ਚੰਡੀਗੜ੍ਹ ‘ਚ ਨੌਜਵਾਨ ਨੂੰ ਵ੍ਹੀਲ ਕਲੈਂਪ ਚੋਰੀ ਕਰਨਾ ਪਿਆ ਭਾਰੀ, 7 ਸਾਲ ਬਾਅਦ ਅਦਾਲਤ ਨੇ ਸੁਣਾਇਆ ਫ਼ੈਸਲਾ

ਚੰਡੀਗੜ੍ਹ ਵਿੱਚ ਗ਼ਲਤ ਪਾਰਕਿੰਗ ਕਰਨ ਤੋਂ ਬਾਅਦ ਟ੍ਰੈਫਿਕ ਪੁਲਿਸ ਵੱਲੋਂ ਕਾਰ ਦੇ ਟਾਇਰ ‘ਤੇ ਲਗਾਏ ਗਏ ਵ੍ਹੀਲ ਕਲੈਂਪ (Wheel Clamp) ਨੂੰ ਚੋਰੀ ਕਰਕੇ ਲਿਜਾਣਾ ਇੱਕ ਨੌਜਵਾਨ ਨੂੰ ਬਹੁਤ ਮਹਿੰਗਾ ਪੈ ਗਿਆ। ਲਗਭਗ ਸੱਤ ਸਾਲਾਂ ਤੱਕ ਚੱਲੇ ਇਸ ਹਾਈ-ਡਰਾਮਾ ਕੇਸ ਵਿੱਚ ਜ਼ਿਲ੍ਹਾ ਅਦਾਲਤ ਨੇ ਦਸ਼ਮੇਸ਼ ਨਗਰ, ਜ਼ੀਰਕਪੁਰ ਦੇ ਰਹਿਣ ਵਾਲੇ ਵਿਸ਼ਾਲ ਕੁਮਾਰ ਨੂੰ ਦੋਸ਼ੀ ਕਰਾਰ ਦਿੰਦਿਆਂ 4 ਹਜ਼ਾਰ ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ। ਇਸ ਪੂਰੇ ਮਾਮਲੇ ਦੌਰਾਨ ਮੁਲਜ਼ਮ ਨੂੰ ਲਗਭਗ ਇੱਕ ਮਹੀਨਾ ਜੇਲ੍ਹ ਦੀਆਂ ਸੀਖਾਂ ਪਿੱਛੇ ਵੀ ਬਿਤਾਉਣਾ ਪਿਆ। ਇੱਕ ਸਮੇਂ ਅਦਾਲਤ ਵੱਲੋਂ ਉਸ ਨੂੰ ਭਗੌੜਾ ਵੀ ਘੋਸ਼ਿਤ ਕਰ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਨੂੰ 50 ਹਜ਼ਾਰ ਰੁਪਏ ਦੇ ਜ਼ਮਾਨਤੀ ਬਾਂਡ ‘ਤੇ ਜ਼ਮਾਨਤ ਮਿਲੀ ਸੀ।

ਸੈਕਟਰ-8 ‘ਚ ਹੋਈ ਸੀ ਘਟਨਾ

ਇਹ ਪੂਰਾ ਮਾਮਲਾ 22 ਫਰਵਰੀ 2019 ਦਾ ਹੈ। ਵਿਸ਼ਾਲ ਕੁਮਾਰ ਨੇ ਸੈਕਟਰ-8 ਸਥਿਤ ‘ਸਿੰਧੀ ਸਵੀਟਸ’ ਦੇ ਸਾਹਮਣੇ ਆਪਣੀ ਕਾਰ ਗ਼ਲਤ ਥਾਂ ‘ਤੇ ਪਾਰਕ ਕੀਤੀ ਸੀ। ਨਿਯਮਾਂ ਦੀ ਉਲੰਘਣਾ ਦੇਖ ਕੇ ਟ੍ਰੈਫਿਕ ਪੁਲਿਸ ਨੇ ਉਸ ਦੀ ਕਾਰ ਦੇ ਇੱਕ ਟਾਇਰ ‘ਤੇ ਵ੍ਹੀਲ ਕਲੈਂਪ ਲਗਾ ਦਿੱਤਾ ਅਤੇ ਗ਼ਲਤ ਪਾਰਕਿੰਗ ਦਾ ਚਲਾਨ ਵੀ ਕੱਟ ਦਿੱਤਾ।

ਚਲਾਨ ਕੱਟਣ ਤੋਂ ਬਾਅਦ ਜਦੋਂ ਪੁਲਿਸ ਕਰਮਚਾਰੀ ਮੌਕੇ ਤੋਂ ਚਲੇ ਗਏ, ਤਾਂ ਵਿਸ਼ਾਲ ਨੇ ਸ਼ਾਤਰਾਨਾ ਦਿਮਾਗ ਲਗਾਉਂਦਿਆਂ ਕਾਰ ‘ਚੋਂ ਸਟੈਪਨੀ (ਫ਼ਾਲਤੂ ਟਾਇਰ) ਕੱਢੀ ਅਤੇ ਜਿਸ ਟਾਇਰ ‘ਚ ਕਲੈਂਪ ਲੱਗਿਆ ਹੋਇਆ ਸੀ, ਉਸ ਨੂੰ ਪੂਰਾ ਬਦਲ ਦਿੱਤਾ। ਇਸ ਤੋਂ ਬਾਅਦ ਉਹ ਕਲੈਂਪ ਵਾਲਾ ਟਾਇਰ ਗੱਡੀ ‘ਚ ਰੱਖ ਕੇ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਜਦੋਂ ਪੁਲਿਸ ਨੂੰ ਵ੍ਹੀਲ ਕਲੈਂਪ ਗਾਇਬ ਹੋਣ ਦੀ ਜਾਣਕਾਰੀ ਮਿਲੀ, ਤਾਂ ਸੈਕਟਰ-3 ਥਾਣਾ ਪੁਲਿਸ ਨੇ ਉਸ ਦੇ ਖ਼ਿਲਾਫ਼ ਚੋਰੀ ਦੀਆਂ ਗੰਭੀਰ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਲਿਆ।

ਪੁਲਿਸ ਨੇ ਅਦਾਲਤ ‘ਚ ਪੇਸ਼ ਕੀਤਾ ਚਲਾਨ

ਪੁਲਿਸ ਨੇ ਮਾਮਲੇ ਦੀ ਜਾਂਚ ਪੂਰੀ ਕਰਨ ਤੋਂ ਬਾਅਦ 3 ਅਪ੍ਰੈਲ 2019 ਨੂੰ ਅਦਾਲਤ ਵਿੱਚ ਦੋਸ਼-ਪੱਤਰ (ਚਲਾਨ) ਪੇਸ਼ ਕਰ ਦਿੱਤਾ। ਕੇਸ ਦੀ ਸੁਣਵਾਈ ਦੀ ਸ਼ੁਰੂਆਤ ਦੌਰਾਨ ਵਿਸ਼ਾਲ ਅਦਾਲਤ ਵਿੱਚ ਪੇਸ਼ ਹੁੰਦਾ ਰਿਹਾ, ਪਰ ਬਾਅਦ ਵਿੱਚ ਕੋਰੋਨਾ ਮਹਾਮਾਰੀ ਦੌਰਾਨ ਲੱਗੇ ਲੌਕਡਾਊਨ ਕਾਰਨ ਉਸ ਦੀ ਪੇਸ਼ੀ ਨਹੀਂ ਹੋ ਸਕੀ। ਲੌਕਡਾਊਨ ਖ਼ਤਮ ਹੋਣ ਤੋਂ ਬਾਅਦ ਵੀ ਉਹ ਅਦਾਲਤ ‘ਚ ਹਾਜ਼ਰ ਨਹੀਂ ਹੋਇਆ।

ਅਦਾਲਤ ਨੇ ਘੋਸ਼ਿਤ ਕੀਤਾ ਭਗੌੜਾ

ਲਗਾਤਾਰ ਅਦਾਲਤੀ ਕਾਰਵਾਈ ‘ਚੋਂ ਗ਼ੈਰ-ਹਾਜ਼ਰ ਰਹਿਣ ਕਾਰਨ ਉਸ ਦੇ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਸ਼ੁਰੂ ਕੀਤੀ ਗਈ। 22 ਜੁਲਾਈ 2021 ਨੂੰ ਉਸ ਦੇ ਖ਼ਿਲਾਫ਼ ਗ਼ੈਰ-ਜ਼ਮਾਨਤੀ ਵਾਰੰਟ ਜਾਰੀ ਕੀਤੇ ਗਏ। ਇਸ ਤੋਂ ਬਾਅਦ, 5 ਨਵੰਬਰ 2022 ਨੂੰ ਅਦਾਲਤ ਨੇ ਉਸ ਨੂੰ ਰਸਮੀ ਤੌਰ ‘ਤੇ ਭਗੌੜਾ ਘੋਸ਼ਿਤ ਕਰ ਦਿੱਤਾ।

ਇੱਕ ਮਹੀਨਾ ਕੱਟਣੀ ਪਈ ਜੇਲ੍ਹ ਦੀ ਹਵਾ

ਭਗੌੜਾ ਘੋਸ਼ਿਤ ਹੋਣ ਤੋਂ ਬਾਅਦ ਪੁਲਿਸ ਨੇ ਉਸ ਦੀ ਭਾਲ ਤੇਜ਼ ਕੀਤੀ ਅਤੇ ਲਗਭਗ ਤਿੰਨ ਸਾਲ ਪਹਿਲਾਂ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ। 1 ਮਈ 2023 ਨੂੰ ਗ੍ਰਿਫ਼ਤਾਰੀ ਤੋਂ ਬਾਅਦ ਉਸ ਨੂੰ ਲਗਭਗ ਇੱਕ ਮਹੀਨਾ ਜੇਲ੍ਹ ਵਿੱਚ ਰਹਿਣਾ ਪਿਆ। ਇਸ ਤੋਂ ਬਾਅਦ 2 ਜੂਨ 2023 ਨੂੰ ਅਦਾਲਤ ਨੇ ਉਸ ਨੂੰ 50 ਹਜ਼ਾਰ ਰੁਪਏ ਦੇ ਜ਼ਮਾਨਤੀ ਬਾਂਡ ‘ਤੇ ਜ਼ਮਾਨਤ ਦਿੱਤੀ।

ਸੱਤ ਸਾਲਾਂ ਬਾਅਦ ਆਇਆ ਅੰਤਿਮ ਫ਼ੈਸਲਾ

ਮਾਮਲੇ ਦੀ ਅੰਤਿਮ ਸੁਣਵਾਈ ਦੌਰਾਨ ਦੋਸ਼ੀ ਨੇ ਅਦਾਲਤ ਸਾਹਮਣੇ ਆਪਣਾ ਗੁਨਾਹ ਕਬੂਲ ਕਰ ਲਿਆ। ਅਦਾਲਤ ਨੇ ਉਸ ਨੂੰ ਚੋਰੀ ਦਾ ਦੋਸ਼ੀ ਠਹਿਰਾਉਂਦਿਆਂ 4 ਹਜ਼ਾਰ ਰੁਪਏ ਜੁਰਮਾਨਾ ਭਰਨ ਦੀ ਸਜ਼ਾ ਸੁਣਾਈ। ਇਸ ਤਰ੍ਹਾਂ ਗ਼ਲਤ ਪਾਰਕਿੰਗ ‘ਤੇ ਲੱਗੇ ਇੱਕ ਵ੍ਹੀਲ ਕਲੈਂਪ ਨੂੰ ਬਚਾਉਣ ਅਤੇ ਚੋਰੀ ਕਰਨ ਦੀ ਕੋਸ਼ਿਸ਼ ਨੌਜਵਾਨ ਨੂੰ ਸੱਤ ਸਾਲਾਂ ਤੱਕ ਅਦਾਲਤਾਂ ਦੇ ਚੱਕਰ ਲਗਵਾਉਣ ਦੇ ਨਾਲ-ਨਾਲ ਜੇਲ੍ਹ ਦੀਆਂ ਸੀਖਾਂ ਪਿੱਛੇ ਵੀ ਲੈ ਗਈ।