ਬਚਪਨ ‘ਚ ਸਿਰ ਤੋਂ ਉੱਠਿਆ ਮਾਪਿਆਂ ਦਾ ਸਾਇਆ, ਹੁਣ ਰਚਿਆ ਇਤਿਹਾਸ… ਕੌਣ ਹੈ ਅਮਰੀਕੀ ਕਾਂਗਰਸ ਪਹੁੰਚੀ ਆਇਸ਼ਾ ਵਹਾਬ
ਪ੍ਰੋਗਰੈਸਿਵ ਡੈਮੋਕ੍ਰੇਟਿਕ ਆਗੂ ਆਇਸ਼ਾ ਵਹਾਬ ਨੇ ਅਮਰੀਕੀ ਸਿਆਸਤ ਵਿੱਚ ਇੱਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। 39 ਸਾਲਾ ਆਇਸ਼ਾ ਵਹਾਬ ਨੇ ਕੈਲੀਫ਼ੋਰਨੀਆ ਵਿੱਚ ਹੋਈ ਵਿਸ਼ੇਸ਼ ਉਪ-ਚੋਣ ਜਿੱਤ ਕੇ ਅਮਰੀਕੀ ਕਾਂਗਰਸ ਦੀ ਪਹਿਲੀ ਅਫ਼ਗਾਨ-ਅਮਰੀਕੀ ਮੈਂਬਰ ਬਣਨ ਦਾ ਮਾਣ ਹਾਸਲ ਕੀਤਾ ਹੈ।
ਪ੍ਰੋਗਰੈਸਿਵ ਡੈਮੋਕ੍ਰੇਟਿਕ ਆਗੂ ਆਇਸ਼ਾ ਵਹਾਬ ਨੇ ਅਮਰੀਕੀ ਸਿਆਸਤ ਵਿੱਚ ਇੱਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। 39 ਸਾਲਾ ਆਇਸ਼ਾ ਵਹਾਬ ਨੇ ਕੈਲੀਫ਼ੋਰਨੀਆ ਵਿੱਚ ਹੋਈ ਵਿਸ਼ੇਸ਼ ਉਪ-ਚੋਣ ਜਿੱਤ ਕੇ ਅਮਰੀਕੀ ਕਾਂਗਰਸ ਦੀ ਪਹਿਲੀ ਅਫ਼ਗਾਨ-ਅਮਰੀਕੀ ਮੈਂਬਰ ਬਣਨ ਦਾ ਮਾਣ ਹਾਸਲ ਕੀਤਾ ਹੈ। 21 ਅਗਸਤ ਨੂੰ ਸਾਹਮਣੇ ਆਏ ਚੋਣ ਨਤੀਜਿਆਂ ਮੁਤਾਬਕ ਉਨ੍ਹਾਂ ਨੇ ਆਪਣੀ ਹੀ ਪਾਰਟੀ ਦੀ ਵਿਰੋਧੀ ਉਮੀਦਵਾਰ ਮੇਲਿਸਾ ਹਰਨਾਂਡੇਜ਼ ਨੂੰ 53.1% ਵੋਟਾਂ ਹਾਸਲ ਕਰਕੇ ਕਰਾਰੀ ਮਾਤ ਦਿੱਤੀ।
ਇਹ ਸੀਟ ਸਾਬਕਾ ਕਾਂਗਰਸਮੈਨ ਐਰਿਕ ਸਵੈਲਵੈੱਲ ਵੱਲੋਂ ਜਿਨਸੀ ਸ਼ੋਸ਼ਣ ਦੇ ਦੋਸ਼ਾਂ ਦੇ ਚੱਲਦਿਆਂ ਅਪ੍ਰੈਲ ਮਹੀਨੇ ਵਿੱਚ ਅਸਤੀਫ਼ਾ ਦੇਣ ਕਾਰਨ ਖ਼ਾਲੀ ਹੋਈ ਸੀ। ਆਇਸ਼ਾ ਵਹਾਬ ਜਨਵਰੀ ਤੱਕ ਇਸ ਵੱਕਾਰੀ ਅਹੁਦੇ ‘ਤੇ ਸੇਵਾਵਾਂ ਨਿਭਾਉਣਗੇ। ਇੱਥੋਂ ਤੱਕ ਪਹੁੰਚਣ ਲਈ ਆਇਸ਼ਾ ਨੂੰ ਜ਼ਿੰਦਗੀ ਵਿੱਚ ਲੰਮਾ ਅਤੇ ਚੁਣੌਤੀਆਂ ਭਰਿਆ ਸੰਘਰਸ਼ ਕਰਨਾ ਪਿਆ ਹੈ।
ਬਚਪਨ ‘ਚ ਸਿਰ ਤੋਂ ਉੱਠਿਆ ਮਾਪਿਆਂ ਦਾ ਸਾਇਆ
ਨਿਊਯਾਰਕ ਦੇ ਕੁਈਨਜ਼ ਵਿੱਚ ਜਨਮੀ ਆਇਸ਼ਾ ਦਾ ਬਚਪਨ ਬਹੁਤ ਹੀ ਤੰਗੀਆਂ ਅਤੇ ਦੁੱਖਾਂ ਵਿੱਚ ਬੀਤਿਆ। ਉਹ ਬਚਪਨ ਵਿੱਚ ਹੀ ਅਨਾਥ ਹੋ ਗਈ ਸੀ; ਪਹਿਲਾਂ ਉਨ੍ਹਾਂ ਦੇ ਪਿਤਾ ਦਾ ਕਤਲ ਹੋ ਗਿਆ ਅਤੇ ਕੁਝ ਸਮੇਂ ਬਾਅਦ ਹੀ ਮਾਤਾ ਦਾ ਵੀ ਦਿਹਾਂਤ ਹੋ ਗਿਆ। ਇਸ ਦੁਖਦਾਈ ਘਟਨਾ ਤੋਂ ਬਾਅਦ ਕੈਲੀਫ਼ੋਰਨੀਆ ਦੇ ਬੇਅ ਏਰੀਆ ਦੇ ਇੱਕ ਦੰਪਤੀ (ਜੋੜੇ) ਨੇ ਉਨ੍ਹਾਂ ਨੂੰ ਗੋਦ ਲਿਆ। ਮੁਸ਼ਕਲ ਹਾਲਾਤਾਂ ਦੇ ਬਾਵਜੂਦ ਆਇਸ਼ਾ ਨੇ ਹਿੰਮਤ ਨਹੀਂ ਹਾਰੀ ਅਤੇ ਪੋਲੀਟੀਕਲ ਸਾਇੰਸ ਵਿੱਚ ਡਿਗਰੀ ਹਾਸਲ ਕਰਨ ਉਪਰੰਤ ਐੱਮ.ਬੀ.ਏ. (MBA) ਅਤੇ ਸੋਸ਼ਲ ਵਰਕ ਵਿੱਚ ਡਾਕਟਰੇਟ (ਪੀ.ਐੱਚ.ਡੀ.) ਦੀ ਪੜ੍ਹਾਈ ਮੁਕੰਮਲ ਕੀਤੀ।
2011 ਦਾ ਆਰਥਿਕ ਸੰਕਟ ਅਤੇ ਸਿਆਸਤ ਵੱਲ ਕਦਮ
ਸਾਲ 2011 ਵਿੱਚ ਆਇਸ਼ਾ ਦੇ ਪਰਿਵਾਰ ‘ਤੇ ਇੱਕ ਵਾਰ ਫਿਰ ਭਾਰੀ ਮੁਸੀਬਤਾਂ ਦਾ ਪਹਾੜ ਟੁੱਟ ਪਿਆ। ਆਰਥਿਕ ਮੰਦੀ ਕਾਰਨ ਪਰਿਵਾਰਕ ਘਰ ਜ਼ਬਤ ਹੋ ਗਿਆ, ਮਾਪਿਆਂ ਦਾ ਕਾਰੋਬਾਰ ਠੱਪ ਹੋ ਗਿਆ, ਗੋਦ ਲੈਣ ਵਾਲੇ ਪਿਤਾ ਦੀ ਸਿਹਤ ਬਹੁਤ ਜ਼ਿਆਦਾ ਵਿਗੜ ਗਈ ਅਤੇ ਇਸੇ ਦੌਰਾਨ ਆਇਸ਼ਾ ਦੀ ਨੌਕਰੀ ਵੀ ਚਲੀ ਗਈ। ਇਨ੍ਹਾਂ ਹਾਲਾਤਾਂ ਵਿੱਚ ਉਨ੍ਹਾਂ ਨੂੰ ਆਪਣਾ ਇਲਾਕਾ ਛੱਡ ਕੇ ਹਾਵਰਡ ਜਾਣਾ ਪਿਆ।
ਹਾਵਰਡ ਪਹੁੰਚ ਕੇ ਉਨ੍ਹਾਂ ਨੇ ਸਥਾਨਕ ਕੌਂਸਲ ਮੀਟਿੰਗਾਂ ਵਿੱਚ ਸਰਗਰਮੀ ਨਾਲ ਹਿੱਸਾ ਲੈਣਾ ਸ਼ੁਰੂ ਕੀਤਾ ਅਤੇ ਕਿਫ਼ਾਇਤੀ ਰਿਹਾਇਸ਼ (ਅਫ਼ੋਰਡੇਬਲ ਹਾਊਸਿੰਗ) ਦੇ ਹੱਕ ਵਿੱਚ ਆਵਾਜ਼ ਬੁਲੰਦ ਕਰਨੀ ਸ਼ੁਰੂ ਕੀਤੀ। ਆਪਣੀ ਸਖ਼ਤ ਮਿਹਨਤ ਸਦਕਾ ਆਇਸ਼ਾ ਨੇ 2018 ਵਿੱਚ ਹੇਵਰਡ ਸਿਟੀ ਕੌਂਸਲ ਦੀ ਚੋਣ ਜਿੱਤੀ। ਇਸ ਤੋਂ ਬਾਅਦ ਸਾਲ 2022 ਵਿੱਚ ਉਹ ਕੈਲੀਫ਼ੋਰਨੀਆ ਸਟੇਟ ਲੈਜਿਸਲੇਚਰ ਲਈ ਚੁਣੀ ਗਈ। ਇਹ ਮੁਕਾਮ ਹਾਸਲ ਕਰਨ ਵਾਲੀ ਉਹ ਕੈਲੀਫ਼ੋਰਨੀਆ ਦੀ ਪਹਿਲੀ ਅਫ਼ਗਾਨ-ਅਮਰੀਕੀ ਅਤੇ ਪਹਿਲੀ ਮੁਸਲਿਮ ਮਹਿਲਾ ਬਣੀ।
ਇਹ ਵੀ ਪੜ੍ਹੋ
ਪ੍ਰਗਤੀਸ਼ੀਲ ਏਜੰਡਾ ਬਣਿਆ ਵੱਡੀ ਜਿੱਤ ਦਾ ਆਧਾਰ
ਆਇਸ਼ਾ ਵਹਾਬ ਦੀ ਇਸ ਇਤਿਹਾਸਕ ਜਿੱਤ ਦਾ ਮੁੱਖ ਕਾਰਨ ਉਨ੍ਹਾਂ ਦਾ ਖੁੱਲ੍ਹ ਕੇ ਪ੍ਰਗਤੀਸ਼ੀਲ ਅਤੇ ਖੱਬੇ-ਪੱਖੀ ਏਜੰਡੇ ‘ਤੇ ਚੋਣ ਪ੍ਰਚਾਰ ਕਰਨਾ ਰਿਹਾ। ਉਨ੍ਹਾਂ ਨੇ ਸਾਰਿਆਂ ਲਈ ਸਿਹਤ ਬੀਮਾ (ਮੈਡੀਕੇਅਰ ਫ਼ਾਰ ਆਲ), ਅਰਬਪਤੀਆਂ ‘ਤੇ ਵਧੇਰੇ ਟੈਕਸ, ਵਿਦਿਆਰਥੀਆਂ ਦੇ ਕਰਜ਼ੇ (ਸਟੂਡੈਂਟ ਲੋਨ) ਮੁਆਫ਼ ਕਰਨ, ਸਮਾਜਿਕ ਭਲਾਈ ਪ੍ਰੋਗਰਾਮਾਂ ਨੂੰ ਮਜ਼ਬੂਤ ਕਰਨ ਅਤੇ ਕਾਰਪੋਰੇਟ ਸ਼ਕਤੀਆਂ ‘ਤੇ ਲਗਾਮ ਕੱਸਣ ਵਾਲੀਆਂ ਲੋਕ-ਪੱਖੀ ਨੀਤੀਆਂ ਦੀ ਜ਼ੋਰਦਾਰ ਵਕਾਲਤ ਕੀਤੀ।
ਵ੍ਹਾਈਟ ਹਾਊਸ ਰਾਊਂਡਟੇਬਲ ਤੱਕ ਪਹੁੰਚ
ਆਇਸ਼ਾ ਲੰਮੇ ਸਮੇਂ ਤੋਂ ਬਜ਼ੁਰਗਾਂ, ਔਰਤਾਂ ਅਤੇ ਬੱਚਿਆਂ ਦੇ ਹੱਕਾਂ ਲਈ ਇੱਕ ਸਰਗਰਮ ਵਕੀਲ ਅਤੇ ਪ੍ਰਬੰਧਕ ਵਜੋਂ ਕੰਮ ਕਰਦੀ ਆ ਰਹੀ ਹੈ। ਉਨ੍ਹਾਂ ਨੇ ਕਿਫ਼ਾਇਤੀ ਰਿਹਾਇਸ਼, ਨਾਗਰਿਕ ਭਾਗੀਦਾਰੀ, ਸਿੱਖਿਆ ਅਤੇ ਆਰਥਿਕ ਅਸਮਾਨਤਾ ਵਰਗੇ ਗੰਭੀਰ ਵਿਸ਼ਿਆਂ ‘ਤੇ ਵੱਡੇ ਪੱਧਰ ‘ਤੇ ਕੰਮ ਕੀਤਾ ਹੈ। ਇਸ ਤੋਂ ਪਹਿਲਾਂ ਉਹ ਅਲਾਮੇਡਾ ਕਾਉਂਟੀ ਹਿਊਮਨ ਰਿਲੇਸ਼ਨਜ਼ ਕਮਿਸ਼ਨ ਦੀ ਮੁਖੀ ਰਹਿ ਚੁੱਕੀ ਹੈ ਅਤੇ ਅਫ਼ਗਾਨ ਕੋਏਲੀਸ਼ਨ, ਅਬੋਡ ਸਰਵਿਸਿਜ਼ ਤੇ ਟਰਾਈ-ਸਿਟੀ ਵਾਲੰਟੀਅਰਜ਼ ਵਰਗੀਆਂ ਗ਼ੈਰ-ਸਰਕਾਰੀ ਸੰਸਥਾਵਾਂ ਵਿੱਚ ਬੋਰਡ ਮੈਂਬਰ ਵਜੋਂ ਸੇਵਾਵਾਂ ਨਿਭਾ ਚੁੱਕੀ ਹੈ। ਉਹ ਅਲਾਮੇਡਾ ਕਾਉਂਟੀ ਪਬਲਿਕ ਹੈਲਥ ਕਮਿਸ਼ਨਰ ਅਤੇ ਬੇਅ ਏਰੀਆ ਵਿਮੈਨਜ਼ ਮਾਰਚ ਵਿੱਚ ਮੁੱਖ ਬੁਲਾਰਾ ਵੀ ਰਹੀ। ਉਨ੍ਹਾਂ ਦੇ ਇਨ੍ਹਾਂ ਬੇਮਿਸਾਲ ਯੋਗਦਾਨਾਂ ਸਦਕਾ ਹੀ ਉਨ੍ਹਾਂ ਨੂੰ ਅਫ਼ਗਾਨ-ਅਮਰੀਕੀ ਆਗੂਆਂ ਦੇ ‘ਵ੍ਹਾਈਟ ਹਾਊਸ ਰਾਊਂਡਟੇਬਲ’ ਵਿੱਚ ਸ਼ਾਮਲ ਹੋਣ ਲਈ ਵਿਸ਼ੇਸ਼ ਤੌਰ ‘ਤੇ ਚੁਣਿਆ ਗਿਆ ਸੀ।
