ਅਮਰੀਕਾ ‘ਚ ਪੰਜਾਬੀ ਵਕੀਲ ਨੂੰ ਬੱਕਰੀਆਂ ਦੀ ਜਾਨ ਬਚਾਉਣਾ ਪਿਆ ਮਹਿੰਗਾ, ਹੋ ਸਕਦੀ ਹੈ 6 ਸਾਲ ਦੀ ਸਜ਼ਾ
ਪੰਜਾਬੀ ਮੂਲ ਦੇ ਇੱਕ ਨੌਜਵਾਨ 'ਤੇ ਅਮਰੀਕਾ ਦੇ ਕੈਲੀਫੋਰਨੀਆ ਰਾਜ ਵਿੱਚ ਦੋ ਬੱਕਰੀਆਂ ਦੀ ਜਾਨ ਬਚਾਉਣ ਦੇ ਮਾਮਲੇ ਵਿੱਚ ਇੱਕ ਗੰਭੀਰ ਅਪਰਾਧਿਕ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਸ ਮਾਮਲੇ ਨੂੰ ਲੈ ਕੇ ਹੁਣ ਅਦਾਲਤ ਵਿੱਚ ਬਹੁਤ ਜਲਦ ਕੋਰਟ ਟਰਾਇਲ ਸ਼ੁਰੂ ਹੋਣ ਜਾ ਰਿਹਾ ਹੈ। ਮੁਲਜ਼ਮ ਵਜੋਂ ਨਾਮਜ਼ਦ ਕੀਤੇ ਗਏ ਨੌਜਵਾਨ ਦੀ ਪਛਾਣ ਤਜਿੰਦਰ ਸਿੰਘ ਉਰਫ਼ ਤਾਜ ਉੱਪਲ ਵਜੋਂ ਹੋਈ ਹੈ।
ਪੰਜਾਬੀ ਮੂਲ ਦੇ ਇੱਕ ਨੌਜਵਾਨ ‘ਤੇ ਅਮਰੀਕਾ ਦੇ ਕੈਲੀਫੋਰਨੀਆ ਰਾਜ ਵਿੱਚ ਦੋ ਬੱਕਰੀਆਂ ਦੀ ਜਾਨ ਬਚਾਉਣ ਦੇ ਮਾਮਲੇ ਵਿੱਚ ਇੱਕ ਗੰਭੀਰ ਅਪਰਾਧਿਕ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਸ ਮਾਮਲੇ ਨੂੰ ਲੈ ਕੇ ਹੁਣ ਅਦਾਲਤ ਵਿੱਚ ਬਹੁਤ ਜਲਦ ਟਰਾਇਲ (ਕੋਰਟ ਟਰਾਇਲ) ਸ਼ੁਰੂ ਹੋਣ ਜਾ ਰਿਹਾ ਹੈ। ਮੁਲਜ਼ਮ ਵਜੋਂ ਨਾਮਜ਼ਦ ਕੀਤੇ ਗਏ ਨੌਜਵਾਨ ਦੀ ਪਛਾਣ ਤਜਿੰਦਰ ਸਿੰਘ ਉਰਫ਼ ਤਾਜ ਉੱਪਲ ਵਜੋਂ ਹੋਈ ਹੈ, ਜੋ ਕੈਲੀਫੋਰਨੀਆ ਵਿੱਚ ਪੇਸ਼ੇ ਵਜੋਂ ਇੱਕ ਵਕੀਲ ਹਨ ਅਤੇ ਪਸ਼ੂਆਂ ਦੇ ਅਧਿਕਾਰਾਂ ਨਾਲ ਜੁੜੀਆਂ ਵੱਖ-ਵੱਖ ਮੁਹਿੰਮਾਂ ਵਿੱਚ ਲੰਬੇ ਸਮੇਂ ਤੋਂ ਸਰਗਰਮ ਭੂਮਿਕਾ ਨਿਭਾ ਰਹੇ ਹਨ।
ਇਸ ਹਾਈ-ਪ੍ਰੋਫਾਈਲ ਕੇਸ ਦੇ ਦਰਜ ਹੋਣ ਤੋਂ ਬਾਅਦ ਹੁਣ ਤਾਜ ਉੱਪਲ ਦੀ ਨੌਕਰੀ ਅਤੇ ਉਨ੍ਹਾਂ ਦੇ ਵਕਾਲਤ ਕਰਨ ਦੇ ਕਾਨੂੰਨੀ ਲਾਈਸੈਂਸ ‘ਤੇ ਵੀ ਤਲਵਾਰ ਲਟਕ ਗਈ ਹੈ। ਇਹ ਪੂਰੀ ਘਟਨਾ 27 ਮਈ 2025 ਨੂੰ ਕੈਲੀਫੋਰਨੀਆ ਦੇ ਸਟ੍ਰੈਟਫੋਰਡ ਇਲਾਕੇ ਵਿੱਚ ਵਾਪਰੀ ਸੀ, ਜਿੱਥੇ ‘ਵੇਰਾ ਗੋਟ ਡੇਅਰੀ’ ਨਾਮਕ ਇੱਕ ਨਿੱਜੀ ਫਾਰਮ ਵਿੱਚੋਂ ਪਸ਼ੂ-ਅਧਿਕਾਰ ਕਾਰਕੁਨਾਂ ਨੇ ਦੋ ਬੱਕਰੀ ਦੇ ਬੱਚਿਆਂ—ਫੋਬੀ ਅਤੇ ਸੀਲੀਆ ਨੂੰ ਬਾਹਰ ਕੱਢਿਆ ਸੀ। ਕਾਰਕੁਨਾਂ ਦਾ ਦਾਅਵਾ ਸੀ ਕਿ ਫਾਰਮ ਦੇ ਅੰਦਰ ਉਨ੍ਹਾਂ ਦੀ ਹਾਲਤ ਬਹੁਤ ਜ਼ਿਆਦਾ ਖ਼ਰਾਬ ਸੀ। ਫਾਰਮ ਵਿੱਚੋਂ ਬਾਹਰ ਲਿਆਉਣ ਤੋਂ ਬਾਅਦ ਜਦੋਂ ਡਾਕਟਰਾਂ ਵੱਲੋਂ ਉਨ੍ਹਾਂ ਦੀ ਡਾਕਟਰੀ ਜਾਂਚ ਕੀਤੀ ਗਈ, ਤਾਂ ਦੋਵੇਂ ਬੱਚੇ ਨਿਮੋਨੀਆ ਅਤੇ ਅੱਖਾਂ ਦੀ ਗੰਭੀਰ ਬੀਮਾਰੀ ਤੋਂ ਪੀੜਤ ਪਾਏ ਗਏ।
ਇਲਾਜ ਮਿਲਣ ਤੋਂ ਬਾਅਦ ਹਾਲਾਂਕਿ ਦੋਵੇਂ ਬੱਕਰੀਆਂ ਬਿਲਕੁਲ ਠੀਕ ਹੋ ਗਈਆਂ, ਪਰ ਇਸ ਦੇ ਬਾਵਜੂਦ ਬੱਕਰੀ ਫਾਰਮ ਚਲਾਉਣ ਵਾਲੀ ਕੰਪਨੀ ਨੇ ਸਖ਼ਤ ਰੁਖ਼ ਅਖਤਿਆਰ ਕਰਦਿਆਂ ਤਾਜ ਉੱਪਲ ਸਹਿਤ 4 ਲੋਕਾਂ ਦੇ ਖ਼ਿਲਾਫ਼ ਅਪਰਾਧਿਕ ਮਾਮਲਾ ਦਰਜ ਕਰਵਾ ਦਿੱਤਾ।
ਪਸ਼ੂ ਚੋਰੀ ਕਰਨ ਅਤੇ ਬਿਨਾਂ ਇਜਾਜ਼ਤ ਨਿੱਜੀ ਜਾਇਦਾਦ ਵਿੱਚ ਵੜਨ ਦੇ ਲੱਗੇ ਆਰੋਪ
ਪੰਜਾਬੀ ਪਰਿਵਾਰ ਨਾਲ ਸਬੰਧਤ ਤਾਜ ਉੱਪਲ ਇੱਕ ਪ੍ਰਤੀਬੱਧ ਸਿੱਖ ਵਕੀਲ ਅਤੇ ਸਮਾਜਿਕ ਕਾਰਕੁਨ ਹਨ। ਉਹ ਪਸ਼ੂਆਂ ਪ੍ਰਤੀ ਹੁੰਦੀ ਕਰੂਰਤਾ ਦੇ ਖ਼ਿਲਾਫ਼ ਲਗਾਤਾਰ ਆਵਾਜ਼ ਬੁਲੰਦ ਕਰਦੇ ਆ ਰਹੇ ਹਨ। ਕਿੰਗਜ਼ ਕਾਉਂਟੀ ਦੇ ਡਿਸਟ੍ਰਿਕਟ ਅਟਾਰਨੀ ਵੱਲੋਂ ਤਾਜ ਉੱਪਲ ਅਤੇ ਉਨ੍ਹਾਂ ਦੇ ਸਾਥੀਆਂ ‘ਤੇ ਪਸ਼ੂਧਨ ਦੀ ਵੱਡੀ ਚੋਰੀ, ਅਪਰਾਧਿਕ ਸਾਜ਼ਿਸ਼ ਰਚਣ ਅਤੇ ਬਿਨਾਂ ਕਿਸੇ ਪ੍ਰਸ਼ਾਸਨਿਕ ਪ੍ਰਵਾਨਗੀ ਦੇ ਕਿਸੇ ਦੀ ਨਿੱਜੀ ਜ਼ਮੀਨ ਜਾਂ ਪਲਾਟ ਵਿੱਚ ਜਬਰਨ ਦਾਖਲ ਹੋਣ ਵਰਗੇ ਗੰਭੀਰ ਦੋਸ਼ ਆਇਦ ਕੀਤੇ ਗਏ ਹਨ।
ਦੋਸ਼ ਸਾਬਤ ਹੋਣ ‘ਤੇ ਹੋ ਸਕਦੀ ਹੈ 6 ਸਾਲ ਤੱਕ ਦੀ ਸਜਾ
ਅਮਰੀਕਾ ਵਿੱਚ ਰਹਿ ਰਹੇ ਪੰਜਾਬੀ ਭਾਈਚਾਰੇ ਦੇ ਲੋਕਾਂ ਦਾ ਮੰਨਣਾ ਹੈ ਕਿ ਉੱਪਲ ‘ਤੇ ਲਗਾਏ ਗਏ ਕਾਨੂੰਨੀ ਦੋਸ਼ ਬਹੁਤ ਜ਼ਿਆਦਾ ਸੰਵੇਦਨਸ਼ੀਲ ਹਨ। ਜੇਕਰ ਅਦਾਲਤੀ ਕਾਰਵਾਈ ਦੌਰਾਨ ਇਹ ਦੋਸ਼ ਸਹੀ ਸਾਬਤ ਹੋ ਜਾਂਦੇ ਹਨ, ਤਾਂ ਤਾਜ ਉੱਪਲ ਨੂੰ ਕਰੀਬ 6 ਸਾਲ ਤੱਕ ਦੀ ਕੈਦ ਦੀ ਸਜ਼ਾ ਭੁਗਤਣੀ ਪੈ ਸਕਦੀ ਹੈ। ਦੂਜੇ ਪਾਸੇ, ਤਾਜ ਉੱਪਲ ਅਤੇ ਬਾਕੀ ਸਾਰੇ ਮੁਲਜ਼ਮਾਂ ਨੇ ਆਪਣੇ-ਆਪ ਨੂੰ ਬੇਕਸੂਰ ਦੱਸਿਆ ਹੈ ਅਤੇ ਕਿਹਾ ਹੈ ਕਿ ਉਹ ਸੱਚਾਈ ਦੇ ਹੱਕ ਵਿੱਚ ਇਸ ਮੁਕੱਦਮੇ ਦਾ ਸਾਹਮਣਾ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।
ਇਹ ਵੀ ਪੜ੍ਹੋ
ਬੱਕਰੀ ਫਾਰਮ ਪ੍ਰਬੰਧਕਾਂ ਨੇ ਇਸ ਨੂੰ ਚੋਰੀ ਦਿੱਤਾ ਕਰਾਰ
ਕੇਸ ਦਰਜ ਕਰਵਾਉਣ ਵਾਲੀ ਫਰਮ ਦੇ ਮਾਲਕਾਂ ਅਤੇ ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਕਿਸੇ ਵੀ ਨਿੱਜੀ ਫਾਰਮ ਵਿੱਚੋਂ ਜਾਨਵਰਾਂ ਨੂੰ ਬਿਨਾਂ ਕਿਸੇ ਲਿਖਤੀ ਇਜਾਜ਼ਤ ਦੇ ਲੈ ਕੇ ਜਾਣਾ ਸਿੱਧੇ ਤੌਰ ‘ਤੇ ਕਾਨੂੰਨ ਦੀ ਉਲੰਘਣਾ ਹੈ। ਸਥਾਨਕ ਪੁਲਿਸ ਅਤੇ ਪ੍ਰਸ਼ਾਸਨ ਨੇ ਵੀ ਇਸ ਪੂਰੀ ਘਟਨਾ ਨੂੰ ਕੋਈ ‘ਬਚਾਅ ਅਭਿਆਨ’ ਮੰਨਣ ਤੋਂ ਇਨਕਾਰ ਕਰਦਿਆਂ, ਇਸ ਨੂੰ ਸਿੱਧੇ ਰੂਪ ਵਿੱਚ ਚੋਰੀ ਅਤੇ ਸਾਜ਼ਿਸ਼ ਨਾਲ ਜੁੜਿਆ ਮਾਮਲਾ ਕਰਾਰ ਦਿੱਤਾ ਹੈ। ਇਹੀ ਕਾਰਨ ਹੈ ਕਿ ਹੁਣ ਇਹ ਕੇਸ ਸਿਰਫ਼ ਦੋ ਬੱਕਰੀਆਂ ਦੀ ਜਾਨ ਬਚਾਉਣ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਇਹ ਪਸ਼ੂ ਅਧਿਕਾਰ, ਵਪਾਰਕ ਬੱਕਰੀ ਫਾਰਮਿੰਗ, ਨਿੱਜੀ ਜਾਇਦਾਦ ਦੀ ਸੁਰੱਖਿਆ ਅਤੇ ਨੈਤਿਕ ਜ਼ਿੰਮੇਵਾਰੀ ਦੇ ਵਿਚਕਾਰ ਇੱਕ ਵੱਡਾ ਵੱਕਾਰੀ ਟਕਰਾਅ ਬਣ ਗਿਆ ਹੈ।
ਫਾਰਮ ਵਿੱਚ ਮਰ ਰਹੇ ਸੀ ਜਾਨਵਰ: ਤਾਜ ਉੱਪਲ
ਤਾਜ ਉੱਪਲ ਦੀ ਸੰਸਥਾ ‘ਡਾਇਰੈਕਟ ਐਕਸ਼ਨ ਐਵਰੀਵੇਅਰ’ ਨੇ ਆਪਣੇ ਪੱਖ ਵਿੱਚ ਦਲੀਲ ਦਿੰਦਿਆਂ ਕਿਹਾ ਕਿ ਜਦੋਂ ਉਨ੍ਹਾਂ ਦੇ ਕਾਰਕੁਨਾਂ ਨੇ ਫਾਰਮ ਦਾ ਦੌਰਾ ਕੀਤਾ ਸੀ, ਤਾਂ ਉੱਥੇ ਜਾਨਵਰਾਂ ਦੀ ਹਾਲਤ ਬੇਹੱਦ ਨਰਕ ਭਰੀ ਸੀ। ਫਾਰਮ ਦੇ ਅੰਦਰ ਹਜ਼ਾਰਾਂ ਦੀ ਗਿਣਤੀ ਵਿੱਚ ਬੱਕਰੀਆਂ ਨੂੰ ਬਹੁਤ ਮਾੜੇ ਹਾਲਾਤ ਵਿੱਚ ਬੰਦ ਕਰਕੇ ਰੱਖਿਆ ਗਿਆ ਸੀ। ਉੱਥੇ ਕਈ ਥਾਵਾਂ ‘ਤੇ ਮਰੇ ਹੋਏ ਜਾਨਵਰਾਂ ਦੇ ਢੇਰ ਲੱਗੇ ਹੋਏ ਸਨ ਅਤੇ ਨਵ-ਜੰਮੇ ਬੱਚਿਆਂ ਨੂੰ ਉਨ੍ਹਾਂ ਦੀਆਂ ਮਾਵਾਂ ਤੋਂ ਬੇਰਹਿਮੀ ਨਾਲ ਵੱਖ ਰੱਖਿਆ ਜਾ ਰਿਹਾ ਸੀ।
ਸੰਸਥਾ ਮੁਤਾਬਕ, ਜਦੋਂ ਸਥਾਨਕ ਪ੍ਰਸ਼ਾਸਨ ਜਾਂ ਫਾਰਮ ਪ੍ਰਬੰਧਕਾਂ ਨੇ ਹਾਲਾਤ ਸੁਧਾਰਨ ਲਈ ਕੋਈ ਠੋਸ ਕਦਮ ਨਹੀਂ ਚੁੱਕੇ, ਤਾਂ ਜਾਨਵਰਾਂ ਨੂੰ ਬਚਾਉਣ ਲਈ ਇਹ ਕਦਮ ਮਜਬੂਰੀਵੱਸ ਚੁੱਕਣਾ ਪਿਆ, ਜੋ ਕਿ ਪੂਰੀ ਤਰ੍ਹਾਂ ਇਨਸਾਨੀਅਤ ਦੇ ਦਾਇਰੇ ਵਿੱਚ ਆਉਂਦਾ ਹੈ।
ਅਮਰੀਕਾ ਵਿੱਚ ‘ਰਾਈਟ ਟੂ ਰੈਸਕਿਊ’ ‘ਤੇ ਬਹਿਸ ਛਿੜੀ
ਇਹ ਪੂਰਾ ਵਿਵਾਦ 27 ਮਈ 2025 ਦੀ ਘਟਨਾ ਤੋਂ ਸ਼ੁਰੂ ਹੋਇਆ ਸੀ, ਜਿਸ ਵਿੱਚ ਲੰਬੀ ਜਾਂਚ-ਪੜਤਾਲ ਤੋਂ ਬਾਅਦ ਹੁਣ ਸਾਲ 2026 ਵਿੱਚ ਪੁਲਿਸ ਨੇ ਅਪਰਾਧਿਕ ਕੇਸ ਦਰਜ ਕਰਕੇ ਕੋਰਟ ਟਰਾਇਲ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੈ। ਅਦਾਲਤੀ ਕਾਰਵਾਈ ਸ਼ੁਰੂ ਹੋਣ ਕਾਰਨ ਇਹ ਮਾਮਲਾ ਅੰਤਰਰਾਸ਼ਟਰੀ ਪੱਧਰ ‘ਤੇ ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਆ ਗਿਆ ਹੈ। ਸੋਸ਼ਲ ਮੀਡੀਆ ‘ਤੇ ਇਸ ਨੂੰ ਲੈ ਕੇ ‘ਰਾਈਟ ਟੂ ਰੈਸਕਿਊ’ ਵਿਸ਼ੇ ‘ਤੇ ਇੱਕ ਵੱਡੀ ਬਹਿਸ ਸ਼ੁਰੂ ਹੋ ਗਈ ਹੈ।
ਜਿੱਥੇ ਇੱਕ ਪਾਸੇ ਵੱਡੀ ਗਿਣਤੀ ਵਿੱਚ ਲੋਕ ਇਸ ਨੂੰ ਇਨਸਾਨੀਅਤ ਅਤੇ ਜੀਵ-ਦਇਆ ਦੀ ਜਿੱਤ ਵਜੋਂ ਦੇਖ ਰਹੇ ਹਨ, ਉੱਥੇ ਹੀ ਦੂਜੇ ਪਾਸੇ ਕੁਝ ਲੋਕ ਇਸ ਨੂੰ ਕਾਨੂੰਨ ਹੱਥ ਵਿੱਚ ਲੈਣ ਵਾਲਾ ਗ਼ੈਰ-ਕਾਨੂੰਨੀ ਕਦਮ ਦੱਸ ਰਹੇ ਹਨ। ਕਾਨੂੰਨੀ ਮਾਹਰਾਂ ਦਾ ਮੰਨਣਾ ਹੈ ਕਿ ਤਾਜ ਉੱਪਲ ਅਤੇ ਉਨ੍ਹਾਂ ਦੇ ਸਾਥੀਆਂ ਦਾ ਇਹ ਮਾਮਲਾ ਜਿੰਨਾ ਭਾਵਨਾਤਮਕ ਹੈ, ਉਨਾ ਹੀ ਕਾਨੂੰਨੀ ਪੇਚੀਦਗੀਆਂ ਨਾਲ ਭਰਿਆ ਹੋਇਆ ਹੈ। ਆਉਣ ਵਾਲੇ ਦਿਨਾਂ ਵਿੱਚ ਅਮਰੀਕੀ ਅਦਾਲਤ ਦਾ ਜੋ ਵੀ ਫੈਸਲਾ ਆਵੇਗਾ, ਉਹ ਪਸ਼ੂ-ਅਧਿਕਾਰਾਂ ਦੇ ਕਾਨੂੰਨਾਂ ਦੇ ਇਤਿਹਾਸ ਵਿੱਚ ਇੱਕ ਨਵੀਂ ਮਿਸਾਲ ਕਾਇਮ ਕਰੇਗਾ।
