NEET UG 2027 ਵਿੱਚ ਪਹਿਲੀ ਵਾਰ ਲਾਗੂ ਹੋਵੇਗਾ ਨਾਰਮਲਾਈਜ਼ੇਸ਼ਨ, ਕੀ ਘੱਟ-ਵੱਧ ਹੋ ਸਕਦੇ ਹਨ ਉਮੀਦਵਾਰਾਂ ਦੇ ਅੰਕ
NEET Normalization: NEET UG 2027 ਦੀ ਪ੍ਰੀਖਿਆ CBT ਮੋਡ ਵਿੱਚ ਕਰਵਾਉਣ ਦਾ ਪ੍ਰਸਤਾਵ ਹੈ। ਇਸ ਤਹਿਤ 20 ਲੱਖ ਤੋਂ ਵੱਧ ਉਮੀਦਵਾਰਾਂ ਲਈ ਪ੍ਰੀਖਿਆ 5 ਤੋਂ 6 ਦਿਨਾਂ ਤੱਕ ਕਰਵਾਈ ਜਾਵੇਗੀ। ਜੇਕਰ ਪ੍ਰੀਖਿਆ ਕਈ ਸ਼ਿਫਟਾਂ ਵਿੱਚ ਕਰਵਾਈ ਜਾਂਦੀ ਹੈ ਤਾਂ ਨਾਰਮਲਾਈਜ਼ੇਸ਼ਨ ਫਾਰਮੂਲਾ ਲਾਗੂ ਹੋਵੇਗਾ।
NEET UG 2027: ਨੈਸ਼ਨਲ ਐਲਿਜ਼ਬਿਲਿਟੀ ਐਂਟਰੈਂਸ ਟੈਸਟ (NEET) UG 2027 ਕਈ ਵੱਡੇ ਬਦਲਾਵਾਂ ਨਾਲ ਕਰਵਾਇਆ ਜਾਵੇਗਾ। ਇਸ ਤਹਿਤ NEET UG 2027 ਨੂੰ ਕੰਪਿਊਟਰ ਬੇਸਡ ਟੈਸਟ (CBT) ਮੋਡ ਵਿੱਚ ਕਰਵਾਉਣ ਦਾ ਐਲਾਨ ਪਹਿਲਾਂ ਹੀ ਕੀਤਾ ਜਾ ਚੁੱਕਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ CBT ਮੋਡ ਉਮੀਦਵਾਰਾਂ ਲਈ ਵੱਡੀ ਰਾਹਤ ਸਾਬਤ ਹੋਵੇਗਾ, ਪਰ ਇਸ ਦੇ ਨਾਲ ਕਈ ਹੋਰ ਮਹੱਤਵਪੂਰਨ ਬਦਲਾਅ ਵੀ ਲਾਗੂ ਹੋਣਗੇ। CBT ਮੋਡ ਵਿੱਚ ਪ੍ਰੀਖਿਆ ਹੋਣ ਕਾਰਨ ਨਾਰਮਲਾਈਜ਼ੇਸ਼ਨ ਫਾਰਮੂਲਾ ਵੀ ਲਾਗੂ ਕੀਤਾ ਜਾਵੇਗਾ। ਇਹ ਪਹਿਲੀ ਵਾਰ ਹੋਵੇਗਾ ਕਿ NEET UG ਵਿੱਚ ਨਾਰਮਲਾਈਜ਼ੇਸ਼ਨ ਪ੍ਰਣਾਲੀ ਅਪਣਾਈ ਜਾਵੇਗੀ। ਇਸ ਦੇ ਨਤੀਜੇ ਵਜੋਂ ਉਮੀਦਵਾਰਾਂ ਦੇ ਅੰਕ ਵੱਧ ਜਾਂ ਘੱਟ ਹੋ ਸਕਦੇ ਹਨ। ਇਸ ਕਾਰਨ NEET UG ਦੇ ਸਕੋਰਿੰਗ ਸਿਸਟਮ ਵਿੱਚ ਵੀ ਵੱਡਾ ਬਦਲਾਅ ਦੇਖਣ ਨੂੰ ਮਿਲੇਗਾ।
ਆਓ ਜਾਣਦੇ ਹਾਂ ਕਿ NEET UG 2027 ਲਈ ਕਿਹੜੇ-ਕਿਹੜੇ ਬਦਲਾਅ ਪ੍ਰਸਤਾਵਿਤ ਹਨ। ਇਹ ਵੀ ਸਮਝਾਂਗੇ ਕਿ ਨਾਰਮਲਾਈਜ਼ੇਸ਼ਨ ਫਾਰਮੂਲਾ ਕੀ ਹੁੰਦਾ ਹੈ, ਕੀ ਇਸ ਦੇ ਲਾਗੂ ਹੋਣ ਨਾਲ ਉਮੀਦਵਾਰਾਂ ਦੇ ਅੰਕ ਵੱਧ ਜਾਂ ਘੱਟ ਹੋ ਸਕਦੇ ਹਨ ਅਤੇ ਅੰਕਾਂ ਵਿੱਚ ਬਦਲਾਅ ਤੋਂ ਬਾਅਦ NEET UG ਦਾ ਸਕੋਰਿੰਗ ਸਿਸਟਮ ਕਿਵੇਂ ਬਦਲ ਸਕਦਾ ਹੈ।
NEET UG 2027 ਦਾ ਆਯੋਜਨ 5 ਤੋਂ 6 ਦਿਨਾਂ ਤੱਕ ਹੋਵੇਗਾ
NEET UG 2027 ਨੂੰ ਕੰਪਿਊਟਰ ਬੇਸਡ ਟੈਸਟ (CBT) ਮੋਡ ਵਿੱਚ ਕਰਵਾਉਣ ਦਾ ਪ੍ਰਸਤਾਵ ਹੈ। ਇਸ ਸਬੰਧੀ ਤਿਆਰੀਆਂ ਦਾ ਖਾਕਾ ਵੀ ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਵੱਲੋਂ ਤਿਆਰ ਕਰ ਲਿਆ ਗਿਆ ਹੈ। ਇਸ ਯੋਜਨਾ ਅਨੁਸਾਰ ਦੇਸ਼ ਭਰ ਦੇ 500 ਸ਼ਹਿਰਾਂ ਵਿੱਚ 1,000 ਪ੍ਰੀਖਿਆ ਕੇਂਦਰ ਬਣਾਏ ਜਾਣਗੇ, ਜਿੱਥੇ NEET UG 2027 ਦੀ ਪ੍ਰੀਖਿਆ 5 ਤੋਂ 6 ਦਿਨਾਂ ਤੱਕ ਕਰਵਾਈ ਜਾਵੇਗੀ। ਇਹ ਜਾਣਕਾਰੀ ਹਾਲ ਹੀ ਵਿੱਚ NTA ਵੱਲੋਂ ਸਿੱਖਿਆ, ਮਹਿਲਾ, ਬਾਲ, ਯੁਵਾ ਅਤੇ ਖੇਡ ਮਾਮਲਿਆਂ ਬਾਰੇ ਸੰਸਦੀ ਸਥਾਈ ਕਮੇਟੀ ਨੂੰ ਦਿੱਤੀ ਗਈ ਹੈ। ਪਹਿਲਾਂ ਜਿੱਥੇ NEET UG ਦੀ ਪ੍ਰੀਖਿਆ ਸਿਰਫ਼ ਇੱਕ ਹੀ ਦਿਨ ਵਿੱਚ ਕਰਵਾਈ ਜਾਂਦੀ ਸੀ, ਹੁਣ ਇਸ ਨੂੰ 5 ਤੋਂ 6 ਦਿਨਾਂ ਵਿੱਚ ਕਈ ਸ਼ਿਫਟਾਂ ਵਿੱਚ ਆਯੋਜਿਤ ਕੀਤਾ ਜਾਵੇਗਾ।
ਕਈ ਸ਼ਿਫਟਾਂ ਵਿੱਚ ਹੋਵੇਗੀ NEET UG, ਤਾਂ ਨਾਰਮਲਾਈਜ਼ੇਸ਼ਨ ਹੋਵੇਗਾ ਲਾਗੂ
NEET UG 2027 ਦਾ ਆਯੋਜਨ 5 ਤੋਂ 6 ਦਿਨਾਂ ਵਿੱਚ CBT ਮੋਡ ਵਿੱਚ ਕਰਵਾਉਣ ਦਾ ਪ੍ਰਸਤਾਵ ਹੈ। ਅਜਿਹੇ ਵਿੱਚ ਇਹ ਪਹਿਲੀ ਵਾਰ ਹੋਵੇਗਾ ਜਦੋਂ NEET UG ਕਈ ਸ਼ਿਫਟਾਂ ਵਿੱਚ ਆਯੋਜਿਤ ਕੀਤੀ ਜਾਵੇਗੀ। ਜਦੋਂ ਵੀ ਕਿਸੇ ਪ੍ਰੀਖਿਆ ਦਾ ਆਯੋਜਨ ਕਈ ਸ਼ਿਫਟਾਂ ਵਿੱਚ ਹੁੰਦਾ ਹੈ, ਤਾਂ ਸਾਰੇ ਉਮੀਦਵਾਰਾਂ ਦਾ ਇੱਕੋ ਜਿਹਾ ਅਤੇ ਨਿਰਪੱਖ ਮੁਲਾਂਕਣ ਯਕੀਨੀ ਬਣਾਉਣ ਲਈ ਨਾਰਮਲਾਈਜ਼ੇਸ਼ਨ ਫਾਰਮੂਲਾ ਲਾਗੂ ਕੀਤਾ ਜਾਂਦਾ ਹੈ।
ਕੀ ਹੈ ਨਾਰਮਲਾਈਜ਼ੇਸ਼ਨ?
ਅਸਲ ਵਿੱਚ ਨਾਰਮਲਾਈਜ਼ੇਸ਼ਨ ਇੱਕ ਗਣਿਤੀ (Mathematical) ਫਾਰਮੂਲਾ ਹੈ। ਇਸ ਫਾਰਮੂਲੇ ਦੀ ਵਰਤੋਂ ਕਈ ਸ਼ਿਫਟਾਂ ਵਿੱਚ ਹੋਈ ਪ੍ਰੀਖਿਆ ਦਾ ਅੰਤਿਮ ਨਤੀਜਾ ਤਿਆਰ ਕਰਨ ਲਈ ਕੀਤੀ ਜਾਂਦੀ ਹੈ। ਇਸ ਦਾ ਮੁੱਖ ਮਕਸਦ ਸਾਰੇ ਉਮੀਦਵਾਰਾਂ ਨੂੰ ਇੱਕੋ ਜਿਹਾ ਅਤੇ ਨਿਰਪੱਖ ਮੌਕਾ ਦੇਣਾ ਹੁੰਦਾ ਹੈ।
ਇਹ ਵੀ ਪੜ੍ਹੋ
ਦਰਅਸਲ, ਕਈ ਸ਼ਿਫਟਾਂ ਵਿੱਚ ਹੋਣ ਵਾਲੀਆਂ ਪ੍ਰੀਖਿਆਵਾਂ ਵਿੱਚ ਪ੍ਰਸ਼ਨ ਪੱਤਰ ਦਾ ਪੱਧਰ ਇੱਕੋ ਜਿਹਾ ਨਹੀਂ ਹੁੰਦਾ। ਕਿਸੇ ਸ਼ਿਫਟ ਦਾ ਪੇਪਰ ਆਸਾਨ ਹੋ ਸਕਦਾ ਹੈ, ਜਦਕਿ ਕਿਸੇ ਹੋਰ ਸ਼ਿਫਟ ਦਾ ਮੁਸ਼ਕਲ। ਅਜਿਹੇ ਵਿੱਚ ਮੁਸ਼ਕਲ ਪੇਪਰ ਦੇਣ ਵਾਲਿਆਂ ਨੂੰ ਸੁਭਾਵਿਕ ਤੌਰ ‘ਤੇ ਘੱਟ ਅਤੇ ਆਸਾਨ ਪੇਪਰ ਦੇਣ ਵਾਲਿਆਂ ਨੂੰ ਵੱਧ ਅੰਕ ਮਿਲ ਸਕਦੇ ਹਨ। ਇਸ ਅਸਮਾਨਤਾ ਨੂੰ ਦੂਰ ਕਰਨ ਲਈ ਨਾਰਮਲਾਈਜ਼ੇਸ਼ਨ ਲਾਗੂ ਕੀਤਾ ਜਾਂਦਾ ਹੈ, ਤਾਂ ਜੋ ਸਾਰੇ ਉਮੀਦਵਾਰਾਂ ਦਾ ਨਿਰਪੱਖ ਮੁਲਾਂਕਣ ਹੋ ਸਕੇ।
ਨਾਰਮਲਾਈਜ਼ੇਸ਼ਨ ਨਾਲ ਅੰਕ ਘੱਟ-ਵੱਧ ਹੋ ਸਕਦੇ ਹਨ
ਨਾਰਮਲਾਈਜ਼ੇਸ਼ਨ ਲਾਗੂ ਹੋਣ ਤੋਂ ਬਾਅਦ ਕੁਝ ਉਮੀਦਵਾਰਾਂ ਦੇ ਅੰਕ ਘੱਟ ਹੋ ਸਕਦੇ ਹਨ, ਜਦਕਿ ਕੁਝ ਦੇ ਅੰਕ ਵੱਧ ਵੀ ਸਕਦੇ ਹਨ। ਆਸਾਨ ਪੇਪਰ ਵਿੱਚ ਮਿਲੇ ਵੱਧ ਅੰਕਾਂ ਵਿੱਚ ਕਟੌਤੀ ਹੋ ਸਕਦੀ ਹੈ, ਜਦਕਿ ਮੁਸ਼ਕਲ ਪੇਪਰ ਦੇਣ ਵਾਲੇ ਉਮੀਦਵਾਰਾਂ ਨੂੰ ਗਣਿਤੀ ਫਾਰਮੂਲੇ ਦੇ ਆਧਾਰ ‘ਤੇ ਵਾਧੂ ਅੰਕ ਮਿਲ ਸਕਦੇ ਹਨ। ਇਸ ਦਾ ਉਦੇਸ਼ ਵੱਖ-ਵੱਖ ਸ਼ਿਫਟਾਂ ਦੇ ਪੇਪਰਾਂ ਦੇ ਪੱਧਰ ਨੂੰ ਸੰਤੁਲਿਤ ਕਰਕੇ ਨਿਰਪੱਖ ਨਤੀਜਾ ਜਾਰੀ ਕਰਨਾ ਹੈ।
NEET UG ਵਿੱਚ ਲਾਗੂ ਹੋਵੇਗਾ ਪਰਸੈਂਟਾਈਲ ਫਾਰਮੂਲਾ
ਹੁਣ ਤੱਕ NEET UG ਵਿੱਚ ਉਮੀਦਵਾਰਾਂ ਨੂੰ ਉਨ੍ਹਾਂ ਦੇ ਸਕੋਰ (Marks) ਦੇ ਆਧਾਰ ‘ਤੇ ਰੈਂਕ ਅਤੇ ਦਾਖਲਾ ਮਿਲਦਾ ਸੀ। ਪਰ NEET UG 2027 ਵਿੱਚ ਨਾਰਮਲਾਈਜ਼ੇਸ਼ਨ ਲਾਗੂ ਹੋਣ ਤੋਂ ਬਾਅਦ ਅੰਕਾਂ ਵਿੱਚ ਤਬਦੀਲੀ ਸੰਭਵ ਹੋਵੇਗੀ। ਇਸ ਕਾਰਨ ਉਮੀਦਵਾਰਾਂ ਦਾ ਮੁਲਾਂਕਣ ਪਰਸੈਂਟਾਈਲ (Percentile) ਦੇ ਆਧਾਰ ‘ਤੇ ਕੀਤਾ ਜਾਵੇਗਾ। ਪਰਸੈਂਟਾਈਲ ਇਹ ਦਰਸਾਉਂਦਾ ਹੈ ਕਿ ਕਿਸੇ ਉਮੀਦਵਾਰ ਤੋਂ ਅੱਗੇ ਜਾਂ ਪਿੱਛੇ ਕਿੰਨੇ ਉਮੀਦਵਾਰ ਹਨ। JEE ਪ੍ਰੀਖਿਆ ਵਿੱਚ ਵੀ ਇਹੀ ਪ੍ਰਣਾਲੀ ਪਹਿਲਾਂ ਤੋਂ ਲਾਗੂ ਹੈ, ਜਿੱਥੇ ਉਮੀਦਵਾਰਾਂ ਦੀ ਕਾਰਗੁਜ਼ਾਰੀ ਪਰਸੈਂਟਾਈਲ ਦੇ ਆਧਾਰ ‘ਤੇ ਤੈਅ ਕੀਤੀ ਜਾਂਦੀ ਹੈ।
Source:TV9Hindi.com
