ਹੁਣ ਬਚੀ ਹੋਈ ਸਬਜ਼ੀ ਨਹੀਂ ਹੋਵੇਗੀ ਬਰਬਾਦ, ਬਣਾਓ ਇਹ ਸੁਆਦੀ ਪਕਵਾਨ

ਅਕਸਰ ਘਰਾਂ ਵਿੱਚ ਆਲੂ, ਗੋਭੀ, ਮਿਕਸ ਵੈੱਜ, ਪਨੀਰ, ਭਿੰਡੀ, ਬੀਨਜ਼, ਮਟਰ ਜਾਂ ਕੋਈ ਹੋਰ ਪੱਕੀ ਹੋਈ ਸਬਜ਼ੀ ਖਾਣ ਤੋਂ ਬਾਅਦ ਥੋੜ੍ਹੀ-ਬਹੁਤ ਬਚ ਜਾਂਦੀ ਹੈ। ਕਈ ਲੋਕ ਇਸ ਬਚੀ ਹੋਈ ਸਬਜ਼ੀ ਨੂੰ ਅਗਲੇ ਦਿਨ ਖ਼ਰਾਬ ਸਮਝ ਕੇ ਸੁੱਟ ਦਿੰਦੇ ਹਨ ਜਾਂ ਦੁਬਾਰਾ ਖਾਣ ਤੋਂ ਕਤਰਾਉਂਦੇ ਹਨ। ਪਰ ਜੇਕਰ ਇਸ ਨੂੰ ਸਹੀ ਤਰੀਕੇ ਨਾਲ ਸਟੋਰ ਕੀਤਾ ਜਾਵੇ ਅਤੇ ਸਮੇਂ ਸਿਰ ਵਰਤਿਆ ਜਾਵੇ, ਤਾਂ ਇਸ ਤੋਂ ਕਈ ਤਰ੍ਹਾਂ ਦੇ ਸੁਆਦੀ ਅਤੇ ਨਵੇਂ ਪਕਵਾਨ ਤਿਆਰ ਕੀਤੇ ਜਾ ਸਕਦੇ ਹਨ। ਇਸ ਨਾਲ ਨਾ ਸਿਰਫ਼ ਭੋਜਨ ਦੀ ਬਰਬਾਦੀ ਰੁਕਦੀ ਹੈ, ਸਗੋਂ ਸਮੇਂ, ਮਿਹਨਤ ਅਤੇ ਪੈਸੇ ਦੀ ਵੀ ਵੱਡੀ ਬਚਤ ਹੁੰਦੀ ਹੈ।

ਸਹੀ ਤਰੀਕੇ ਨਾਲ ਵਰਤੀ ਗਈ ਸਬਜ਼ੀ ਨਾਲ ਹਰ ਵਾਰ ਨਵੀਂ ਸਬਜ਼ੀ ਬਣਾਉਣ ਦੀ ਲੋੜ ਨਹੀਂ ਪੈਂਦੀ ਅਤੇ ਕੁਝ ਹੀ ਮਿੰਟਾਂ ਵਿੱਚ ਇੱਕ ਵਧੀਆ ਨਾਸ਼ਤਾ ਜਾਂ ਹਲਕਾ ਭੋਜਨ ਤਿਆਰ ਹੋ ਜਾਂਦਾ ਹੈ। ਹਾਲਾਂਕਿ, ਬਚੀ ਹੋਈ ਸਬਜ਼ੀ ਦੀ ਵਰਤੋਂ ਉਦੋਂ ਹੀ ਕਰਨੀ ਚਾਹੀਦੀ ਹੈ ਜਦੋਂ ਉਹ ਸਹੀ ਢੰਗ ਨਾਲ ਰੱਖੀ ਗਈ ਹੋਵੇ ਅਤੇ ਖ਼ਰਾਬ ਨਾ ਹੋਈ ਹੋਵੇ। ਆਓ ਜਾਣਦੇ ਹਾਂ ਬਚੀ ਹੋਈ ਸਬਜ਼ੀ ਤੋਂ ਬਣਨ ਵਾਲੇ 4 ਸੁਆਦੀ ਪਕਵਾਨਾਂ ਅਤੇ ਇਸ ਨੂੰ ਵਰਤਣ ਵੇਲੇ ਧਿਆਨ ਵਿੱਚ ਰੱਖਣਯੋਗ ਗੱਲਾਂ ਬਾਰੇ:

ਬਚੀ ਹੋਈ ਸਬਜ਼ੀ ਤੋਂ ਬਣਾਓ ਇਹ 4 ਟੇਸਟੀ ਡਿਸ਼ਾਂ

ਸਟੱਫਡ ਪਰੌਂਠਾ

ਬਚੀ ਹੋਈ ਸੁੱਕੀ ਸਬਜ਼ੀ ਨੂੰ ਹਲਕਾ ਜਿਹਾ ਮੈਸ਼ ਲਵੋ ਅਤੇ ਆਟੇ ਦੀ ਲੋਈ ਵਿੱਚ ਭਰ ਕੇ ਪਰੌਂਠਾ ਵੇਲ ਲਵੋ। ਇਸ ਨੂੰ ਤਵੇ ‘ਤੇ ਹਲਕਾ ਘਿਓ ਜਾਂ ਤੇਲ ਲਗਾ ਕੇ ਚੰਗੀ ਤਰ੍ਹਾਂ ਸੇਕੋ। ਇਹ ਪਰੌਂਠਾ ਬੇਹੱਦ ਸੁਆਦੀ ਹੁੰਦਾ ਹੈ ਅਤੇ ਪੇਟ ਨੂੰ ਵੀ ਲੰਬੇ ਸਮੇਂ ਤੱਕ ਭਰਿਆ ਰੱਖਦਾ ਹੈ।

ਵੈੱਜ ਸੈਂਡਵਿਚ

ਬਚੀ ਹੋਈ ਸਬਜ਼ੀ ਨੂੰ ਬ੍ਰੈੱਡ ਦੇ ਸਲਾਈਸ ‘ਤੇ ਫੈਲਾਓ। ਜੇਕਰ ਚਾਹੋ ਤਾਂ ਇਸ ‘ਤੇ ਥੋੜ੍ਹਾ ਪਨੀਰ ਜਾਂ ਚੀਜ਼ ਪਾ ਕੇ ਦੂਜੀ ਬ੍ਰੈੱਡ ਨਾਲ ਢੱਕ ਕੇ ਟੋਸਟ ਕਰ ਲਵੋ। ਇਹ ਝਟਪਟ ਤਿਆਰ ਹੋਣ ਵਾਲਾ ਨਾਸ਼ਤਾ ਹੈ, ਜਿਸ ਵਿੱਚ ਸਬਜ਼ੀਆਂ ਦੇ ਪੋਸ਼ਕ ਤੱਤ ਵੀ ਮਿਲ ਜਾਂਦੇ ਹਨ ਅਤੇ ਵੱਖਰੇ ਤੌਰ ‘ਤੇ ਮਸਾਲਾ ਤਿਆਰ ਕਰਨ ਦੀ ਲੋੜ ਵੀ ਨਹੀਂ ਪੈਂਦੀ।

ਵੈੱਜ ਚੀਲਾ

ਵੇਸਣ ਦਾ ਘੋਲ ਤਿਆਰ ਕਰੋ ਅਤੇ ਉਸ ਵਿੱਚ ਬਚੀ ਹੋਈ ਸਬਜ਼ੀ ਨੂੰ ਮਿਲਾ ਕੇ ਤਵੇ ‘ਤੇ ਚੀਲਾ ਬਣਾਓ। ਇਸ ਨੂੰ ਹਰੀ ਚਟਨੀ ਜਾਂ ਦਹੀ ਦੇ ਨਾਲ ਖਾਧਾ ਜਾ ਸਕਦਾ ਹੈ। ਇਹ ਪ੍ਰੋਟੀਨ ਅਤੇ ਸਬਜ਼ੀਆਂ ਦਾ ਇੱਕ ਬਹਤੁ ਵਧੀਆ ਸੁਮੇਲ ਹੈ, ਜੋ ਨਾਸ਼ਤੇ ਲਈ ਸਿਹਤਮੰਦ ਵਿਕਲਪ ਸਾਬਤ ਹੁੰਦਾ ਹੈ।

ਵੈੱਜ ਫ੍ਰਾਈਡ ਰਾਈਸ

ਬਚੇ ਹੋਏ ਚੌਲਾਂ ਵਿੱਚ ਬਚੀ ਹੋਈ ਸਬਜ਼ੀ ਮਿਲਾ ਕੇ ਹਲਕੇ ਮਸਾਲਿਆਂ ਨਾਲ ਕੁਝ ਮਿੰਟਾਂ ਲਈ ਭੁੰਨ ਲਵੋ। ਉੱਪਰੋਂ ਹਰਾ ਧਨੀਆ ਪਾ ਕੇ ਗਰਮਾ-ਗਰਮ ਪਰੋਸੋ। ਇਹ ਡਿਸ਼ ਬਹੁਤ ਜਲਦੀ ਤਿਆਰ ਹੋ ਜਾਂਦੀ ਹੈ ਅਤੇ ਇੱਕੋ ਪਲੇਟ ਵਿੱਚ ਕਾਰਬੋਹਾਈਡ੍ਰੇਟਸ ਦੇ ਨਾਲ-ਨਾਲ ਸਬਜ਼ੀਆਂ ਦਾ ਸੁਆਦ ਵੀ ਮਿਲ ਜਾਂਦਾ ਹੈ।

ਬਚੀ ਹੋਈ ਸਬਜ਼ੀ ਨੂੰ ਵਰਤਣ ਤੋਂ ਪਹਿਲਾਂ ਕਿਨ੍ਹਾਂ ਗੱਲਾਂ ਦਾ ਧਿਆਨ ਰੱਖਣਾ ਚਾਹੀਦਾ ਹੈ?

ਬਚੀ ਹੋਈ ਸਬਜ਼ੀ ਨੂੰ ਕਮਰੇ ਦੇ ਤਾਪਮਾਨ ‘ਤੇ ਲੰਬੇ ਸਮੇਂ ਤੱਕ ਨਾ ਰੱਖੋ। ਠੰਡੀ ਹੋਣ ਤੋਂ ਬਾਅਦ ਇਸ ਨੂੰ ਸਾਫ਼ ਅਤੇ ਬੰਦ ਡੱਬੇ ਵਿੱਚ ਪਾ ਕੇ ਫ੍ਰਿਜ ਵਿੱਚ ਰੱਖ ਦਿਓ। ਕੋਸ਼ਿਸ਼ ਕਰੋ ਕਿ ਇਸ ਨੂੰ 1 ਤੋਂ 2 ਦਿਨਾਂ ਦੇ ਅੰਦਰ-ਅੰਦਰ ਵਰਤ ਲਿਆ ਜਾਵੇ। ਜੇਕਰ ਸਬਜ਼ੀ ਵਿੱਚੋਂ ਅਜੀਬ ਬੱਦਬੂ ਆ ਰਹੀ ਹੋਵੇ, ਉਸ ਦਾ ਰੰਗ ਬਦਲ ਗਿਆ ਹੋਵੇ ਜਾਂ ਉਸ ਵਿੱਚ ਉੱਲੀ ਦਿਖਾਈ ਦੇਵੇ, ਤਾਂ ਉਸ ਨੂੰ ਬਿਲਕੁਲ ਨਾ ਖਾਓ।