾਰਮ ਨਾਲ ਜੂਝ ਰਹੇ ਨਿਕੋਲਸ ਪੂਰਨ ਨੇ ਅੱਜ ਆਪਣਾ ਜਲਵਾ ਦਿਖਾਇਆ ਅਤੇ ਮਹਿਜ਼ 21 ਗੇਂਦਾਂ ਵਿੱਚ 63 ਦੌੜਾਂ ਬਣਾਈਆਂ। ਉਨ੍ਹਾਂ ਨੇ ਸਿਰਫ਼ 17 ਗੇਂਦਾਂ ਵਿੱਚ 8 ਛੱਕਿਆਂ ਦੀ ਮਦਦ ਨਾਲ ਅਰਧ ਸੈਂਕੜਾ ਪੂਰਾ ਕੀਤਾ। ਹਾਲਾਂਕਿ, ਅਗਲੇ 10 ਓਵਰਾਂ ਵਿੱਚ ਮੁੰਬਈ ਦੇ ਗੇਂਦਬਾਜ਼ਾਂ ਨੇ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਲਖਨਊ ਨੂੰ 250 ਦੇ ਅੰਕੜੇ ਤੱਕ ਪਹੁੰਚਣ ਤੋਂ ਰੋਕ ਦਿੱਤਾ। ਮੁੰਬਈ ਵੱਲੋਂ ਕਾਰਬਿਨ ਬੌਸ਼ ਨੇ ਸਭ ਤੋਂ ਵੱਧ 2 ਵਿਕਟਾਂ ਲਈਆਂ।

ਰੋਹਿਤ ਅਤੇ ਰਿਕਲਟਨ ਦੀ ਤੂਫ਼ਾਨੀ ਪਾਰੀ

ਟੀਚੇ ਦਾ ਪਿੱਛਾ ਕਰਨ ਉਤਰੀ ਮੁੰਬਈ ਇੰਡੀਅਨਜ਼ ਨੂੰ ਰੋਹਿਤ ਸ਼ਰਮਾ ਅਤੇ ਰਾਇਨ ਰਿਕਲਟਨ ਨੇ ਧਮਾਕੇਦਾਰ ਸ਼ੁਰੂਆਤ ਦਿੱਤੀ। ਦੋਵਾਂ ਨੇ ਮਿਲ ਕੇ 10.4 ਓਵਰਾਂ ਵਿੱਚ 143 ਦੌੜਾਂ ਦੀ ਤੂਫ਼ਾਨੀ ਸਾਂਝੇਦਾਰੀ ਕੀਤੀ। ਸੱਟ ਕਾਰਨ ਪਿਛਲੇ 5 ਮੈਚਾਂ ਤੋਂ ਬਾਹਰ ਰਹੇ ਰੋਹਿਤ ਸ਼ਰਮਾ ਨੇ ਵਾਪਸੀ ਕਰਦਿਆਂ 27 ਗੇਂਦਾਂ ਵਿੱਚ ਅਰਧ ਸੈਂਕੜਾ ਜੜਿਆ, ਜਦਕਿ ਰਿਕਲਟਨ ਨੇ 22 ਗੇਂਦਾਂ ਵਿੱਚ ਆਪਣੀ ਫਿਫਟੀ ਪੂਰੀ ਕੀਤੀ। ਹਾਲਾਂਕਿ ਦੋਵੇਂ ਬੱਲੇਬਾਜ਼ ਆਪਣੇ ਸੈਂਕੜੇ ਤੋਂ ਖੁੰਝ ਗਏ। ਰਿਕਲਟਨ ਨੇ 32 ਗੇਂਦਾਂ ਵਿੱਚ 83 ਅਤੇ ਰੋਹਿਤ ਨੇ 44 ਗੇਂਦਾਂ ਵਿੱਚ 84 ਦੌੜਾਂ ਦੀ ਪਾਰੀ ਖੇਡੀ।

ਮੁੰਬਈ ਨੇ ਲਖਨਊ ਦੇ ਉਲਟ ਆਪਣੀ ਬੱਲੇਬਾਜ਼ੀ ਦੀ ਰਫ਼ਤਾਰ ਨੂੰ ਘੱਟ ਨਹੀਂ ਹੋਣ ਦਿੱਤਾ। ਰੋਹਿਤ ਦੇ ਆਊਟ ਹੋਣ ਤੋਂ ਬਾਅਦ ਤਿਲਕ ਵਰਮਾ ਅਤੇ ਸੂਰਿਆਕੁਮਾਰ ਯਾਦਵ ਜਲਦੀ ਆਊਟ ਹੋ ਗਏ, ਪਰ ਨਮਨ ਧੀਰ ਨੇ 12 ਗੇਂਦਾਂ ਵਿੱਚ ਨਾਬਾਦ 23 ਦੌੜਾਂ ਬਣਾ ਕੇ ਟੀਮ ਨੂੰ ਜਿੱਤ ਦਿਵਾਈ। ਮੁੰਬਈ ਨੇ 18.4 ਓਵਰਾਂ ਵਿੱਚ 4 ਵਿਕਟਾਂ ਗੁਆ ਕੇ ਟੀਚਾ ਹਾਸਲ ਕਰ ਲਿਆ। ਇਸ ਸੀਜ਼ਨ ਵਿੱਚ 10 ਮੈਚਾਂ ਵਿੱਚ ਮੁੰਬਈ ਦੀ ਇਹ ਤੀਜੀ ਜਿੱਤ ਹੈ, ਜਦਕਿ ਲਖਨਊ ਲਈ ਇਹ ਲਗਾਤਾਰ ਛੇਵੀਂ ਹਾਰ ਸਾਬਤ ਹੋਈ।

ਇਹ ਵੀ ਪੜ੍ਹੋ

ਪੰਜਾਬ ਦੀ ਦੂਜੀ ਹਾਰ, ਹੋਲਡਰ ਦੇ ਦਮ 'ਤੇ ਗੁਜਰਾਤ ਨੇ ਲਗਾਈ ਜਿੱਤ ਦੀ ਹੈਟ੍ਰਿਕ

ਚੇਨਈ ਨੇ ਮੁੰਬਈ ਨੂੰ ਦੂਜੀ ਵਾਰ ਚਟਾਈ ਧੂੜ, ਦਰਜ ਕੀਤੀ ਸੀਜ਼ਨ ਦੀ ਚੌਥੀ ਜਿੱਤ

ਸਟਾਰਕ ਤੇ ਰਾਹੁਲ ਦੇ ਦਮ 'ਤੇ ਦਿੱਲੀ ਨੇ ਰਾਜਸਥਾਨ ਨੂੰ ਦਿੱਤੀ ਕਰਾਰੀ ਮਾਤ