ਜਪਾਨ ਕਾਰ ਹਾਦਸੇ ‘ਚ ਬਚਿਆ ਸਿੰਗਾਪੁਰ ਰਹਿਣ ਵਾਲਾ ਭਾਰਤੀ, ਪਤਨੀ ਅਤੇ ਮਸੂਮ ਬੱਚੀ ਦੀ ਮੌਤ

ਸਿੰਗਾਪੁਰ : 44 ਵਰ੍ਹਿਆਂ ਦੇ ਸਿੰਗਾਪੁਰ ਰਹਿੰਦੇ ਭਾਰਤੀ ਕਾਰਤਿਕ ਬਾਲਾਸੁਬਰਮਨੀਅਨ ਆਪਣੇ ਪਰਿਵਾਰ ਨਾਲ ਛੁੱਟੀਆਂ ‘ਚ ਘੁੰਮਣ-ਫਿਰਣ ਜਪਾਨ ਗਏ ਸੀ, ਜਿੱਥੇ ਖਤਰਨਾਕ ਕਾਰ ਹਾਦਸੇ ਦੌਰਾਨ ਉਨ੍ਹਾਂ ਦੀ 41 ਸਾਲ ਦੀ ਪਤਨੀ ਅਤੇ ਉਹਨਾਂ ਦੀ ਸਿਰਫ ਚਾਰ ਮਹੀਨਿਆਂ ਦੀ ਇੱਕ ਮਸੂਮ ਬੱਚੀ ਦੀ ਮੌਤ ਹੋ ਗਈ। ਬੀਤੀ 2 ਜਨਵਰੀ ਨੂੰ ਹੋਏ ਹਾਦਸੇ ਵਿੱਚ ਕਾਰਤਿਕ ਦੀ ਓਦੋਂ ਜਾਨ ਬਚ ਗਈ ਜਦੋਂ ਉਹ ਕਿਰਾਏ ਦੀ ਇੱਕ ਕਾਰ ਵਿੱਚ ਆਪਣੀ ਪਤਨੀ, ਤਿੰਨ ਸਾਲ ਦੀ ਵੱਡੀ ਬੇਟੀ ਅਤੇ ਸਿਰਫ਼ 4 ਮਹੀਨਿਆਂ ਦੀ ਮਸੂਮ ਬੱਚੀ ਦੇ ਨਾਲ ਜਾ ਰਹੇ ਸਨ ਕਿ ਰਸਤੇ ਵਿੱਚ ਉਹਨਾਂ ਦੀ ਜਪਾਨ ਦੇ ਹੋਕਾਇਡੋ ਇਲਾਕੇ ‘ਚ ਇੱਕ ਟ੍ਰੱਕ ਨਾਲ ਟੱਕਰ ਹੋ ਗਈ। ਆਪਣੀ ਵੱਡੀ ਬੇਟੀ ਦੇ ਨਾਲ ਬੀਤੇ ਬੁੱਧਵਾਰ ਨੂੰ ਹੀ ਕਾਰਤਿਕ ਸਿੰਘਾਪੁਰ ਵਾਪਸ ਪਰਤੇ।

ਟ੍ਰੱਕ ਨਾਲ ਹੋਈ ਟੱਕਰ

ਦੱਸਿਆ ਗਿਆ ਕਿ ਕਾਰਤਿਕ ਆਪਣੀ ਕਾਰ ਲੈ ਕੇ ਸਾਇਡ ਰੋਡ ਤੋਂ ਮੇਨ ਰੋਡ ‘ਤੇ ਆ ਰਹੇ ਸਨ ਕਿ ਉਨ੍ਹਾਂ ਦੇ ਅੱਗੇ-ਅੱਗੇ ਸਿੱਧੇ ਜਾ ਰਹੇ ਇੱਕ ਟ੍ਰੱਕ ਨਾਲ ਉਨ੍ਹਾਂ ਦੀ ਟੱਕਰ ਹੋ ਗਈ। ਜਿਸ ਥਾਂ ਤੇ ਇਹ ਹਾਦਸਾ ਵਾਪਰਿਆ, ਉਥੇ ਟ੍ਰੈਫਿਕ ਲਾਈਟਾਂ ਨਹੀਂ ਸੀ, ਉਥੇ ਵਾਹਨ ਚਾਲਕਾਂ ਨੂੰ ਸੁਚੇਤ ਕਰਨ ਵਾਸਤੇ ‘ਸਟਾਪ ਸਾਇਨ’ ਜ਼ਰੂਰ ਲੱਗਿਆ ਹੋਇਆ ਹੈ। ਕਾਰਤਿਕ ਦਾ ਕਹਿਣਾ ਹੈ ਕਿ ਹਾਦਸੇ ਦੇ ਸਮੇਂ ਉਨ੍ਹਾਂ ਦੀ ਪਤਨੀ ਦੇ ਮੂੰਹ ਚੋਂ ਨਿੱਕਲੀਆਂ ਚੀਕਾਂ ਹਾਲੇ ਵੀ ਉਨ੍ਹਾਂ ਦੇ ਕੰਨਾਂ ਵਿੱਚ ਗੂੰਜ ਰਹੀਆਂ ਹਨ।

2014 ਚ ਹੋਇਆ ਸੀ ਕਾਰਤਿਕ ਦਾ ਵਿਆਹ

ਕਾਰਤਿਕ ਸਾਲ 2006 ਵਿੱਚ ਆਪਣੇ ਇੱਕ ਦੋਸਤ ਦੇ ਰਾਹੀਂ ਉਥੇ ਸਿੰਗਾਪੁਰ ਦੀ ਰਹਿਣ ਵਾਲੀ ਇੱਕ ਕੁੜੀ ਲਿਨ ਨੂੰ ਮਿਲੇ ਅਤੇ ਸਾਲ 2014 ਵਿੱਚ ਦੋਨਾਂ ਨੇ ਵਿਆਹ ਕਰ ਲਿਆ। ਹਾਦਸੇ ਦੀ ਖਬਰ ਮਗਰੋਂ ਉਨ੍ਹਾਂ ਦੀ ਭੈਣ ਹੁਣ ਭਾਰਤ ਤੋਂ ਆਪਣੇ ਭਰਾ ਅਤੇ ਭਤੀਜੀ ਦੀ ਦੇਖਭਾਲ ਕਰਨ ਵਾਸਤੇ ਸਿੰਘਾਪੁਰ ਪੁੱਜ ਗਈ ਹੈ। ਕਾਰਤਿਕ ਨੇ ਦੱਸਿਆ, ਉਥੇ ਸੜਕ ਦੀ ਹਾਲਤ ਐਨੀ ਖਰਾਬ ਸੀ ਕਿ ਮੈਂਨੂੰ ਆਲੇ ਦੁਆਲੇ ਬਰਫ ਕਰਕੇ ਅੱਗੇ ਸੜਕ ਦਾ ਪਤਾ ਹੀ ਨਹੀਂ ਚਲ ਸਕਿਆ।

ਛੋਟੀ ਬੇਟੀ ਦੀ ਹੋਈ ਮੌਤ

ਆਖਰੀ ਮੌਕੇ ਤੇ ਲੱਗੇ ‘ਸਟਾਪ ਸਾਈਨ’ ਵੇਖ ਕੇ ਬਰੇਕਾਂ ਲਾਈਆਂ ਪਰ ਓਦੋਂ ਤਕ ਬਹੁਤ ਦੇਰ ਹੋ ਚੁੱਕੀ ਸੀ। ਮੇਰੇ ਕੰਨਾਂ ਵਿੱਚ ਉਸ ਵੇਲੇ ਮੇਰੀ ਪਤਨੀ ਦੇ ਮੂੰਹ ਚੋਂ ਨਿੱਕਲੀਆਂ ਚੀਕਾਂ ਹੀ ਅਵਾਜ਼ ਪਈ ਸੀ ਜੋ ਹਾਲੇ ਤਕ ਵੀ ਮੇਰੇ ਕੰਨਾਂ ਵਿੱਚ ਗੂੰਜ ਰਹੀ ਹੈ। ਕੁਝ ਸਮੇਂ ਬਾਅਦ ਮੇਰੀ ਅੱਖਾਂ ਦੇ ਅੱਗੇ ਹਨੇਰਾ ਛਾ ਗਿਆ। ਕਾਰ ਹਾਦਸੇ ਵਿੱਚ ਉਨ੍ਹਾਂ ਦੀ ਮਸੂਮ ਬੇਟੀ ਨੂੰ ਭਾਵੇਂ ਕੋਈ ਸ਼ਰੀਰਿਕ ਚੋਟ ਨਹੀਂ ਆਈ ਸੀ ਪਰ ਹਾਦਸੇ ਮਗਰੋਂ ਉਸਨੂੰ ਬੜਾ ਵੱਡਾ ਝਟਕਾ ਲੱਗਿਆ ਹੋਣਾ, ਜਿਸ ਨੂੰ ਉਹ ਬਰਦਾਸ਼ਤ ਨਹੀਂ ਕਰ ਸਕੀ ਅਤੇ ਉਹਦੀ ਮੌਤ ਹੋ ਗਈ। ਉਹਨਾਂ ਦੀ ਵੱਡੀ ਬੇਟੀ ਦੇ ਸਿਰ ਵਿੱਚ ਟਾਂਕੇ ਆਏ ਹਨ ਅਤੇ ਉਨ੍ਹਾਂ ਦੇ ਆਪ ਦੇ ਵੀ ਕੂਲ੍ਹੇ ਦੀ ਹੱਡੀ ਟੁੱਟੀ ਹੈ।