ਪੰਜਾਬ ਦੇ ਕੈਦੀ ਹੁਣ ਬਣਨਗੇ ਟੈਕਨੀਸ਼ੀਅਨ, ਇਲੈਕਟ੍ਰੀਸ਼ੀਅਨ ਤੇ ਹੋਰ ਬਹੁਤ ਕੁੱਝ, ਸਰਕਾਰ ਤੇ HC ਦਾ ਨਵਾਂ ਪ੍ਰੋਗਰਾਮ
ਪੰਜਾਬ ਸਰਕਾਰ ਨੇ ਕੈਦੀਆਂ ਲਈ ਇੱਕ ਵੱਡਾ ਕਦਮ ਚੁੱਕਿਆ ਹੈ। 'Empowering Lives Behind Bars' ਪਹਿਲਕਦਮੀ ਦੇ ਤਹਿਤ, ਜੇਲ੍ਹਾਂ 'ਚ 11 ਨਵੀਆਂ ITI ਖੋਲ੍ਹੀਆਂ ਜਾਣਗੀਆਂ, ਜਿਸ ਨਾਲ 2,500 ਕੈਦੀਆਂ ਨੂੰ ਵੈਲਡਿੰਗ ਤੇ ਇਲੈਕਟ੍ਰੀਸ਼ੀਅਨ ਵਰਗੇ NCVT-ਪ੍ਰਮਾਣਿਤ ਹੁਨਰ ਸਿਖਲਾਈ ਪ੍ਰਦਾਨ ਕੀਤੀ ਜਾਵੇਗੀ।
ਪੰਜਾਬ ਸਰਕਾਰ ਨੇ ਜੇਲ੍ਹਾਂ ‘ਚ ਕੈਦੀਆਂ ਲਈ ਇੱਕ ਵੱਡਾ ਕਦਮ ਚੁੱਕਿਆ ਹੈ। ‘Empowering Lives Behind Bars’ ਪਹਿਲਕਦਮੀ ਦੇ ਤਹਿਤ, ਪੰਜਾਬ ਸਰਕਾਰ ਤੇ ਪੰਜਾਬ-ਹਰਿਆਣਾ ਹਾਈ ਕੋਰਟ ਵੱਲੋਂ ਜੇਲ੍ਹਾਂ ‘ਚ 11 ਨਵੀਆਂ ITI ਖੋਲ੍ਹੀਆਂ ਜਾਣਗੀਆਂ। ਇਸ ਰਾਹੀਂ, ਸਾਰੀਆਂ 24 ਜੇਲ੍ਹਾਂ ਦੇ 2,500 ਕੈਦੀਆਂ ਨੂੰ NCVT ਤੇ NSQF-ਪ੍ਰਮਾਣਿਤ ਹੁਨਰ ਸਿਖਲਾਈ ਪ੍ਰਾਪਤ ਹੋਵੇਗੀ।
ਇਹ ਪ੍ਰੋਗਰਾਮ ਪਟਿਆਲਾ ਕੇਂਦਰੀ ਜੇਲ੍ਹ ‘ਚ ਚੀਫ ਜਸਟਿਸ ਸੂਰਿਆ ਕਾਂਤ ਦੀ ਮੌਜੂਦਗੀ ਵਿੱਚ ਸ਼ੁਰੂ ਹੋਵੇਗਾ। ਇਸ ਪਹਿਲਕਦਮੀ ਰਾਹੀਂ, ਕੈਦੀਆਂ ਨੂੰ ਵੈਲਡਿੰਗ, ਇਲੈਕਟ੍ਰੀਸ਼ੀਅਨ, ਬੇਕਰੀ ਤੇ COPA ਸਮੇਤ ਵੱਖ-ਵੱਖ ਵਪਾਰਾਂ ‘ਚ ਲਾਂਗ ਟਰਮ ਤੇ ਸ਼ਾਰਟ ਟਰਮ ਦੇ ਕੋਰਸ ਕਰਵਾਏ ਜਾਣਗੇ। ਪੰਜਾਬ ਰਾਜ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦੀ ਯੂਥ ਅਗੇਂਸਟ ਡਰੱਗਜ਼ (YSD) ਮੁਹਿੰਮ ਵੀ ਉਸੇ ਦਿਨ ਸ਼ੁਰੂ ਹੋਵੇਗੀ।
ਕੋਰਸ ਦੇ ਨਾਲ ਵਜ਼ੀਫ਼ਾ ਵੀ ਮਿਲੇਗਾ
ਹਰੇਕ ਪ੍ਰੋਗਰਾਮ ਰਾਸ਼ਟਰੀ ਮਾਪਦੰਡਾਂ ਅਨੁਸਾਰ ਚਲਾਇਆ ਜਾਵੇਗਾ, ਜਿਸ ‘ਚ ਪ੍ਰਮਾਣਿਤ ਟ੍ਰੇਨਰ, ਆਧੁਨਿਕ ਵਰਕਸ਼ਾਪਾਂ ਤੇ ਜੇਲ੍ਹ ਫੈਕਟਰੀਆਂ ਦੇ ਅੰਦਰ ਪ੍ਰੈਕੀਟਲ ਅਭਿਆਸ ਸ਼ਾਮਲ ਹੋਣਗੇ। ਕੋਰਸ ‘ਚ 1,000 ਰੁਪਏ ਦਾ ਮਹੀਨਾਵਾਰ ਵਜ਼ੀਫ਼ਾ ਤੇ ਰਾਸ਼ਟਰੀ ਪੱਧਰ ‘ਤੇ ਮਾਨਤਾ ਪ੍ਰਾਪਤ ਪ੍ਰਮਾਣੀਕਰਣ ਸ਼ਾਮਲ ਹੋਵੇਗਾ, ਜੋ ਇਹਨਾਂ ਯੋਗਤਾਵਾਂ ਨੂੰ ਸਰਕਾਰੀ ਤੇ ਨਿੱਜੀ ਦੋਵਾਂ ਖੇਤਰਾਂ ਵਿੱਚ ਵੈਧ ਬਣਾਉਂਦਾ ਹੈ।
ਪੰਜਾਬ ‘ਚ ਮਜ਼ਬੂਤ ਹੋ ਰਿਹਾ ਪੁਨਰਵਾਸ ਸਿਸਟਮ
ਪੰਜਾਬ ਨੇ ਨੌਂ ਜੇਲ੍ਹਾਂ ‘ਚ ਇੱਕੋ ਸਮੇਂ ਪੈਟਰੋਲ ਪੰਪ, ਯੋਗਾ ਤੇ ਖੇਡ ਪ੍ਰੋਗਰਾਮ, ਪਰਿਵਾਰ ਨਾਲ ਸੰਪਰਕ ਬਣਾਈ ਰੱਖਣ ਲਈ ਇੱਕ ਜੇਲ੍ਹ ਕਾਲਿੰਗ ਪ੍ਰਣਾਲੀ, ਕੈਦੀਆਂ ਦੁਆਰਾ ਚਲਾਇਆ ਜਾਣ ਵਾਲਾ ਇੱਕ ਰੇਡੀਓ ਚੈਨਲ, ਰੇਡੀਓ ਉਜਾਲਾ ਤੇ ਰਚਨਾਤਮਕ ਪ੍ਰਗਟਾਵੇ ਲਈ ਇੱਕ ਸਮਰਪਿਤ ਪਲੇਟਫਾਰਮ ਸਥਾਪਤ ਕਰਕੇ ਆਪਣੀ ਪੁਨਰਵਾਸ ਪ੍ਰਣਾਲੀ ਨੂੰ ਮਜ਼ਬੂਤ ਕੀਤਾ ਹੈ। ਰਾਜ ਕਾਨੂੰਨੀ ਸੇਵਾਵਾਂ ਅਥਾਰਟੀ ਨਸ਼ੇ ਦੀ ਲਤ ਨਾਲ ਜੁੜੇ ਅਪਰਾਧ ਪੈਟਰਨ ਦੇ ਜਵਾਬ ‘ਚ, ਯੂਥ ਅਗੇਂਸਟ ਡਰੱਗਜ਼ ਨਾਮਕ ਇੱਕ ਰਾਜ ਵਿਆਪੀ ਨਸ਼ਾ ਵਿਰੋਧੀ ਜਾਗਰੂਕਤਾ ਮੁਹਿੰਮ ਵੀ ਸ਼ੁਰੂ ਕਰ ਰਹੀ ਹੈ।
ਹਰਿਆਣਾ ‘ਚ ਸੁਧਾਰ ਪਹਿਲਕਦਮੀਆਂ
ਹਰਿਆਣਾ ਪੌਲੀਟੈਕਨਿਕ ਡਿਪਲੋਮਾ ਪ੍ਰੋਗਰਾਮ, ਆਈਟੀਆਈ ਕੋਰਸਾਂ ਤੇ ਹੁਨਰ ਵਿਕਾਸ ਕੇਂਦਰਾਂ ‘ਤੇ ਅਧਾਰਤ ਇੱਕ ਮਾਡਲ ਪੇਸ਼ ਕਰੇਗਾ। ਇਸ ਦਾ ਮੁੱਖ ਪ੍ਰੋਗਰਾਮ ਕੰਪਿਊਟਰ ਇੰਜੀਨੀਅਰਿੰਗ ‘ਚ ਤਿੰਨ ਸਾਲਾਂ ਦਾ ਪੌਲੀਟੈਕਨਿਕ ਡਿਪਲੋਮਾ ਹੈ। ਜਸਟਿਸ ਕੁਲਦੀਪ ਤਿਵਾੜੀ ਦੀ ਅਗਵਾਈ ਵਾਲੀ ਕਮੇਟੀ ਦੁਆਰਾ ਨਿਰਦੇਸ਼ਤ, ਇਹ ਢਾਂਚਾ ਸਲਾਹ, ਹੁਨਰ ਨਿਰੰਤਰਤਾ ਤੇ ਆਚਰਣ-ਅਧਾਰਤ ਪ੍ਰਮਾਣੀਕਰਣ ‘ਤੇ ਵੀ ਜ਼ੋਰ ਦਿੰਦਾ ਹੈ।
