ਤਕਨੀਕੀ ਖ਼ਰਾਬੀ ਕਾਰਨ ਪਾਕਿਸਤਾਨੀ ਏਅਰਸਪੇਸ ‘ਚ ਪਹੁੰਚਿਆਂ ਏਅਰ ਇੰਡੀਆ ਦਾ ਜਹਾਜ਼, ਚੇਤਾਵਨੀ ਤੋਂ ਬਾਅਦ ਲਿਆ ਯੂ-ਟਰਨ

ਦਿੱਲੀ ਤੋਂ ਅੰਮ੍ਰਿਤਸਰ ਜਾ ਰਹੀ ਇੱਕ ਏਅਰ ਇੰਡੀਆ ਦੀ ਫਲਾਈਟ ਤਕਨੀਕੀ ਸਮੱਸਿਆ ਦੇ ਚੱਲਦੇ ਆਪਣੇ ਨਿਰਧਾਰਤ ਰੂਟ ਤੋਂ ਭਟਕ ਗਈ। ਫਲਾਈਟ ਦੇ ਰੂਟ ਭਟਕਣ ਤੋਂ ਬਾਅਦ ਪਾਕਿਸਤਾਨ ਏਅਰਸਪੇਸ ‘ਚ ਦਾਖਲ ਹੋ ਗਈ, ਹਾਲਾਂਕਿ ਪਾਕਿਸਤਾਨ ਏਅਰ ਟ੍ਰੈਫ਼ਿਕ ਅਥਾਰਿਟੀ ਦੀ ਚੇਤਾਨੀ ਤੋਂ ਬਾਅਦ ਫਲਾਈਟ ਭਾਰਤੀ ਹਵਾਈ ਖੇਤਰ ‘ਚ ਵਾਪਸ ਪਰਤ ਆਈ।

ਜਾਣਕਾਰੀ ਮੁਤਾਬਕ, ਫਲਾਈਟ AI-479 (ਪਲੇਨ A321) ਸੋਮਵਾਰ ਰਾਤ ਕਰੀਬ 9:18 ਵਜੇ ਦਿੱਲੀ ਤੋਂ ਰਵਾਨਾ ਹੋਈ। ਯਾਤਰਾ ਦੌਰਾਨ, ਇੱਕ ਤਕਨੀਕੀ ਖ਼ਰਾਬੀ ਕਾਰਨ ਫਲਾਈਟ ਆਪਣੇ ਨਿਰਧਾਰਤ ਰੂਟ ਤੋਂ ਭਟਕ ਗਈ।

ਚੇਤਾਵਨੀ ਤੋਂ ਬਾਅਦ ਯੂ-ਟਰਨ

ਫਲਾਈਟ ਪਹਿਲਾਂ ਥੋੜ੍ਹੇ ਸਮੇਂ ਲਈ ਪਾਕਿਸਤਾਨੀ ਹਵਾਈ ਖੇਤਰ ‘ਚ ਦਾਖਲ ਹੋ ਗਈ ਸੀ। ਚੇਤਾਵਨੀ ਤੋਂ ਬਾਅਦ, ਉਡਾਣ ਨੂੰ ਓਪਰੋਟ ਕਰਨ ਵਾਲੀ ਅਧਿਕਾਰੀਆਂ ਨੇ ਕਾਰਵਾਈ ਕੀਤੀ ਤੇ ਫਲਾਈਟ ਨੂੰ ਭਾਰਤੀ ਹਵਾਈ ਖੇਤਰ ਵੱਲ ਵਾਪਸ ਮੋੜ ਦਿੱਤਾ। ਫਲਾਈਟ ਸਫਲਤਾਪੂਰਵਕ ਆਪਣੇ ਨਿਰਧਾਰਤ ਰੂਟ ‘ਤੇ ਵਾਪਸ ਪਰਤ ਆਈ, ਪਰ ਨਿਰਧਾਰਤ ਉਤਰਨ ਦਾ ਸਮਾਂ ਨਿਕਲ ਜਾਣ ਦੇ ਕਾਰਨ ਫਲਾਈਟ ਨੂੰ ਅੰਮ੍ਰਿਤਸਰ ‘ਚ ਲੈਂਡ ਕਰਨ ਦੀ ਅਨੁਮਤੀ ਨਹੀਂ ਮਿਲੀ। ਇਸ ਤੋਂ ਬਾਅਦ ਫਲਾਈਟ ਨੂੰ ਵਾਪਸ ਦਿੱਲੀ ਭੇਜ ਦਿੱਤਾ ਗਿਆ, ਜਿੱਥੇ ਇਹ ਸੁਰੱਖਿਅਤ ਢੰਗ ਨਾਲ ਲੈਂਡ ਕੀਤੀ।

ਚਾਰ ਘੰਟੇ ਦੀ ਦੇਰੀ ਤੋਂ ਬਾਅਦ ਉਡਾਣ ਮੰਜ਼ਿਲ ‘ਤੇ ਪਹੁੰਚੀ

ਉਡਾਣ ਆਖਰਕਾਰ ਲਗਭਗ 2:20 ਵਜੇ ਅੰਮ੍ਰਿਤਸਰ ਹਵਾਈ ਅੱਡੇ ‘ਤੇ ਸੁਰੱਖਿਅਤ ਢੰਗ ਨਾਲ ਉਤਰੀ, ਜੋ ਕਿ ਨਿਰਧਾਰਤ ਸਮੇਂ ਤੋਂ ਲਗਭਗ ਚਾਰ ਘੰਟੇ ਪਿੱਛੇ ਸੀ। ਫਲਾਈਟ ਨਿਰਧਾਰਤ ਸਮੇਂ ਅਨੁਸਾਰ ਲਗਭਗ 10:30 ਵਜੇ ਤੱਕ ਪਹੁੰਚਣ ਦੀ ਉਮੀਦ ਸੀ, ਹਾਲਾਂਕਿ ਯਾਤਰੀਆਂ ਨੂੰ ਮੰਜ਼ਿਲ ‘ਤੇ ਪਹੁੰਚਣ ਲਈ ਕਾਫ਼ੀ ਦੇਰੀ ਦਾ ਸਾਹਮਣਾ ਕਰਨਾ ਪਿਆ। ਅਧਿਕਾਰੀਆਂ ਨੇ ਤਕਨੀਕੀ ਖਰਾਬੀ ਦੇ ਸਹੀ ਕਾਰਨ ਦਾ ਪਤਾ ਲਗਾਉਣ ਤੇ ਮੁਲਾਂਕਣ ਕਰਨ ਲਈ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।