LPU ਵਿਦਿਆਰਥੀਆਂ ਬਾਰੇ ਡਾਕਟਰ ਦੇ ਦਾਅਵੇ ਨਾਲ ਵਿਵਾਦ, ਯੂਨੀਵਰਸਿਟੀ ਨੇ ਹਾਇਰ ਅਥਾਰਟੀ ਨੂੰ ਦਿੱਤੀ ਜਾਣਕਾਰੀ
ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਹੋਈ ਹੈ। ਉੱਥੇ ਹੀ, LPU ਮੈਨੇਜਮੈਂਟ ਨੇ ਮਾਮਲੇ ਦੀ ਜਾਣਕਾਰੀ ਉੱਚ ਅਧਿਕਾਰੀਆਂ ਨੂੰ ਦੇਣ ਦੀ ਗੱਲ ਕਹੀ ਹੈ ਤੇ ਕਿਹਾ ਹੈ ਕਿ ਇਸ ਸਬੰਧੀ ਅਧਿਕਾਰਤ ਬਿਆਨ ਉੱਚ ਅਧਿਕਾਰੀਆਂ ਵੱਲੋਂ ਜਾਰੀ ਕੀਤਾ ਜਾਵੇਗਾ।
ਜਲੰਧਰ ਦੀ ਇੱਕ ਮਹਿਲਾ ਡਾਕਟਰ ਦੇ ਉਸ ਦਾਅਵੇ ਤੋਂ ਬਾਅਦ ਸਵਾਲ ਖੜ੍ਹੇ ਹੋ ਗਏ ਹਨ, ਜਿਸ ‘ਚ ਉਨ੍ਹਾਂ ਨੇ ਫਗਵਾੜਾ ਸਥਿਤ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ (LPU) ਦੇ ਵਿਦਿਆਰਥੀਆਂ ਨਾਲ ਜੁੜੇ ਕਥਿਤ ਅਣਚਾਹੀ ਗਰਭ ਅਵਸਥਾ ਦੇ ਮਾਮਲਿਆਂ ਦਾ ਜ਼ਿਕਰ ਕੀਤਾ ਹੈ। ਡਾਕਟਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਸੈਂਟਰ ‘ਤੇ ਕਈ ਵਾਰ ਲਿਵ-ਇਨ ਰਿਲੇਸ਼ਨਸ਼ਿਪ ‘ਚ ਰਹਿਣ ਵਾਲੇ ਜੋੜੇ ਅਣਚਾਹੀ ਗਰਭ ਅਵਸਥਾ ਤੋਂ ਬਾਅਦ ਮੈਡੀਕਲ ਸਲਾਹ ਤੇ ਇਲਾਜ ਲਈ ਪਹੁੰਚਦੇ ਹਨ। ਡਾਕਟਰ ਨੇ ਇਹ ਵੀ ਦਾਅਵਾ ਕੀਤਾ ਕਿ ਇਨ੍ਹਾਂ ‘ਚ ਵਿਦੇਸ਼ੀ ਵਿਦਿਆਰਥੀ-ਵਿਦਿਆਰਥਣਾਂ ਵੀ ਸ਼ਾਮਲ ਰਹੇ ਹਨ।
ਹਾਲਾਂਕਿ, ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਤੌਰ ‘ਤੇ ਪੁਸ਼ਟੀ ਨਹੀਂ ਹੋਈ ਹੈ। ਉੱਥੇ ਹੀ, LPU ਮੈਨੇਜਮੈਂਟ ਨੇ ਮਾਮਲੇ ਦੀ ਜਾਣਕਾਰੀ ਉੱਚ ਅਧਿਕਾਰੀਆਂ ਨੂੰ ਦੇਣ ਦੀ ਗੱਲ ਕਹੀ ਹੈ ਤੇ ਕਿਹਾ ਹੈ ਕਿ ਇਸ ਸਬੰਧੀ ਅਧਿਕਾਰਤ ਬਿਆਨ ਉੱਚ ਅਧਿਕਾਰੀਆਂ ਵੱਲੋਂ ਜਾਰੀ ਕੀਤਾ ਜਾਵੇਗਾ।
ਡਾਕਟਰ ਨੇ ਵੀਡੀਓ ‘ਚ ਕੀਤਾ ਦਾਅਵਾ
ਜਲੰਧਰ ਦੇ ਇੱਕ ਫਰਟੀਲਿਟੀ ਸੈਂਟਰ ਨਾਲ ਜੁੜੀ ਡਾਕਟਰ ਮਨਦੀਪ ਕੌਰ ਨੇ ਇੱਕ ਵੀਡੀਓ ‘ਚ ਦਾਅਵਾ ਕੀਤਾ ਕਿ LPU ਨਾਲ ਜੁੜੇ ਕਈ ਵਿਦਿਆਰਥੀ ਲਿਵ-ਇਨ ਰਿਲੇਸ਼ਨਸ਼ਿਪ ‘ਚ ਰਹਿੰਦੇ ਹੋਏ ਅਣਚਾਹੀ ਗਰਭ ਅਵਸਥਾ ਦੀ ਸਥਿਤੀ ‘ਚ ਉਨ੍ਹਾਂ ਕੋਲ ਪਹੁੰਚਦੇ ਹਨ।
ਡਾਕਟਰ ਮੁਤਾਬਕ, ਇਨ੍ਹਾਂ ਮਾਮਲਿਆਂ ‘ਚ ਕਈ ਵਾਰ ਵਿਦੇਸ਼ੀ ਵਿਦਿਆਰਥੀ-ਵਿਦਿਆਰਥਣਾਂ ਵੀ ਸ਼ਾਮਲ ਹੁੰਦੇ ਹਨ। ਉਨ੍ਹਾਂ ਇੱਕ ਵਿਦੇਸ਼ੀ ਮਹਿਲਾ ਦਾ ਉਦਾਹਰਨ ਦਿੰਦਿਆਂ ਦਾਅਵਾ ਕੀਤਾ ਕਿ ਉਹ ਗਰਭਵਤੀ ਸੀ ਤੇ ਉਸ ਸਮੇਂ ਉਸ ਦਾ ਪਾਰਟਨਰ ਉਸ ਦੇ ਨਾਲ ਮੌਜੂਦ ਨਹੀਂ ਸੀ। ਡਾਕਟਰ ਦੇ ਅਨੁਸਾਰ, ਮਹਿਲਾ ਦੀ ਸਹਿਮਤੀ ਲੈਣ ਤੋਂ ਬਾਅਦ ਉਸ ਨੂੰ MTP ਕਿਟ ਦਿੱਤੀ ਗਈ ਤੇ ਇੱਕ ਹਫ਼ਤੇ ਬਾਅਦ ਦੁਬਾਰਾ ਜਾਂਚ ਲਈ ਬੁਲਾਇਆ ਗਿਆ।
ਬਿਨਾਂ ਡਾਕਟਰੀ ਸਲਾਹ ਦਵਾਈ ਨਾ ਲੈਣ ਦੀ ਸਲਾਹ
ਡਾਕਟਰ ਮਨਦੀਪ ਕੌਰ ਨੇ ਕਿਹਾ ਕਿ ਅਣਚਾਹੀ ਗਰਭ ਅਵਸਥਾ ਦੀ ਸਥਿਤੀ ‘ਚ ਬਿਨਾਂ ਡਾਕਟਰੀ ਸਲਾਹ ਦੇ ਕਿਸੇ ਵੀ ਤਰ੍ਹਾਂ ਦੀ ਦਵਾਈ ਲੈਣਾ ਖ਼ਤਰਨਾਕ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਮੈਡੀਕਲ ਟਰਮੀਨੇਸ਼ਨ ਆਫ਼ ਪ੍ਰੈਗਨੈਂਸੀ (MTP) ਨਾਲ ਜੁੜੇ ਮਾਮਲਿਆਂ ‘ਚ ਡਾਕਟਰੀ ਨਿਗਰਾਨੀ ਜ਼ਰੂਰੀ ਹੈ।
ਇਹ ਵੀ ਪੜ੍ਹੋ
ਉਨ੍ਹਾਂ ਮੁਤਾਬਕ, ਕੁਝ ਹਾਲਾਤਾਂ ‘ਚ ਬਹੁਤ ਜ਼ਿਆਦਾ ਖ਼ੂਨ ਵਹਿਣ ਜਾਂ ਬੱਚੇਦਾਨੀ ‘ਚ ਟਿਸ਼ੂ ਰਹਿ ਜਾਣ ਵਰਗੀਆਂ ਪੇਚੀਦਗੀਆਂ ਪੈਦਾ ਹੋ ਸਕਦੀਆਂ ਹਨ। ਉਨ੍ਹਾਂ ਨੌਜਵਾਨਾਂ ਨੂੰ ਗਰਭਨਿਰੋਧਕ ਤਰੀਕਿਆਂ ਤੇ ਸੁਰੱਖਿਅਤ ਯੌਨ ਸਬੰਧਾਂ ਬਾਰੇ ਜਾਗਰੂਕ ਰਹਿਣ ਦੀ ਅਪੀਲ ਕੀਤੀ।
LPU ਦਾ ਨਾਮ ਲੈਣ ਤੋਂ ਬਾਅਦ ਦਿੱਤੀ ਸਫ਼ਾਈ
ਪਹਿਲੀ ਵੀਡੀਓ ‘ਚ LPU ਦਾ ਨਾਮ ਲਏ ਜਾਣ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਸਵਾਲ ਉੱਠਣ ਲੱਗੇ। ਇਸ ਤੋਂ ਬਾਅਦ ਡਾਕਟਰ ਮਨਦੀਪ ਕੌਰ ਨੇ ਇੱਕ ਹੋਰ ਵੀਡੀਓ ਜਾਰੀ ਕਰਕੇ ਆਪਣੀ ਗੱਲ ਸਪੱਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਕਿਹਾ ਕਿ LPU ਦਾ ਨਾਮ ਕਿਸੇ ਸੰਸਥਾ ਨੂੰ ਬਦਨਾਮ ਕਰਨ ਦੇ ਮਕਸਦ ਨਾਲ ਨਹੀਂ ਲਿਆ ਗਿਆ। ਡਾਕਟਰ ਮੁਤਾਬਕ, ਜਲੰਧਰ ਦੇ ਕਈ ਡਾਕਟਰਾਂ ਕੋਲ LPU ਦੇ ਵਿਦਿਆਰਥੀ ਮੈਡੀਕਲ ਸਲਾਹ ਜਾਂ ਮਿਸਕੈਰੇਜ ਨਾਲ ਸਬੰਧਤ ਦਵਾਈਆਂ ਲਈ ਪਹੁੰਚਦੇ ਹਨ। ਉਨ੍ਹਾਂ ਕਿਹਾ ਕਿ LPU ‘ਚ ਵੱਡੀ ਗਿਣਤੀ ‘ਚ ਨੌਜਵਾਨ ਪੜ੍ਹਦੇ ਹਨ, ਇਸ ਲਈ ਉੱਥੋਂ ਨਾਲ ਸਬੰਧਤ ਮਾਮਲੇ ਵਧੇਰੇ ਸਾਹਮਣੇ ਆ ਸਕਦੇ ਹਨ।
LPU ਮੈਨੇਜਮੈਂਟ ਨੇ ਕੀ ਕਿਹਾ?
ਡਾਕਟਰ ਦੇ ਦਾਅਵਿਆਂ ਸਬੰਧੀ ਜਦੋਂ LPU ਮੈਨੇਜਮੈਂਟ ਤੋਂ ਪ੍ਰਤੀਕਿਰਿਆ ਲਈ ਗਈ ਤਾਂ ਮੈਨੇਜਮੈਂਟ ਵੱਲੋਂ ਕਿਹਾ ਗਿਆ ਕਿ ਮਾਮਲੇ ਦੀ ਜਾਣਕਾਰੀ ਉੱਚ ਅਧਿਕਾਰੀਆਂ ਨੂੰ ਦੇ ਦਿੱਤੀ ਗਈ ਹੈ। ਮੈਨੇਜਮੈਂਟ ਮੁਤਾਬਕ, ਇਸ ਮਾਮਲੇ ‘ਤੇ ਅਧਿਕਾਰਤ ਬਿਆਨ ਉੱਚ ਅਧਿਕਾਰੀਆਂ ਵੱਲੋਂ ਜਾਰੀ ਕੀਤਾ ਜਾਵੇਗਾ। ਉੱਥੇ ਹੀ ਡਾਕਟਰ ਮਨਦੀਪ ਕੌਰ ਦੇ ਹਸਪਤਾਲ ਦੇ ਨੰਬਰ ‘ਤੇ ਸੰਪਰਕ ਕਰਨ ‘ਤੇ ਰਿਸੈਪਸ਼ਨ ਵੱਲੋਂ ਦੱਸਿਆ ਗਿਆ ਕਿ ਡਾਕਟਰ ਇਸ ਸਮੇਂ ਮੌਜੂਦ ਨਹੀਂ ਹਨ।
