ਲੋਹੀਆਂ ਖ਼ਾਸ ਸਟੇਸ਼ਨ ‘ਤੇ ਸੁਪਰਡੈਂਟ ਨੇ ਟਰੇਨ ਮੈਨੇਜਰ ਦੇ ਸਿਰ ‘ਤੇ ਮਾਰਿਆ ਡੰਡਾ; ਦਿਨ ਭਰ ਖੜ੍ਹੀ ਰਹੀ ਮਾਲਗੱਡੀ
ਜਲੰਧਰ ਦੇ ਕਸਬਾ ਲੋਹੀਆਂ ਖ਼ਾਸ ਰੇਲਵੇ ਸਟੇਸ਼ਨ ਉੱਤੇ ਵੀਰਵਾਰ ਨੂੰ ਉਸ ਵੇਲੇ ਭਾਰੀ ਹੰਗਾਮਾ ਖੜ੍ਹਾ ਹੋ ਗਿਆ, ਜਦੋਂ ਬੋਗੀ ਪੈਟਰੋਲ ਟੈਂਕ ਵੈਗਨ (BTPN) ਮਾਲਗੱਡੀ ਨੂੰ ਰਵਾਨਾ ਕਰਨ ਨੂੰ ਲੈ ਕੇ ਸਟੇਸ਼ਨ ਸੁਪਰਡੈਂਟ ਅਤੇ ਟਰੇਨ ਮੈਨੇਜਰ (ਗਾਰਡ) ਵਿਚਾਲੇ ਤਕਰਾਰ ਹੋ ਗਈ। ਗੱਲ ਇੰਨੀ ਵੱਧ ਗਈ ਕਿ ਸਟੇਸ਼ਨ ਸੁਪਰਡੈਂਟ ਨੇ ਗੁੱਸੇ ਵਿੱਚ ਆ ਕੇ ਟਰੇਨ ਮੈਨੇਜਰ ਦੇ ਸਿਰ ਤੇ ਡੰਡਾ ਮਾਰ ਦਿੱਤਾ। ਇਸ ਹਮਲੇ ਦੌਰਾਨ ਟਰੇਨ ਮੈਨੇਜਰ ਦੇ ਹੱਥੋਂ ਮੋਬਾਈਲ ਫ਼ੋਨ ਛੁੱਟ ਕੇ ਹੇਠਾਂ ਡਿੱਗ ਪਿਆ।
ਜਲੰਧਰ ਦੇ ਕਸਬਾ ਲੋਹੀਆਂ ਖ਼ਾਸ ਰੇਲਵੇ ਸਟੇਸ਼ਨ ਉੱਤੇ ਵੀਰਵਾਰ ਨੂੰ ਉਸ ਵੇਲੇ ਭਾਰੀ ਹੰਗਾਮਾ ਖੜ੍ਹਾ ਹੋ ਗਿਆ, ਜਦੋਂ ਬੋਗੀ ਪੈਟਰੋਲ ਟੈਂਕ ਵੈਗਨ (BTPN) ਮਾਲਗੱਡੀ ਨੂੰ ਰਵਾਨਾ ਕਰਨ ਨੂੰ ਲੈ ਕੇ ਸਟੇਸ਼ਨ ਸੁਪਰਡੈਂਟ ਅਤੇ ਟਰੇਨ ਮੈਨੇਜਰ (ਗਾਰਡ) ਵਿਚਾਲੇ ਤਕਰਾਰ ਹੋ ਗਈ। ਗੱਲ ਇੰਨੀ ਵੱਧ ਗਈ ਕਿ ਸਟੇਸ਼ਨ ਸੁਪਰਡੈਂਟ ਨੇ ਗੁੱਸੇ ਵਿੱਚ ਆ ਕੇ ਟਰੇਨ ਮੈਨੇਜਰ ਦੇ ਸਿਰ ਤੇ ਡੰਡਾ ਮਾਰ ਦਿੱਤਾ। ਇਸ ਹਮਲੇ ਦੌਰਾਨ ਟਰੇਨ ਮੈਨੇਜਰ ਦੇ ਹੱਥੋਂ ਮੋਬਾਈਲ ਫ਼ੋਨ ਹੇਠਾਂ ਡਿੱਗ ਪਿਆ। ਇਸ ਪੂਰੀ ਘਟਨਾ ਦਾ ਇੱਕ ਵੀਡੀਓ ਵੀ ਸੋਸ਼ਲ ਮੀਡੀਆ ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ।
ਸੁਨੇਹਾ ਨਾ ਮਿਲਣ ਕਾਰਨ ਪੈਦਾ ਹੋਇਆ ਵਿਵਾਦ
ਮਿਲੀ ਜਾਣਕਾਰੀ ਅਨੁਸਾਰ ਫ਼ਿਰੋਜ਼ਪੁਰ ਮੰਡਲ ਤੋਂ ਜੰਮੂ ਵੱਲ ਜਾਣ ਵਾਲਾ ਤੇਲ ਦੇ ਟੈਂਕਰਾਂ ਦਾ ਰੈਕ (BTPN) ਵੀਰਵਾਰ ਸਵੇਰੇ ਲਗਭਗ 11 ਵਜੇ ਲੋਹੀਆਂ ਖ਼ਾਸ ਸਟੇਸ਼ਨ ਤੇ ਪੁੱਜਿਆ ਸੀ। ਰੇਲਗੱਡੀ ਨੂੰ ਅੱਗੇ ਰਵਾਨਾ ਕਰਨ ਜਾਂ ਰੋਕ ਕੇ ਰੱਖਣ ਬਾਰੇ ਕੋਈ ਸਪੱਸ਼ਟ ਸੰਦੇਸ਼ ਨਹੀਂ ਮਿਲ ਰਿਹਾ ਸੀ। ਟਰੇਨ ਮੈਨੇਜਰ ਰਵੀ ਵੱਲੋਂ ਲਗਾਤਾਰ ਵਾਕੀ-ਟਾਕੀ ਰਾਹੀਂ ਸਟੇਸ਼ਨ ਸੁਪਰਡੈਂਟ ਯਸ਼ਵੰਤ ਨਾਲ ਸੰਪਰਕ ਕਰਕੇ ਗੱਡੀ ਚਲਾਉਣ ਸੰਬੰਧੀ ਸਿਗਨਲ ਜਾਂ ਸੁਨੇਹੇ ਦੀ ਮੰਗ ਕੀਤੀ ਜਾ ਰਹੀ ਸੀ, ਪਰ ਦੂਜੇ ਪਾਸਿਓਂ ਕੋਈ ਜਵਾਬ ਨਹੀਂ ਮਿਲਿਆ।
ਇਸ ਤੋਂ ਬਾਅਦ ਲੋਕੋ ਪਾਇਲਟ ਗਿਆਨ ਪ੍ਰਕਾਸ਼ ਨੇ ਵੀ ਸੁਨੇਹਾ ਭੇਜਿਆ, ਪਰ ਫਿਰ ਵੀ ਕੋਈ ਪ੍ਰਤੀਕਿਰਿਆ ਨਾ ਆਈ। ਆਖ਼ਰਕਾਰ ਪੁਆਇੰਟਸਮੈਨ ਰਾਹੀਂ ਸਟੇਸ਼ਨ ਸੁਪਰਡੈਂਟ ਕੋਲ ਸੁਨੇਹਾ ਪਹੁੰਚਾਇਆ ਗਿਆ, ਜਿਸ ਤੋਂ ਬਾਅਦ ਜਵਾਬ ਮਿਲਿਆ ਕਿ ਪਹਿਲਾਂ ਕਿਸੇ ਹੋਰ ਗੱਡੀ ਨੂੰ ਲੰਘਾਇਆ ਜਾਵੇਗਾ। ਸਥਿਤੀ ਸਪੱਸ਼ਟ ਕਰਨ ਲਈ ਜਦੋਂ ਟਰੇਨ ਮੈਨੇਜਰ ਰਵੀ ਖ਼ੁਦ ਸਟੇਸ਼ਨ ਸੁਪਰਡੈਂਟ ਦੇ ਦਫ਼ਤਰ ਪਹੁੰਚੇ ਅਤੇ ਨਿਮਰਤਾ ਨਾਲ ਕਿਹਾ ਕਿ ਜੇਕਰ ਗੱਡੀ ਨੂੰ ਹੋਰ ਰੇਲਗੱਡੀ ਕਾਰਨ ਰੋਕਿਆ ਜਾਣਾ ਹੈ ਤਾਂ ਉਨ੍ਹਾਂ ਨੂੰ ਬਾਕਾਇਦਾ ਸੂਚਿਤ ਕਰ ਦਿੱਤਾ ਜਾਵੇ, ਤਾਂ ਸੁਪਰਡੈਂਟ ਤੈਸ਼ ਵਿੱਚ ਆ ਗਿਆ ਅਤੇ ਉਸ ਨੇ ਡੰਡੇ ਨਾਲ ਹਮਲਾ ਕਰ ਦਿੱਤਾ।
ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਸ਼ੁਰੂ
ਇਸ ਘਟਨਾ ਦੀ ਸੂਚਨਾ ਤੁਰੰਤ ਫ਼ਿਰੋਜ਼ਪੁਰ ਮੰਡਲ ਦੇ ਡਿਵੀਜ਼ਨਲ ਆਪਰੇਸ਼ਨਲ ਮੈਨੇਜਰ (DOM) ਗੁਰਸ਼ਰਨ ਪਾਠਕ ਨੂੰ ਦਿੱਤੀ ਗਈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਡੀਓਐੱਮ ਨੇ ਸਟੇਸ਼ਨ ਸੁਪਰਡੈਂਟ ਯਸ਼ਵੰਤ ਅਤੇ ਟਰੇਨ ਮੈਨੇਜਰ ਰਵੀ ਦੋਵਾਂ ਨੂੰ ਤੁਰੰਤ ਮੰਡਲ ਦਫ਼ਤਰ ਤਲਬ ਕਰ ਲਿਆ ਹੈ। ਹੁਣ ਇਸ ਸਮੁੱਚੇ ਘਟਨਾਕ੍ਰਮ ਦੀ ਵਿਭਾਗੀ ਜਾਂਚ ਫ਼ਿਰੋਜ਼ਪੁਰ ਮੰਡਲ ਹੈੱਡਕੁਆਰਟਰ ਵਿਖੇ ਹੀ ਹੋਵੇਗੀ।
ਦੂਜੇ ਪਾਸੇ ਸਰਕਾਰੀ ਰੇਲਵੇ ਪੁਲਿਸ (GRP) ਨੇ ਵੀ ਮੌਕੇ ਤੇ ਪਹੁੰਚ ਕੇ ਸੰਬੰਧਿਤ ਧਿਰਾਂ ਦੇ ਬਿਆਨ ਦਰਜ ਕਰ ਲਏ ਹਨ ਅਤੇ ਕਾਨੂੰਨੀ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ। ਇਸ ਸਾਰੇ ਹੰਗਾਮੇ ਅਤੇ ਵਿਵਾਦ ਕਾਰਨ ਜੰਮੂ ਜਾਣ ਵਾਲਾ ਤੇਲ ਦਾ ਰੈਕ ਦਿਨ ਭਰ ਲੋਹੀਆਂ ਖ਼ਾਸ ਸਟੇਸ਼ਨ ਤੇ ਹੀ ਖੜ੍ਹਾ ਰਿਹਾ, ਜਿਸ ਨਾਲ ਰੇਲ ਆਵਾਜਾਈ ਦੇ ਕੰਮਕਾਜ ਤੇ ਵੀ ਅਸਰ ਪਿਆ।
ਇਹ ਵੀ ਪੜ੍ਹੋ
