ਜਲੰਧਰ ‘ਚ MP ਚੰਨੀ ਨੇ ਬਣਵਾਇਆ ਨਵਾਂ ਘਰ, 2027 ਚੋਣਾਂ ਨੂੰ ਕਰ ਰਹੇ ਟਾਰਗੇਟ

ਜਲੰਧਰ ਤੋਂ ਕਾਂਗਰਸ ਦੇ ਲੋਕ ਸਭਾ ਸਾਂਸਦ ਤੇ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਜਲੰਧਰ ਦੇ ਖਜੂਰਲਾ ਪਿੰਡ ‘ਚ ਆਪਣਾ ਘਰ ਬਣਾ ਲਿਆ ਹੈ। ਚੰਨੀ ਨੇ ਦੱਸਿਆ ਕਿ ਬੁੱਧਵਾਰ ਯਾਨੀ ਕਿ ਅੱਜ ਪਾਠ ਦੇ ਭੋਗ ਪਾਏ ਜਾਣਗੇ, ਜਿਸ ਤੋਂ ਬਾਅਦ ਉਹ ਇੱਥੇ ਰਹਿਣਾ ਸ਼ੁਰੂ ਕਰਨਗੇ। ਉਨ੍ਹਾਂ ਨੇ ਕਿਹਾ ਕਿ ਚੋਣਾਂ ਵੇਲੇ ਉਨ੍ਹਾਂ ਨੇ ਜਲੰਧਰ ਦੇ ਲੋਕਾਂ ਨਾਲ ਵਾਅਦਾ ਕੀਤਾ ਸੀ ਕਿ ਉਹ ਇੱਥੇ ਹੀ ਰਹਿਣਗੇ।

ਜਲੰਧਰ ਬਣਿਆਂ ਲੀਡਰਾਂ ਦਾ ਕੈਂਪ

ਦੱਸ ਦੇਈਏ ਕਿ ਪੰਜਾਬ ‘ਚ ਅਗਲੇ ਸਾਲ ਵਿਧਾਨ ਸਭਾ ਚੋਣਾਂ ਹੋਣੀਆਂ ਹਨ। ਇਸ ਤੋਂ ਪਹਿਲਾਂ ਜਲੰਧਰ ‘ਚ ਆਗੂਆਂ ਦਾ ਆਉਣਾ-ਜਾਣਾ ਵੱਧ ਗਿਆ ਹੈ। ਇਸ ਤੋਂ ਪਹਿਲਾਂ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਵੀ ਜਲੰਧਰ ‘ਚ ਘਰ ਲਿਆ ਸੀ। ਭਾਜਪਾ ਦੇ ਵੀ ਕਈ ਵੱਡੇ ਆਗੂਆਂ ਦੇ ਇੱਥੇ ਘਰ ਹਨ। ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਜਲੰਧਰ ਆਗੂਆਂ ਦਾ ਕੈਂਪ ਬਣ ਚੁੱਕਿਆ ਹੈ।

“ਜਲੰਧਰ ਦੇ ਲੋਕਾਂ ਨਾਲ ਵਾਅਦਾ ਪੂਰਾ ਕੀਤਾ”

ਦੂਜੇ ਪਾਸੇ, ਚੰਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਲੋਕਾਂ ਨਾਲ ਆਪਣਾ ਇੱਕ ਵਾਅਦਾ ਪੂਰਾ ਕਰ ਦਿੱਤਾ ਹੈ। ਚੋਣਾਂ ਦੌਰਾਨ ਉਨ੍ਹਾਂ ਨੇ ਕਿਹਾ ਸੀ ਕਿ ਉਹ ਸਿਰਫ਼ ਇੱਕ ਵੋਟ ਲੈਣ ਹੀ ਨਹੀਂ ਆਏ, ਸਗੋਂ ਉਹ ਜਲੰਧਰ ਦੇ ਪੱਕੇ ਵਸਨੀਕ ਬਣ ਕੇ ਇੱਥੋਂ ਦੇ ਲੋਕਾਂ ਦੀ ਸੇਵਾ ਕਰਨਗੇ। ਇਸ ਵਾਅਦੇ ਨੂੰ ਨਿਭਾਉਂਦੇ ਹੋਏ ਉਨ੍ਹਾਂ ਨੇ ਜਲੰਧਰ ‘ਚ ਘਰ ਲਿਆ ਹੈ ਤੇ ਹੁਣ ਉਹ ਇੱਥੇ ਪੱਕੇ ਤੌਰ ‘ਤੇ ਰਹਿਣਗੇ।

ਚਰਨਜੀਤ ਚੰਨੀ ਦਾ ਕਹਿਣਾ ਹੈ ਕਿ ਇਹ ਬਹੁਤ ਸਾਧਾਰਨ ਤੇ ਸੁਵਿਧਾਜਨਕ ਘਰ ਹੈ। ਇਸ ‘ਚ ਹੇਠਲੀ ਮੰਜ਼ਿਲ ‘ਤੇ ਇੱਕ ਵੱਡਾ ਆਫਿਸ ਬਣਾਇਆ ਗਿਆ ਹੈ ਤਾ ਜੋ ਆਉਣ-ਜਾਣ ਵਾਲੇ ਲੋਕਾਂ ‘ਚ ਮਿਲਣ ਲਈ ਦਿੱਕਤ ਨਾ ਹੋਵੇ। ਉੱਤੇ ਦੀ ਮੰਜਿਲ ‘ਤੇ ਬੈੱਡਰੂਮ ਹੈ। ਉਨ੍ਹਾਂ ਨੇ ਕਿਹਾ ਕਿ ਪਹਿਲਾਂ ਉਹ ਕਿਰਾਏ ਦੇ ਫਲੈਟ ‘ਤੇ ਰਹਿ ਰਹੇ ਸਨ। ਇਸ ਕਰਕੇ ਲੋਕਾਂ ਦੇ ਆਉਣਾ-ਜਾਣ ਥੋੜ੍ਹਾ ਮੁਸ਼ਕਿਲ ਸੀ। ਹੁਣ ਰੋਡ ਕਰੀਬ ਇਸ ਘਰ ‘ਚ ਕੋਈ ਵੀ ਪਹੁੰਚ ਸਕਦਾ ਹੈ।