ਹੋਲੀ ਮੌਕੇ ਮੁਹਾਲੀ ਦੇ ਕੈਫੇ ‘ਚ ਵਿਕ ਰਹੀ ਸੀ ਚੰਡੀਗੜ੍ਹ ਦੀ ਸ਼ਰਾਬ, ਐਕਸਾਈਜ਼ ਵਿਭਾਗ ਨੇ ਦਿੱਤੀ ਦਬਿਸ਼

ਹੋਲੀ ਦੀ ਤਿਉਹਾਰ ਮੌਕੇ ਮੁਹਾਲੀ ਦੇ ਇੱਕ ਕੈਫੇ ‘ਚ ਚੰਡੀਗੜ੍ਹ ਦੀ ਸ਼ਰਾਬ ਲੋਕਾਂ ਨੂੰ ਪਰੋਸੀ ਜਾ ਰਹੀ ਸੀ। ਇਸ ਮਾਮਲੇ ਦੀ ਸੂਚਨਾ ਜਿਵੇਂ ਹੀ ਐਕਸਾਈਜ਼ ਵਿਭਾਗ ਨੂੰ ਲੱਗੀ ਤਾਂ ਤੁਰੰਤ ਛਾਪੇਮਾਰੀ ਕੀਤੀ ਗਈ। ਇਸ ਦੌਰਾਨ ਚੰਡੀਗੜ੍ਹ ‘ਚ ਵਿਕਰੀ ਦੇ ਲਈ ਨਿਰਧਾਰਤ ਪ੍ਰੀਮਿਅਮ ਬ੍ਰਾਂਡ ਦੀ ਸ਼ਰਾਬ ਬਰਾਮਦ ਹੋਈ। ਇਹ ਸ਼ਰਾਬ ਪੰਜਾਬ ‘ਚ ਗੈਰ-ਕਾਨੂੰਨੀ ਤੌਰ ‘ਤੇ ਵੇਚੀ ਜਾ ਰਹੀ ਸੀ।

ਐਕਸਾਈਜ਼ ਵਿਭਾਗ ਨੇ ਇਸ ਸਾਰੀ ਸ਼ਰਾਬ ਨੂੰ ਜ਼ਬਤ ਕਰ ਲਿਆ। ਐਕਸਾਈਜ਼ ਵਿਭਾਗ ਨੇ ਇਸ ਮਾਮਲੇ ‘ਚ ਮੁਲਜ਼ਮ ਰਿਧਮ ਨਿਵਾਸੀ ਸੈਕਟਰ-20 ਅੰਬਾਲਾ ਦੇ ਖਿਲਾਫ਼ ਸੋਹਾਣਾ ਥਾਣੇ ‘ਚ ਐਫਆਈਆਰ ਦਰਜ ਕੀਤੀ ਹੈ। ਇਹ ਐਫਆਈਆਰ ਐਕਸਾਈਜ਼ ਐਕਟ ਦੀ ਧਾਰਾ 61 ਦੇ ਤਹਿਤ ਦਰਜ ਕੀਤੀ ਗਈ ਹੈ।

ਜਾਣਕਾਰੀ ਮੁਤਾਬਕ ਪੰਜਾਬ ਐਕਸਾਈਜ਼ ਵਿਭਾਗ ਨੇ ਗੈਰ-ਕਾਨੂੰਨੀ ਸ਼ਰਾਬ ਦੀ ਵਿਕਰੀ ਖਿਲਾਫ਼ 4 ਮਾਰਚ ਨੂੰ ਸੈਕਟਰ-99 ਮੁਹਾਲੀ ਵਿਖੇ ਇੱਕ ਕੈਫੇ ‘ਚ ਵਿਸ਼ੇਸ਼ ਛਾਪੇਮਾਰੀ ਕੀਤੀ। ਐਕਸਾਈਜ਼ ਕਮਿਸ਼ਨਰ ਤੇ ਪਟਿਆਲਾ ਜ਼ੋਨ ਦੇ ਡਿਪਟੀ ਕਮਿਸ਼ਨਰ (ਐਕਸਾਈਜ਼) ਦੇ ਹੁਕਮਾਂ ਤਹਿਤ ਕਾਰਵਾਈ ਕੀਤੀ ਗਈ।

ਐਕਸਾਈਜ਼ ਇੰਸਪੈਕਟਰ ਗੁਰਿੰਦਰਪਾਲ ਸਿੰਘ ਦੀ ਅਗਵਾਈ ‘ਚ ਐਕਸਾਈਜ਼ ਪੁਲਿਸ ਦੀ ਟੀਮ ਨੇ ਕੈਫੇ ਦੀ ਤਲਾਸ਼ੀ ਲਈ। ਜਾਂਚ ਦੌਰਾਨੁ ਕੈਫੇ ਤੋਂ ਚੰਡੀਗੜ੍ਹ ‘ਚ ਵਿਕਰੀ ਦੇ ਲਈ ਨਿਰਧਾਰਤ ਪ੍ਰੀਮਿਅਮ ਬ੍ਰਾਂਡ ਦੀ ਸ਼ਰਾਬ ਬਰਾਮਦ ਹੋਈ, ਜੋ ਕਿ ਪੰਜਾਬ ‘ਚ ਗੈਰ-ਕਾਨੂੰਨੀ ਤੌਰ ‘ਤੇ ਵੇਚੀ ਜਾ ਰਹੀ ਹੈ।