ਲੁਧਿਆਣਾ ‘ਚ ਕੋਰਟ ਮੈਰਿਜ ਕਰਵਾਉਣਾ ਨੌਜਵਾਨ ਨੂੰ ਪਿਆ ਭਾਰਾ, ਅੱਧ-ਨੰਗਾ ਤੇ ਗੰਜਾ ਕਰ ਘੁੰਮਾਇਆ
ਪੀੜਤ ਹਰਜੋਤ ਸਿੰਘ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਪਿੰਡ ਦੇ ਅਰਸ਼ ਸੈਲੂਨ ਵਿੱਚ ਆਪਣੀ ਦਾੜ੍ਹੀ ਕਟਵਾ ਰਿਹਾ ਸੀ। ਉਦੋਂ ਗੁਰਪ੍ਰੀਤ ਸਿੰਘ ਉਰਫ ਗੋਪਾ, ਸਿਮਰਨਜੀਤ ਸਿੰਘ, ਸੰਦੀਪ ਸਿੰਘ ਉਰਫ ਸੈਮ, ਰਾਜਵੀਰ ਅਤੇ ਰਮਨਦੀਪ ਉਰਫ ਕਾਕਾ ਉਥੇ ਪਹੁੰਚ ਗਏ। ਮੁਲਜ਼ਮਾਂ ਨੇ ਮਿਲ ਕੇ ਉਸ ਨੂੰ ਕੁੱਟਿਆ, ਉਸ ਦਾ ਚਿਹਰਾ ਕਾਲਾ ਕਰ ਦਿੱਤਾ, ਉਸ ਦੇ ਵਾਲ, ਦਾੜ੍ਹੀ ਤੇ ਮੁੱਛਾਂ ਕੱਟ ਦਿੱਤੀਆਂ ਹਨ।

ਲੁਧਿਆਣਾ ‘ਚ ਇੱਕ ਕੋਰਟ ਮੈਰਿਜ ਨਾਲ ਸਬੰਧਤ ਝਗੜੇ ਵਿੱਚ ਕੁੜੀ ਵਾਲੇ ਪਾਸੇ ਦੇ ਲੋਕਾਂ ਨੇ ਇੱਕ ਨੌਜਵਾਨ ਨਾਲ ਬੇਰਹਿਮੀ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ। ਕੁਝ ਨੌਜਵਾਨਾਂ ਨੇ ਨਾ ਸਿਰਫ਼ ਉਸ ਦਾ ਚਿਹਰਾ ਕਾਲਾ ਕਰ ਦਿੱਤਾ, ਸਗੋਂ ਉਸ ਦੀ ਦਾੜ੍ਹੀ ਤੇ ਮੁੱਛਾਂ ਵੀ ਕੱਟ ਦਿੱਤੀਆਂ। ਉਸ ਨੂੰ ਅੱਧ ਨੰਗਾ ਕਰਕੇ ਪਿੰਡ ਵਿੱਚ ਘੁੰਮਾਇਆ ਗਿਆ। ਕਿਸੇ ਤਰ੍ਹਾਂ ਉਸ ਨੂੰ ਮੁਆਫ਼ੀ ਮੰਗ ਕੇ ਆਜ਼ਾਦ ਹੋਣਾ ਪਿਆ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇੱਕ ਮੁਲਜ਼ਮ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਹਮਲਾਵਰ ਉਸ ਤੋਂ ਕੁੜੀ ਦਾ ਪਤਾ ਪੁੱਛ ਰਹੇ ਸਨ।
ਪੀੜਤ ਹਰਜੋਤ ਸਿੰਘ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਪਿੰਡ ਦੇ ਅਰਸ਼ ਸੈਲੂਨ ਵਿੱਚ ਆਪਣੀ ਦਾੜ੍ਹੀ ਕਟਵਾ ਰਿਹਾ ਸੀ। ਉਦੋਂ ਗੁਰਪ੍ਰੀਤ ਸਿੰਘ ਉਰਫ ਗੋਪਾ, ਸਿਮਰਨਜੀਤ ਸਿੰਘ, ਸੰਦੀਪ ਸਿੰਘ ਉਰਫ ਸੈਮ, ਰਾਜਵੀਰ ਅਤੇ ਰਮਨਦੀਪ ਉਰਫ ਕਾਕਾ ਉਥੇ ਪਹੁੰਚ ਗਏ। ਮੁਲਜ਼ਮਾਂ ਨੇ ਮਿਲ ਕੇ ਉਸ ਨੂੰ ਕੁੱਟਿਆ, ਉਸ ਦਾ ਚਿਹਰਾ ਕਾਲਾ ਕਰ ਦਿੱਤਾ, ਉਸ ਦੇ ਵਾਲ, ਦਾੜ੍ਹੀ ਤੇ ਮੁੱਛਾਂ ਕੱਟ ਦਿੱਤੀਆਂ ਹਨ। ਇਸ ਦੌਰਾਨ ਉਸ ਨੇ ਜਾਤੀਸੂਚਕ ਸ਼ਬਦਾਂ ਦੀ ਵਰਤੋਂ ਵੀ ਕੀਤੀ ਤੇ ਪੂਰੀ ਘਟਨਾ ਦੀ ਵੀਡੀਓ ਵੀ ਬਣਾਈ।
ਨੌਜਵਾਨ ਨੂੰ ਅੱਧ ਨੰਗਾ ਤੇ ਗੰਜਾ ਕਰ ਘੁੰਮਾਇਆ
ਪੀੜਤ ਦੇ ਰਿਸ਼ਤੇਦਾਰਾਂ ਅਨੁਸਾਰ, ਇਹ ਮਾਮਲਾ 19 ਜੂਨ ਨੂੰ ਹੋਏ ਇੱਕ ਕੋਰਟ ਮੈਰਿਜ ਨਾਲ ਸਬੰਧਤ ਹੈ। ਹਰਜੋਤ ਦੇ ਦੋਸਤ ਗੁਰਪ੍ਰੀਤ ਨੇ ਪਿੰਡ ਦੀ ਇੱਕ ਕੁੜੀ ਨਾਲ ਕੋਰਟ ਮੈਰਿਜ ਕੀਤੀ ਸੀ। ਮੁਲਜ਼ਮ ਨੂੰ ਸ਼ੱਕ ਸੀ ਕਿ ਹਰਜੋਤ ਨੇ ਗੁਰਪ੍ਰੀਤ ਦੀ ਮਦਦ ਕੀਤੀ ਸੀ ਤੇ ਉਸ ਦਾ ਠਿਕਾਣਾ ਜਾਣਦਾ ਸੀ।
ਮੇਹਰਬਾਨ ਥਾਣੇ ਨੇ 16 ਲੋਕਾਂ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਮੁਲਜ਼ਮਾਂ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ 115(2), 127(2), 351, 66A, 67-B ਅਤੇ SC/ST ਐਕਟ, 1989 ਤਹਿਤ ਮਾਮਲਾ ਦਰਜ ਕੀਤਾ ਜਾ ਰਿਹਾ ਹੈ। ਹੁਣ ਤੱਕ ਇੱਕ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।