ਅੱਤਵਾਦੀ ਛਵੀ ਨੂੰ ਧੋਣ ਲਈ ਪਾਕਿਸਤਾਨ ਲੈ ਰਿਹਾ ਅਮਰੀਕਾ ਦਾ ਸਹਾਰਾ, ਫਾਈਨਲ ਹੋਈ ਡੀਲ
Lobbying Deal Pakistan: ਪਾਕਿਸਤਾਨ ਆਪਣੀ ਖਰਾਬ ਅੰਤਰਰਾਸ਼ਟਰੀ ਛਵੀ ਨੂੰ ਸੁਧਾਰਨ ਲਈ ਅਮਰੀਕਾ ਦਾ ਸਹਾਰਾ ਲੈ ਰਿਹਾ ਹੈ। ਉਸ ਨੇ ਵਾਸ਼ਿੰਗਟਨ ਵਿੱਚ ਇੱਕ ਅਮਰੀਕੀ ਲਾਬਿੰਗ ਕੰਪਨੀ ਨਾਲ 1.2 ਮਿਲੀਅਨ ਡਾਲਰ (ਲਗਭਗ 10 ਕਰੋੜ ਰੁਪਏ) ਦਾ 2 ਸਾਲਾਂ ਦਾ ਸਮਝੌਤਾ ਕੀਤਾ ਹੈ। ਇਸ ਡੀਲ ਰਾਹੀਂ ਪਾਕਿਸਤਾਨ ਨੂੰ ਦੁਨੀਆ ਦੇ ਸਾਹਮਣੇ ਇੱਕ ਭਰੋਸੇਯੋਗ ਵਪਾਰਿਕ ਸਾਥੀ ਅਤੇ ਅੱਤਵਾਦ-ਵਿਰੋਧੀ ਦੇਸ਼ ਵਜੋਂ ਪੇਸ਼ ਕਰਨਾ ਹੈ।
ਸ਼ਾਹਬਾਜ਼ ਸ਼ਰੀਫ਼
ਦੁਨੀਆ ਵਿੱਚ ਅੱਤਵਾਦ ਫੈਲਾਉਣ ਦੀ ਛਵੀ ਰੱਖਣ ਵਾਲਾ ਪਾਕਿਸਤਾਨ ਆਪਣੀ ਛਵੀ ਸੁਧਾਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਇਸ ਲਈ ਉਹ ਅਮਰੀਕਾ ਦਾ ਸਹਾਰਾ ਲੈ ਰਿਹਾ ਹੈ। ਆਪਣੀ ਅੰਤਰਰਾਸ਼ਟਰੀ ਛਵੀ ਨੂੰ ਬਿਹਤਰ ਬਣਾਉਣ ਲਈ ਪਾਕਿਸਤਾਨ ਨੇ ਵਾਸ਼ਿੰਗਟਨ ਵਿੱਚ 2 ਸਾਲਾਂ ਲਈ 1.2 ਮਿਲੀਅਨ ਡਾਲਰ ਦਾ ਲਾਬਿੰਗ ਸਮਝੌਤਾ ਕੀਤਾ ਹੈ। ਇਸ ਡੀਲ ਰਾਹੀਂ ਉਹ ਆਪਣੇ ਰਣਨੀਤਕ ਹਿਤਾਂ ਨੂੰ ਵੀ ਅੱਗੇ ਵਧਾਏਗਾ। ਇਸ ਸਮਝੌਤੇ ਦੇ ਅਨੁਸਾਰ, ਵਾਸ਼ਿੰਗਟਨ ਵਿੱਚ ਪਾਕਿਸਤਾਨੀ ਦੂਤਾਵਾਸ ਨੇ ਅਮਰੀਕਾ ਦੀ ਇੱਕ ਫਰਮ Ervin Graves Strategy Group, LLC ਨੂੰ 50,000 ਡਾਲਰ ਮਹੀਨਾਵਾਰ ਫੀਸ ਤੇ ਨਿਯੁਕਤ ਕੀਤਾ ਹੈ। ਇਹ ਸਮਝੌਤਾ 1 ਮਈ 2026 ਤੋਂ ਪ੍ਰਭਾਵੀ ਹੋਵੇਗਾ।
ਇਸ ਸਮਝੌਤੇ ਤੇ Ervin Graves Strategy LLC ਦੇ CEO ਟੌਮ ਗ੍ਰੇਵਜ਼ ਅਤੇ ਅਮਰੀਕਾ ਵਿੱਚ ਪਾਕਿਸਤਾਨ ਦੇ ਰਾਜਦੂਤ ਰਿਜ਼ਵਾਨ ਸਈਦ ਸ਼ੇਖ ਨੇ ਹਸਤਾਖਰ ਕੀਤੇ ਹਨ। ਇਸ ਸਮਝੌਤੇ ਦੇ ਤਹਿਤ, ਫਰਮ ਨੂੰ ਖਾਸ ਤੌਰ ਤੇ ਵਾਸ਼ਿੰਗਟਨ ਵਿੱਚ ਪਾਕਿਸਤਾਨ ਪ੍ਰਤੀ ਨਜ਼ਰੀਏ ਨੂੰ ਬਦਲਣ ਦਾ ਕੰਮ ਸੌਂਪਿਆ ਗਿਆ ਹੈ। ਇਸ ਨਜ਼ਰੀਏ ਨੂੰ ਬਦਲਣ ਦੀ ਕੋਸ਼ਿਸ਼ ਵਿੱਚ ਪਾਕਿਸਤਾਨ ਨੂੰ ਇੱਕ ਭਰੋਸੇਯੋਗ ਵਪਾਰਿਕ ਅਤੇ ਅੱਤਵਾਦ-ਵਿਰੋਧੀ ਸਾਥੀ ਵਜੋਂ ਪੇਸ਼ ਕੀਤਾ ਜਾਵੇਗਾ। ਨਾਲ ਹੀ ਇਸਲਾਮਾਬਾਦ ਨੂੰ ਉਸਦੀ ਲੰਬੇ ਸਮੇਂ ਤੋਂ ਚੱਲ ਰਹੀ ਅੱਤਵਾਦੀ ਛਵੀ ਨਾਲ ਜੁੜੀਆਂ ਚੁਣੌਤੀਆਂ ਤੋਂ ਦੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ।
ਲਾਬਿੰਗ ਫਰਮ ਕੀ-ਕੀ ਕਰੇਗੀ?
ਅਮਰੀਕੀ ਲਾਬਿੰਗ ਫਰਮ Ervin Graves Strategy Group ਨੂੰ ਸਿਰਫ ਪਾਕਿਸਤਾਨ ਦੀ ਛਵੀ ਸੁਧਾਰਨ ਦੀ ਜ਼ਿੰਮੇਵਾਰੀ ਹੀ ਨਹੀਂ ਦਿੱਤੀ ਗਈ, ਬਲਕਿ ਇਸਨੂੰ ਐਡਵੋਕੇਸੀ ਮੁਹਿੰਮ ਚਲਾਉਣ ਦਾ ਕੰਮ ਵੀ ਸੌਂਪਿਆ ਗਿਆ ਹੈ। ਇਹ ਫਰਮ ਵ੍ਹਾਈਟ ਹਾਊਸ ਅਤੇ ਪੈਂਟਾਗਨ ਦੇ ਅਧਿਕਾਰੀਆਂ ਨਾਲ ਉੱਚ-ਸਤ੍ਹਰੀਆਂ ਮੀਟਿੰਗਾਂ ਆਯੋਜਿਤ ਕਰੇਗੀ। ਇਸਦੇ ਨਾਲ ਹੀ ਇਹ ਅਮਰੀਕੀ ਕਾਂਗਰਸ ਦੇ ਮੈਂਬਰਾਂ ਅਤੇ ਰੱਖਿਆ, ਵਪਾਰ ਅਤੇ ਵਿਦੇਸ਼ ਨੀਤੀ ਦੀ ਦੇਖਰੇਖ ਕਰਨ ਵਾਲੀਆਂ ਮੁੱਖ ਕਾਂਗਰਸੀ ਕਮੇਟੀਆਂ ਦੇ ਮੈਂਬਰਾਂ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕਰੇਗੀ। ਇਸ ਰਣਨੀਤੀ ਦਾ ਇੱਕ ਮੁੱਖ ਹਿੱਸਾ ਵਾਸ਼ਿੰਗਟਨ ਵਿੱਚ ਪਾਕਿਸਤਾਨੀ ਦੂਤਾਵਾਸ ਦੇ ਅੰਦਰ ਅਮਰੀਕੀ ਸੰਸਦ ਮੈਂਬਰਾਂ, ਮੁੱਖ ਮੰਤਰਾਲਿਆਂ ਦੇ ਕਰਮਚਾਰੀਆਂ ਅਤੇ ਪਾਕਿਸਤਾਨੀ ਅਧਿਕਾਰੀਆਂ ਵਿਚਕਾਰ ਰਿਸੈਪਸ਼ਨ ਸਮਾਰੋਹ, ਗੋਲਮੇਜ਼ ਚਰਚਾਵਾਂ ਅਤੇ ਬੰਦ ਦਰਵਾਜ਼ਿਆਂ ਪਿੱਛੇ ਨੀਤੀ ਸੰਬੰਧੀ ਮੀਟਿੰਗਾਂ ਕਰਵਾਉਣਾ ਵੀ ਹੈ।
ਇਹ ਫਰਮ ਅਮਰੀਕੀ ਸੰਸਦ ਮੈਂਬਰਾਂ ਅਤੇ ਕਾਂਗਰਸੀ ਕਰਮਚਾਰੀਆਂ ਦੇ ਪਾਕਿਸਤਾਨ ਦੌਰਿਆਂ ਤੋਂ ਪਹਿਲਾਂ ਉਨ੍ਹਾਂ ਨਾਲ ਤਾਲਮੇਲ ਬਣਾਏਗੀ ਅਤੇ ਉਨ੍ਹਾਂ ਨੂੰ ਜਾਣਕਾਰੀ ਵੀ ਦੇਵੇਗੀ। ਇਸ ਕੋਸ਼ਿਸ਼ ਦਾ ਉਦੇਸ਼ ਇਹ ਯਕੀਨੀ ਬਣਾਉਣਾ ਹੈ ਕਿ ਖੇਤਰ ਦਾ ਦੌਰਾ ਕਰਨ ਤੋਂ ਪਹਿਲਾਂ ਹੀ ਉੱਥੇ ਦੀ ਜ਼ਮੀਨੀ ਹਾਲਤ ਬਾਰੇ ਉਨ੍ਹਾਂ ਦੀ ਸੋਚ ਨੂੰ ਸਹੀ ਦਿਸ਼ਾ ਦਿੱਤੀ ਜਾ ਸਕੇ।