ਈਰਾਨ ਨੇ ਆਖਰੀ ਵਕਤ ਤੱਕ ਨਹੀਂ ਮੰਨੀ ਹਾਰ, ਇਨ੍ਹਾਂ 2 ਫੋਨ ਕਾਲਸ ਨਾਲ ਰੁੱਕੀ ਇਜ਼ਰਾਈਲ ਨਾਲ ਜੰਗ
Iran Isreal Ceasefire : ਐਕਸੀਓਸ ਦੇ ਅਨੁਸਾਰ, ਜਦੋਂ ਡੋਨਾਲਡ ਟਰੰਪ ਦੇ ਰਾਜਦੂਤ ਨੇ ਈਰਾਨ ਨੂੰ ਸਮਝੌਤੇ ਲਈ ਬੁਲਾਇਆ, ਤਾਂ ਈਰਾਨ ਨੇ ਆਪਣੀਆਂ ਸ਼ਰਤਾਂ ਰੱਖੀਆਂ। ਈਰਾਨ ਨੇ ਕਿਹਾ ਕਿ ਗੱਲਬਾਤ ਤਾਂ ਹੀ ਹੋ ਸਕਦੀ ਹੈ ਜੇਕਰ ਇਜ਼ਰਾਈਲ ਹਮਲਾ ਬੰਦ ਕਰੇ। ਅਮਰੀਕਾ ਨੇ ਕਤਰ ਦੀ ਸਿਫਾਰਸ਼ 'ਤੇ ਜੰਗਬੰਦੀ ਦੀ ਪਹਿਲ ਕੀਤੀ ਸੀ।
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਤਰ ਦੀ ਸਿਫਾਰਸ਼ ‘ਤੇ ਈਰਾਨ ਅਤੇ ਇਜ਼ਰਾਈਲ ਵਿਚਕਾਰ ਜੰਗਬੰਦੀ ਕਰਵਾਈ ਹੈ। ਇਹ ਖੁਲਾਸਾ ਨਿਊਜ਼ਵੀਕ ਮੈਗਜ਼ੀਨ ਨੇ ਅਮਰੀਕੀ ਕੂਟਨੀਤਕ ਸੂਤਰਾਂ ਦੇ ਹਵਾਲੇ ਨਾਲ ਕੀਤਾ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਜਿਵੇਂ ਹੀ ਈਰਾਨ ਨੇ ਕਤਰ ‘ਤੇ ਮਿਜ਼ਾਈਲਾਂ ਦਾਗੀਆਂ, ਕਤਰ ਦੇ ਅਮੀਰ ਅਤੇ ਪ੍ਰਧਾਨ ਮੰਤਰੀ ਅਮਰੀਕਾ ਵੱਲ ਦੇਖਣ ਲੱਗ ਪਏ।
ਨਿਊਜ਼ਵੀਕ ਨੇ ਅਮਰੀਕੀ ਰਾਜਦੂਤ ਦੇ ਹਵਾਲੇ ਨਾਲ ਕਿਹਾ ਕਿ ਕਤਰ ਦੀ ਸਿਫਾਰਸ਼ ‘ਤੇ, ਟਰੰਪ ਨੇ ਆਪਣੇ ਮੱਧ ਪੂਰਬ ਦੇ ਆਪਣੇ ਰਾਜਦੂਤ ਵਿਟਕੌਫ ਨਾਲ ਗੱਲ ਕੀਤੀ। ਵਿਟਕੌਫ ਨੇ ਫਿਰ ਆਪਣੇ ਈਰਾਨੀ ਹਮਰੁਤਬਾ ਨੂੰ ਫ਼ੋਨ ਕੀਤਾ।
ਐਲਾਨ ਹੋਣ ਤੱਕ ਐਕਟਿਵ ਰਹੇ ਕਤਰ ਦੇ ਅਮੀਰ
ਰਿਪੋਰਟ ਦੇ ਅਨੁਸਾਰ, ਕਤਰ ਦੇ ਅਮੀਰ ਅਤੇ ਪ੍ਰਧਾਨ ਮੰਤਰੀ ਜੰਗਬੰਦੀ ਦਾ ਐਲਾਨ ਹੋਣ ਤੱਕ ਐਕਟਿਵ ਰਹੇ। ਦੋਵੇਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਉਪ ਰਾਸ਼ਟਰਪਤੀ ਜੇਡੀ ਵੈਂਸ ਨਾਲ ਗੱਲ ਕਰਦੇ ਰਹੇ।
ਈਰਾਨ ਨੇ ਸੋਮਵਾਰ ਅੱਧੀ ਰਾਤ ਨੂੰ ਕਤਰ ‘ਤੇ ਮਿਜ਼ਾਈਲ ਹਮਲਾ ਕੀਤਾ ਸੀ। ਈਰਾਨ ਨੇ ਦੋਹਾ ਵਿੱਚ ਅਮਰੀਕੀ ਏਅਰਬੇਸ ‘ਤੇ 6 ਮਿਜ਼ਾਈਲਾਂ ਦਾਗੀਆਂ ਸਨ। ਕਤਰ ਨੂੰ ਅੱਗੇ ਵੀ ਹੋਰ ਹਮਲਿਆਂ ਤੋਂ ਡਰ ਸਤਾ ਰਿਹਾ ਸੀ।
ਵਿਟਕੌਫ ਦੇ ਫੋਨ ‘ਤੇ ਈਰਾਨ ਨੇ ਰੱਖੀ ਸ਼ਰਤ
ਐਕਸੀਓਸ ਨੇ ਵ੍ਹਾਈਟ ਹਾਊਸ ਦੇ ਸੂਤਰਾਂ ਦੇ ਹਵਾਲੇ ਨਾਲ ਕਿਹਾ ਹੈ ਕਿ ਜਿਵੇਂ ਹੀ ਵਿਟਕੌਫ ਨੇ ਈਰਾਨ ਦੇ ਵਿਦੇਸ਼ ਮੰਤਰੀ ਨੂੰ ਫੋਨ ਕੀਤਾ, ਵਿਦੇਸ਼ ਮੰਤਰੀ ਨੇ ਇੱਕ ਸ਼ਰਤ ਰੱਖੀ। ਈਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਘਚੀ ਨੇ ਕਿਹਾ ਕਿ ਜੇਕਰ ਇਜ਼ਰਾਈਲ ਹਮਲਾ ਰੋਕੇਗਾ ਤਾਂ ਹੀ ਗੱਲ ਬਣ ਸਕਦੀ ਹੈ।
ਇਹ ਵੀ ਪੜ੍ਹੋ
ਅਰਾਘਾਚੀ ਦੇ ਅਨੁਸਾਰ, ਇਜ਼ਰਾਈਲ ਨੇ ਯੁੱਧ ਸ਼ੁਰੂ ਕੀਤਾ ਸੀ। ਹਮਲਾ ਰੋਕਣਾ ਵੀ ਉਸੇ ਦਾ ਕੰਮ ਹੈ। ਜੇਕਰ ਇਜ਼ਰਾਈਲ ਹਮਲਾ ਰੋਕਦਾ ਹੈ, ਤਾਂ ਅਸੀਂ ਵੀ ਹਮਲਾ ਨਹੀਂ ਕਰਾਂਗੇ। ਫੋਨ ‘ਤੇ, ਵਿਟਕੌਫ ਨੇ ਈਰਾਨ ਨੂੰ ਭਰੋਸਾ ਦਿੱਤਾ ਕਿ ਇਜ਼ਰਾਈਲ ਅਗਲੇ 24 ਘੰਟਿਆਂ ਬਾਅਦ ਹਮਲਾ ਨਹੀਂ ਕਰੇਗਾ।
ਈਰਾਨ ਦੇ ਵਿਦੇਸ਼ ਮੰਤਰੀ ਨਾਲ ਫੋਨ ‘ਤੇ ਗੱਲ ਕਰਨ ਤੋਂ ਬਾਅਦ, ਵਿਟਕੌਫ ਨੇ ਵ੍ਹਾਈਟ ਹਾਊਸ ਨੂੰ ਆਪਣਾ ਸੁਨੇਹਾ ਭੇਜਿਆ। ਇਸ ਤੋਂ ਬਾਅਦ, ਅਮਰੀਕੀ ਰਾਸ਼ਟਰਪਤੀ ਨੇ ਜੰਗਬੰਦੀ ਦਾ ਐਲਾਨ ਕੀਤਾ।
ਵੱਡਾ ਸਵਾਲ- ਯੁੱਧ ਵਿੱਚ ਹੁਣ ਅੱਗੇ ਕੀ?
ਇਜ਼ਰਾਈਲ ਅਤੇ ਅਮਰੀਕਾ ਦੀ ਕੋਸ਼ਿਸ਼ ਈਰਾਨ ਦੇ ਯੂਰੇਨੀਅਮ ਭੰਡਾਰ ਨੂੰ ਖਤਮ ਕਰਨ ਦੀ ਸੀ। ਅਮਰੀਕਾ ਨੇ ਇਸ ਰਣਨੀਤੀ ਦੇ ਤਹਿਤ ਈਰਾਨ ਦੇ 3 ਪ੍ਰਮਾਣੂ ਸਥਾਨਾਂ ਨੂੰ ਨਿਸ਼ਾਨਾ ਬਣਾਇਆ। ਹਾਲਾਂਕਿ, ਈਰਾਨ ਦਾ ਕਹਿਣਾ ਹੈ ਕਿ ਉੱਥੇ ਕੋਈ ਯੂਰੇਨੀਅਮ ਸੀ ਹੀ ਨਹੀਂ।
ਦ ਟੈਲੀਗ੍ਰਾਫ ਯੂਕੇ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਈਰਾਨ ਨੇ ਹਮਲੇ ਤੋਂ ਪਹਿਲਾਂ 400 ਕਿਲੋਗ੍ਰਾਮ ਯੂਰੇਨੀਅਮ ਸ਼ਿਫਟ ਕਰ ਦਿੱਤਾ ਸੀ। ਇਸ ਬਾਰੇ ਕਿਸੇ ਨੂੰ ਕੋਈ ਜਾਣਕਾਰੀ ਨਹੀਂ ਹੈ।
ਇਜ਼ਰਾਈਲ ਦਾ ਕਹਿਣਾ ਹੈ ਕਿ ਈਰਾਨ ਇੱਕ ਜਾਂ ਦੋ ਸਾਲਾਂ ਤੱਕ ਪ੍ਰਮਾਣੂ ਬੰਬ ਤਿਆਰ ਨਹੀਂ ਕਰ ਸਕੇਗਾ। ਅੱਗੇ ਕੀ ਹੋਵੇਗਾ ਇਹ ਜ਼ਿਆਦਾਤਰ ਈਰਾਨ ਦੀ ਅਗਲੀ ਰਣਨੀਤੀ ‘ਤੇ ਨਿਰਭਰ ਕਰੇਗਾ।
