ਪਠਾਨਕੋਟ ਦਾ ਮਿੰਨੀ ਗੋਆ ਬਣੇਗਾ ਸੈਲਾਨੀਆਂ ਦੀ ਨਵੀਂ ਪਸੰਦ, ਸ਼ੁਰੂ ਹੋਈਆਂ ਐਡਵੈਂਚਰ ਗਤੀਵਿਧੀਆਂ
Pathankot Tourism: ਪਠਾਨਕੋਟ ਦੇ ਚਮਰੌੜ ਪੱਤਣ ਵਿੱਚ ਪੈਰਾਸੇਲਿੰਗ ਅਤੇ ਕਰੂਜ਼ ਰਾਹੀਂ ਸਿਰਫ਼ ਪੰਜਾਬ ਹੀ ਨਹੀਂ, ਸਗੋਂ ਹਿਮਾਚਲ ਅਤੇ ਜੰਮੂ ਤੋਂ ਵੀ ਸੈਲਾਨੀਆਂ ਨੂੰ ਖਿੱਚਣ ਦੀ ਤਿਆਰੀ ਹੈ।
ਪੰਜਾਬ ਦੇ ਵਸਨੀਕਾਂ ਨੂੰ ਹੁਣ ਪੈਰਾਸੇਲਿੰਗ ਅਤੇ ਰੋਮਾਂਚਕ ਵਾਟਰ ਸਪੋਰਟਸ ਦਾ ਆਨੰਦ ਲੈਣ ਲਈ ਦੂਰ-ਦੁਰਾਡੇ ਗੋਆ ਜਾਣ ਦੀ ਲੋੜ ਨਹੀਂ ਪਵੇਗੀ। ਪੰਜਾਬ ਦੇ ਪ੍ਰਮੁੱਖ ਸੈਰ-ਸਪਾਟਾ ਕੇਂਦਰ ਵਜੋਂ ਆਪਣੀ ਵੱਖਰੀ ਪਛਾਣ ਬਣਾ ਚੁੱਕੇ ਜ਼ਿਲ੍ਹਾ ਪਠਾਨਕੋਟ ਵਿਖੇ ਰਾਵੀ ਦਰਿਆ ‘ਤੇ ਬਣੇ ਡੈਮ ਦੀ ਖੂਬਸੂਰਤ ਝੀਲ ਵਿੱਚ ਇਹ ਸਾਰੀਆਂ ਆਧੁਨਿਕ ਸਹੂਲਤਾਂ ਸ਼ੁਰੂ ਕੀਤੀਆਂ ਜਾ ਰਹੀਆਂ ਹਨ। ਡੈਮ ਪ੍ਰਸ਼ਾਸਨ ਵੱਲੋਂ ਇਨ੍ਹਾਂ ਰੋਮਾਂਚਕ ਗਤੀਵਿਧੀਆਂ ਦੀ ਰਸਮੀ ਸ਼ੁਰੂਆਤ ਕਰ ਦਿੱਤੀ ਗਈ ਹੈ।
ਰਣਜੀਤ ਸਾਗਰ ਡੈਮ ਦੀ ਝੀਲ ਦੇ ਕੰਢੇ ਸਥਿਤ ਅਤੇ ‘ਮਿੰਨੀ ਗੋਆ’ ਦੇ ਨਾਂ ਨਾਲ ਮਸ਼ਹੂਰ ਚਮਰੋੜ ਪੱਤਣ ਸਮੇਤ ਨਵੇਂ ਬਣੇ ਸ਼ਾਹਪੁਰਕੰਡੀ ਬੈਰਾਜ ਝੀਲ ਨੂੰ ਕੌਮਾਂਤਰੀ ਪੱਧਰ ਦਾ ਟੂਰਿਜ਼ਮ ਹੱਬ ਬਣਾਉਣ ਲਈ ਡੈਮ ਪ੍ਰਸ਼ਾਸਨ ਵੱਲੋਂ ਲਗਾਤਾਰ ਠੋਸ ਉਪਰਾਲੇ ਕੀਤੇ ਜਾ ਰਹੇ ਹਨ। ਇਸੇ ਲੜੀ ਤਹਿਤ ਪਹਿਲਾਂ ਜਿੱਥੇ ਰਾਵੀ ਦਰਿਆ ਦੀ ਝੀਲ ਵਿੱਚ ਸੈਲਾਨੀ ਸਿਰਫ਼ ਸਪੀਡ ਬੋਟਿੰਗ ਦਾ ਆਨੰਦ ਮਾਣਦੇ ਸਨ, ਉੱਥੇ ਹੀ ਹੁਣ ਉਹ ਹਵਾ ਵਿੱਚ ਉੱਡਣ ਵਾਲੀ ਪੈਰਾਸੇਲਿੰਗ ਦਾ ਵੀ ਰੋਮਾਂਚਕ ਲੁਤਫ਼ ਉਠਾ ਸਕਣਗੇ।
ਸੈਲਾਨੀਆਂ ‘ਚ ਭਾਰੀ ਉਤਸ਼ਾਹ
ਮਿੰਨੀ ਗੋਆ ਵਜੋਂ ਮਸ਼ਹੂਰ ਚਮਰੋੜ ਵਿਖੇ ਘੁੰਮਣ ਆਏ ਸੈਲਾਨੀਆਂ ਨੇ ਇਸ ਪਹਿਲਕਦਮੀ ਦੀ ਭਰਪੂਰ ਸ਼ਲਾਘਾ ਕਰਦਿਆਂ ਕਿਹਾ ਕਿ ਹੁਣ ਉਨ੍ਹਾਂ ਨੂੰ ਆਪਣੇ ਹੀ ਸੂਬੇ ਵਿੱਚ ਗੋਆ ਵਰਗਾ ਮਾਹੌਲ ਅਤੇ ਰੋਮਾਂਚ ਮਿਲ ਰਿਹਾ ਹੈ। ਇੱਥੇ ਸਪੀਡ ਬੋਟ ਦੇ ਨਾਲ-ਨਾਲ ਪੈਰਾਸੇਲਿੰਗ ਸ਼ੁਰੂ ਹੋਣ ਨਾਲ ਨਾ ਸਿਰਫ਼ ਸੈਲਾਨੀਆਂ ਦੀ ਆਮਦ ਵਿੱਚ ਭਾਰੀ ਵਾਧਾ ਹੋਵੇਗਾ, ਸਗੋਂ ਸਥਾਨਕ ਲੋਕਾਂ ਲਈ ਰੋਜ਼ਗਾਰ ਦੇ ਨਵੇਂ ਮੌਕੇ ਵੀ ਪੈਦਾ ਹੋਣਗੇ।
ਇਸ ਦੇ ਨਾਲ ਹੀ ਕੁਝ ਸੈਲਾਨੀਆਂ ਨੇ ਨਿਰਾਸ਼ਾ ਜ਼ਾਹਿਰ ਕਰਦਿਆਂ ਕਿਹਾ ਕਿ ਇਸ ਮਿੰਨੀ ਗੋਆ ਤੱਕ ਪਹੁੰਚਣ ਵਾਲੀ ਮੁੱਖ ਸੜਕ ਬੁਰੀ ਤਰ੍ਹਾਂ ਟੁੱਟੀ ਹੋਈ ਹੈ, ਜਿਸ ਕਾਰਨ ਰਾਹਗੀਰਾਂ ਨੂੰ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਉਨ੍ਹਾਂ ਪੰਜਾਬ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਇਸ ਸੜਕ ਦੀ ਹਾਲਤ ਤੁਰੰਤ ਸੁਧਾਰੀ ਜਾਵੇ ਤਾਂ ਜੋ ਸੈਲਾਨੀਆਂ ਨੂੰ ਕਿਸੇ ਕਿਸਮ ਦੀ ਪ੍ਰੇਸ਼ਾਨੀ ਨਾ ਹੋਵੇ।
ਸੁਰੱਖਿਆ ਦੇ ਕੀਤੇ ਗਏ ਪੁਖ਼ਤਾ ਇੰਤਜ਼ਾਮ: ਸੀਨੀਅਰ ਇੰਜੀਨੀਅਰ
ਦੂਜੇ ਪਾਸੇ, ਸ਼ਾਹਪੁਰਕੰਡੀ ਬੈਰਾਜ ਪ੍ਰੋਜੈਕਟ ਡੈਮ ਦੇ ਸੀਨੀਅਰ ਇੰਜੀਨੀਅਰ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪਹਿਲਾਂ ਝੀਲ ਵਿੱਚ ਸਪੀਡ ਬੋਟਾਂ ਚਲਾਈਆਂ ਜਾ ਰਹੀਆਂ ਸਨ ਅਤੇ ਹੁਣ ਸੈਲਾਨੀਆਂ ਦੇ ਮਨੋਰੰਜਨ ਲਈ ਪੈਰਾਸੇਲਿੰਗ ਦੀ ਸਹੂਲਤ ਵੀ ਸ਼ੁਰੂ ਕਰ ਦਿੱਤੀ ਗਈ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਸੈਲਾਨੀਆਂ ਦੀ ਸੁਰੱਖਿਆ ਨੂੰ ਮੁੱਖ ਰੱਖਦਿਆਂ ਹਰ ਤਰ੍ਹਾਂ ਦੇ ਪੁਖ਼ਤਾ ਅਤੇ ਠੋਸ ਪ੍ਰਬੰਧ ਮੁਕੰਮਲ ਕੀਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਰਣਜੀਤ ਸਾਗਰ ਡੈਮ ਅਤੇ ਸ਼ਾਹਪੁਰਕੰਡੀ ਬੈਰਾਜ ਦੀ ਸਮੁੱਚੀ ਸੁਰੱਖਿਆ ਯਕੀਨੀ ਬਣਾਉਣਾ ਵਿਭਾਗ ਦੀ ਮੁੱਖ ਜ਼ਿੰਮੇਵਾਰੀ ਹੈ, ਜਿਸ ਨਾਲ ਕਿਸੇ ਵੀ ਕੀਮਤ ‘ਤੇ ਸਮਝੌਤਾ ਨਹੀਂ ਕੀਤਾ ਜਾਵੇਗਾ।
ਇਹ ਵੀ ਪੜ੍ਹੋ
