ਪੰਜਾਬ ਸਰਕਾਰ ਨੇ ਵੇਰਕਾ ਲਈ ਦੁੱਧ ਖਰੀਦਣ ਦੀਆਂ ਵਧਾਈਆਂ ਕੀਮਤਾਂ, 1 ਅਪ੍ਰੈਲ ਤੋਂ ਲਾਗੂ ਨਵੇਂ ਰੇਟ
Verka Milk Purcase Rate Increased: ਇਸਤੋਂ ਪਹਿਲਾਂ, ਜਲੰਧਰ ਵਿੱਚ ਨਿੱਜੀ ਡੇਅਰੀ ਸੰਚਾਲਕਾਂ ਨੇ ਦੁੱਧ ਦੀਆਂ ਕੀਮਤਾਂ ਵਿੱਚ 5 ਰੁਪਏ ਪ੍ਰਤੀ ਲੀਟਰ ਵਾਧੇ ਦਾ ਐਲਾਨ ਕੀਤਾ ਸੀ। ਇਹ ਫੈਸਲਾ ਖਾਲਸਾ ਡੇਅਰੀ ਵੈਲਫੇਅਰ ਸੋਸਾਇਟੀ ਦੀ ਮੀਟਿੰਗ ਵਿੱਚ ਲਿਆ ਗਿਆ ਸੀ। ਵਧੀਆਂ ਕੀਮਤਾਂ 1 ਅਪ੍ਰੈਲ ਤੋਂ ਲਾਗੂ ਕਰ ਦਿੱਤੀਆਂ ਗਈਆਂ ਹਨ। ਇਸ ਵਾਧੇ ਦੇ ਮੁੱਖ ਕਾਰਨ ਚਾਰੇ ਦੀ ਵਧਦੀ ਕੀਮਤ, ਦੁਧਾਰੂ ਜਾਨਵਰਾਂ ਦੀਆਂ ਕੀਮਤਾਂ ਦਾ ਦੁੱਗਣਾ ਹੋਣਾ ਅਤੇ ਚੱਲ ਰਹੇ ਵਿਸ਼ਵ ਯੁੱਧ ਕਾਰਨ ਮਹਿੰਗਾਈ ਦੱਸਿਆ ਗਿਆ ਹੈ।
ਪੰਜਾਬ ਸਰਕਾਰ ਨੇ ਵੇਰਕਾ ਲਈ ਦੁੱਧ ਦੀ ਖਰੀਦ ਦਰਾਂ ਵਧਾ ਦਿੱਤੀਆਂ ਹਨ। ਡੇਅਰੀ ਉਤਪਾਦਕਾਂ ਤੋਂ ਖਰੀਦੇ ਜਾਣ ਵਾਲੇ ਦੁੱਧ ਵਿੱਚ 15 ਰੁਪਏ ਪ੍ਰਤੀ ਕਿਲੋਗ੍ਰਾਮ ਫੈਟ ਦੇ ਹਿਸਾਬ ਨਾਲ ਵਾਧਾ ਕੀਤਾ ਹੈ।। ਇਸ ਫੈਸਲੇ ਨੂੰ 1 ਅਪ੍ਰੈਲ ਤੋਂ ਲਾਗੂ ਕਰ ਦਿੱਤਾ ਗਿਆ ਹੈ। ਹਾਲਾਂਕਿ ਵੇਰਕਾ ਦੇ ਦੁੱਧ ਦੀ ਬਾਜ਼ਾਰੀ ਕੀਮਤ ਅਜੇ ਤੱਕ ਨਹੀਂ ਵਧੀ ਹੈ, ਪਰ ਕਿਸਾਨਾਂ ਨੂੰ ਵੱਧ ਅਦਾਇਗੀਆਂ ਨਾਲ ਇਹ ਵਧਣ ਦੀ ਉਮੀਦ ਹੈ। ਪਹਿਲਾਂ, ਜਲੰਧਰ ਦੀਆਂ ਡੇਅਰੀਆਂ ਨੇ ਪਹਿਲਾਂ ਹੀ 5 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦਰ ਵਧਾ ਦਿੱਤੀ ਸੀ।
ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਫੈਸਲਾ ਵਧਦੀਆਂ ਲਾਗਤਾਂ, ਪਸ਼ੂਆਂ ਦੀ ਖੁਰਾਕ ਅਤੇ ਹੋਰ ਖਰਚਿਆਂ ਨੂੰ ਹੱਲ ਕਰਨ ਲਈ ਲਿਆ ਗਿਆ ਸੀ, ਜਿਸ ਨਾਲ ਦੁੱਧ ਦੀਆਂ ਬਿਹਤਰ ਕੀਮਤਾਂ ਯਕੀਨੀ ਬਣਾਈਆਂ ਜਾ ਸਕਣ। ਇਸ ਫੈਸਲੇ ਨਾਲ ਸੂਬੇ ਦੇ ਲਗਭਗ 2.5 ਲੱਖ ਡੇਅਰੀ ਕਿਸਾਨਾਂ ਨੂੰ ਸਿੱਧਾ ਫਾਇਦਾ ਹੋਵੇਗਾ। ਸਰਕਾਰ ਨੇ ਪਿਛਲੇ ਸਾਲ ਵੀ ਕੀਮਤ 10 ਰੁਪਏ ਵਧਾਈ ਸੀ।
ਇੰਝ ਵਧਾਈਆਂ ਗਈਆਂ ਕੀਮਤਾਂ
ਮਿਲਕਫੈੱਡ ਦੇ ਅਨੁਸਾਰ, ਗਾਂ ਦੇ ਦੁੱਧ ਦਾ ਪੁਰਾਣਾ ਰੇਟ ਲਗਭਗ 770-780 ਪ੍ਰਤੀ ਕਿਲੋਗ੍ਰਾਮ ਫੈਟ ਸੀ, ਜਿਸਨੂੰ ਵਧਾ ਕੇ 780-795 ਪ੍ਰਤੀ ਕਿਲੋਗ੍ਰਾਮ ਫੈਟ ਕਰ ਦਿੱਤਾ ਗਿਆ ਹੈ, ਇਸ ਵਿੱਚ 15 ਦਾ ਵਾਧਾ ਕੀਤਾ ਗਿਆ ਹੈ। ਇਸ ਦੌਰਾਨ, ਮੱਝ ਦੇ ਦੁੱਧ ਦੀ ਕੀਮਤ ਪਹਿਲਾਂ ਲਗਭਗ ₹810-820 ਪ੍ਰਤੀ ਕਿਲੋਗ੍ਰਾਮ ਫੈਟ ਸੀ, ਜੋ ਹੁਣ ਵਧ ਕੇ ₹820-835 ਪ੍ਰਤੀ ਕਿਲੋਗ੍ਰਾਮ ਫੈਟ ਕਰ ਦਿੱਤੀ ਗਈ ਹੈ।
ਪੰਜਾਬ ਦੇ 2.5 ਲੱਖ ਦੇ ਕਰੀਬ ਪਸ਼ੂ ਪਾਲਕ ਕਿਸਾਨਾਂ ਦੀ ਕਮਾਈ ‘ਚ ਹੋਵੇਗਾ ਵਾਧਾ! 👉🏻 ਮਿਲਕਫੈੱਡ (ਵੇਰਕਾ) ਨਾਲ਼ ਜੁੜੇ ਕਿਸਾਨਾਂ ਨੂੰ ਦੁੱਧ ਦੀ ਮਿਲੇਗੀ ਵੱਧ ਕੀਮਤ 👉🏻 ਮਾਨ ਸਰਕਾਰ ਨੇ 10 ਤੋਂ 15 ਰੁਪਏ ਵਧਾਏ ਪ੍ਰਤੀ ਕਿਲੋਗ੍ਰਾਮ ਫੈਟ ਦੇ ਭਾਅ 👉🏻 1 ਅਪ੍ਰੈਲ 2026 ਤੋਂ ਲਾਗੂ ਹੋਣਗੀਆਂ ਸੋਧੀਆਂ ਹੋਈਆਂ ਦਰਾਂ pic.twitter.com/0LJXJWcFrv
— AAP Punjab (@AAPPunjab) April 3, 2026
ਗਾਂ ਅਤੇ ਮੱਝ ਦੇ ਦੁੱਧ ਵਿੱਚ ਬਰਾਬਰ ਵਾਧਾ
ਮਿਲਕਫੈੱਡ ਦੇ ਅਨੁਸਾਰ, ਗਾਂ ਅਤੇ ਮੱਝ ਦੇ ਦੁੱਧ ਦੋਵਾਂ ਦੀ ਕੀਮਤ ਬਰਾਬਰ ਵਧਾਈ ਗਈ ਹੈ, ਹਾਲਾਂਕਿ ਅੰਤਿਮ ਭੁਗਤਾਨ ਫੈਟ ਯਾਨੀ ਚਰਬੀ ਪ੍ਰਤੀਸ਼ਤ ਦੇ ਅਧਾਰ ਤੇ ਨਿਰਧਾਰਤ ਕੀਤਾ ਜਾਂਦਾ ਹੈ, ਜਿਸਦੇ ਨਤੀਜੇ ਵਜੋਂ ਵਿਅਕਤੀਗਤ ਕਿਸਾਨਾਂ ਦੁਆਰਾ ਪ੍ਰਾਪਤ ਹੋਣ ਵਾਲੀ ਰਕਮ ਵਿੱਚ ਥੋੜ੍ਹਾ ਅੰਤਰ ਹੋ ਸਕਦਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਵੇਰਕਾ ਦੇ ਰੇਟ ਵਾਧੇ ਤੋਂ ਬਾਅਦ, ਨਿੱਜੀ ਡੇਅਰੀਆਂ ਨੂੰ ਵੀ ਆਪਣੀਆਂ ਖਰੀਦ ਕੀਮਤਾਂ ਵਧਾਉਣ ਲਈ ਮਜਬੂਰ ਹੋਣਾ ਪਵੇਗਾ, ਜਿਸ ਨਾਲ ਬਾਜ਼ਾਰ ਵਿੱਚ ਮੁਕਾਬਲਾ ਵਧੇਗਾ ਅਤੇ ਕਿਸਾਨਾਂ ਨੂੰ ਵਧੇਰੇ ਲਾਭ ਮਿਲੇਗਾ।
ਇਹ ਵੀ ਪੜ੍ਹੋ
ਸੇਲ ਦਰ ‘ਤੇ ਅਜੇ ਫੈਸਲਾ ਨਹੀਂ
ਵੇਰਕਾ ਨੇ ਕਿਸਾਨਾਂ ਤੋਂ ਦੁੱਧ ਦੇ ਖਰੀਦ ਰੇਟ ਵਧਾ ਦਿੱਤੇ ਹਨ। ਹਾਲਾਂਕਿ, ਸੇਲ ਰੇਟ ਬਾਰੇ ਕੋਈ ਫੈਸਲਾ ਨਹੀਂ ਲਿਆ ਗਿਆ ਹੈ। ਹੋ ਸਕਦਾ ਹੈ ਆਉਣ ਵਾਲੇ ਦਿਨਾਂ ਵਿੱਚ, ਵੇਰਕਾ ਵਧੀ ਹੋਈ ਖਰੀਦ ਦਰ ਦਾ ਹਵਾਲਾ ਦਿੰਦੇ ਹੋਏ ਵਿਕਰੀ ਦਰ ਵਿੱਚ ਸੋਧ ਵੀ ਕਰ ਸਕਦਾ ਹੈ, ਜਿਸਦਾ ਸਿੱਧਾ ਅਸਰ ਆਮ ਲੋਕਾਂ ‘ਤੇ ਪਵੇਗਾ।
