Rajasthan Exit Poll: ਰਾਜਸਥਾਨ ‘ਚ ਔਰਤਾਂ ਦਾ ਕਾਂਗਰਸ ‘ਤੇ ਭਰੋਸਾ, ਸਵਰਨ ਤੇ OBC ਭਾਜਪਾ ‘ਤੇ ਮਹਿਰਬਾਨ!

ਰਾਜਸਥਾਨ (Rajasthan) ‘ਚ ਐਗਜ਼ਿਟ ਪੋਲ ਸਰਵੇ ‘ਚ ਭਾਰਤੀ ਜਨਤਾ ਪਾਰਟੀ 5 ਸਾਲ ਦੇ ਇੰਤਜ਼ਾਰ ਤੋਂ ਬਾਅਦ ਸੱਤਾ ‘ਚ ਵਾਪਸੀ ਕਰਦੀ ਨਜ਼ਰ ਆ ਰਹੀ ਹੈ, ਜਦਕਿ ਪਾਰਟੀ ‘ਚ ਅੰਦਰੂਨੀ ਕਲੇਸ਼ ਕਾਰਨ ਕਾਂਗਰਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੋਲਸਟ੍ਰੇਟ ਦੇ ਐਗਜ਼ਿਟ ਪੋਲ ਸਰਵੇਖਣ ਵਿੱਚ ਕਿਹਾ ਗਿਆ ਹੈ ਕਿ ਰਾਜਸਥਾਨ ਦੀਆਂ ਔਰਤਾਂ ਨੇ ਕਾਂਗਰਸ ਵਿੱਚ ਭਰੋਸਾ ਜਤਾਇਆ ਹੈ ਜਦੋਂ ਕਿ ਸਵਰਨ ਜਾਤਾਂ ਅਤੇ ਹੋਰ ਪੱਛੜੀਆਂ ਸ਼੍ਰੇਣੀਆਂ ਦੇ ਵੋਟਰਾਂ ਨੇ ਭਾਜਪਾ ਦੇ ਹੱਕ ਵਿੱਚ ਵੋਟਾਂ ਪਾਈਆਂ ਹਨ, ਜਿਸ ਕਾਰਨ ਪਾਰਟੀ ਸੱਤਾ ਵਿੱਚ ਵਾਪਸ ਆ ਰਹੀ ਹੈ। ਸੂਬੇ ‘ਚ 200 ਮੈਂਬਰੀ ਵਿਧਾਨ ਸਭਾ ‘ਚ 199 ਸੀਟਾਂ ‘ਤੇ ਹੋਈਆਂ ਚੋਣਾਂ ਤੋਂ ਬਾਅਦ ਸਰਵੇ ‘ਚ ਭਾਜਪਾ (BJP) ਨੂੰ 100 ਤੋਂ 110 ਸੀਟਾਂ ਮਿਲਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ। ਜਦਕਿ ਕਾਂਗਰਸ 90 ਤੋਂ 100 ਸੀਟਾਂ ਤੱਕ ਹੀ ਸੀਮਤ ਨਜ਼ਰ ਆ ਰਹੀ ਹੈ। ਚੋਣਾਂ ਵਿੱਚ ਭਾਜਪਾ ਨੂੰ ਕਰੀਬ 42 ਫੀਸਦੀ ਵੋਟਾਂ ਮਿਲੀਆਂ ਹਨ, ਜਿਸ ਵਿੱਚ ਉੱਚ ਜਾਤੀ ਅਤੇ ਓਬੀਸੀ ਵੋਟਰਾਂ ਨੇ ਅਹਿਮ ਭੂਮਿਕਾ ਨਿਭਾਈ ਹੈ।

59 ਫੀਸਦੀ ਸਵਰਨ ਜਾਤਾਂ ਨੇ ਭਾਜਪਾ ਨੂੰ ਕੀਤਾ ਵੋਟ

ਸਰਵੇਖਣ ਮੁਤਾਬਕ ਰਾਜਸਥਾਨ ਵਿੱਚ ਸਵਰਨ ਜਾਤਾਂ ਦੇ 59 ਫੀਸਦੀ ਵੋਟਰਾਂ ਨੇ ਭਾਜਪਾ ਦੇ ਹੱਕ ਵਿੱਚ ਵੋਟ ਪਾਈ ਜਦੋਂ ਕਿ ਕਾਂਗਰਸ ਨੂੰ ਸਿਰਫ਼ 27 ਫੀਸਦੀ ਵੋਟਾਂ ਮਿਲੀਆਂ। ਜਿੱਥੋਂ ਤੱਕ ਮਹਿਲਾ ਵੋਟਰਾਂ ਦਾ ਸਵਾਲ ਹੈ, ਕਾਂਗਰਸ ਉਨ੍ਹਾਂ ਦੀ ਪਸੰਦੀਦਾ ਪਾਰਟੀ ਰਹੀ ਹੈ। 43 ਫੀਸਦੀ ਮਹਿਲਾ ਵੋਟਰਾਂ ਨੇ ਕਾਂਗਰਸ ਦੇ ਹੱਕ ਵਿੱਚ ਵੋਟ ਪਾਈ। ਜਦੋਂ ਕਿ 38 ਫੀਸਦੀ ਔਰਤਾਂ ਨੇ ਭਾਜਪਾ ਨੂੰ ਵੋਟ ਦਿੱਤੀ। ਇਸੇ ਤਰ੍ਹਾਂ ਜੇਕਰ ਅਸੀਂ ਮਰਦ ਵੋਟਰਾਂ ‘ਤੇ ਨਜ਼ਰ ਮਾਰੀਏ ਤਾਂ 46 ਫੀਸਦੀ ਨੇ ਭਾਜਪਾ ਨੂੰ ਵੋਟ ਦਿੱਤੀ, ਜਦਕਿ 37 ਫੀਸਦੀ ਮਰਦ ਵੋਟਰ ਕਾਂਗਰਸ ਦੇ ਹੱਕ ‘ਚ ਗਏ। ਜਾਤ ਆਧਾਰ ‘ਤੇ ਪਈਆਂ ਵੋਟਾਂ ਦੇ ਸਰਵੇਖਣ ਦੇ ਆਧਾਰ ‘ਤੇ ਇਹ ਕਿਹਾ ਜਾ ਸਕਦਾ ਹੈ ਕਿ ਅਨੁਸੂਚਿਤ ਜਾਤੀ ਅਤੇ ਅਨੁਸੂਚਿਤ ਜਨਜਾਤੀ ਦੇ ਵੋਟਰ ਕਾਂਗਰਸ ਦੇ ਸਮਰਥਨ ‘ਚ ਸਨ ਜਦਕਿ ਅਗਾੜੀ ਅਤੇ ਓਬੀਸੀ ਵੋਟਰ ਭਾਜਪਾ ਦੇ ਨਾਲ ਗਏ ਸਨ। 47 ਫੀਸਦੀ ਅਨੁਸੂਚਿਤ ਜਾਤਾਂ ਦੇ ਵੋਟਰਾਂ ਅਤੇ 44 ਫੀਸਦੀ ਅਨੁਸੂਚਿਤ ਜਨਜਾਤੀ ਵੋਟਰਾਂ ਨੇ ਕਾਂਗਰਸ ਨੂੰ ਵੋਟ ਦਿੱਤੀ। ਅਨੁਸੂਚਿਤ ਜਾਤੀਆਂ ਦੀਆਂ 35 ਫੀਸਦੀ ਅਤੇ ਅਨੁਸੂਚਿਤ ਕਬੀਲਿਆਂ ਦੀਆਂ 36 ਫੀਸਦੀ ਵੋਟਾਂ ਭਾਜਪਾ ਨੂੰ ਪਈਆਂ।

ਮੁਸਲਮਾਨ ਵੋਟਰ

ਇਸੇ ਤਰ੍ਹਾਂ ਓਬੀਸੀ ਵੋਟਰਾਂ ਵਿੱਚੋਂ 46 ਫੀਸਦੀ ਵੋਟਰ ਭਾਜਪਾ ਦੇ ਨਾਲ ਗਏ, ਜਦੋਂ ਕਿ ਸਵਰਨ ਜਾਤਾਂ ਦੇ ਵੋਟਰਾਂ ਵਿੱਚੋਂ 59 ਫੀਸਦੀ ਵੋਟ ਭਾਜਪਾ ਦੇ ਹੱਕ ਵਿੱਚ ਪਏ। ਜੇਕਰ ਮੁਸਲਿਮ ਵੋਟਰਾਂ ਦੀ ਗੱਲ ਕਰੀਏ ਤਾਂ ਕਾਂਗਰਸ ਨੂੰ 59 ਫੀਸਦੀ ਅਤੇ ਭਾਜਪਾ ਨੂੰ ਵੀ 23 ਫੀਸਦੀ ਵੋਟ ਮਿਲੇ ਹਨ। ਭਾਜਪਾ ਨੂੰ ਇੱਥੋਂ ਦੇ ਨੌਜਵਾਨਾਂ ਦੀਆਂ ਵੋਟਾਂ ਮਿਲੀਆਂ ਹਨ।