ਹੜ੍ਹ ‘ਚ ਸਭ ਕੁਝ ਵਹਿ ਗਿਆ, ਫਿਰ ਵੀ ਕਿਵੇਂ ਬਚਿਆ ਨੇਪਾਲ ਦਾ ਹਰਾ ਘਰ?
Nepal flood: ਨੇਪਾਲ ਵਿੱਚ ਭਿਆਨਕ ਫਲੈਸ਼ ਫਲੱਡ ਦੌਰਾਨ ਆਸ-ਪਾਸ ਦੀਆਂ ਇਮਾਰਤਾਂ ਢਹਿ ਗਈਆਂ, ਪਰ ਇੱਕ ਹਰਾ ਘਰ ਬਚ ਗਿਆ। ਮਜ਼ਬੂਤ RCC ਫਰੇਮ, ਸਟੀਲ ਸਰਿਆ ਅਤੇ ਉੱਚੀ ਜਗ੍ਹਾ ਤੇ ਬਣਿਆ ਹੋਣ ਕਾਰਨ ਇਹ ਘਰ ਤੇਜ਼ ਪਾਣੀ ਅਤੇ ਮਲਬੇ ਦੀ ਲਪੇਟ ਤੋਂ ਬਚ ਗਿਆ।
ਹੜ੍ਹ 'ਚ ਕਿਵੇਂ ਬਚਿਆ ਨੇਪਾਲ ਦਾ ਹਰਾ ਘਰ?
ਨੇਪਾਲ ਵਿੱਚ ਆਈ ਭਿਆਨਕ ਹੜ੍ਹ ਦਾ ਵੀਡੀਓ ਸੋਸ਼ਲ ਮੀਡੀਆ ਤੇ ਵਾਇਰਲ ਹੋ ਰਿਹਾ ਹੈ। ਵੀਡੀਓ ਵਿੱਚ ਤੇਜ਼ ਰਫ਼ਤਾਰ ਪਾਣੀ ਦੇ ਨਾਲ ਵੱਡੇ-ਵੱਡੇ ਪੱਥਰ, ਚਿੱਕੜ ਅਤੇ ਉਖੜੇ ਹੋਏ ਦਰੱਖਤ ਵਹਿੰਦੇ ਹੋਏ ਦਿਖਾਈ ਦੇ ਰਹੇ ਹਨ। ਪਾਣੀ ਅਤੇ ਮਲਬੇ ਦੀ ਇਸ ਧਾਰ ਨੇ ਰਸਤੇ ਵਿੱਚ ਆਉਣ ਵਾਲੀਆਂ ਕਈ ਛੋਟੀਆਂ-ਵੱਡੀਆਂ ਇਮਾਰਤਾਂ ਨੂੰ ਕੁਝ ਹੀ ਮਿੰਟਾਂ ਵਿੱਚ ਢਾਹ ਦਿੱਤਾ। ਪਰ ਇਸ ਤਬਾਹੀ ਦੇ ਵਿਚਕਾਰ ਹਰੇ ਰੰਗ ਦਾ ਘਰ ਮਜ਼ਬੂਤੀ ਨਾਲ ਖੜ੍ਹਾ ਰਿਹਾ। ਘਰ ਵਿੱਚ ਮੌਜੂਦ ਪਰਿਵਾਰ ਵੀ ਬਾਲਕਨੀ ਵਿੱਚ ਇੱਕ-ਦੂਜੇ ਨਾਲ ਸਟ ਕੇ ਬੈਠਾ ਰਿਹਾ ਅਤੇ ਇਸ ਉਮੀਦ ਵਿੱਚ ਸੀ ਕਿ ਘਰ ਹੜ੍ਹ ਦਾ ਦਬਾਅ ਝੱਲ ਲਵੇਗਾ। ਆਖ਼ਰਕਾਰ ਘਰ ਅਤੇ ਪਰਿਵਾਰ ਦੋਵੇਂ ਸੁਰੱਖਿਅਤ ਬਚ ਗਏ।
ਇਸ ਘਟਨਾ ਦਾ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਸਵਾਲ ਉੱਠਣ ਲੱਗਾ ਕਿ ਜਦੋਂ ਆਲੇ-ਦੁਆਲੇ ਦੀਆਂ ਇਮਾਰਤਾਂ ਢਹਿ ਗਈਆਂ ਤਾਂ ਇਹ ਘਰ ਕਿਵੇਂ ਬਚ ਗਿਆ? ਸਟਰਕਚਰਲ ਇੰਜੀਨੀਅਰਿੰਗ ਨਾਲ ਜੁੜੇ ਮਾਹਰਾਂ ਨੇ ਦੱਸਿਆ ਕਿ ਇਸ ਦੇ ਪਿੱਛੇ ਸਿਰਫ਼ ਕਿਸਮਤ ਨਹੀਂ ਸੀ, ਸਗੋਂ ਘਰ ਦੀ ਮਜ਼ਬੂਤ ਬਣਤਰ ਅਤੇ ਇਸ ਦੀ ਜਗ੍ਹਾ ਨੇ ਵੀ ਅਹਿਮ ਭੂਮਿਕਾ ਨਿਭਾਈ।
ਘਰ ਦੀ ਬਣਤਰ ਨੇ ਬਚਾਈ ਜਾਨ
ਨੇਪਾਲ ਦੀਆਂ ਹਿਮਾਲਿਆਈ ਘਾਟੀਆਂ ਵਿੱਚ ਜ਼ਿਆਦਾਤਰ ਘਰ ਪੱਥਰਾਂ ਦੀ ਚਿਣਾਈ ਨਾਲ ਬਣਾਏ ਜਾਂਦੇ ਹਨ। ਇਨ੍ਹਾਂ ਵਿੱਚ ਆਮ ਤੌਰ ‘ਤੇ ਮਜ਼ਬੂਤ ਆਰਸੀਸੀ ਫਰੇਮ ਨਹੀਂ ਹੁੰਦਾ। ਅਜਿਹੇ ਘਰ ਉੱਪਰੋਂ ਪੈਣ ਵਾਲੇ ਭਾਰ ਯਾਨੀ ਵਰਟੀਕਲ ਲੋਡ ਨੂੰ ਤਾਂ ਸੰਭਾਲ ਸਕਦੇ ਹਨ, ਪਰ ਤੇਜ਼ ਪਾਣੀ ਅਤੇ ਮਲਬੇ ਨਾਲ ਆਉਣ ਵਾਲੇ ਪਾਸੇ ਦੇ ਦਬਾਅ ਵਿੱਚ ਕਮਜ਼ੋਰ ਪੈ ਸਕਦੇ ਹਨ।
ਵਾਇਰਲ ਵੀਡੀਓ ਵਿੱਚ ਦਿਖਾਈ ਦੇ ਰਿਹਾ ਘਰ ਵੱਖਰੇ ਤਰੀਕੇ ਨਾਲ ਬਣਾਇਆ ਗਿਆ ਸੀ। ਇਸ ਵਿੱਚ ਰੀਇਨਫੋਰਸਡ ਕੰਕਰੀਟ ਫਰੇਮ ਸੀ। ਸਟੀਲ ਦੀਆਂ ਸਰਿਆਂ ਨੂੰ ਕਾਲਮ, ਬੀਮ ਅਤੇ ਨੀਂਹ ਨਾਲ ਲਗਾਤਾਰ ਜੋੜਿਆ ਗਿਆ ਸੀ। ਇਸ ਨਾਲ ਪੂਰਾ ਘਰ ਇੱਕ ਮਜ਼ਬੂਤ ਢਾਂਚੇ ਵਾਂਗ ਕੰਮ ਕਰ ਰਿਹਾ ਸੀ। ਜਦੋਂ ਪਾਣੀ, ਚਿੱਕੜ ਅਤੇ ਮਲਬੇ ਦੀ ਤੇਜ਼ ਧਾਰਾ ਘਰ ਨਾਲ ਟਕਰਾਈ ਤਾਂ ਇਸ ਮਜ਼ਬੂਤ ਫਰੇਮ ਨੇ ਪਾਸੇ ਤੋਂ ਆਉਣ ਵਾਲੇ ਦਬਾਅ ਨੂੰ ਸੰਭਾਲਿਆ ਅਤੇ ਉਸ ਤਾਕਤ ਨੂੰ ਨੀਂਹ ਰਾਹੀਂ ਜ਼ਮੀਨ ਤੱਕ ਪਹੁੰਚਾਇਆ। ਇਹੀ ਕਾਰਨ ਰਿਹਾ ਕਿ ਘਰ ਆਸਾਨੀ ਨਾਲ ਨਹੀਂ ਟੁੱਟਿਆ।
ਘਰ ਸਹੀ ਜਗ੍ਹਾ ‘ਤੇ ਵੀ ਸੀ
ਘਰ ਦੇ ਬਚਣ ਦੀ ਦੂਜੀ ਵੱਡੀ ਵਜ੍ਹਾ ਇਸ ਦੀ ਲੋਕੇਸ਼ਨ ਸੀ। ਇਹ ਮਲਬੇ ਅਤੇ ਪਾਣੀ ਦੀ ਧਾਰਾ ਦੇ ਬਿਲਕੁਲ ਵਿਚਕਾਰ ਨਹੀਂ ਸੀ। ਮਲਬੇ ਦੀ ਧਾਰਾ ਵਿੱਚ ਸਭ ਤੋਂ ਵੱਡੇ ਅਤੇ ਭਾਰੀ ਪੱਥਰ ਆਮ ਤੌਰ ‘ਤੇ ਸਭ ਤੋਂ ਡੂੰਘੇ ਮੁੱਖ ਰਸਤੇ ਰਾਹੀਂ ਲੰਘਦੇ ਹਨ। ਇਹ ਘਰ ਉਸ ਰਸਤੇ ਤੋਂ ਥੋੜ੍ਹਾ ਹਟ ਕੇ ਅਤੇ ਕੁਝ ਉੱਚੀ ਜ਼ਮੀਨ ‘ਤੇ ਬਣਿਆ ਹੋਇਆ ਸੀ। ਪਾਣੀ ਦੀ ਦਿਸ਼ਾ ਘਰ ਦੇ ਬਿਲਕੁਲ ਨਾਲ ਤੋਂ ਹੀ ਲੰਘ ਰਹੀ ਸੀ। ਘਰ ਤੋਂ ਪਹਿਲਾਂ ਕੁਝ ਦਰੱਖਤ ਵੀ ਲਗਾਏ ਹੋਏ ਸਨ। ਨਾਲ ਹੀ, ਲਾਗੇ ਵਿੱਚ ਦੋ ਘਰ ਵੀ ਜੁੜੇ ਹੋਏ ਸਨ, ਜਿਸ ਕਾਰਨ ਇਸ ਨੂੰ ਜ਼ਿਆਦਾ ਨੁਕਸਾਨ ਨਹੀਂ ਹੋਇਆ।
ਇਹ ਵੀ ਪੜ੍ਹੋ
ਘਰ ਦਾ ਛੋਟਾ ਅਤੇ ਕੌਂਪੈਕਟ ਆਕਾਰ ਵੀ ਮਦਦਗਾਰ ਰਿਹਾ। ਪਾਣੀ ਅਤੇ ਮਲਬਾ ਘਰ ਨਾਲ ਸਿੱਧਾ ਟਕਰਾਉਣ ਦੀ ਬਜਾਏ ਦੋਵੇਂ ਪਾਸਿਆਂ ਤੋਂ ਲੰਘ ਗਿਆ। ਬਾਅਦ ਵਿੱਚ ਜਮਿਆ ਹੋਇਆ ਚਿੱਕੜ ਇੱਕ ਕੁਦਰਤੀ ਰੈਂਪ ਵਾਂਗ ਬਣ ਗਿਆ, ਜਿਸ ਕਾਰਨ ਆਉਣ ਵਾਲੀਆਂ ਤੇਜ਼ ਧਾਰਾਵਾਂ ਵੀ ਘਰ ਤੋਂ ਦੂਰ ਮੁੜ ਗਈਆਂ।
ਨੇਪਾਲ ਦੀ ਇਸ ਫਲੈਸ਼ ਫਲੱਡ ਤ੍ਰਾਸਦੀ ਵਿੱਚ 700 ਤੋਂ ਵੱਧ ਲੋਕਾਂ ਦੀ ਮੌਤ ਹੋਈ ਹੈ ਅਤੇ 3,000 ਤੋਂ ਜ਼ਿਆਦਾ ਲੋਕ ਲਾਪਤਾ ਦੱਸੇ ਗਏ ਹਨ। ਅਜਿਹੇ ਵਿੱਚ ਇਹ ਘਰ ਸਿਰਫ਼ ਇੱਕ ਵਾਇਰਲ ਵੀਡੀਓ ਨਹੀਂ, ਸਗੋਂ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਮਜ਼ਬੂਤ ਨਿਰਮਾਣ ਅਤੇ ਸਹੀ ਜਗ੍ਹਾ ਦੀ ਚੋਣ ਦੀ ਮਹੱਤਤਾ ਦੀ ਇੱਕ ਮਿਸਾਲ ਵੀ ਬਣ ਗਿਆ ਹੈ।