ਹਮਲਿਆਂ ਤੋਂ ਬਾਅਦ ਈਰਾਨ ਫਿਰ ਐਕਟਿਵ! ਪ੍ਰਮਾਣੂ ਤੇ ਮਿਜ਼ਾਈਲ ਸਥਾਨਾਂ ‘ਤੇ ਦੇਖੀ ਗਈ ਗਤੀਵਿਧੀ

ਅਮਰੀਕਾ ਤੇ ਇਜ਼ਰਾਈਲ ਦੇ ਹਾਲ ਹੀ ਦੇ ਹਮਲਿਆਂ ਤੋਂ ਬਾਅਦ ਈਰਾਨ ਆਪਣੇ ਕੁਝ ਪ੍ਰਮਾਣੂ ਤੇ ਮਿਜ਼ਾਈਲ ਸਥਾਨਾਂ ਦੀ ਮੁਰੰਮਤ ਜਾਂ ਪੁਨਰ ਨਿਰਮਾਣ ‘ਚ ਰੁੱਝਿਆ ਹੋ ਸਕਦਾ ਹੈ। 10 ਜੁਲਾਈ ਨੂੰ ਜਾਰੀ ਕੀਤੀ ਗਈ ਇੱਕ ਰਿਪੋਰਟ ਸੈਟੇਲਾਈਟ ਇਮੇਜਰੀ ਦੇ ਆਧਾਰ ‘ਤੇ ਇਹ ਦਾਅਵਾ ਕਰਦੀ ਹੈ। ਇਨ੍ਹਾਂ ਤਸਵੀਰਾਂ ਦਾ ਵਿਸ਼ਲੇਸ਼ਣ ਜਿਓਸਪੈਸ਼ਿਅਲ ਖੁਫੀਆ ਕੰਪਨੀ ਵੈਂਟਰ ਦੁਆਰਾ ਕੀਤਾ ਗਿਆ ਸੀ। CNN ਦੀ ਇੱਕ ਜਾਂਚ ਦੇ ਅਨੁਸਾਰ, ਤਹਿਰਾਨ ਦੇ ਦੱਖਣ-ਪੂਰਬ ‘ਚ ਸਥਿਤ ਪਰਚਿਨ ਮਿਲਟਰੀ ਕੰਪਲੈਕਸ ਦੇ ਅੰਦਰ ਤਾਲੇਘਾਨ-2 ਸੈਂਟਰ ‘ਚ ਮੁਰੰਮਤ ਦਾ ਕੰਮ ਚੱਲ ਰਿਹਾ ਜਾਪਦਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਸੈਂਟਰ ‘ਚ ਪ੍ਰਮਾਣੂ ਹਥਿਆਰਾਂ ਦੇ ਨਿਰਮਾਣ ‘ਚ ਵਰਤੇ ਜਾਣ ਵਾਲੇ ਵਿਸਫੋਟਕਾਂ ਨਾਲ ਸਬੰਧਤ ਕੰਮ ਹੁੰਦਾ ਹੈ। 22 ਜੂਨ ਤੇ 7 ਜੁਲਾਈ ਨੂੰ ਲਈਆਂ ਗਈਆਂ ਸੈਟੇਲਾਈਟ ਤਸਵੀਰਾਂ ਹਮਲਿਆਂ ਕਾਰਨ ਹੋਏ ਟੋਇਆਂ (ਕ੍ਰੇਟਰ) ਦੇ ਆਲੇ-ਦੁਆਲੇ ਮਸ਼ੀਨਰੀ ਤੇ ਹੋਰ ਗਤੀਵਿਧੀਆਂ ਦੇ ਸੰਕੇਤ ਦੇ ਰਹੀਆਂ ਹਨ। ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਨੁਕਸਾਨੇ ਗਏ ਢਾਂਚਿਆਂ ਦੀ ਮੁਰੰਮਤ ਤੇ ਮੁੜ ਨਿਰਮਾਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ।

ਇਸਫਹਾਨ ਨੇੜੇ ਪਿਕਐਕਸ ਮਾਊਨਟਨ ਦਾ ਜ਼ਿਕਰ

ਇਸਫਹਾਨ ਨੇੜੇ ਪਿਕਐਕਸ ਮਾਊਨਟਨ ਨੂੰ ਸ਼ੱਕੀ ਅੰਡਰਗ੍ਰਾਊਂਡ ਪ੍ਰਮਾਣੂ ਸਹੂਲਤ ਮੰਨਿਆ ਜਾਂਦਾ ਹੈ। 21 ਜੂਨ ਤੋਂ ਸੈਟੇਲਾਈਟ ਤਸਵੀਰਾਂ ‘ਚ ਸਾਈਟ ‘ਤੇ ਸੁਰੰਗਾਂ ‘ਚ ਤੇ ਬਾਹਰ ਵਾਹਨਾਂ ਦੀ ਆਵਾਜਾਈ ਦਿਖਾਈ ਦਿੱਤੀ। ਸੀਐਨਐਨ ਦੇ ਅਨੁਸਾਰ, ਇਹ ਗਤੀਵਿਧੀ ਉਦੋਂ ਹੋਈ ਜਦੋਂ ਈਰਾਨ ਤੇ ਅਮਰੀਕਾ ਵਿਚਕਾਰ ਸਮਝੌਤਾ (ਐਮਓਯੂ) ਅਜੇ ਵੀ ਲਾਗੂ ਸੀ। ਹਾਲਾਂਕਿ, ਇਨ੍ਹਾਂ ਸੈਟੇਲਾਈਟ ਤਸਵੀਰਾਂ ਦੇ ਸਾਹਮਣੇ ਆਉਣ ਤੋਂ ਬਾਅਦ ਵੀ, ਨਾ ਤਾਂ ਈਰਾਨੀ ਸਰਕਾਰ ਤੇ ਨਾ ਹੀ ਕਿਸੇ ਸੁਤੰਤਰ ਅੰਤਰਰਾਸ਼ਟਰੀ ਪ੍ਰਮਾਣੂ ਨਿਰੀਖਣ ਏਜੰਸੀ ਨੇ ਪੁਸ਼ਟੀ ਕੀਤੀ ਹੈ ਕਿ ਇਨ੍ਹਾਂ ਸਥਾਨਾਂ ‘ਤੇ ਕੀ ਕੰਮ ਕੀਤਾ ਜਾ ਰਿਹਾ ਹੈ।

ਈਰਾਨ ਹੋਰਮੁਜ਼ ਨੂੰ ਖੁੱਲ੍ਹਾ ਐਲਾਨ ਕਰੇ: ਅਮਰੀਕਾ

ਇਸ ਦੌਰਾਨ, ਅਮਰੀਕੀ ਮੀਡੀਆ ਆਉਟਲੈਟ ਐਕਸੀਓਸ ਦੀ ਇੱਕ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਟਰੰਪ ਪ੍ਰਸ਼ਾਸਨ ਨੇ ਈਰਾਨ ਨੂੰ ਸ਼ਨੀਵਾਰ ਤੱਕ ਦੀ ਸਮਾਂ ਸੀਮਾ ਦਿੱਤੀ ਹੈ। ਅਮਰੀਕਾ ਚਾਹੁੰਦਾ ਹੈ ਕਿ ਈਰਾਨ ਜਨਤਕ ਤੌਰ ‘ਤੇ ਐਲਾਨ ਕਰੇ ਕਿ ਹੋਰਮੁਜ਼ ਪੂਰੀ ਤਰ੍ਹਾਂ ਖੁੱਲ੍ਹਾ ਰਹੇਗਾ ਤੇ ਵਪਾਰਕ ਜਹਾਜ਼ਾਂ ‘ਤੇ ਕੋਈ ਹਮਲਾ ਨਹੀਂ ਕੀਤਾ ਜਾਵੇਗਾ। ਇਹ ਸੁਨੇਹਾ ਸਿੱਧੇ ਈਰਾਨ ਤੇ ਖੇਤਰੀ ਵਿਚੋਲਿਆਂ ਰਾਹੀਂ ਦਿੱਤਾ ਗਿਆ ਹੈ।

ਦਾਅਵਾ: ਈਰਾਨ ਨੇ ਆਪਣੀ ਗਲਤੀ ਮੰਨੀ

ਸੀਬੀਐਸ ਨਿਊਜ਼ ਦੀ ਇੱਕ ਰਿਪੋਰਟ ‘ਚ ਦਾਅਵਾ ਕੀਤਾ ਗਿਆ ਹੈ ਕਿ ਈਰਾਨੀ ਅਧਿਕਾਰੀਆਂ ਨੇ ਟਰੰਪ ਪ੍ਰਸ਼ਾਸਨ ਦੇ ਸਲਾਹਕਾਰਾਂ ਨਾਲ ਨਿੱਜੀ ਗੱਲਬਾਤ ‘ਚ ਸਵੀਕਾਰ ਕੀਤਾ ਕਿ ਹੋਰਮੁਜ਼ ‘ਚ ਵਪਾਰਕ ਜਹਾਜ਼ਾਂ ‘ਤੇ ਹਮਲਾ ਕਰਨਾ ਇੱਕ ਗਲਤੀ ਸੀ। ਉਨ੍ਹਾਂ ਨੇ ਕਿਹਾ ਕਿ ਇਹ ਹਮਲਾ ਇੱਕ ਕੱਟੜਪੰਥੀ ਧੜੇ ਦੇ ਅੰਦਰਲੇ ਭਟਕੇ ਹੋਏ ਲੋਕਾਂ ਦੁਆਰਾ ਕੀਤਾ ਗਿਆ ਸੀ ਜੋ ਗੱਲਬਾਤ ਨੂੰ ਪਟੜੀ ਤੋਂ ਉਤਾਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਅਧਿਕਾਰੀਆਂ ਦੇ ਅਨੁਸਾਰ, ਈਰਾਨ ਨੇ ਵੀ ਅਮਰੀਕਾ ਨਾਲ ਗੱਲਬਾਤ ਜਾਰੀ ਰੱਖਣ ਦੀ ਇੱਛਾ ਪ੍ਰਗਟ ਕੀਤੀ ਹੈ। ਅਮਰੀਕਾ ਦਾ ਕਹਿਣਾ ਹੈ ਕਿ ਹੋਰਮੁਜ਼ ‘ਚ ਜਹਾਜ਼ਾਂ ‘ਤੇ ਹੋਏ ਹਮਲਿਆਂ ਨੇ ਜੰਗਬੰਦੀ ਦੀ ਉਲੰਘਣਾ ਕੀਤੀ। ਵਾਸ਼ਿੰਗਟਨ ਚਾਹੁੰਦਾ ਹੈ ਕਿ ਓਮਾਨ ‘ਚ ਸ਼ਨੀਵਾਰ ਨੂੰ ਹੋਣ ਵਾਲੀ ਗੱਲਬਾਤ ਤੋਂ ਬਾਅਦ ਈਰਾਨ ਜਨਤਕ ਤੌਰ ‘ਤੇ ਭਰੋਸਾ ਦਿਵਾਏ ਕਿ ਹੋਰਮੁਜ਼ ਪਹਿਲਾਂ ਵਾਂਗ ਖੁੱਲ੍ਹਾ ਰਹੇਗਾ ਤੇ ਅੰਤਰਰਾਸ਼ਟਰੀ ਜਹਾਜ਼ਾਂ ਦੀ ਆਵਾਜਾਈ ਬਿਨਾਂ ਕਿਸੇ ਰੁਕਾਵਟ ਦੇ ਜਾਰੀ ਰਹੇਗੀ।