ਚੰਨੀ ਦੀ ਉਮੀਦਵਾਰੀ ਤੇ ਪ੍ਰੀਖਿਆ ਰੱਦ ਹੋਵੇ… ਮੰਤਰੀ ਚੀਮਾ ਨੇ ਵਾਇਰਲ ਤਸਵੀਰ ‘ਤੇ ਚੁੱਕੇ ਸਵਾਲ, ਸਾਬਕਾ ਸੀਐਮ ਨੇ ਕੀ ਦਿੱਤਾ ਜਵਾਬ?

ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਤੇ ਮੌਜੂਦਾ ਲੋਕ ਸਭਾ ਮੈਂਬਰ ਚਰਨਜੀਤ ਸਿੰਘ ਚੰਨੀ ਦੇ ਪ੍ਰੀਖਿਆ ਹਾਲ ਦੀ ਫੋਟੋ ਦਾ ਵਿਵਾਦ ਰੁਕਣ ਦਾ ਨਾਮ ਨਹੀਂ ਲੈ ਰਿਹਾ। ਹੁਣ ਆਮ ਆਦਮੀ ਪਾਰਟੀ ਆਗੂ ਤੇ ਪੰਜਾਬ ਕੈਬਨਿਟ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਚੰਨੀ ਦੀ ਫੋਟੋ ‘ਤੇ ਸਵਾਲ ਚੁੱਕੇ ਹਨ। ਉਨ੍ਹਾਂ ਨੇ ਚੰਨੀ ਵੱਲੋਂ ਨਿਯਮਾਂ ਦੀ ਉਲੰਘਣਾ ਦਾ ਇਲਜ਼ਾਮ ਲਗਾਇਆ ਗਿਆ ਹੈ ਤੇ ਉਨ੍ਹਾਂ ਨੇ ਪ੍ਰੀਖਿਆ ਰੱਦ ਕਰਨ ਦੀ ਮੰਗ ਕੀਤੀ ਹੈ।

ਹਰਪਾਲ ਸਿੰਘ ਚੀਮਾ ਨੇ ਕਿਹਾ ਕਿ ਇੱਕ ਸਾਬਕਾ ਮੁੱਖ ਮੰਤਰੀ ਪ੍ਰੀਖਿਆ ਹਾਲ ‘ਚ ਬੈਠ ਕੇ ਆਪਣਾ ਫੋਟੋ ਸ਼ੂਟ ਕਰਵਾ ਰਿਹਾ ਹੈ। ਇਸ ਤੋਂ ਪਤਾ ਚਲਦਾ ਹੈ ਕਿ ਉਹ ਪ੍ਰੀਖਿਆ ਦੇਣ ਨਹੀਂ ਗਏ ਸਨ ਤੇ ਕਿਤੇ ਨਾ ਕਿਤੇ ਉਹ ਜੋ ਮੋਬਾਇਲ ਲੈ ਕੇ ਗਏ ਸਨ, ਉਸ ਤੋਂ ਨਕਲ ਕਰ ਰਹੇ ਸਨ। ਮੈਂ ਸਮਝਦਾ ਹਾਂ ਕਿ ਉਹ ਪ੍ਰੀਖਿਆ ਤੁਰੰਤ ਰੱਦ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਤੁਸੀਂ ਪੇਪਰ ਦੇਣਾ ਹੈ ਨਾ ਕਿ ਪਬਲੀਸਿਟੀ ਕਰਨੀ ਹੈ।

ਚੀਮਾ ਨੇ ਚਰਨਜੀਤ ਚੰਨੀ ਨੂੰ ਘੇਰਦੇ ਹੋਏ ਕਿਹਾ ਕਿ ਤੁਸੀਂ ਲੋਕ ਪ੍ਰਸ਼ਾਸਨ ਦਾ ਪੇਪਰ ਦੇ ਰਹੇ ਹੋ ਤੇ ਤੁਸੀਂ ਪ੍ਰਸ਼ਾਸਨ ਵੀ ਚਲਾਇਆ ਹੈ। ਤੁਹਾਨੂੰ ਇੰਨੀ ਸਮਝ ਹੋਣੀ ਚਾਹੀਦੀ ਹੈ ਕਿ ਤੁਸੀਂ ਕੈਮਰਾ ਲਿਜਾ ਕੇ ਪੇਪਰ ਦੇ ਰਹੇ ਹੋ। ਹਰਪਾਲ ਚੀਮਾ ਨੇ ਕਿਹਾ ਕਿ ਚੰਨੀ ਦੀ ਪ੍ਰੀਖਿਆ ਲਈ ਉਮੀਦਵਾਰੀ ਰੱਦ ਹੋਣੀ ਚਾਹੀਦੀ ਹੈ ਤੇ ਪ੍ਰੀਖਿਆ ਵੀ ਰੱਦ ਹੋਣੀ ਚਾਹੀਦੀ ਹੈ।

Chandigarh: Punjab Minister Harpal Singh Cheema, On the viral photo of Congress MP Charanjit Singh Channi inside an examination hall, says, An ex-minister was sitting in an examination centre and getting his photos clicked. If he was using that phone to cheat, then the pic.twitter.com/hdWkTAAEoR

— IANS (@ians_india) August 24, 2026

ਚੰਨੀ ਨੇ ਪੁੱਛਿਆ- ਕੋਈ ਆਫ਼ਤ ਆ ਗਈ?

ਦੂਜੇ ਪਾਸੇ, ਇਸ ਮਾਮਲੇ ‘ਤੇ ਚਰਨਜੀਤ ਸਿੰਘ ਚੰਨੀ ਨੇ ਸਫ਼ਾਈ ਦਿੰਦੇ ਹੋਏ ਪੁੱਛਿਆ ਹੈ ਕਿ ਪੱਤਰਕਾਰਾਂ ਨੂੰ ਕੋਈ ਰੋਕ ਸਕਦਾ ਹੈ? ਉਨ੍ਹਾਂ ਕਿਹਾ ਕਿ ਪੱਤਰਕਾਰ ਧੱਕੇ ਨਾਲ ਫੋਟੋ ਲੈਂਦੇ ਹਨ ਤੇ ਧੱਕੇ ਨਾਲ ਖੜ੍ਹੇ ਕਰਕੇ ਸਵਾਲ ਪੁੱਛਦੇ ਹਨ ਤੇ ਅਸੀਂ ਪੱਤਕਾਰਾਂ ਨੂੰ ਰੋਕ ਸਕਦੇ ਹਾਂ?

ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਕਿਸੇ ਨੇ ਪ੍ਰੀਖਿਆ ਹਾਲ ਦੇ ਬਾਹਰ ਖਿੜਕੀ ਤੋਂ ਫੋਟੋ ਲੈ ਲਈ, ਤਾਂ ਕੀ ਕੋਈ ਆਫ਼ਤ ਆ ਗਈ। ਉਨ੍ਹਾਂ ਕਿਹਾ ਉੱਥੇ ਕੋਈ ਇੱਕ ਨਹੀਂ 100 ਪੱਤਰਕਾਰ ਸੀ ਤੇ ਪੱਤਰਕਾਰਾਂ ਨੇ ਫੋਟੋ ਲੈ ਲਈ ਤਾਂ ਕੀ ਆਫ਼ਤ ਆ ਗਈ ਹੈ?

ਦੱਸ ਦੇਈਏ ਕਿ ਚਰਨਜੀਤ ਸਿੰਘ ਚੰਨੀ ਨੇ 20 ਅਗਸਤ ਨੂੰ ਐਮਏ ਲੋਕ ਪ੍ਰਸ਼ਾਸਨ ਦੀ ਪ੍ਰੀਖਿਆ ਦਿੱਤੀ ਸੀ। ਉਨ੍ਹਾਂ ਦੀ ਪ੍ਰੀਖਿਆ ਦੇਣ ਦੀ ਤਸਵੀਰ ਸਾਹਮਣੇ ਆਈ ਸੀ, ਜਿਸ ਤੋਂ ਬਾਅਦ ਕਈ ਲੋਕਾਂ ਵੱਲੋਂ ਪ੍ਰੀਖਿਆ ਵਿਵਸਥਾ ਤੇ ਸਵਾਲ ਖੜ੍ਹੇ ਕੀਤੇ ਜਾ ਰਹੇ ਹਨ।