ਜਰਮਨੀ ਦੇ ਗੁਰਦੁਆਰੇ ‘ਚ ਹਿੰਸਕ ਝੜਪ, ਕਿਰਪਾਨਾਂ ਤੇ ਪੈਪਰ ਸਪਰੇਅ ਨਾਲ ਹਮਲਾ, ਗੋਲੀਬਾਰੀ ਦਾ ਵੀ ਇਲਜ਼ਾਮ

ਜਰਮਨੀ ਦੇ ਗੁਰਦੁਆਰੇ 'ਚ ਹਿੰਸਕ ਝੜਪ (Pic Source: Social Media)

ਜਰਮਨੀ ਦੇ ਇੱਕ ਗੁਰਦੁਆਰੇ ‘ਚ ਦੋ ਗੁੱਟਾਂ ਵਿਚਕਾਰ ਹੋਈ ਹਿੰਸਕ ਝੜਪ ‘ਚ ਘੱਟੋ-ਘੱਟ 11 ਲੋਕ ਜ਼ਖਮੀ ਹੋ ਗਏ। ਘਟਨਾ ਐਤਵਾਰ ਨੂੰ ਮੋਅਰਸ ਸ਼ਹਿਰ ‘ਚ ਗੁਰਦੁਆਰਾ ਸਿੰਘ ਸਭਾ, ਡੁਇਸਬਰਗ ਵਿਖੇ ਵਾਪਰੀ। ਜਾਣਕਾਰੀ ਮੁਤਾਬਕ, ਗੁਰਦੁਆਰੇ ਦੇ ਅੰਦਰ ਹੋਈ ਝੜਪ ‘ਚ 40 ਤੋਂ ਵੱਧ ਵਿਅਕਤੀ ਸ਼ਾਮਲ ਸਨ। ਬਹਿਸ ਤੋਂ ਸ਼ੁਰੂ ਹੋਇਆ ਮਾਮਲਾ, ਤੇਜ਼ੀ ਨਾਲ ਹਿੰਸਕ ਝੜਪ ‘ਚ ਬਦਲ ਗਿਆ। ਇਲਜ਼ਾਮ ਹੈ ਕਿ ਇਸ ਦੌਰਾਨ ਕਈ ਸਿੱਖਾਂ ਦੀ ਪੱਗਾਂ ਵੀ ਲੱਥ ਗਈਆਂ।

ਝੜਪ ਦੌਰਾਨ ਲੋਕਾਂ ਵੱਲੋਂ ਤੇਜ਼ਧਾਰ ਹਥਿਆਰਾਂ, ਕਿਰਪਾਨਾਂ ਤੇ ਪੈਪਰ ਸਪਰੇਅ ਦੀ ਵਰਤੋਂ ਕਰਨ ਦੇ ਇਲਜ਼ਾਮ ਲੱਗੇ। ਘਟਨਾ ਦੌਰਾਨ ਗੋਲੀਬਾਰੀ ਦੇ ਵੀ ਦਾਅਵਾ ਕੀਤਾ ਗਿਆ, ਪਰ ਕਿਸੇ ਦੇ ਵੀ ਗੋਲੀਬਾਰੀ ਨਾਲ ਜ਼ਖਮੀ ਹੋਣ ਦੀ ਅਧਿਕਾਰਤ ਤੌਰ ‘ਤੇ ਪੁਸ਼ਟੀ ਨਹੀਂ ਹੋਈ ਹੈ। ਝੜਪ ਤੋਂ ਬਾਅਦ, ਜਰਮਨ ਪੁਲਿਸ ਅਧਿਕਾਰੀਆਂ ਨੇ ਸਥਿਤੀ ਨੂੰ ਕਾਬੂ ਕਰਨ ਲਈ ਇਲਾਕੇ ‘ਚ ਸਪੈਸ਼ਲ ਪੁਲਿਸ ਟੀਮਾਂ ਤਾਇਨਾਤ ਕੀਤੀਆਂ।

ਜਰਮਨ ਦੇ ਇੱਕ ਮੀਡੀਆ ਅਦਾਰੇ ਦੀ ਜਾਣਕਾਰੀ ਮੁਤਾਬਕ ਹਿੰਸਾ ਗੁਰਦੁਆਰੇ ਦੇ ਪ੍ਰਬੰਧਨ ਤੇ ਵਿੱਤੀ ਨਿਯੰਤਰਣ ਨੂੰ ਲੈ ਕੇ ਚੱਲ ਰਹੇ ਵਿਵਾਦਾਂ ਤੋਂ ਪੈਦਾ ਹੋਈ ਸੀ। ਲੋਕਾਂ ਨੇ ਇਲਜ਼ਾਮ ਲਗਾਇਆ ਕਿ ਇੱਕ ਗੁੱਟ ਨੇ ਪਹਿਲਾਂ ਤੋਂ ਹੀ ਹਮਲੇ ਦੀ ਯੋਜਨਾ ਬਣਾਈ ਸੀ। ਝੜਪ ਦੌਰਾਨ ਤੇਜ਼ਧਾਰ ਹਥਿਆਰਾਂ ਦੇ ਹਮਲੇ ਤੋਂ ਪਹਿਲਾਂ ਇੱਕ ਧਿਰ ‘ਤੇ ਪੇਪਰ ਸਪਰੇਅ ਦੀ ਵਰਤੋਂ ਦੇ ਇਲਜ਼ਾਮ ਲਗਾਏ ਗਏ।

ਲੋਕਾਂ ਨੇ ਇਹ ਵੀ ਇਲਜ਼ਾਮ ਲਗਾਇਆ ਕਿ ਇੱਕ ਗੁੱਟ ਦੇ ਮੈਂਬਰਾਂ ਨੇ ਪਿਸਤੌਲਾਂ ਸਮੇਤ ਹੋਰ ਹਥਿਆਰ ਲਿਆਂਦੇ ਸਨ ਤੇ ਉਨ੍ਹਾਂ ਵੱਲੋਂ ਗੋਲੀਬਾਰੀ ਵੀ ਕੀਤੀ ਗਈ। ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਕਿਹ ਕਿ ਇਹ ਝੜਪ ਗੁਰਦੁਆਰਾ ਅੰਦਰ ਲੰਬੇ ਸਮੇਂ ਤੋਂ ਚੱਲ ਰਹੇ ਵਿਵਾਦ ਦਾ ਨਤੀਜਾ ਹੈ

ਜਰਮਨੀ ਦੇ ਪੁਲਿਸ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਕਿ ਸਥਿਤੀ ਨੂੰ ਕਾਬੂ ‘ਚ ਲਿਆਉਣ ਲਈ ਇੱਕ ਵੱਡੇ ਲੈਵਲ ‘ਤੇ ਕਾਰਵਾਈ ਸ਼ੁਰੂ ਕੀਤੀ ਗਈ। ਗੋਲੀਬਾਰੀ ਦੀਆਂ ਰਿਪੋਰਟਾਂ ਮਿਲਣ ਤੋਂ ਬਾਅਦ ਵਿਸ਼ੇਸ਼ ਟੀਮਾਂ ਤੈਨਾਤ ਕੀਤੀਆਂ ਗਈਆ। ਪੁਲਿਸ ਟੀਮ ਨੇ ਗੁਰਦੁਆਰੇ ਨੂੰ ਸੁਰੱਖਿਅਤ ਕੀਤਾ ਤੇ ਸ਼ਾਂਤੀ ਬਹਾਲ ਕੀਤੀ।