ਜੰਗਲਾਂ ‘ਚ ਆਪਰੇਸ਼ਨ, ਅਸਮਾਨ ਤੋਂ ਹਮਲਾ ਭਾਰਤ-ਇੰਡੋਨੇਸ਼ੀਆ ਦੀਆਂ ਸਪੈਸ਼ਲ ਫੋਰਸਿਜ਼ ਦਾ ਗਰੁੜ ਸ਼ਕਤੀ ਫ਼ੌਜੀ ਅਭਿਆਸ ਸ਼ੁਰੂ
Garuda Shakti 2026: ਭਾਰਤ ਅਤੇ ਇੰਡੋਨੇਸ਼ੀਆ ਦਾ ਸਾਂਝਾ ਫ਼ੌਜੀ ਅਭਿਆਸ ਗਰੁੜ ਸ਼ਕਤੀ 2026 ਸ਼ੁਰੂ ਹੋ ਗਿਆ ਹੈ। ਇਸ ਵਿੱਚ ਭਾਰਤੀ ਫ਼ੌਜ ਦੀ ਪੈਰਾਸ਼ੂਟ ਰੈਜੀਮੈਂਟ ਦੀਆਂ ਸਪੈਸ਼ਲ ਫੋਰਸਿਜ਼ ਦੇ ਜਵਾਨ ਹਿੱਸਾ ਲੈ ਰਹੇ ਹਨ। ਇਹ ਅਭਿਆਸ ਇੰਡੋਨੇਸ਼ੀਆ ਦੇ ਬਾਨਿਉਵਾਂਗੀ ਵਿੱਚ ਕਰਵਾਇਆ ਜਾ ਰਿਹਾ ਹੈ।
ਭਾਰਤ ਅਤੇ ਇੰਡੋਨੇਸ਼ੀਆ ਦੀਆਂ ਸਪੈਸ਼ਲ ਫੋਰਸਿਜ਼ ਦੇ ਸਾਂਝੇ ਫ਼ੌਜੀ ਅਭਿਆਸ ਗਰੁੜ ਸ਼ਕਤੀ ਦਾ 11ਵਾਂ ਐਡੀਸ਼ਨ ਸ਼ੁਰੂ ਹੋ ਗਿਆ ਹੈ। ਇਹ ਫ਼ੌਜੀ ਅਭਿਆਸ 27 ਅਕਤੂਬਰ ਤੋਂ 6 ਨਵੰਬਰ 2026 ਤੱਕ ਇੰਡੋਨੇਸ਼ੀਆ ਦੇ ਬਾਨਿਉਵਾਂਗੀ ਵਿੱਚ ਕਰਵਾਇਆ ਜਾ ਰਿਹਾ ਹੈ। ਇਸ ਦੌਰਾਨ ਦੋਵਾਂ ਦੇਸ਼ਾਂ ਦੇ ਵਿਸ਼ੇਸ਼ ਫ਼ੌਜੀ ਬਲ ਜੰਗਲਾਂ ਵਿੱਚ ਆਪਰੇਸ਼ਨ, ਏਅਰ ਅਸਾਲਟ ਅਤੇ ਲੜਾਈ ਦੀ ਟ੍ਰੇਨਿੰਗ ਰਾਹੀਂ ਮੁਸ਼ਕਲ ਹਾਲਾਤ ਵਿੱਚ ਆਪਣੀ ਜੰਗੀ ਮੁਹਾਰਤ ਦਾ ਅਭਿਆਸ ਕਰਨਗੇ।
ਇਸ ਫ਼ੌਜੀ ਅਭਿਆਸ ਵਿੱਚ ਭਾਰਤੀ ਫ਼ੌਜ ਦੀ ਪੈਰਾਸ਼ੂਟ ਰੈਜੀਮੈਂਟ ਦੀਆਂ ਸਪੈਸ਼ਲ ਫੋਰਸਿਜ਼ ਦੇ ਜਵਾਨ ਹਿੱਸਾ ਲੈ ਰਹੇ ਹਨ। ਉੱਥੇ ਹੀ, ਇੰਡੋਨੇਸ਼ੀਆ ਵੱਲੋਂ ਉੱਥੋਂ ਦੀਆਂ ਸਪੈਸ਼ਲ ਫੋਰਸਿਜ਼ ਦੇ ਸੈਨਿਕ ਸ਼ਾਮਲ ਹੋਏ ਹਨ। ਇਸ ਅਭਿਆਸ ਦਾ ਮੁੱਖ ਉਦੇਸ਼ ਦੋਵਾਂ ਦੇਸ਼ਾਂ ਦੀਆਂ ਸਪੈਸ਼ਲ ਫੋਰਸਿਜ਼ ਵਿਚਾਲੇ ਆਪਸੀ ਸਮਝ, ਸਹਿਯੋਗ ਅਤੇ ਸਾਂਝੇ ਆਪਰੇਸ਼ਨ ਕਰਨ ਦੀ ਸਮਰੱਥਾ ਨੂੰ ਵਧਾਉਣਾ ਹੈ। ਇਹ ਦੋਵਾਂ ਦੇਸ਼ਾਂ ਵਿਚਾਲੇ ਰਣਨੀਤਕ ਭਾਈਵਾਲੀ ਅਤੇ ਭਰੋਸੇ ਨੂੰ ਮਜ਼ਬੂਤ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾ ਸਕਦਾ ਹੈ।
ਜੰਗਲਾਂ ਵਿੱਚ ਲੜਾਈ ਤੋਂ ਲੈ ਕੇ ਏਅਰ ਅਸਾਲਟ ਤੱਕ ਦੀ ਟ੍ਰੇਨਿੰਗ
ਫ਼ੌਜੀ ਅਭਿਆਸ ਗਰੁੜ ਸ਼ਕਤੀ ਦੌਰਾਨ ਜਵਾਨਾਂ ਨੂੰ ਵੱਖ-ਵੱਖ ਹਾਲਾਤ ਵਿੱਚ ਫ਼ੌਜੀ ਆਪਰੇਸ਼ਨ ਕਰਨ ਦੀ ਸਿਖਲਾਈ ਦਿੱਤੀ ਜਾਵੇਗੀ। ਇਸ ਵਿੱਚ ਜੰਗਲਾਂ ਵਿੱਚ ਵਿਸ਼ੇਸ਼ ਫ਼ੌਜੀ ਆਪਰੇਸ਼ਨ ਕਰਨ ਦੀ ਟ੍ਰੇਨਿੰਗ ਵੀ ਸ਼ਾਮਲ ਹੋਵੇਗੀ। ਇਸ ਦੌਰਾਨ ਰੁਕਾਵਟਾਂ ਨੂੰ ਪਾਰ ਕਰਨ, ਸਟੀਕ ਨਿਸ਼ਾਨੇਬਾਜ਼ੀ, ਪਹਾੜੀ ਜੰਗ ਦੀ ਸਿਖਲਾਈ, ਏਅਰ ਅਸਾਲਟ ਅਤੇ ਮੁਸ਼ਕਲ ਹਾਲਾਤ ਵਿੱਚ ਮੁਕਾਬਲਾ ਕਰਨ ਦੀ ਸਮਰੱਥਾ ਤੇ ਜੰਗੀ ਹੁਨਰ ਵਿਕਸਿਤ ਕਰਨ ‘ਤੇ ਜ਼ੋਰ ਦਿੱਤਾ ਜਾਵੇਗਾ।
ਇਸ ਤੋਂ ਇਲਾਵਾ, ਦੋਵਾਂ ਦੇਸ਼ਾਂ ਦੇ ਸੈਨਿਕ ਹਥਿਆਰਾਂ, ਫ਼ੌਜੀ ਉਪਕਰਨਾਂ ਅਤੇ ਆਪਰੇਸ਼ਨਾਂ ਨਾਲ ਜੁੜੀਆਂ ਰਣਨੀਤੀਆਂ ਬਾਰੇ ਆਪਣੇ ਤਜਰਬੇ ਵੀ ਸਾਂਝੇ ਕਰਨਗੇ। ਅਭਿਆਸ ਦੇ ਆਖ਼ਰੀ ਪੜਾਅ ਵਿੱਚ ਇੱਕ ਵਿਸ਼ੇਸ਼ ਤਸਦੀਕੀ ਅਭਿਆਸ, ਜਿਸ ਨੂੰ ਵੈਲੀਡੇਸ਼ਨ ਐਕਸਰਸਾਈਜ਼ ਕਿਹਾ ਜਾਂਦਾ ਹੈ, ਕਰਵਾਇਆ ਜਾਵੇਗਾ। ਇਸ ਵਿੱਚ ਅਸਲ ਜੰਗ ਵਰਗੇ ਹਾਲਾਤ ਤਿਆਰ ਕਰਕੇ ਦੋਵਾਂ ਦੇਸ਼ਾਂ ਦੇ ਸੈਨਿਕਾਂ ਦੀ ਸਹਿਣਸ਼ਕਤੀ, ਆਪਸੀ ਤਾਲਮੇਲ ਅਤੇ ਆਪਰੇਸ਼ਨਲ ਤਿਆਰੀ ਦੀ ਪਰਖ ਕੀਤੀ ਜਾਵੇਗੀ।
ਰੱਖਿਆ ਸਹਿਯੋਗ ਹੋਰ ਮਜ਼ਬੂਤ ਹੋਣ ਦੀ ਉਮੀਦ
ਗਰੁੜ ਸ਼ਕਤੀ ਭਾਰਤ ਅਤੇ ਇੰਡੋਨੇਸ਼ੀਆ ਵਿਚਾਲੇ ਰੱਖਿਆ ਸਹਿਯੋਗ ਨੂੰ ਮਜ਼ਬੂਤ ਕਰਨ ਵਾਲਾ ਇੱਕ ਅਹਿਮ ਸਾਂਝਾ ਫ਼ੌਜੀ ਅਭਿਆਸ ਹੈ। ਇਸ ਰਾਹੀਂ ਦੋਵਾਂ ਦੇਸ਼ਾਂ ਦੀਆਂ ਸਪੈਸ਼ਲ ਫੋਰਸਿਜ਼ ਨੂੰ ਸਿਖਲਾਈ ਹਾਸਲ ਕਰਨ, ਤਜਰਬੇ ਸਾਂਝੇ ਕਰਨ ਅਤੇ ਸਾਂਝੇ ਫ਼ੌਜੀ ਆਪਰੇਸ਼ਨਾਂ ਦੀ ਸਮਰੱਥਾ ਬਿਹਤਰ ਬਣਾਉਣ ਦਾ ਮੌਕਾ ਮਿਲਦਾ ਹੈ। ਇਸ ਅਭਿਆਸ ਨਾਲ ਭਾਰਤ ਅਤੇ ਇੰਡੋਨੇਸ਼ੀਆ ਵਿਚਾਲੇ ਰੱਖਿਆ ਸਹਿਯੋਗ ਹੋਰ ਮਜ਼ਬੂਤ ਹੋਣ ਦੀ ਉਮੀਦ ਹੈ।
ਇਹ ਵੀ ਪੜ੍ਹੋ
ਜ਼ਿਕਰਯੋਗ ਹੈ ਕਿ ਭਾਰਤ ਅਤੇ ਇੰਡੋਨੇਸ਼ੀਆ ਦੇ ਸਾਂਝੇ ਫ਼ੌਜੀ ਅਭਿਆਸ ਗਰੁੜ ਸ਼ਕਤੀ ਦਾ 10ਵਾਂ ਐਡੀਸ਼ਨ 3 ਤੋਂ 12 ਦਸੰਬਰ 2025 ਤੱਕ ਹਿਮਾਚਲ ਪ੍ਰਦੇਸ਼ ਦੇ ਬਕਲੋਹ ਸਥਿਤ ਸਪੈਸ਼ਲ ਫੋਰਸਿਜ਼ ਟ੍ਰੇਨਿੰਗ ਸਕੂਲ ਵਿੱਚ ਕਰਵਾਇਆ ਗਿਆ ਸੀ।
Source: TV9Hindi.com
