ਜ਼ਿੰਦਗੀ ਦੀ ਜੰਗ ਹਾਰ ਗਿਆ ਮਾਸੂਮ! 21 ਘੰਟੇ ਚੱਲੇ ਰੈਸਕਿਊ ਤੋਂ ਬਾਅਦ ਬੋਰਵੈੱਲ ‘ਚੋਂ ਕੱਢੀ ਗਈ ਨਿਰਵੈਰ ਦੀ ਲਾਸ਼

ਹਰਿਆਣਾ ਦੇ ਅੰਬਾਲਾ ‘ਚ ਇੱਕ ਖੁੱਲ੍ਹੇ ਬੋਰਵੈੱਲ ‘ਚ ਡਿੱਗਣ ਵਾਲੇ 4 ਸਾਲਾ ਬੱਚੇ ਨੂੰ ਬਚਾਉਣ ਲਈ 21 ਘੰਟੇ ਚੱਲੀ ਕੋਸ਼ਿਸ਼ ਅਖੀਰ ਅਸਫਲ ਰਹੀ। ਬੁੱਧਵਾਰ ਸਵੇਰੇ, ਬਚਾਅ ਟੀਮ ਨੇ ਬੱਚੇ ਨੂੰ 220 ਫੁੱਟ ਡੂੰਘੇ ਬੋਰਵੈੱਲ ‘ਚੋਂ ਕੱਢਿਆ, ਪਰ ਡਾਕਟਰਾਂ ਨੇ ਹਸਪਤਾਲ ਪਹੁੰਚਣ ‘ਤੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਹਾਦਸੇ ਤੋਂ ਬਾਅਦ ਪੂਰੇ ਪਿੰਡ ‘ਚ ਸੋਗ ਦੀ ਲਹਿਰ ਦੌੜ ਗਈ ਹੈ।

ਇਹ ਘਟਨਾ ਅੰਬਾਲਾ ਜ਼ਿਲ੍ਹੇ ਦੇ ਧਨੇਰਾ ਪਿੰਡ ‘ਚ ਵਾਪਰੀ। ਮੰਗਲਵਾਰ ਸਵੇਰੇ ਲਗਭਗ 6:30 ਵਜੇ, 4 ਸਾਲਾ ਨਿਰਵੈਰ ਸਿੰਘ ਆਪਣੇ ਪਿਤਾ ਮਨਜੀਤ ਸਿੰਘ ਨਾਲ ਖੇਤਾਂ ‘ਚ ਗਿਆ ਸੀ। ਉਸ ਦਾ ਦਾਦਾ ਕਰਨੈਲ ਸਿੰਘ ਪਹਿਲਾਂ ਹੀ ਖੇਤ ‘ਚ ਕੰਮ ਕਰ ਰਿਹਾ ਸੀ। ਮਨਜੀਤ ਆਪਣੇ ਪਿਤਾ ਲਈ ਖਾਣਾ ਲੈ ਕੇ ਖੇਤ ‘ਚ ਪਹੁੰਚਿਆ ਸੀ।

ਬੱਚਾ ਬੋਰਵੈੱਲ ‘ਚ ਡਿੱਗ ਗਿਆ

ਖੇਤਾਂ ‘ਚ ਪਹੁੰਚਣ ਤੋਂ ਬਾਅਦ, ਮਨਜੀਤ ਆਪਣੇ ਕੰਮ ‘ਚ ਰੁੱਝ ਗਿਆ ਜਦੋਂ ਕਿ ਕਰਨੈਲ ਸਿੰਘ ਖਾਣਾ ਖਾਣ ਲਈ ਬੈਠ ਗਿਆ। ਨਿਰਵੈਰ ਸਿੰਘ ਪਹਿਲਾਂ ਆਪਣੇ ਦਾਦੇ ਦੇ ਕੋਲ ਬੈਠਾ ਸੀ, ਪਰ ਕੁਝ ਦੇਰ ਬਾਅਦ ਖੇਡਣ ਲਈ ਚਲਾ ਗਿਆ। ਇਸ ਦੌਰਾਨ, ਉਸ ਨੇ ਖੇਤ ‘ਚ ਇੱਕ ਖੁੱਲ੍ਹਾ ਬੋਰਵੈੱਲ ਦੇਖਿਆ। ਦੱਸਿਆ ਗਿਆ ਕਿ ਬੱਚਾ ਬੋਰਵੈੱਲ ‘ਚ ਮਿੱਟੀ ਪਾਉਣ ਲੱਗ ਪਿਆ, ਅੰਦਰ ਝਾਤੀ ਮਾਰਦੇ ਹੋਏ, ਗਿੱਲੀ ਮਿੱਟੀ ਖਿਸਕ ਗਈ ਜਿਸ ਕਾਰਨ ਉਹ ਡਿੱਗ ਪਿਆ।

ਪਰਿਵਾਰ ਦੇ ਅਨੁਸਾਰ, ਡਿੱਗਣ ਦੀ ਆਵਾਜ਼ ਸੁਣ ਕੇ ਪਿਤਾ ਤੇ ਆਸ-ਪਾਸ ਦੇ ਹੋਰ ਲੋਕ ਬੋਰਵੈੱਲ ਵੱਲ ਭੱਜੇ। ਉਨ੍ਹਾਂ ਨੇ ਬੱਚੇ ਨੂੰ ਆਵਾਜ਼ ਮਾਰੀ ਤੇ ਆਪਣੇ ਆਪ ਉਸ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਅਸਫਲ ਰਹੇ। ਬਾਅਦ ‘ਚ ਸ਼ਾਮ 7:30 ਵਜੇ ਦੇ ਕਰੀਬ ਪ੍ਰਸ਼ਾਸਨ ਨੂੰ ਸੂਚਿਤ ਕੀਤਾ ਗਿਆ।

ਬਚਾਅ ਕਾਰਜ 21 ਘੰਟੇ ਚੱਲਿਆ

ਸੂਚਨਾ ਮਿਲਣ ‘ਤੇ, ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਟੀਮ ਮੌਕੇ ‘ਤੇ ਪਹੁੰਚੀ। ਫਿਰ NDRF, SDRF ਤੇ ਫੌਜ ਦੀਆਂ ਟੀਮਾਂ ਨੇ ਇੱਕ ਸਾਂਝਾ ਬਚਾਅ ਕਾਰਜ ਸ਼ੁਰੂ ਕੀਤਾ। ਇਸ ਮਿਸ਼ਨ ‘ਚ ਕਈ ਏਜੰਸੀਆਂ ਸ਼ਾਮਲ ਸਨ, ਬਚਾਅ ਕਾਰਜ ਲਗਭਗ 21 ਘੰਟੇ ਚੱਲਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਬੋਰਵੈੱਲ ਲਗਭਗ 9 ਇੰਚ ਚੌੜਾ ਤੇ ਲਗਭਗ 220 ਫੁੱਟ ਡੂੰਘਾ ਸੀ, ਜਿਸ ਕਾਰਨ ਬਚਾਅ ਕਾਰਜ ਬਹੁਤ ਚੁਣੌਤੀਪੂਰਨ ਹੋ ਗਿਆ।

ਬੁੱਧਵਾਰ ਸਵੇਰੇ, ਲਗਭਗ 3:40 ਵਜੇ, ਬਚਾਅ ਟੀਮ ਨੇ ਬੱਚੇ ਨੂੰ ਬਾਹਰ ਕੱਢਿਆ, ਜਿਸ ਨੂੰ ਤੁਰੰਤ ਐਂਬੂਲੈਂਸ ਰਾਹੀਂ ਅੰਬਾਲਾ ਕੈਂਟ ਸਿਵਲ ਹਸਪਤਾਲ ਲਿਜਾਇਆ ਗਿਆ। ਜਾਂਚ ਤੋਂ ਬਾਅਦ, ਹਸਪਤਾਲ ਦੇ ਡਾਕਟਰਾਂ ਨੇ ਐਲਾਨ ਕੀਤਾ ਕਿ ਬੱਚੇ ਨੂੰ ਐਮਰਜੈਂਸੀ ਵਾਰਡ ‘ਚ ਮ੍ਰਿਤਕ ਲਿਆਂਦਾ ਗਿਆ ਸੀ।

ਘਟਨਾ ਦੀ ਜਾਣਕਾਰੀ ਮਿਲਣ ‘ਤੇ, ਹਰਿਆਣਾ ਦੇ ਕੈਬਨਿਟ ਮੰਤਰੀ ਅਨਿਲ ਵਿਜ ਨੇ ਮੰਗਲਵਾਰ ਸ਼ਾਮ ਨੂੰ ਬਚਾਅ ਕਾਰਜ ਦਾ ਮੁਲਾਂਕਣ ਕਰਨ ਲਈ ਮੌਕੇ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਦੁਖੀ ਪਰਿਵਾਰ ਨਾਲ ਵੀ ਮੁਲਾਕਾਤ ਕੀਤੀ।

ਅੰਬਾਲਾ ਦੇ ਡਿਪਟੀ ਕਮਿਸ਼ਨਰ ਅਜੈ ਸਿੰਘ ਤੋਮਰ ਨੇ ਕਿਹਾ ਕਿ ਇਸ ਮਾਮਲੇ ‘ਚ ਲਾਪਰਵਾਹੀ ਵਰਤਣ ਵਾਲਿਆਂ ਵਿਰੁੱਧ ਨਿਯਮਾਂ ਅਨੁਸਾਰ ਕਾਰਵਾਈ ਕੀਤੀ ਜਾਵੇਗੀ। ਉਨ੍ਹਾਂ ਕਿਸਾਨਾਂ ਤੇ ਜਨਤਾ ਨੂੰ ਅਪੀਲ ਕੀਤੀ ਕਿ ਉਹ ਖੁੱਲ੍ਹੇ ਬੋਰਵੈੱਲਾਂ ਨੂੰ ਤੁਰੰਤ ਢੱਕ ਦੇਣ। ਇਹ ਧਿਆਨ ਦੇਣ ਯੋਗ ਹੈ ਕਿ ਬੱਚਿਆਂ ਦੇ ਖੁੱਲ੍ਹੇ ਬੋਰਵੈੱਲਾਂ ‘ਚ ਡਿੱਗਣ ਦੀਆਂ ਘਟਨਾਵਾਂ ਪਹਿਲਾਂ ਵੀ ਵਾਪਰੀਆਂ ਹਨ। ਪਿਛਲੇ ਮਹੀਨੇ ਹੀ, ਪੰਜਾਬ ਦੇ ਹੁਸ਼ਿਆਰਪੁਰ ‘ਚ ਇੱਕ ਚਾਰ ਸਾਲ ਦਾ ਬੱਚਾ ਬੋਰਵੈੱਲ ਵਿੱਚ ਡਿੱਗ ਗਿਆ ਸੀ ਤੇ ਲਗਭਗ 9 ਘੰਟੇ ਚੱਲੇ ਇੱਕ ਆਪ੍ਰੇਸ਼ਨ ਤੋਂ ਬਾਅਦ ਉਸਨੂੰ ਸੁਰੱਖਿਅਤ ਬਚਾਇਆ ਗਿਆ ਸੀ। ਇਸੇ ਤਰ੍ਹਾਂ 2006 ‘ਚ, ਹਰਿਆਣਾ ਦੇ ਕੁਰੂਕਸ਼ੇਤਰ ‘ਚ ਇੱਕ ਬੋਰਵੈੱਲ ‘ਚੋਂ ਪ੍ਰਿੰਸ ਨਾਮ ਦੇ ਇੱਕ ਬੱਚੇ ਨੂੰ 48 ਘੰਟਿਆਂ ਦੇ ਆਪ੍ਰੇਸ਼ਨ ਤੋਂ ਬਾਅਦ ਬਚਾਇਆ ਗਿਆ ਸੀ।

ਰਿਪੋਰਟ: ਕ੍ਰਿਸ਼ਨਾ ਬਾਲੀ, ਅੰਬਾਲਾ