ਨੁਸਰਤ ਭਰੂਚਾ ਕਿੱਥੇ ਹੈ? ਇਜ਼ਰਾਈਲ ‘ਚ ਹਮਾਸ ਦੇ ਹਮਲੇ ਤੋਂ ਬਾਅਦ ਕੁਝ ਪਤਾ ਨਹੀਂ, ਟੀਮ ਨੇ ਕਿਹਾ- ਨਹੀਂ ਹੋ ਰਿਹਾ ਕੋਈ ਸੰਪਰਕ ਸੰਭਵ

ਇਜ਼ਰਾਈਲ ਅਤੇ ਫਲਿਸਤੀਨੀ ਅੱਤਵਾਦੀ ਸਮੂਹ ਦੇ ਵਿਚਕਾਰ ਚੱਲ ਰਹੀ ਜੰਗ ਦੇ ਵਿਚਕਾਰ ਬਾਲੀਵੁੱਡ ਅਦਾਕਾਰਾ ਨੁਸਰਤ ਭਰੂਚਾ ਇਜ਼ਰਾਈਲ ਵਿੱਚ ਫਸ ਗਈ ਹੈ। ਨੁਸਰਤ ਭਰੂਚਾ ਹਾਲ ਹੀ ‘ਚ ਇਜ਼ਰਾਈਲ ਪਹੁੰਚੀ ਸੀ। ਇੱਥੇ ਉਹ ਹਾਈਫਾ ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ ਦਾ ਹਿੱਸਾ ਬਣੀ। ਇਸ ਫਿਲਮ ਫੈਸਟੀਵਲ ਵਿੱਚ ਨੁਸਰਤ ਭਰੂਚਾ ਦੀ ਫਿਲਮ ਅਕੇਲੀ ਨੂੰ ਪ੍ਰਦਰਸ਼ਿਤ ਕੀਤਾ ਗਿਆ। ਪਰ ਤਣਾਅ ਦੇ ਇਸ ਮਾਹੌਲ ਵਿਚਕਾਰ ਨੁਸਰਤ ਭਰੂਚਾ ਦੀ ਟੀਮ ਕਾਫੀ ਚਿੰਤਤ ਹੋ ਗਈ ਹੈ।

ਦਰਅਸਲ, ਨੁਸਰਤ ਦੀ ਟੀਮ ਪਿਛਲੇ ਦਿਨ ਤੋਂ ਉਸ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪਰ ਅਜੇ ਤੱਕ ਅਦਾਕਾਰਾ ਨਾਲ ਗੱਲ ਨਹੀਂ ਹੋ ਸਕੀ ਹੈ। ਮੀਡੀਆ ਰਿਪੋਰਟਾਂ ਦੇ ਮੁਤਾਬਕ ਹਾਈਫਾ ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ ‘ਚ ਸ਼ਾਮਲ ਹੋਣ ਲਈ ਗਈ ਸੀ। ਅਦਾਕਾਰਾ ਦੀ ਟੀਮ ਦਾ ਕਹਿਣਾ ਹੈ ਕਿ ਨੁਸਰਤ ਨਾਲ ਕੱਲ੍ਹ ਦੁਪਹਿਰ 12:30 ਵਜੇ ਆਖਰੀ ਵਾਰ ਸੰਪਰਕ ਹੋਇਆ ਸੀ। ਇਸ ਦੌਰਾਨ ਉਹ ਬੇਸਮੈਂਟ ਵਿੱਚ ਸੀ ਅਤੇ ਪੂਰੀ ਤਰ੍ਹਾਂ ਸੁਰੱਖਿਅਤ ਸੀ।

ਟੀਮ ਦਾ ਅੱਗੇ ਕਹਿਣਾ ਹੈ ਕਿ ਕੱਲ੍ਹ ਤੋਂ ਹੁਣ ਤੱਕ ਉਨ੍ਹਾਂ ਨਾਲ ਦੁਬਾਰਾ ਸੰਪਰਕ ਨਹੀਂ ਹੋਇਆ ਹੈ। ਉਨ੍ਹਾਂ ਦੀ ਪੂਰੀ ਟੀਮ ਨੁਸਰਤ ਨੂੰ ਸੁਰੱਖਿਅਤ ਭਾਰਤ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਹਰ ਕੋਈ ਦੁਆ ਕਰ ਰਿਹਾ ਹੈ ਕਿ ਉਹ ਜਲਦੀ ਸਹੀ ਸਲਾਮਤ ਭਾਰਤ ਪਰਤੇ। ਹਾਲਾਂਕਿ ਇਸ ਖਬਰ ਦੇ ਸਾਹਮਣੇ ਆਉਣ ਤੋਂ ਬਾਅਦ ਨੁਸਰਤ ਦੇ ਪ੍ਰਸ਼ੰਸਕ ਥੋੜੇ ਚਿੰਤਤ ਹੋ ਗਏ ਹਨ। ਕਿਉਂਕਿ ਫਲਿਸਤੀਨ ‘ਤੇ ਅੱਤਵਾਦੀ ਸੰਗਠਨ ਨੇ ਸ਼ਨੀਵਾਰ ਨੂੰ 20 ਮਿੰਟਾਂ ‘ਚ ਇਜ਼ਰਾਈਲ ‘ਤੇ 5 ਹਜ਼ਾਰ ਰਾਕੇਟ ਦਾਗੇ ਸਨ। ਜਿਸ ਵਿੱਚ ਕਈ ਲੋਕਾਂ ਦੀ ਮੌਤ ਹੋਣ ਦੀ ਖਬਰ ਸਾਹਮਣੇ ਆਈ ਹੈ।

ਜੇਕਰ ਨੁਸਰਤ ਭਰੂਚਾ ਦੀ ਫਿਲਮ ‘ਅਕੇਲੀ’ ਦੀ ਗੱਲ ਕਰੀਏ ਤਾਂ ਇਹ ਅਗਸਤ ਮਹੀਨੇ ‘ਚ ਰਿਲੀਜ਼ ਹੋਈ ਸੀ। ਜੇਕਰ ਫਿਲਮ ਦੀ ਕਹਾਣੀ ਦੱਸੀਏ ਤਾਂ ਇਰਾਕ ਦੇ ਘਰੇਲੂ ਯੁੱਧ ਦੌਰਾਨ ਇੱਕ ਔਰਤ ਕਿਸੇ ਅਣਜਾਣ ਥਾਂ ‘ਤੇ ਫਸ ਜਾਂਦੀ ਹੈ। ਕਹਾਣੀ ਵਿੱਚ, ਯੁੱਧ ਦੇ ਮਾਹੌਲ ਵਿੱਚ, ਇੱਕ ਔਰਤ ਆਪਣੇ ਘਰ ਵਾਪਸ ਜਾਣ ਲਈ ਸੰਘਰਸ਼ ਕਰਦੀ ਦਿਖਾਈ ਦਿੰਦੀ ਹੈ।