ਕਾਰ ਦੀ ਕੀਮਤ 8 ਲੱਖ, ਪਰ ਬਿਲ 10 ਲੱਖ! ਜਾਣੋ ਐਕਸ-ਸ਼ੋਰੂਮ ਅਤੇ ਆਨ-ਰੋਡ ਕੀਮਤ ਦੇ ਵਿਚਕਾਰ ਪੂਰਾ ਅੰਤਰ
Car Price vs Ex-Showroom Price: ਨਵੀਂ ਕਾਰ ਜਾਂ ਬਾਈਕ ਖਰੀਦਦੇ ਸਮੇਂ ਐਕਸ-ਸ਼ੋਰੂਮ ਅਤੇ ਆਨ-ਰੋਡ ਕੀਮਤ ਵਿੱਚ ਵੱਡਾ ਫਰਕ ਹੁੰਦਾ ਹੈ। ਆਨ-ਰੋਡ ਕੀਮਤ ਵਿੱਚ ਰੋਡ ਟੈਕਸ, ਰਜਿਸਟ੍ਰੇਸ਼ਨ, ਬੀਮਾ, ਫਾਸਟੈਗ ਅਤੇ ਹੋਰ ਚਾਰਜ ਸ਼ਾਮਲ ਹੁੰਦੇ ਹਨ। ਇਸ ਲਈ ਵਾਹਨ ਖਰੀਦਣ ਤੋਂ ਪਹਿਲਾਂ ਇਸਦੀ ਪੂਰੀ ਆਨ-ਰੋਡ ਕੀਮਤ ਬਾਰੇ ਜ਼ਰੂਰ ਜਾਣਕਾਰੀ ਲੈ ਲਵੋ।
ਹਰ ਕੋਈ ਨਵੀਂ ਕਾਰ ਜਾਂ ਬਾਈਕ ਖਰੀਦਣ ਦਾ ਸੁਪਨਾ ਦੇਖਦਾ ਹੈ। ਪਰ ਜਦੋਂ ਲੋਕ ਸ਼ੋਅਰੂਮ ਵਿੱਚ ਵਾਹਨ ਖਰੀਦਣ ਜਾਂਦੇ ਹਨ, ਤਾਂ ਉਨ੍ਹਾਂ ਨੂੰ ਪਤਾ ਲੱਗਦਾ ਹੈ ਕਿ ਇਸ਼ਤਿਹਾਰੀ ਕੀਮਤ ਅਤੇ ਅਸਲ ਭੁਗਤਾਨ ਦੀ ਰਕਮ ਵੱਖਰੀ ਹੈ। ਇਸ ਨਾਲ ਅਕਸਰ ਬਜਟ ਵੱਧ ਜਾਂਦਾ ਹੈ। ਇਹ ਐਕਸ-ਸ਼ੋਰੂਮ ਅਤੇ ਆਨ-ਰੋਡ ਕੀਮਤ ਵਿੱਚ ਅੰਤਰ ਦੇ ਕਾਰਨ ਹੁੰਦਾ ਹੈ।
ਕੀ ਹੁੰਦੀ ਹੈ ਐਕਸ-ਸ਼ੋਰੂਮ ਦੀ ਕੀਮਤ?
ਐਕਸ-ਸ਼ੋਰੂਮ ਕੀਮਤ ਨਿਰਮਾਤਾ ਦੁਆਰਾ ਦਰਸਾਈ ਗਈ ਵਾਹਨ ਦੀ ਮੂਲ ਕੀਮਤ ਹੈ। ਇਸ ਵਿੱਚ ਵਾਹਨ ਦੀ ਕੀਮਤ, ਡੀਲਰ ਮਾਰਜਿਨ ਅਤੇ GST ਸ਼ਾਮਲ ਹਨ। ਹਾਲਾਂਕਿ, ਇਸ ਕੀਮਤ ‘ਤੇ ਵਾਹਨ ਨੂੰ ਸਿੱਧਾ ਸੜਕ ‘ਤੇ ਨਹੀਂ ਚਲਾਇਆ ਜਾ ਸਕਦਾ। ਕੁਝ ਡਿਊਟੀਆਂ ਅਤੇ ਟੈਕਸ ਅਦਾ ਕਰਨੇ ਪੈਂਦੇ ਹਨ, ਜੋ ਮਿਲ ਕੇ ਵਾਹਨ ਦੀ ਆਨ-ਰੋਡ ਕੀਮਤ ਬਣਾਉਂਦੇ ਹਨ।
ਰੋਡ ਟੈਕਸ ਅਤੇ ਰਜਿਸਟ੍ਰੇਸ਼ਨ
ਸਭ ਤੋਂ ਵੱਡਾ ਖਰਚਾ ਰੋਡ ਟੈਕਸ ਅਤੇ ਰਜਿਸਟ੍ਰੇਸ਼ਨ ਦਾ ਹੁੰਦਾ ਹੈ। ਹਰ ਰਾਜ ਆਪਣੀ ਨੀਤੀ ਅਨੁਸਾਰ ਰੋਡ ਟੈਕਸ ਵਸੂਲ ਕਰਦਾ ਹੈ। ਇਹ ਟੈਕਸ ਵਾਹਨ ਦੀ ਕੀਮਤ, ਇੰਜਣ ਦੀ ਸਮਰੱਥਾ ਅਤੇ ਵਰਤੇ ਜਾਣ ਵਾਲੇ ਈਂਧਨ ਦੀ ਕਿਸਮ ਦੇ ਆਧਾਰ ‘ਤੇ ਨਿਰਧਾਰਤ ਕੀਤਾ ਜਾਂਦਾ ਹੈ। ਇਸ ਦੇ ਨਾਲ ਹੀ ਵਾਹਨ ਦੀ ਰਜਿਸਟ੍ਰੇਸ਼ਨ ਅਤੇ ਨੰਬਰ ਪਲੇਟ ਦਾ ਖਰਚਾ ਵੀ ਜੋੜਿਆ ਜਾਂਦਾ ਹੈ।
ਥਰਡ ਪਾਰਟੀ ਇੰਸ਼ੋਰੈਂਸ
ਇਸ ਤੋਂ ਬਾਅਦ ਬੀਮੇ ਦਾ ਖਰਚਾ ਆਉਂਦਾ ਹੈ। ਭਾਰਤ ਵਿੱਚ ਬਿਨਾਂ ਬੀਮੇ ਦੇ ਵਾਹਨ ਚਲਾਉਣਾ ਨਿਯਮਾਂ ਦੇ ਖ਼ਿਲਾਫ਼ ਹੈ। ਨਵੀਂ ਕਾਰ ਖਰੀਦਣ ‘ਤੇ 3 ਸਾਲ ਅਤੇ ਦੋਪਹੀਆ ਵਾਹਨ ਖਰੀਦਣ ‘ਤੇ 5 ਸਾਲ ਦਾ ਥਰਡ ਪਾਰਟੀ ਇੰਸ਼ੋਰੈਂਸ ਲੈਣਾ ਲਾਜ਼ਮੀ ਹੁੰਦਾ ਹੈ। ਕਈ ਲੋਕ ਆਪਣੀ ਗੱਡੀ ਦੀ ਵੱਧ ਸੁਰੱਖਿਆ ਲਈ ਕੰਪ੍ਰਿਹੈਂਸਿਵ (ਪੂਰਾ) ਇੰਸ਼ੋਰੈਂਸ ਵੀ ਕਰਵਾਉਂਦੇ ਹਨ, ਜਿਸ ਨਾਲ ਕੁੱਲ ਕੀਮਤ ਹੋਰ ਵੱਧ ਜਾਂਦੀ ਹੈ। ਜੇਕਰ ਕਿਸੇ ਵਾਹਨ ਦੀ ਐਕਸ-ਸ਼ੋਰੂਮ ਕੀਮਤ 10 ਲੱਖ ਰੁਪਏ ਤੋਂ ਵੱਧ ਹੈ, ਤਾਂ ਉਸ ‘ਤੇ 1 ਫੀਸਦੀ TCS (ਟੈਕਸ ਕਲੈਕਟਡ ਐਟ ਸੋਰਸ) ਵੀ ਦੇਣਾ ਪੈਂਦਾ ਹੈ। ਇਹ ਰਕਮ ਬਾਅਦ ਵਿੱਚ ਆਮਦਨ ਕਰ ਰਿਟਰਨ (Income Tax Return) ਭਰਨ ਸਮੇਂ ਐਡਜਸਟ ਹੋ ਸਕਦੀ ਹੈ, ਪਰ ਵਾਹਨ ਖਰੀਦਦੇ ਵੇਲੇ ਇਸਦਾ ਭੁਗਤਾਨ ਕਰਨਾ ਲਾਜ਼ਮੀ ਹੁੰਦਾ ਹੈ।
ਫਾਸਟੈਗ ਦੀ ਫੀਸ
ਇਸ ਤੋਂ ਇਲਾਵਾ ਫਾਸਟੈਗ ਦਾ ਸ਼ੁਲਕ ਵੀ ਲਿਆ ਜਾਂਦਾ ਹੈ, ਜਿਸ ਨਾਲ ਹਾਈਵੇਅ ‘ਤੇ ਟੋਲ ਦਾ ਭੁਗਤਾਨ ਆਸਾਨ ਹੋ ਜਾਂਦਾ ਹੈ। ਕੁਝ ਰਾਜਾਂ ਵਿੱਚ, ਖ਼ਾਸ ਕਰਕੇ ਡੀਜ਼ਲ ਵਾਹਨਾਂ ‘ਤੇ, ਵਾਧੂ ਗ੍ਰੀਨ ਟੈਕਸ ਵੀ ਲਗਾਇਆ ਜਾਂਦਾ ਹੈ। ਵਾਹਨ ਖਰੀਦਦੇ ਸਮੇਂ ਡੀਲਰ ਕੁਝ ਅਜਿਹੇ ਖਰਚੇ ਵੀ ਜੋੜ ਸਕਦੇ ਹਨ ਜੋ ਲਾਜ਼ਮੀ ਨਹੀਂ ਹੁੰਦੇ। ਜਿਵੇਂ ਕਿ ਐਕਸੈਸਰੀਜ਼ ਪੈਕ, ਐਕਸਟੈਂਡਡ ਵਾਰੰਟੀ ਜਾਂ ਹੋਰ ਵਾਧੂ ਸੁਵਿਧਾਵਾਂ। ਇਸ ਲਈ ਗੱਡੀ ਖਰੀਦਣ ਤੋਂ ਪਹਿਲਾਂ ਹਰ ਖਰਚੇ ਦੀ ਜਾਣਕਾਰੀ ਧਿਆਨ ਨਾਲ ਚੈੱਕ ਕਰਨਾ ਜ਼ਰੂਰੀ ਹੈ।
ਇਹ ਵੀ ਪੜ੍ਹੋ
ਜੇ ਤੁਸੀਂ ਇਹ ਚੀਜ਼ਾਂ ਨਹੀਂ ਲੈਣਾ ਚਾਹੁੰਦੇ, ਤਾਂ ਤੁਸੀਂ ਮਨ੍ਹਾਂ ਵੀ ਕਰ ਸਕਦੇ ਹੋ। ਇਸ ਲਈ ਫਾਈਨਲ ਬਿਲ ਨੂੰ ਧਿਆਨ ਨਾਲ ਜਾਂਚਣਾ ਬਹੁਤ ਜ਼ਰੂਰੀ ਹੈ। ਨਵੀਂ ਗੱਡੀ ਖਰੀਦਣ ਤੋਂ ਪਹਿਲਾਂ ਹਮੇਸ਼ਾ ਆਨ-ਰੋਡ ਕੀਮਤ ਜ਼ਰੂਰ ਪੁੱਛੋ। ਇਸ ਨਾਲ ਤੁਹਾਨੂੰ ਸਹੀ ਬਜਟ ਦਾ ਅੰਦਾਜ਼ਾ ਲੱਗੇਗਾ ਅਤੇ ਬਾਅਦ ਵਿੱਚ ਕਿਸੇ ਤਰ੍ਹਾਂ ਦੀ ਪਰੇਸ਼ਾਨੀ ਨਹੀਂ ਹੋਵੇਗੀ।
Source:TV9Hindi.com
