ਲੁਧਿਆਣਾ ਬਣਿਆ ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਵਾਲਾ ਤੀਜ਼ਾ ਸ਼ਹਿਰ, DGP ਨੇ ਇੰਟੀਗ੍ਰੇਟਡ ਕਮਾਂਡ ਐਂਡ ਕੰਟਰੋਲ ਸੈਂਟਰ ਦਾ ਕੀਤਾ ਉਦਘਾਟਨ
ਡੀਜੀਪੀ ਗੌਰਵ ਯਾਦਵ ਨੇ ਕਿਹਾ ਕਿ ਲੁਧਿਆਣਾ ਹੁਣ ਮੋਹਾਲੀ ਤੇ ਜਲੰਧਰ ਤੋਂ ਬਾਅਦ ਪੰਜਾਬ ਦਾ ਤੀਜਾ ਸ਼ਹਿਰ ਬਣ ਗਿਆ ਹੈ, ਜਿੱਥੇ ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ (ਆਈਟੀਐਮਐਸ) ਨੂੰ ਪੂਰੀ ਤਰ੍ਹਾਂ ਲਾਗੂ ਕੀਤਾ ਗਿਆ ਹੈ। ਇਸ ਪ੍ਰਣਾਲੀ ਦੇ ਤਹਿਤ, 46 ਮੁੱਖ ਜੰਕਸ਼ਨਾਂ 'ਤੇ ਲਗਾਏ ਗਏ AI-ਅਧਾਰਤ ਕੈਮਰੇ ਆਪਣੇ ਆਪ ਟ੍ਰੈਫਿਕ ਉਲੰਘਣਾਵਾਂ ਦਾ ਪਤਾ ਲਗਾਉਣਗੇ ਤੇ ਈ-ਚਲਾਨ ਤਿਆਰ ਕਰਨਗੇ।
ਪੰਜਾਬ ਦੇ ਡੀਜੀਪੀ ਗੌਰਵ ਯਾਦਵ ਨੇ ਅੱਜ ਲੁਧਿਆਣੇ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਪੁਲਿਸ ਲਾਈਨਜ਼ ‘ਚ ਇੰਟੀਗ੍ਰੇਟਡ ਕਮਾਂਡ ਐਂਡ ਕੰਟਰੋਲ ਸੈਂਟਰ (ICCC) ਦਾ ਉਦਘਾਟਨ ਕੀਤਾ। ਨਵਾਂ ਲਾਂਚ ਕੀਤਾ ਗਿਆ ਆਈਸੀਸੀਸੀ ਕਈ ਐਮਰਜੈਂਸੀ ਤੇ ਨਿਗਰਾਨੀ ਪ੍ਰਣਾਲੀਆਂ ਨੂੰ ਇੱਕ ਨਾਲ ਕੰਟਰੋਲ ਕਰਦਾ ਹੈ, ਜਿਸ ਨਾਲ ਪੁਲਿਸ ‘ਚ ਤਾਲਮੇਲ ‘ਚ ਆਸਾਨੀ ਹੋਵੇਗੀ। ਪ੍ਰੋਗਰਾਮ ਦੌਰਾਨ, ਡੀਜੀਪੀ ਨੇ ਪੁਲਿਸ ਕਰਮਚਾਰੀਆਂ ਨਾਲ ਵੀ ਗੱਲਬਾਤ ਕੀਤੀ ਤੇ ਉਨ੍ਹਾਂ ਨਾਲ ਖਾਣਾ ਖਾਧਾ।
ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ
ਮੀਡੀਆ ਨਾਲ ਗੱਲ ਕਰਦੇ ਹੋਏ, ਗੌਰਵ ਯਾਦਵ ਨੇ ਕਿਹਾ ਕਿ ਲੁਧਿਆਣਾ ਹੁਣ ਮੋਹਾਲੀ ਤੇ ਜਲੰਧਰ ਤੋਂ ਬਾਅਦ ਪੰਜਾਬ ਦਾ ਤੀਜਾ ਸ਼ਹਿਰ ਬਣ ਗਿਆ ਹੈ, ਜਿੱਥੇ ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਨੂੰ ਪੂਰੀ ਤਰ੍ਹਾਂ ਲਾਗੂ ਕੀਤਾ ਗਿਆ ਹੈ। ਇਸ ਪ੍ਰਣਾਲੀ ਦੇ ਤਹਿਤ ਮੁੱਖ ਲੋਕੇਸ਼ਨਾਂ ‘ਤੇ ਲਗਾਏ ਗਏ AI-ਅਧਾਰਤ ਕੈਮਰੇ ਆਪਣੇ ਆਪ ਟ੍ਰੈਫਿਕ ਉਲੰਘਣਾਵਾਂ ਦਾ ਪਤਾ ਲਗਾਉਣਗੇ ਤੇ ਈ-ਚਲਾਨ ਕੱਟਣਗੇ।
ਉਨ੍ਹਾਂ ਅੱਗੇ ਕਿਹਾ ਕਿ ਐਮਰਜੈਂਸੀ ਹੈਲਪਲਾਈਨ 112 ਤੇ ਵਾਇਰਲੈੱਸ ਸੰਚਾਰ ਵਰਗੀਆਂ ਸੇਵਾਵਾਂ ਇੰਟੀਗ੍ਰੇਟਡ ਕਰਨ ਨਾਲ ਪੁਲਿਸ ਰਿਸਪਾਂਸ ਸਮਾਂ ਘਟਾ ਕੇ ਸਿਰਫ 7-8 ਮਿੰਟ ਕਰ ਦਿੱਤਾ ਹੈ। ਕੁੱਲ ਮਿਲਾ ਕੇ, ਸ਼ਹਿਰ ਦੇ 259 ਸਥਾਨਾਂ ‘ਤੇ ਲਗਭਗ 1700 ਨਿਗਰਾਨੀ ਕੈਮਰੇ ਲਗਾਏ ਗਏ ਹਨ, ਜੋ ਕਾਨੂੰਨੀ ਨਿਯਮਾਂ ‘ਤੇ ਨਜ਼ਰ ਰੱਖਣਗੇ।
ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੀ ਵਰਤੋਂ
ਡੀਜੀਪੀ ਨੇ ਦੱਸਿਆ ਕਿ ਪੰਜਾਬ ਪੁਲਿਸ 2019 ਤੋਂ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੀ ਵਰਤੋਂ ਕਰ ਰਹੀ ਹੈ। ਪੁਲਿਸ ਅਪਰਾਧੀਆਂ ਦਾ ਡੇਟਾਬੇਸ ਰੱਖਦੀ ਹੈ, ਜਿਸ ‘ਚ ਜਾਂਚ ‘ਚ ਸਹਾਇਤਾ ਲਈ ਆਵਾਜ਼ ਦੇ ਨਮੂਨੇ ਸ਼ਾਮਲ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਪਿਛਲੇ ਚਾਰ ਸਾਲਾਂ ਵਿੱਚ, ਪੰਜਾਬ ਪੁਲਿਸ ਨੇ ਆਧੁਨਿਕੀਕਰਨ ‘ਤੇ ਲਗਭਗ 1100 ਕਰੋੜ ਖਰਚ ਕੀਤੇ ਹਨ, ਜਦੋਂ ਕਿ ਸਾਈਬਰ ਵਿੰਗ ਨੂੰ ਅਪਗ੍ਰੇਡ ਕਰਨ ‘ਚ 32 ਕਰੋੜ ਦਾ ਨਿਵੇਸ਼ ਕੀਤਾ ਗਿਆ ਹੈ। ਇਸ ਨਾਲ ਰਾਜ ਨੂੰ ਦੇਸ਼ ਭਰ ‘ਚ ਸਾਈਬਰ ਧੋਖਾਧੜੀ ਰਿਕਵਰੀ ‘ਚ ਇੱਕ ਮਜ਼ਬੂਤੀ ਮਿਲੀ ਹੈ।
ਸਰਹੱਦੀ ਸੁਰੱਖਿਆ ‘ਤੇ, ਡੀਜੀਪੀ ਯਾਦਵ ਨੇ ਕਿਹਾ ਕਿ 585 ਸਥਾਨਾਂ ‘ਤੇ 2,300 ਕੈਮਰੇ ਲਗਾਏ ਗਏ ਹਨ, ਜਿਸ ਨਾਲ “ਸੈਕੰਡ ਲਾਈਨ ਆਫ਼ ਡਿਫੈਂਸ” ਬਣਾਈ ਗਈ ਹੈ। ਉਨ੍ਹਾਂ ਨੇ ਕਿਹਾ ਕਿ ਪੰਜਾਬ ਇਕਲੌਤਾ ਰਾਜ ਹੈ. ਜੋ ਆਪਣੇ ਖੁਦ ਦੇ ਐਂਟੀ-ਡਰੋਨ ਸਿਸਟਮ ਨਾਲ ਲੈੱਸ ਹੈ, ਜਿਸ ਦੇ ਤਿੰਨ ਸਿਸਟਮ ਪਹਿਲਾਂ ਹੀ ਕਾਰਜਸ਼ੀਲ ਹਨ ਤੇ ਛੇ ਹੋਰ ਜਲਦੀ ਹੀ ਲਗਾਏ ਜਾਣਗੇ।
ਇਹ ਵੀ ਪੜ੍ਹੋ
