ਮੈਂ ਕਿਹਾ ਸੋਨਾ ਘੱਟ ਖਰੀਦੋ, ਲੋਕਾਂ ਨੇ ਗੱਲ ਮੰਨੀ ਤੇ ਭਾਅ ਡਿੱਗ ਗਏ… ਕੌਸ਼ਲ ਡਿਗਰੀ ਵੰਡ ਸਮਾਰੋਹ ‘ਚ ਬੋਲੇ PM ਮੋਦੀ
ਲਖਨਊ ਦੇ ਕੌਸ਼ਲ ਦੀਕਸ਼ਾਂਤ ਸਮਾਰੋਹ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਲੋਕਾਂ ਨੂੰ ਅਗਲੇ ਇੱਕ ਹੋਰ ਸਾਲ ਤੱਕ ਸੋਨਾ ਨਾ ਖਰੀਦਣ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਪਿਛਲੀ ਅਪੀਲ ਮਗਰੋਂ ਸੋਨੇ ਦੇ ਭਾਅ ਡਿੱਗਣ ਨਾਲ ਦੇਸ਼ ਦਾ ਪੈਸਾ ਬਚਿਆ ਹੈ। ਉਨ੍ਹਾਂ ITI ਵਿਦਿਆਰਥੀਆਂ ਨੂੰ IIT ਵਰਗਾ ਸਤਿਕਾਰ ਦੇਣ ਦਾ ਵੀ ਐਲਾਨ ਕੀਤਾ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਲਖਨਊ ਵਿਖੇ ਆਯੋਜਿਤ ‘ਕੌਸ਼ਲ ਡਿਗਰੀ ਵੰਡ ਸਮਾਰੋਹ’ ਨੂੰ ਸੰਬੋਧਨ ਕਰਦਿਆਂ ਇੱਕ ਵਾਰ ਮੁੜ ਸੋਨੇ ਦੀ ਖਰੀਦਦਾਰੀ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਪੁਰਾਣੀ ਅਪੀਲ ਨੂੰ ਯਾਦ ਕਰਵਾਉਂਦਿਆਂ ਕਿਹਾ ਕਿ ਉਨ੍ਹਾਂ ਦੇਸ਼ ਵਾਸੀਆਂ ਨੂੰ ਸੋਨਾ ਘੱਟ ਖਰੀਦਣ ਦੀ ਬੇਨਤੀ ਕੀਤੀ ਸੀ, ਜਿਸ ਨੂੰ ਲੋਕਾਂ ਨੇ ਸਵੀਕਾਰ ਕੀਤਾ ਅਤੇ ਨਤੀਜੇ ਵਜੋਂ ਸੋਨੇ ਦੀਆਂ ਕੀਮਤਾਂ ਹੇਠਾਂ ਆ ਗਈਆਂ, ਜਿਸ ਨਾਲ ਦੇਸ਼ ਦਾ ਪੈਸਾ ਵੀ ਬਚਿਆ ਹੈ। ਪੀਐੱਮ ਮੋਦੀ ਨੇ ਦੇਸ਼ ਵਾਸੀਆਂ ਨੂੰ ਅਗਲੇ ਇੱਕ ਹੋਰ ਸਾਲ ਤੱਕ ਸੋਨਾ ਨਾ ਖਰੀਦਣ ਦੀ ਅਪੀਲ ਕੀਤੀ ਹੈ। ਇਸ ਸਮਾਗਮ ਦੌਰਾਨ ਪ੍ਰਧਾਨ ਮੰਤਰੀ ਨੇ ਇਹ ਵੀ ਐਲਾਨ ਕੀਤਾ ਕਿ ਹੁਣ ਆਈ.ਟੀ.ਆਈ. (ITI) ਵਿੱਚ ਪੜ੍ਹਨ ਵਾਲੇ ਵਿਦਿਆਰਥੀਆਂ ਨੂੰ ਵੀ ਓਨਾ ਹੀ ਸਤਿਕਾਰ ਮਿਲੇਗਾ, ਜਿੰਨਾ ਆਈ.ਆਈ.ਟੀ. (IIT) ਦੇ ਵਿਦਿਆਰਥੀਆਂ ਨੂੰ ਮਿਲਦਾ ਹੈ।
ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਪੀਐੱਮ ਮੋਦੀ ਨੇ ਕਿਹਾ ਕਿ ਉੱਤਰ ਪ੍ਰਦੇਸ਼ ਤੋਂ ਸੰਸਦ ਮੈਂਬਰ ਹੋਣ ਦੇ ਨਾਤੇ ਇਹ ਉਨ੍ਹਾਂ ਲਈ ਬੜੇ ਮਾਣ ਅਤੇ ਸੁਭਾਗ ਦੀ ਗੱਲ ਹੈ ਕਿ ਅੱਜ ਉਨ੍ਹਾਂ ਨੂੰ ਦੇਸ਼ ਭਰ ਤੋਂ ਆਏ ਨੌਜਵਾਨ ਸਾਥੀਆਂ ਦਾ ਸਵਾਗਤ ਕਰਨ ਦਾ ਮੌਕਾ ਮਿਲਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਅੱਜ ਸਵੇਰੇ ਦਿੱਲੀ ਤੋਂ ਬੰਗਾਲ ਗਏ ਸਨ, ਜਿੱਥੇ ਉਨ੍ਹਾਂ ਦਾ ਪਹਿਲਾ ਪ੍ਰੋਗਰਾਮ ਇੰਡੀਅਨ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ (IIT) ਵਿੱਚ ਸੀ। ਉਨ੍ਹਾਂ ਕਿਹਾ ਕਿ ਜਿਸ ਊਰਜਾ, ਸੁਪਨਿਆਂ, ਉਮੀਦਾਂ ਅਤੇ ਇੱਛਾਵਾਂ ਨਾਲ ਉਹ IIT ਦੇ ਵਿਦਿਆਰਥੀਆਂ ਵਿਚਕਾਰ ਗਏ ਸਨ, ਉਸੇ ਉਤਸ਼ਾਹ ਅਤੇ ਉਮੰਗ ਨਾਲ ਉਹ ਅੱਜ ਇੰਡਸਟਰੀਅਲ ਟ੍ਰੇਨਿੰਗ ਇੰਸਟੀਚਿਊਟ (ITI) ਦੇ ਵਿਦਿਆਰਥੀਆਂ ਵਿਚਕਾਰ ਆਏ ਹਨ। ਪੀਐੱਮ ਮੁਤਾਬਕ, ਚਾਹੇ IIT ਹੋਵੇ ਜਾਂ ITI, ਇਹ ਦੋਵੇਂ ਹੀ ਦੇਸ਼ ਦੀ ਅਸਲ ਸੰਪਤੀ, ਸਮਰੱਥਾ ਅਤੇ ਭਵਿੱਖ ਹਨ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨੌਜਵਾਨਾਂ ਨੇ ITI ਵਿੱਚ ਜੋ ਹੁਨਰ ਸਿੱਖਿਆ ਹੈ, ਉਹੀ ‘ਵਿਕਸਿਤ ਭਾਰਤ’ ਦੀ ਸਭ ਤੋਂ ਵੱਡੀ ਊਰਜਾ ਹੈ ਅਤੇ ਇਹ ਵਿਕਸਿਤ ਭਾਰਤ ਉਨ੍ਹਾਂ ਦੇ ਹੁਨਰ ਸਦਕਾ ਹੀ ਬਣੇਗਾ, ਕਿਉਂਕਿ ਸਾਡਾ ਦੇਸ਼ ਹਮੇਸ਼ਾ ਤੋਂ ਹੀ ਹੁਨਰ ਨੂੰ ਸਤਿਕਾਰ ਦੇਣ ਵਾਲਾ ਮੁਲਕ ਰਿਹਾ ਹੈ।
#WATCH | Lucknow, Uttar Pradesh: Prime Minister Narendra Modi says, “A year ago, I urged the countrymen: for one year, if it is not necessary, please do not buy gold.’ And I am happy, just as Lal Bahadur Shastri ji had asked the countrymen to skip one meal, and this country obeyed his call; my country still holds that same character. An ordinary person like me asked to buy less gold; the countrymen bought less gold, and gold prices fell. Today, people are telling me, ‘Modi ji, you spoke, we listened to your advice, and our money was saved.'”
(Source: ANI/DD News) — ANI (@ANI) November 21, 2026
ਇੱਕ ਹੋਰ ਸਾਲ ਸੋਨਾ ਨਾ ਖਰੀਦਣ ਦੀ ਕੀਤੀ ਅਪੀਲ
ਪੀਐੱਮ ਮੋਦੀ ਨੇ ਕਿਹਾ ਕਿ ਇੱਕ ਸਾਲ ਪਹਿਲਾਂ ਉਨ੍ਹਾਂ ਦੇਸ਼ ਵਾਸੀਆਂ ਨੂੰ ਬੇਨਤੀ ਕੀਤੀ ਸੀ ਕਿ ਜੇਕਰ ਬਹੁਤ ਜ਼ਿਆਦਾ ਜ਼ਰੂਰੀ ਨਾ ਹੋਵੇ ਤਾਂ ਕਿਰਪਾ ਕਰਕੇ ਇੱਕ ਸਾਲ ਤੱਕ ਸੋਨਾ ਨਾ ਖਰੀਦਿਆ ਜਾਵੇ। ਉਨ੍ਹਾਂ ਖੁਸ਼ੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਜਿਸ ਤਰ੍ਹਾਂ ਸਾਬਕਾ ਪ੍ਰਧਾਨ ਮੰਤਰੀ ਲਾਲ ਬਹਾਦਰ ਸ਼ਾਸਤਰੀ ਜੀ ਦੇ ਇੱਕ ਵੇਲੇ ਦਾ ਭੋਜਨ ਛੱਡਣ ਦੇ ਸੱਦੇ ਨੂੰ ਦੇਸ਼ ਵਾਸੀਆਂ ਨੇ ਮੰਨਿਆ ਸੀ, ਸਾਡੇ ਦੇਸ਼ ਦਾ ਚਰਿੱਤਰ ਅੱਜ ਵੀ ਬਿਲਕੁਲ ਉਹੀ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਵਰਗੇ ਇੱਕ ਸਧਾਰਨ ਵਿਅਕਤੀ ਦੇ ਕਹਿਣ ‘ਤੇ ਦੇਸ਼ ਵਾਸੀਆਂ ਨੇ ਸੋਨਾ ਘੱਟ ਖਰੀਦਿਆ, ਜਿਸ ਕਾਰਨ ਸੋਨੇ ਦੇ ਭਾਅ ਡਿੱਗ ਗਏ। ਅੱਜ ਲੋਕ ਉਨ੍ਹਾਂ ਨੂੰ ਮਿਲ ਕੇ ਕਹਿੰਦੇ ਹਨ ਕਿ ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਦੀ ਸਲਾਹ ਮੰਨੀ ਅਤੇ ਉਨ੍ਹਾਂ ਦੇ ਪੈਸੇ ਬਚ ਗਏ।
ਇਹ ਵੀ ਪੜ੍ਹੋ
ਲਖਨਊ ਦੀ ਚਿਕਨਕਾਰੀ ਅਤੇ ਇਤਿਹਾਸਕ ਹੁਨਰ ਦਾ ਕੀਤਾ ਜ਼ਿਕਰ
ਆਪਣੇ ਭਾਸ਼ਣ ਦੌਰਾਨ ਪੀਐੱਮ ਮੋਦੀ ਨੇ ਲਖਨਊ ਦੀ ਪ੍ਰਸਿੱਧ ਚਿਕਨਕਾਰੀ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਸਾਡੇ ਦੇਸ਼ ਦੀ ਪੁਰਾਤਨ ਸਮਾਜਿਕ ਵਿਵਸਥਾ ਹੀ ਹੁਨਰ ਦੇ ਆਲੇ-ਦੁਆਲੇ ਬੁਣੀ ਹੋਈ ਸੀ। ਭਾਰਤ ਦੀ ਕੌਸ਼ਲ ਵਿਵਸਥਾ ਦੀ ਤਬਾਹੀ ਬਾਰੇ ਬੋਲਦਿਆਂ ਉਨ੍ਹਾਂ ਕਿਹਾ ਕਿ ਜਦੋਂ ਬਾਹਰਲੇ ਹਮਲਾਵਰ ਦੇਸ਼ ਵਿੱਚ ਆਏ ਤਾਂ ਉਨ੍ਹਾਂ ਨੇ ਸਭ ਤੋਂ ਪਹਿਲੀ ਸੱਟ ਸਾਡੇ ਹੁਨਰ ‘ਤੇ ਹੀ ਮਾਰੀ ਸੀ। ਜਦੋਂ ਕੋਈ ਕਾਰੀਗਰ ਕੋਈ ਵਧੀਆ ਚੀਜ਼ ਬਣਾਉਂਦਾ ਸੀ ਤਾਂ ਉਸ ਦੇ ਅੰਗੂਠੇ ਕੱਟ ਦਿੱਤੇ ਜਾਂਦੇ ਸਨ, ਕਿਉਂਕਿ ਹਮਲਾਵਰ ਜਾਣਦੇ ਸਨ ਕਿ ਇਹੀ ਹੁਨਰ ਭਾਰਤ ਦੀ ਤਰੱਕੀ ਦਾ ਮੁੱਖ ਕਾਰਨ ਹੈ। ਬਾਅਦ ਵਿੱਚ ਜਦੋਂ ਅੰਗਰੇਜ਼ ਆਏ ਤਾਂ ਉਨ੍ਹਾਂ ਨੇ ਭਾਰਤ ਦੇ ਹੁਨਰ ਨੂੰ ਤਬਾਹ ਕਰਕੇ ਆਪਣੇ ਦੇਸ਼ ਵਿੱਚ ਇੰਡਸਟਰੀ ਅਤੇ ਮੈਨੂਫੈਕਚਰਿੰਗ ਨੂੰ ਅੱਗੇ ਵਧਾਇਆ।
ਪੀਐੱਮ ਨੇ ਅੱਗੇ ਕਿਹਾ ਕਿ ਹੁਣ ITI ਵਿੱਚ ਪੜ੍ਹਨ ਵਾਲੇ ਬੱਚਿਆਂ ਨੂੰ ਵੀ IIT ਦੇ ਵਿਦਿਆਰਥੀਆਂ ਜਿੰਨਾ ਹੀ ਮਾਣ-ਸਤਿਕਾਰ ਮਿਲੇਗਾ। ਅੱਜ ਦੇਸ਼ ਦਾ ਪ੍ਰਧਾਨ ਮੰਤਰੀ ਖੁਦ ਬੰਗਾਲ ਤੋਂ ਭੱਜ ਕੇ ITI ਦੇ ਵਿਦਿਆਰਥੀਆਂ ਨੂੰ ਸਰਟੀਫਿਕੇਟ ਦੇਣ ਲਈ ਉਨ੍ਹਾਂ ਦੇ ਵਿਚਕਾਰ ਆਉਂਦਾ ਹੈ। ਉਨ੍ਹਾਂ ITI ਦੇ ਵਿਦਿਆਰਥੀਆਂ ਦੇ ਪਹਿਰਾਵੇ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਇਹ ਠਾਠ-ਬਾਠ ਅਤੇ ਡਿਜ਼ਾਈਨਰ ਕੱਪੜੇ ਵੱਡੀਆਂ ਯੂਨੀਵਰਸਿਟੀਆਂ ਦੇ ਵਿਦਿਆਰਥੀਆਂ ਨੂੰ ਵੀ ਨਸੀਬ ਨਹੀਂ ਹੁੰਦੇ, ਜਿਹੋ ਜਿਹੇ ਸਾਡੇ ITI ਦੇ ਬੱਚਿਆਂ ਕੋਲ ਹਨ।
ਜਿਸ ਕੋਲ ਹੁਨਰ ਹੈ, ਉਸ ਦਾ ਰੁਜ਼ਗਾਰ ਕੋਈ ਨਹੀਂ ਖੋਹ ਸਕਦਾ
ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਕਾਰਨ ਰੁਜ਼ਗਾਰ ਖੁੱਸਣ ਦੀਆਂ ਚਰਚਾਵਾਂ ‘ਤੇ ਬੋਲਦਿਆਂ ਪੀਐੱਮ ਮੋਦੀ ਨੇ ਕਿਹਾ ਕਿ ਨਵੀਂ ਸਿੱਖਿਆ ਨੀਤੀ (NEP) ਵਿੱਚ ਵੀ ਹੁਨਰ ਵਿਕਾਸ ‘ਤੇ ਬਹੁਤ ਜ਼ੋਰ ਦਿੱਤਾ ਗਿਆ ਹੈ। ਜਿਸ ਵਿਅਕਤੀ ਕੋਲ ਹੁਨਰ ਹੈ, ਉਸ ਦਾ ਰੁਜ਼ਗਾਰ ਕੋਈ ਨਹੀਂ ਖੋਹ ਸਕਦਾ। ਜਦੋਂ ਨੌਜਵਾਨ ਹੁਨਰ ਸਿੱਖਦੇ ਹਨ ਤਾਂ ਉਹ ਦੇਸ਼ ਦਾ ਕੰਮ ਆਸਾਨ ਬਣਾਉਂਦੇ ਹਨ। ਅੱਜ ਪੂਰੀ ਦੁਨੀਆ ਵਿੱਚ ਭਾਰਤ ਦਾ ਬਣਿਆ ਮੋਬਾਈਲ ਫ਼ੋਨ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਸਾਲ 2014 ਤੋਂ ਬਾਅਦ ਕੇਂਦਰ ਸਰਕਾਰ ਨੇ ਦੇਸ਼ ਵਿੱਚ 5000 ਨਵੇਂ ITI ਸਥਾਪਤ ਕੀਤੇ ਹਨ ਅਤੇ ਆਉਣ ਵਾਲੇ ਭਵਿੱਖ ਵਿੱਚ ITI ਇੱਕ ਸ਼ਾਨਦਾਰ ਇਤਿਹਾਸ ਲਿਖਣ ਜਾ ਰਿਹਾ ਹੈ।
ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਸਾਊਦੀ ਅਰਬ ਵਿੱਚ ਹਰ ਸ਼ਾਹੀ ਪਰਿਵਾਰ ਭਾਰਤ ਦੇ ਹੁਨਰ ਦੀ ਸ਼ਲਾਘਾ ਕਰਦਾ ਹੈ। ਅੱਜ ਪੂਰੀ ਦੁਨੀਆ ਭਾਰਤ ਦੇ ਨੌਜਵਾਨਾਂ ਦੀ ਮੰਗ ਕਰ ਰਹੀ ਹੈ, ਯੂਨੀਵਰਸਿਟੀਆਂ ਤੋਂ ਨਿਕਲੇ ਵਿਦਿਆਰਥੀਆਂ ਦੀ ਨਹੀਂ ਸਗੋਂ ITI ਦੇ ਹੁਨਰਮੰਦ ਨੌਜਵਾਨਾਂ ਦੀ। ਉਨ੍ਹਾਂ ਕਿਹਾ ਕਿ ਸਿਰਫ਼ ਕਾਗਜ਼ੀ ਡਿਗਰੀਆਂ ਲੈ ਕੇ ਕੋਟ-ਪੈਂਟ ਪਾ ਕੇ ਘੁੰਮਣ ਵਾਲਿਆਂ ਨਾਲੋਂ ਕਿਤੇ ਵੱਧ ਕਦਰ ਇਨ੍ਹਾਂ ਹੁਨਰਮੰਦ ਨੌਜਵਾਨਾਂ ਦੀ ਹੋਣ ਵਾਲੀ ਹੈ।


