ਸਾਵਣ ‘ਚ ਨਾਨਵੈਜ ਖਾਣ ਦੀ ਕਿਉਂ ਹੁੰਦੀ ਹੈ ਮਨਾਹੀ? ਸਮਝੋ ਪੂਰਾ ਵਿਗਿਆਨ, ਮਾਹਿਰਾਂ ਨੇ ਦੱਸਿਆ
Sawan Non Veg Science: ਸਾਵਣ ਦੇ ਮਹੀਨੇ ਦਾ ਹਿੰਦੂ ਧਰਮ ਵਿੱਚ ਵਿਸ਼ੇਸ਼ ਧਾਰਮਿਕ ਮਹੱਤਵ ਹੈ। ਇਸ ਲਈ ਕੁਝ ਲੋਕ ਇਸ ਦੌਰਾਨ ਮਾਸਾਹਾਰ ਅਤੇ ਸ਼ਰਾਬ ਤੋਂ ਪਰਹੇਜ਼ ਕਰਨ ਲੱਗਦੇ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਇਸ ਮਹੀਨੇ ਵਿੱਚ ਨਾਨਵੈਜ ਨਾ ਖਾਣ ਦੇ ਪਿੱਛੇ ਵਿਗਿਆਨਕ ਕਾਰਨ ਵੀ ਹੋ ਸਕਦੇ ਹਨ। ਆਓ ਤੁਹਾਨੂੰ ਦੱਸਦੇ ਹਾਂ...
ਸਾਵਣ 'ਚ ਕਿਉਂ ਨਹੀਂ ਖਾਣਾ ਚਾਹੀਦਾ ਨਾਨਵੈਜ?
ਸਾਵਣ ਦੇ ਮਹੀਨੇ ਨੂੰ ਭਗਵਾਨ ਸ਼ਿਵ ਦੀ ਉਪਾਸਨਾ ਲਈ ਬਹੁਤ ਹੀ ਪਵਿੱਤਰ ਮੰਨਿਆ ਜਾਂਦਾ ਹੈ। ਇਸ ਮਹੀਨੇ ਵਿੱਚ ਜ਼ਿਆਦਾਤਰ ਲੋਕ ਨਾਨਵੈਜ ਵਰਗੀਆਂ ਚੀਜ਼ਾਂ ਖਾਣ ਤੋਂ ਪਰਹੇਜ਼ ਕਰਦੇ ਹਨ। ਇਸ ਤੋਂ ਇਲਾਵਾ ਕੁਝ ਲੋਕ ਲਸਣ-ਪਿਆਜ਼ ਵਰਗੀਆਂ ਤਾਮਸਿਕ ਚੀਜ਼ਾਂ ਦਾ ਸੇਵਨ ਵੀ ਨਹੀਂ ਕਰਦੇ। ਸਾਵਣ ਜਾਂ ਮਾਨਸੂਨ ਦੇ ਦੌਰਾਨ ਨਾਨਵੈਜ ਨਾ ਖਾਣਾ ਵਿਗਿਆਨਕ ਤੌਰ ‘ਤੇ ਵੀ ਸਹੀ ਮੰਨਿਆ ਜਾਂਦਾ ਹੈ। ਪਰ ਬਹੁਤ ਘੱਟ ਲੋਕ ਇਸ ਦੇ ਪਿੱਛੇ ਛੁਪੇ ਵਿਗਿਆਨਕ ਕਾਰਨਾਂ ਨੂੰ ਜਾਣਦੇ ਹਨ। ਲੋਕ ਅਕਸਰ ਇਹ ਮੰਨ ਲੈਂਦੇ ਹਨ ਕਿ ਨਾਨਵੈਜ ਛੱਡਣਾ ਸਿਰਫ਼ ਧਾਰਮਿਕ ਮਾਨਤਾ ਹੈ, ਜਦਕਿ ਇਹ ਪੂਰਾ ਸੱਚ ਨਹੀਂ ਹੈ। ਮਾਹਰਾਂ ਦੇ ਅਨੁਸਾਰ ਨਾਨਵੈਜ ਖਾਣ ਦਾ ਸਬੰਧ ਮੌਸਮ, ਪਾਚਨ ਤੰਤਰ ਅਤੇ ਇਨਫੈਕਸ਼ਨ ਦੇ ਖਤਰੇ ਨਾਲ ਡੂੰਘੇ ਤੌਰ ‘ਤੇ ਜੁੜਿਆ ਹੋਇਆ ਹੈ।
ਆਯੁਰਵੇਦ ਦੇ ਅਨੁਸਾਰ, ਬਰਸਾਤ ਦੇ ਮੌਸਮ ਵਿੱਚ ਡਾਈਜੈਸਟਿਵ ਫਾਇਰ ਯਾਨੀ ਜਠਰਾਗਨੀ ਆਮ ਨਾਲੋਂ ਕਮਜ਼ੋਰ ਹੋ ਜਾਂਦੀ ਹੈ। ਇਸ ਕਾਰਨ ਇਨ੍ਹਾਂ ਦਿਨਾਂ ਵਿੱਚ ਸਾਡੀ ਪਾਚਨ ਸਮਰੱਥਾ ਘੱਟ ਹੋ ਜਾਂਦੀ ਹੈ। ਮਾਸਾਹਾਰੀ ਚੀਜ਼ਾਂ ਨੂੰ ਪਚਾਉਣ ਵਿੱਚ ਜ਼ਿਆਦਾ ਸਮਾਂ ਲੱਗਦਾ ਹੈ ਅਤੇ ਕਮਜ਼ੋਰ ਪਾਚਨ ਤੰਤਰ ਕਾਰਨ ਸਮੱਸਿਆਵਾਂ ਵੱਧ ਸਕਦੀਆਂ ਹਨ। ਸਾਵਣ ਵਿੱਚ ਨਾਨਵੈਜ ਨਾ ਖਾਣ ਦੇ ਹੋਰ ਕਿਹੜੇ-ਕਿਹੜੇ ਵੱਡੇ ਕਾਰਨ ਹਨ, ਆਓ ਤੁਹਾਨੂੰ ਮਾਹਰਾਂ ਦੇ ਜ਼ਰੀਏ ਦੱਸਦੇ ਹਾਂ
ਜਾਣ ਲਓ ਵਿਗਿਆਨਕ ਕਾਰਨ?
ਡਾਇਟੀਸ਼ੀਅਨ ਪਾਇਲ ਦੱਤ ਕਹਿੰਦੀ ਹਨ ਕਿ ਬਹੁਤ ਸਾਰੇ ਲੋਕਾਂ ਨੂੰ ਲੱਗਦਾ ਹੈ ਕਿ ਸਾਵਣ ਵਿੱਚ ਨਾਨਵੈਜ ਨਾ ਖਾਣਾ ਸਿਰਫ਼ ਧਰਮ ਨਾਲ ਜੁੜੀ ਗੱਲ ਹੈ। ਪਰ ਜੇਕਰ ਇਸ ਨੂੰ ਸਿਹਤ ਦੇ ਨਜ਼ਰੀਏ ਤੋਂ ਦੇਖਿਆ ਜਾਵੇ ਤਾਂ ਇਸ ਦੇ ਪਿੱਛੇ ਕੁਝ ਵਿਗਿਆਨਕ ਕਾਰਨ ਵੀ ਹਨ। ਸਾਵਣ ਦਾ ਮਹੀਨਾ ਬਰਸਾਤ ਦਾ ਮੌਸਮ ਹੁੰਦਾ ਹੈ। ਇਸ ਸਮੇਂ ਹਵਾ ਵਿੱਚ ਨਮੀ ਬਹੁਤ ਜ਼ਿਆਦਾ ਹੁੰਦੀ ਹੈ। ਅਜਿਹੇ ਵਿੱਚ ਜੇਕਰ ਮਾਸ, ਚਿਕਨ ਜਾਂ ਮੱਛੀ ਨੂੰ ਸਹੀ ਤਰੀਕੇ ਨਾਲ ਸੰਭਾਲ ਕੇ ਨਾ ਰੱਖਿਆ ਜਾਵੇ ਜਾਂ ਠੀਕ ਤਰ੍ਹਾਂ ਨਾ ਪਕਾਇਆ ਜਾਵੇ, ਤਾਂ ਇਹ ਜਲਦੀ ਖਰਾਬ ਹੋ ਸਕਦੇ ਹਨ। ਇਸ ਕਾਰਨ ਫੂਡ ਪੌਇਜ਼ਨਿੰਗ ਅਤੇ ਪੇਟ ਦੇ ਇਨਫੈਕਸ਼ਨ ਦਾ ਖਤਰਾ ਵੱਧ ਜਾਂਦਾ ਹੈ।
ਉਨ੍ਹਾਂ ਨੇ ਅੱਗੇ ਦੱਸਿਆ ਕਿ ਪਹਿਲਾਂ ਦੇ ਸਮੇਂ ਵਿੱਚ ਫ੍ਰਿਜ ਵਰਗੀ ਸਹੂਲਤ ਨਹੀਂ ਹੁੰਦੀ ਸੀ। ਇਸ ਲਈ ਇਸ ਮੌਸਮ ਵਿੱਚ ਨਾਨਵੈਜ ਤੋਂ ਪਰਹੇਜ਼ ਕਰਨਾ ਬਿਮਾਰੀਆਂ ਤੋਂ ਬਚਣ ਦਾ ਇੱਕ ਤਰੀਕਾ ਮੰਨਿਆ ਜਾਂਦਾ ਸੀ। ਬਰਸਾਤ ਦੇ ਮੌਸਮ ਵਿੱਚ ਸਾਡਾ ਪਾਚਨ ਤੰਤਰ ਵੀ ਥੋੜ੍ਹਾ ਹੌਲੀ ਕੰਮ ਕਰ ਸਕਦਾ ਹੈ। ਇਸ ਲਈ ਕਈ ਲੋਕਾਂ ਨੂੰ ਨਾਨਵੈਜ ਵਰਗੀਆਂ ਭਾਰੀ ਚੀਜ਼ਾਂ ਪਚਾਉਣ ਵਿੱਚ ਦਿੱਕਤ ਆਉਂਦੀ ਹੈ। ਇਹੀ ਕਾਰਨ ਹੈ ਕਿ ਇਸ ਸਮੇਂ ਲੋਕ ਹਲਕਾ ਅਤੇ ਤਾਜ਼ਾ ਬਣਿਆ ਹੋਇਆ ਖਾਣਾ ਖਾਣਾ ਜ਼ਿਆਦਾ ਪਸੰਦ ਕਰਦੇ ਹਨ। ਆਯੁਰਵੇਦ ਵੀ ਇਸ ਮੌਸਮ ਵਿੱਚ ਹਲਕਾ, ਤਾਜ਼ਾ ਅਤੇ ਆਸਾਨੀ ਨਾਲ ਪਚਣ ਵਾਲਾ ਭੋਜਨ ਖਾਣ ਦੀ ਸਲਾਹ ਦਿੰਦਾ ਹੈ।
ਜੀਵਾਂ ਦੇ ਪ੍ਰਜਨਨ ਦਾ ਸਮਾਂ
ਮਾਹਿਰ ਦੱਸਦੇ ਹਨ ਕਿ ਬਰਸਾਤ ਦਾ ਮੌਸਮ ਕਈ ਜਾਨਵਰਾਂ ਅਤੇ ਪਾਣੀ ਵਿੱਚ ਰਹਿਣ ਵਾਲੇ ਜੀਵਾਂ ਦੇ ਪ੍ਰਜਨਨ ਦਾ ਸਮਾਂ ਹੁੰਦਾ ਹੈ। ਇਸ ਲਈ ਇਸ ਦੌਰਾਨ ਉਨ੍ਹਾਂ ਦਾ ਸ਼ਿਕਾਰ ਕਰਨਾ ਜਾਂ ਜ਼ਿਆਦਾ ਵਰਤੋਂ ਘੱਟ ਕਰਨਾ ਕੁਦਰਤ ਦਾ ਸੰਤੁਲਨ ਬਣਾਈ ਰੱਖਣ ਦਾ ਇੱਕ ਤਰੀਕਾ ਵੀ ਮੰਨਿਆ ਜਾਂਦਾ ਸੀ।
ਇਹ ਵੀ ਪੜ੍ਹੋ
ਇਨ੍ਹਾਂ ਗੱਲਾਂ ਦਾ ਰੱਖੋ ਖ਼ਾਸ ਧਿਆਨ
ਹਾਲਾਂਕਿ, ਅਜਿਹੀ ਕੋਈ ਮੈਡੀਕਲ ਸਲਾਹ ਨਹੀਂ ਹੈ ਕਿ ਸਾਵਣ ਵਿੱਚ ਹਰ ਵਿਅਕਤੀ ਨੂੰ ਨਾਨਵੈਜ ਬਿਲਕੁਲ ਛੱਡ ਦੇਣਾ ਚਾਹੀਦਾ ਹੈ। ਜੇਕਰ ਤੁਸੀਂ ਨਾਨਵੈਜ ਖਾਂਦੇ ਹੋ ਤਾਂ ਸਿਰਫ਼ ਇਹ ਧਿਆਨ ਰੱਖੋ ਕਿ ਉਹ ਤਾਜ਼ਾ ਹੋਵੇ, ਚੰਗੀ ਤਰ੍ਹਾਂ ਪਕਾਇਆ ਗਿਆ ਹੋਵੇ ਅਤੇ ਸਾਫ਼-ਸਫ਼ਾਈ ਨਾਲ ਤਿਆਰ ਕੀਤਾ ਗਿਆ ਹੋਵੇ। ਸਿਹਤ ਲਈ ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਭੋਜਨ ਸੁਰੱਖਿਅਤ ਹੋਵੇ, ਸਿਰਫ਼ ਇਹ ਨਹੀਂ ਕਿ ਉਹ ਵੇਜ ਹੈ ਜਾਂ ਨਾਨਵੈਜ।