ਕੋਲਡ ਕਾਲਿੰਗ ਕੀ ਹੈ, ਭਾਰਤ ‘ਚ ਕਿਉਂ ਹੈ ਇਹ ਬਦਨਾਮ? ਇਸ ਪੇਸ਼ੇ ਨੂੰ ਬਿਹਤਰ ਬਣਾਉਣ ‘ਤੇ ਹੋ ਰਹੀ ਚਰਚਾ
Cold Calling: ਕੋਲਡ ਕਾਲਿੰਗ ਦਾ ਨਾਮ ਸੁਣਦੇ ਹੀ ਲੋਕਾਂ ਨੂੰ ਅਣਚਾਹੀਆਂ ਸੇਲਜ਼ ਕਾਲਾਂ ਯਾਦ ਆਉਂਦੀਆਂ ਹਨ, ਪਰ ਸਹੀ ਤਰੀਕੇ ਨਾਲ ਕੀਤੀ ਗਈ ਸੇਲਜ਼ ਦਾ ਮਤਲਬ ਗਾਹਕ ਦੀ ਲੋੜ ਨੂੰ ਸਮਝ ਕੇ ਹੱਲ ਮੁਹੱਈਆ ਕਰਵਾਉਣਾ ਹੈ। ਇਸ ਪੇਸ਼ੇ ਦੀ ਛਵੀ ਨੂੰ ਬਦਲਣ ਦੀ ਲੋੜ 'ਤੇ ਚਰਚਾ ਹੋ ਰਹੀ ਹੈ।
ਭਾਰਤ ਵਿੱਚ ਕੋਲਡ ਕਾਲਿੰਗ ਨੂੰ ਅਕਸਰ ਅaਣਚਾਹੀਆਂ ਫੋਨ ਕਾਲਾਂ ਅਤੇ ਪਰੇਸ਼ਾਨ ਕਰਨ ਵਾਲੀ ਸੇਲਜ਼ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਬੈਂਕਿੰਗ, ਇੰਸ਼ੋਰੈਂਸ, ਕ੍ਰੈਡਿਟ ਕਾਰਡ ਅਤੇ ਲੋਨ ਦੇ ਨਾਮ ‘ਤੇ ਆਉਣ ਵਾਲੀਆਂ ਲਗਾਤਾਰ ਕਾਲਾਂ ਨੇ ਇਸ ਪੇਸ਼ੇ ਦੀ ਛਵੀ ਖ਼ਰਾਬ ਕੀਤੀ ਹੈ। ਪਰ ਸੇਲਜ਼ ਦਾ ਮਤਲਬ ਸਿਰਫ਼ ਕਿਸੇ ਗਾਹਕ ਤੋਂ ਪੈਸੇ ਲੈਣਾ ਨਹੀਂ ਹੈ। ਇੱਕ ਵੀਡੀਓ ਵਿੱਚ ਸੇਲਜ਼ ਪੇਸ਼ੇ ਨੂੰ ਲੈ ਕੇ ਇਸੇ ਸੋਚ ‘ਤੇ ਸਵਾਲ ਉਠਾਇਆ ਗਿਆ ਹੈ। ਇਸ ਵਿੱਚ ਦੱਸਿਆ ਗਿਆ ਕਿ ਚੰਗੀ ਸੇਲਜ਼ ਉਹ ਹੁੰਦੀ ਹੈ, ਜਿਸ ਵਿੱਚ ਗਾਹਕ ਦੀ ਲੋੜ ਅਤੇ ਸਮੱਸਿਆ ਨੂੰ ਸਮਝ ਕੇ ਉਸ ਨੂੰ ਅਜਿਹਾ ਹੱਲ ਦਿੱਤਾ ਜਾਵੇ, ਜਿਸ ਦੀ ਕੀਮਤ ਗਾਹਕ ਨੂੰ ਚੁਕਾਈ ਗਈ ਰਕਮ ਤੋਂ ਵੱਧ ਮਹਿਸੂਸ ਹੋਵੇ। ਇਸੇ ਸੋਚ ਨਾਲ ਕੋਲਡ ਕਾਲਿੰਗ ਦੇ ਪੇਸ਼ੇ ਨੂੰ ਬਿਹਤਰ ਬਣਾਉਣ ਦੀ ਲੋੜ ਦੱਸੀ ਗਈ ਹੈ।
ਕੀ ਹੁੰਦੀ ਹੈ ਕੋਲਡ ਕਾਲਿੰਗ?
ਕੋਲਡ ਕਾਲਿੰਗ ਮਾਰਕੀਟਿੰਗ ਦਾ ਉਹ ਤਰੀਕਾ ਹੈ, ਜਿਸ ਵਿੱਚ ਸੇਲਜ਼ਪਰਸਨ ਕਿਸੇ ਅਜਿਹੇ ਸੰਭਾਵਿਤ ਗਾਹਕ ਨੂੰ ਫੋਨ ਕਰਦਾ ਹੈ, ਜਿਸ ਨਾਲ ਪਹਿਲਾਂ ਕੋਈ ਸੰਪਰਕ ਨਹੀਂ ਹੋਇਆ ਹੁੰਦਾ। ਇਸ ਕਾਲ ਦਾ ਮਕਸਦ ਕਿਸੇ ਪ੍ਰੋਡਕਟ ਜਾਂ ਸਰਵਿਸ ਬਾਰੇ ਜਾਣਕਾਰੀ ਦੇਣਾ ਅਤੇ ਉਸ ਨੂੰ ਖਰੀਦਣ ਲਈ ਤਿਆਰ ਕਰਨਾ ਹੁੰਦਾ ਹੈ। ਕੰਪਨੀਆਂ ਨਵੇਂ ਗਾਹਕ ਬਣਾਉਣ ਲਈ ਇਸ ਤਰੀਕੇ ਦੀ ਵਰਤੋਂ ਕਰਦੀਆਂ ਹਨ।
ਸਮੱਸਿਆ ਉਦੋਂ ਸ਼ੁਰੂ ਹੁੰਦੀ ਹੈ ਜਦੋਂ ਲੋਕਾਂ ਨੂੰ ਉਨ੍ਹਾਂ ਦੀ ਸਹਿਮਤੀ ਤੋਂ ਬਿਨਾਂ ਵਾਰ-ਵਾਰ ਕਾਲਾਂ ਕੀਤੀਆਂ ਜਾਂਦੀਆਂ ਹਨ। ਕਈ ਵਾਰ ਇੱਕੋ ਵਿਅਕਤੀ ਨੂੰ ਵੱਖ-ਵੱਖ ਨੰਬਰਾਂ ਤੋਂ ਫੋਨ ਆਉਂਦੇ ਹਨ। ਕੰਮ, ਮੀਟਿੰਗ ਜਾਂ ਆਰਾਮ ਦੇ ਸਮੇਂ ਆਉਣ ਵਾਲੀਆਂ ਅਜਿਹੀਆਂ ਕਾਲਾਂ ਲੋਕਾਂ ਨੂੰ ਪਰੇਸ਼ਾਨ ਕਰਦੀਆਂ ਹਨ।
ਭਾਰਤ ਵਿੱਚ ਕਿਉਂ ਬਦਨਾਮ ਹੈ ਸੇਲਜ਼ ਦਾ ਕੰਮ ?
ਕੋਲਡ ਕਾਲਿੰਗ ਦੀ ਖ਼ਰਾਬ ਛਵੀ ਦੀ ਇੱਕ ਵਜ੍ਹਾ ਸਪੈਮ ਅਤੇ ਫਰਾਡ ਕਾਲਾਂ ਵੀ ਹਨ। ਕੁਝ ਧੋਖੇਬਾਜ਼ ਬੈਂਕ, ਲੋਨ, ਇੰਸ਼ੋਰੈਂਸ ਜਾਂ ਹੋਰ ਆਫ਼ਰਾਂ ਦੇ ਨਾਮ ‘ਤੇ ਲੋਕਾਂ ਤੋਂ ਨਿੱਜੀ ਜਾਂ ਬੈਂਕਿੰਗ ਜਾਣਕਾਰੀ ਮੰਗਦੇ ਹਨ। ਇਸ ਤੋਂ ਇਲਾਵਾ DND ਸੁਵਿਧਾ ਦੇ ਬਾਵਜੂਦ ਆਉਣ ਵਾਲੀਆਂ ਅਣਚਾਹੀਆਂ ਕਾਲਾਂ ਨੇ ਲੋਕਾਂ ਦਾ ਭਰੋਸਾ ਘਟਾ ਦਿੱਤਾ ਹੈ।
ਸਿਰਫ਼ ਪੈਸੇ ਲੈਣਾ ਨਹੀਂ, ਸਗੋਂ ਵੈਲਿਊ ਦੇਣਾ ਹੈ
ਵੀਡੀਓ ਵਿੱਚ ਸੇਲਜ਼ ਨੂੰ ਇੱਕ ਵੱਖਰੇ ਨਜ਼ਰੀਏ ਨਾਲ ਸਮਝਾਇਆ ਗਿਆ ਹੈ। ਇਸ ਵਿੱਚ 500 ਰੁਪਏ ਦੀ ਉਦਾਹਰਨ ਦੇ ਕੇ ਦੱਸਿਆ ਗਿਆ ਕਿ ਜੇਕਰ ਕੋਈ ਵਿਅਕਤੀ 100 ਰੁਪਏ ਦੇ ਕੇ ਅਜਿਹੀ ਸਰਵਿਸ ਲੈਂਦਾ ਹੈ, ਜਿਸ ਦੀ ਕੀਮਤ ਉਸ ਨੂੰ 500 ਰੁਪਏ ਦੇ ਬਰਾਬਰ ਮਹਿਸੂਸ ਹੁੰਦੀ ਹੈ ਤਾਂ ਇਹ ਸਿਰਫ਼ ਪੈਸੇ ਲੈਣਾ ਨਹੀਂ, ਸਗੋਂ ਵੈਲਿਊ ਦੇਣਾ ਹੈ। ਯਾਨੀ ਚੰਗੀ ਸੇਲਜ਼ ਦਾ ਮਕਸਦ ਗਾਹਕ ‘ਤੇ ਦਬਾਅ ਬਣਾ ਕੇ ਸਮਾਨ ਵੇਚਣਾ ਨਹੀਂ, ਸਗੋਂ ਉਸ ਦੀ ਲੋੜ ਸਮਝ ਕੇ ਸਹੀ ਹੱਲ ਦੇਣਾ ਹੋਣਾ ਚਾਹੀਦਾ ਹੈ। ਇਸੇ ਕਾਰਨ ਕੋਲਡ ਕਾਲਿੰਗ ਦੇ ਪੇਸ਼ੇ ਵਿੱਚ ਵੀ ਭਰੋਸੇ, ਸਹਿਮਤੀ ਅਤੇ ਬਿਹਤਰ ਗਾਹਕ ਅਨੁਭਵ ‘ਤੇ ਧਿਆਨ ਦੇਣ ਦੀ ਲੋੜ ਹੈ।
ਇਹ ਵੀ ਪੜ੍ਹੋ
Source:TV9Hindi.com
