ਹੁੱਡਾ-ਸੈਲਜਾ ਦਾ ਨਾਂ ਲਏ ਬਿਨਾਂ ਰਾਹੁਲ ਗਾਂਧੀ ਨੇ ਲਗਾਈ ਕਲਾਸ, ਪਾਰਟੀ ਦੀ ਬਜਾਏ ਨੇਤਾਵਾਂ ਨੇ ਆਪਣਾ ਹਿੱਤ ਦੇਖਿਆ

ਕਾਂਗਰਸ ਹਰਿਆਣਾ ਵਿਧਾਨ ਸਭਾ ਚੋਣਾਂ ਵਿੱਚ ਆਪਣੀ ਹਾਰ ਦਾ ਕਾਰਨ ਲੱਭਣ ਵਿੱਚ ਲੱਗੀ ਹੋਈ ਹੈ। ਅੱਜ ਯਾਨੀ ਵੀਰਵਾਰ ਨੂੰ ਪਾਰਟੀ ਪ੍ਰਧਾਨ ਮਲਿਕਾਰਜੁਨ ਖੜਗੇ ਦੀ ਰਿਹਾਇਸ਼ ‘ਤੇ ਬੈਠਕ ਹੋਈ, ਜਿਸ ‘ਚ ਰਾਹੁਲ ਗਾਂਧੀ ਨੇ ਵੀ ਸ਼ਿਰਕਤ ਕੀਤੀ। ਸੂਤਰਾਂ ਮੁਤਾਬਕ ਰਾਹੁਲ ਨੇ ਇਸ ਦੌਰਾਨ ਭੂਪੇਂਦਰ ਸਿੰਘ ਹੁੱਡਾ ਅਤੇ ਕੁਮਾਰੀ ਸ਼ੈਲਜਾ ਦਾ ਨਾਂ ਲਏ ਬਿਨਾਂ ਵੱਡੀ ਗੱਲ ਕਹੀ। ਉਨ੍ਹਾਂ ਸਪੱਸ਼ਟ ਕਿਹਾ ਕਿ ਆਗੂਆਂ ਨੇ ਪਾਰਟੀ ਦੀ ਬਜਾਏ ਆਪਣੇ ਹਿੱਤਾਂ ਨੂੰ ਦੇਖਿਆ।

ਸੂਤਰਾਂ ਮੁਤਾਬਕ ਇਸ ਬੈਠਕ ‘ਚ ਰਾਹੁਲ ਗਾਂਧੀ ਨੇ ਕਿਹਾ ਕਿ ਹਰਿਆਣਾ ‘ਚ ਨੇਤਾਵਾਂ ਦੀ ਦਿਲਚਸਪੀ ਉੱਤੇ ਰਿਹਾ, ਪਾਰਟੀ ਦਾ ਇੰਟਰੈਸਟ ਹੇਠਾਂ ਚਲਾ ਗਿਆ। ਰਾਹੁਲ ਗਾਂਧੀ ਨੇ ਕਿਸੇ ਵੀ ਨੇਤਾ ਦਾ ਨਾਂ ਲਏ ਬਿਨਾਂ ਇਹ ਗੱਲ ਕਹੀ। ਬੈਠਕ ਦੀ ਜਾਣਕਾਰੀ ਦਿੰਦੇ ਹੋਏ ਕਾਂਗਰਸ ਨੇਤਾ ਅਜੇ ਮਾਕਨ ਨੇ ਦੱਸਿਆ ਕਿ ਨਤੀਜਿਆਂ ਤੋਂ ਬਾਅਦ ਅਸੀਂ ਸਮੀਖਿਆ ਬੈਠਕ ਕੀਤੀ। ਸਾਰੇ ਐਗਜ਼ਿਟ ਪੋਲ ਸਾਨੂੰ ਜਿੱਤ ਦਿਖਾ ਰਹੇ ਸਨ, ਸਾਨੂੰ ਜਿੱਤ ਦਾ ਭਰੋਸਾ ਸੀ। ਅਸੀਂ ਹਾਰ ਦੀ ਸਮੀਖਿਆ ਕੀਤੀ, ਈਵੀਐਮ ਤੋਂ ਲੈ ਕੇ ਨੇਤਾਵਾਂ ਵਿੱਚ ਮਤਭੇਦ ਵੀ ਵਿਚਾਰੇ ਗਏ। ਅੱਗੇ ਕੀ ਕਰਨਾ ਹੈ, ਉਹ ਜਲਦੀ ਹੀ ਖੁਲਾਸਾ ਕਰਨਗੇ।

ਮੀਟਿੰਗ ਵਿੱਚ ਕੌਣ ਸੀ ਮੌਜੂਦ?

ਖੜਗੇ ਦੇ ਘਰ ਹੋਈ ਮੀਟਿੰਗ ਵਿੱਚ ਰਾਹੁਲ, ਕੇਸੀ ਵੇਣੂਗੋਪਾਲ, ਓਬਜ਼ਰਵਰ ਅਜੈ ਮਾਕਨ, ਅਸ਼ੋਕ ਗਹਿਲੋਤ ਮੌਜੂਦ ਰਹੇ। ਭੂਪੇਂਦਰ ਹੁੱਡਾ ਅਤੇ ਉਦੈਭਾਨ ਦੇ ਨਾਮ ਸੂਚੀ ਵਿੱਚ ਸਨ, ਪਰ ਇਹ ਦੋਵੇਂ ਨਹੀਂ ਆਏ। ਇਹ ਸਪੱਸ਼ਟ ਨਹੀਂ ਹੈ ਕਿ ਉਨ੍ਹਾਂ ਨੂੰ ਰੋਕ ਦਿੱਤਾ ਗਿਆ ਜਾਂ ਉਹ ਆਪ ਨਹੀਂ ਆਏ ਜਾਂ ਫੋਨ ‘ਤੇ ਹੀ ਉਨ੍ਹਾਂ ਤੋਂ ਜਾਣਕਾਰੀ ਲਈ ਗਈ। ਕੁਮਾਰੀ ਸ਼ੈਲਜਾ ਅਤੇ ਰਣਦੀਪ ਸੁਰਜੇਵਾਲਾ ਨੂੰ ਬੁਲਾਇਆ ਹੀ ਨਹੀਂ ਗਿਆ ਸੀ।

ਕਾਂਗਰਸ ਬਣਾਏਗੀ ਕਮੇਟੀ

ਸੂਤਰਾਂ ਮੁਤਾਬਕ ਪਾਰਟੀ ਹਾਰ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਕਮੇਟੀ ਬਣਾਏਗੀ। ਕਮੇਟੀ ਇਸ ਗੱਲ ਦਾ ਪਤਾ ਲਗਾਏਗੀ ਕਿ ਉਸ ਨੂੰ ਚੋਣਾਂ ਵਿਚ ਕਿਉਂ ਅਤੇ ਕਿਵੇਂ ਹਾਰ ਮਿਲੀ। ਕਮੇਟੀ ਵਿੱਚ ਕੌਣ-ਕੌਣ ਹੋਵੇਗਾ, ਇਸ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ।

ਹਾਰ ਲਈ ਈਵੀਐਮ ਨੂੰ ਜ਼ਿੰਮੇਵਾਰ ਠਹਿਰਾ ਰਹੀ ਹੈ ਕਾਂਗਰਸ

ਕਾਂਗਰਸ ਹਾਰ ਲਈ ਈਵੀਐਮ ਨੂੰ ਜ਼ਿੰਮੇਵਾਰ ਠਹਿਰਾ ਰਹੀ ਹੈ। ਪਾਰਟੀ ਨੇਤਾ ਉਦੈਭਾਨ ਨੇ ਕਿਹਾ ਹੈ ਕਿ ਈਵੀਐਮ ਹੈਕ ਹੋ ਗਈਆਂ ਹਨ। ਪੂਰੇ ਸੂਬੇ ਵਿੱਚ ਸ਼ੰਕੇ ਹਨ। ਮਸ਼ੀਨਾਂ ਨੂੰ ਸੀਲ ਕਰਵਾਇਆ ਜਾਵੇਗਾ। ਦੁੱਧ ਦਾ ਦੁੱਧ ਪਾਣੀ ਦਾ ਪਾਣੀ ਹੋਣਾ ਚਾਹੀਦਾ ਹੈ। ਭੁਪਿੰਦਰ ਸਿੰਘ ਹੁੱਡਾ ਨੇ ਕਿਹਾ ਕਿ ਹਰਿਆਣਾ ਦਾ ਨਤੀਜਾ ਹੈਰਾਨੀਜਨਕ ਹੈ। ਦੇਸ਼ ਦਾ ਹਰ ਵਿਅਕਤੀ ਕਹਿ ਰਿਹਾ ਸੀ ਕਿ ਕਾਂਗਰਸ ਦੀ ਸਰਕਾਰ ਬਣਨ ਜਾ ਰਹੀ ਹੈ, ਅਸੀਂ ਹਰ ਸਰਵੇਖਣ ਵਿੱਚ ਅੱਗੇ ਸੀ, ਪਰ ਜੋ ਨਤੀਜੇ ਆਏ ਉਹ ਹੈਰਾਨੀਜਨਕ ਹਨ।

ਇਹ ਵੀ ਪੜ੍ਹੋ

ਰਾਸ਼ਟਰਪਤੀ ਭਵਨ ਵਿਖੇ ਪੁਤਿਨ ਨੂੰ ਗਾਰਡ ਆਫ਼ ਆਨਰ ਦੀਆਂ ਤਿਆਰੀਆਂ

ਪੀਐਮ ਮੋਦੀ ਨੇ ਪੁਤਿਨ ਨੂੰ ਭੇਟ ਕੀਤੀ ਗੀਤਾ, ਬੋਲੇ- ਇਹ ਕਰੋੜਾਂ ਲੋਕਾਂ ਦੀ ਪ੍ਰੇਰਨਾ

ਪੁਤਿਨ ਦੇ ਭਾਰਤ ਦੌਰੇ ਦਾ ਦੂਜਾ ਦਿਨ, ਜਾਣੋ ਕੀ ਹੈ ਅੱਜ ਦਾ ਪੂਰਾ ਸ਼ਡਿਊਲ

ਕਾਂਗਰਸ ਨੇ ਬੁੱਧਵਾਰ ਨੂੰ ਚੋਣ ਕਮਿਸ਼ਨ ਨੂੰ ਵੀ ਈਵੀਐਮਜ਼ ਦੇ ਸਬੰਧ ਵਿੱਚ ਜਾਣਕਾਰੀ ਦਿੱਤੀ ਸੀ ਅਤੇ ਜਾਂਚ ਦੀ ਮੰਗ ਕੀਤੀ ਸੀ। ਮੁੱਖ ਵਿਰੋਧੀ ਪਾਰਟੀ ਦੇ ਸੀਨੀਅਰ ਨੇਤਾਵਾਂ ਦੇ ਇੱਕ ਵਫ਼ਦ ਨੇ ਵੀ ਕਮਿਸ਼ਨ ਨੂੰ ਜਾਂਚ ਪੂਰੀ ਹੋਣ ਤੱਕ ਉਨ੍ਹਾਂ ਇਲੈਕਟ੍ਰਾਨਿਕ ਵੋਟਿੰਗ ਮਸ਼ੀਨਾਂ (ਈਵੀਐਮ) ਨੂੰ ਸੀਲ ਅਤੇ ਸੁਰੱਖਿਅਤ ਰੱਖਣ ਦੀ ਬੇਨਤੀ ਕੀਤੀ ਸੀ, ਜਿਸ ਬਾਰੇ ਸਵਾਲ ਉਠਾਏ ਗਏ ਹਨ।

ਇਸ ਸਾਲ ਜੂਨ ‘ਚ ਲੋਕ ਸਭਾ ਚੋਣਾਂ ਦੇ ਨਤੀਜਿਆਂ ਤੋਂ ਬਾਅਦ ਹਰਿਆਣਾ ‘ਚ ਭਾਜਪਾ ਅਤੇ ਕਾਂਗਰਸ ਵਿਚਾਲੇ ਪਹਿਲੀ ਵੱਡੀ ਸਿੱਧੀ ਟੱਕਰ ‘ਚ ਸੱਤਾਧਾਰੀ ਪਾਰਟੀ ਨੇ 90 ਮੈਂਬਰੀ ਵਿਧਾਨ ਸਭਾ ਦੀਆਂ ਚੋਣਾਂ ‘ਚ 48 ਸੀਟਾਂ ‘ਤੇ ਜਿੱਤ ਦਰਜ ਕੀਤੀ ਸੀ, ਜਦਕਿ 2019 ‘ਚ ਇਸ ਨੇ 41 ਸੀਟਾਂ ‘ਤੇ ਜਿੱਤ ਹਾਸਲ ਕੀਤੀ ਸੀ। ਕਾਂਗਰਸ ਨੂੰ 37 ਸੀਟਾਂ ਨਾਲ ਸੰਤੁਸ਼ਟ ਹੋਣਾ ਪਿਆ।