ਡੀਜ਼ਲ-ATF ਤੇ ਲੱਗਣ ਵਾਲਾ ਵਿੰਡਫਾਲ ਟੈਕਸ ਘਟਿਆ, ਪੈਟਰੋਲ ਐਕਸਪੋਰਟ ਰਹੇਗਾ ਡਿਊਟੀ ਫ੍ਰੀ

ਪੈਟਰੋਲ ਡੀਜ਼ਲ

ਸਰਕਾਰ ਨੇ 1 ਮਈ 2026 ਤੋਂ ਡੀਜ਼ਲ ਦੇ ਨਿਰਯਾਤ ਤੇ ਲੱਗਣ ਵਾਲਾ ਅਚਾਨਕ ਵੱਧ ਮੁਨਾਫ਼ੇ ਵਾਲਾ ਟੈਕਸ (ਵਿੰਡਫਾਲ ਟੈਕਸ) ਘਟਾ ਕੇ 23 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਹੈ। ਇਸੇ ਸਮੇਂ, ਜਹਾਜ਼ਾਂ ਵਿੱਚ ਵਰਤੇ ਜਾਣ ਵਾਲੇ ਫਿਊਲ (ATF) ਤੇ ਇਹ ਟੈਕਸ ਹੁਣ 33 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਗਿਆ ਹੈ। ਵੀਰਵਾਰ ਦੇਰ ਰਾਤ ਵਿੱਤ ਮੰਤਰਾਲੇ ਦੇ ਬਿਆਨ ਵਿੱਚ ਦੱਸਿਆ ਗਿਆ ਕਿ ਪੈਟਰੋਲ ਦੇ ਨਿਰਯਾਤ ਤੇ ਟੈਕਸ ਅਜੇ ਵੀ ਜ਼ੀਰੋ ਹੀ ਰਹੇਗਾ।

ਮੰਤਰਾਲੇ ਨੇ ਇਹ ਵੀ ਕਿਹਾ ਕਿ ਦੇਸ਼ ਦੇ ਅੰਦਰ ਵਰਤੇ ਜਾਣ ਵਾਲੇ ਪੈਟਰੋਲ ਅਤੇ ਡੀਜ਼ਲ ਤੇ ਲੱਗ ਰਹੇ ਐਕਸਾਈਟ ਟੈਕਸ ਵਿੱਚ ਕੋਈ ਵੀ ਬਦਲਾਅ ਨਹੀਂ ਕੀਤਾ ਗਿਆ ਹੈ। ਡੀਜ਼ਲ ਦੇ ਐਕਸਪੋਰਟ ਤੇ ਲੱਗਣ ਵਾਲਾ ਖ਼ਾਸ ਵਾਧੂ ਟੈਕਸ ਪਹਿਲਾਂ 55.5 ਰੁਪਏ ਪ੍ਰਤੀ ਲੀਟਰ ਸੀ, ਜਿਸਨੂੰ ਹੁਣ ਘਟਾ ਕੇ 23 ਰੁਪਏ ਕਰ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ATF ਤੇ ਇਹ ਟੈਕਸ 42 ਰੁਪਏ ਤੋਂ ਘਟਾ ਕੇ 33 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਗਿਆ ਹੈ।

1 ਮਈ ਤੋਂ ਸ਼ੁਰੂ ਹੋਣ ਵਾਲੇ ਅਗਲੇ 15 ਦਿਨਾਂ ਦੇ ਪੀਰੀਅਡ ਲਈ ਡੀਜ਼ਲ ਦੇ ਐਕਸਪੋਰਟ ਤੇ ਸੜਕ ਅਤੇ ਵਿਕਾਸ ਲਈ ਲੱਗਣ ਵਾਲਾ ਟੈਕਸ (ਸੈਸ) ਜ਼ੀਰੋ ਰੱਖਿਆ ਗਿਆ ਹੈ। ਸਰਕਾਰ ਨੇ 26 ਮਾਰਚ ਨੂੰ ਡੀਜ਼ਲ ਤੇ 21.50 ਰੁਪਏ ਅਤੇ ATF ਤੇ 29.5 ਰੁਪਏ ਪ੍ਰਤੀ ਲੀਟਰ ਐਕਸਪੋਰਟ ਟੈਕਸ ਲਗਾਇਆ ਸੀ। ਇਸ ਤੋਂ ਬਾਅਦ 11 ਅਪ੍ਰੈਲ ਦੇ ਰਿਵਿਊ ਵਿੱਚ ਇਨ੍ਹਾਂ ਟੈਕਸਾਂ ਨੂੰ ਵਧਾ ਕੇ 55.5 ਰੁਪਏ ਅਤੇ 42 ਰੁਪਏ ਕਰ ਦਿੱਤਾ ਗਿਆ ਸੀ।

ਕਿਉਂ ਲਾਇਆ ਗਿਆ ਸੀ ਇਹ ਟੈਕਸ?

ਅਮਰੀਕਾ, ਇਸਰਾਈਲ ਅਤੇ ਈਰਾਨ ਵਿਚਾਲੇ ਚੱਲ ਰਹੀ ਜੰਗ ਦੌਰਾਨ ਦੇਸ਼ ਵਿੱਚ ਫਿਊਲ ਦੀ ਸਪਲਾਈ ਬਣੀ ਰਹੇ, ਇਸ ਲਈ ਸਰਕਾਰ ਨੇ ਇਹ ਟੈਕਸ ਲਗਾਇਆ ਸੀ। ਇਸ ਦਾ ਮਕਸਦ ਇਹ ਵੀ ਸੀ ਕਿ ਜੋ ਕੰਪਨੀਆਂ ਫਿਊਲ ਬਾਹਰ ਭੇਜਦੀਆਂ ਹਨ, ਉਹ ਗਲੋਬਲ ਕੀਮਤਾਂ ਦੇ ਫਰਕ ਦਾ ਗਲਤ ਫਾਇਦਾ ਨਾ ਉਠਾ ਸਕਣ। ਜੰਗ ਸ਼ੁਰੂ ਹੋਣ ਤੋਂ ਬਾਅਦ ਦੁਨੀਆ ਭਰ ਵਿੱਚ ਕੱਚੇ ਤੇਲ ਦੀਆਂ ਕੀਮਤਾਂ ਤੇਜ਼ੀ ਨਾਲ ਵੱਧ ਗਈਆਂ ਸਨ। 28 ਫ਼ਰਵਰੀ ਨੂੰ ਅਮਰੀਕਾ ਅਤੇ ਇਸਰਾਈਲ ਨੇ ਈਰਾਨ ਤੇ ਸੈਨਿਕ ਹਮਲਾ ਕੀਤਾ, ਜਿਸ ਤੋਂ ਬਾਅਦ ਈਰਾਨ ਨੇ ਵੀ ਜਵਾਬੀ ਕਾਰਵਾਈ ਕੀਤੀ।

ਇਸ ਕਾਰਨ ਕੱਚੇ ਤੇਲ ਦੀਆਂ ਕੀਮਤਾਂ ਵੱਧ ਕੇ ਕਰੀਬ 126 ਡਾਲਰ ਪ੍ਰਤੀ ਬੈਰਲ ਤੱਕ ਪਹੁੰਚ ਗਈਆਂ, ਜਦਕਿ ਜੰਗ ਤੋਂ ਪਹਿਲਾਂ ਇਹ ਲਗਭਗ 73 ਡਾਲਰ ਪ੍ਰਤੀ ਬੈਰਲ ਸਨ। ਮੰਤਰਾਲੇ ਨੇ ਕਿਹਾ ਕਿ ਵੈਸਟ ਏਸ਼ੀਆ ਵਿੱਚ ਤਣਾਅ ਨੂੰ ਦੇਖਦੇ ਹੋਏ ਐਕਸਪੋਰਟ ਘਟਾ ਕੇ ਦੇਸ਼ ਵਿੱਚ ਪੈਟਰੋਲ-ਡੀਜ਼ਲ ਦੀ ਸਪਲਾਈ ਬਣਾਈ ਰੱਖਣ ਲਈ ਇਹ ਟੈਕਸ ਲਗਾਇਆ ਗਿਆ ਸੀ।

Source ਟੀਵੀ9 ਭਾਰਤਵਰਸ਼