ਹੁਣ ChatGPT ਲੱਭ ਕੇ ਦੇਵੇਗਾ ਸਭ ਤੋਂ ਸਸਤੀ ਫਲਾਈਟ! Skyscanner ਨਾਲ ਮਿਲਾਇਆ ਹੱਥ, ਜਾਣੋ ਕਿਵੇਂ ਕਰੀਏ ਵਰਤੋਂ

Image Credit source: Freepik

ਜੇਕਰ ਤੁਸੀਂ ਵੀ ਫਲਾਈਟ ਟਿਕਟ ਬੁੱਕ ਕਰਦੇ ਸਮੇਂ ਵੱਖ-ਵੱਖ ਐਪਸ ਦੇ ਵਿਚਕਾਰ ਸਵਿਚ ਕਰਦੇ ਹੋ ਅਤੇ ਵਾਰ-ਵਾਰ ਕੀਮਤਾਂ ਚੈੱਕ ਕਰਕੇ ਪਰੇਸ਼ਾਨ ਹੁੰਦੇ ਹੋ, ਤਾਂ ਹੁਣ ਤੁਹਾਡੀ ਇਹ ਮੁਸ਼ਕਲ ChatGPT ਨੇ ਦੂਰ ਕਰ ਦਿੱਤੀ ਹੈ। ਚੈਟਜੀਪੀਟੀ ਨੇ ਦੁਨੀਆ ਦੇ ਮਸ਼ਹੂਰ ਟ੍ਰੈਵਲ ਸਰਚ ਇੰਜਣ Skyscanner ਨਾਲ ਹੱਥ ਮਿਲਾ ਲਿਆ ਹੈ, ਜਿਸ ਦਾ ਭਾਰਤੀ ਯੂਜ਼ਰਸ ਨੂੰ ਬਹੁਤ ਵੱਡਾ ਫਾਇਦਾ ਮਿਲਣ ਵਾਲਾ ਹੈ। ਕੰਪਨੀ ਨੇ ਫਲਾਈਟ ਸਰਚ ਟੂਲ ਨੂੰ ਸਿੱਧੇ ਚੈਟਜੀਪੀਟੀ ਵਿੱਚ ਸ਼ਾਮਲ ਕਰ ਦਿੱਤਾ ਹੈ ਅਤੇ ਹੁਣ ਇਹ ਫੀਚਰ ਭਾਰਤ ਵਿੱਚ ਯੂਜ਼ਰਸ ਲਈ ਉਪਲਬਧ ਹੈ।

ਹੁਣ ਵੱਖ-ਵੱਖ ਫਿਲਟਰਾਂ ਅਤੇ ਕਈ ਪੇਜਾਂ ‘ਤੇ ਜਾਣ ਦੀ ਬਜਾਏ, ਤੁਸੀਂ ਸਿਰਫ਼ ਚੈਟ ਵਿੱਚ ਟਾਈਪ ਕਰਕੇ ਇਹ ਪਤਾ ਲਗਾ ਸਕਦੇ ਹੋ ਕਿ ਫਲਾਈਟ ਦੀ ਕੀਮਤ ਕਿਸ ਸਾਈਟ ‘ਤੇ ਸਭ ਤੋਂ ਘੱਟ ਹੈ। ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਤੁਹਾਨੂੰ ਸਾਰੇ ਨਤੀਜੇ ਚੈਟ ਦੇ ਅੰਦਰ ਹੀ ਮਿਲ ਜਾਣਗੇ।

ਇਹ ਫੀਚਰ ਕਿਸੇ ਸਰਚ ਟੂਲ ਵਾਂਗ ਘੱਟ ਅਤੇ ਕਿਸੇ ਨਿੱਜੀ ਸਹਾਇਕ ਨੂੰ ਫਲਾਈਟ ਲੱਭਣ ਲਈ ਕਹਿਣ ਵਾਂਗ ਜ਼ਿਆਦਾ ਮਹਿਸੂਸ ਹੁੰਦਾ ਹੈ। ਇਹ ਨਤੀਜੇ Skyscanner ਦੇ ਮੌਜੂਦਾ ਸਿਸਟਮ ਤੋਂ ਆਉਂਦੇ ਹਨ, ਇਸ ਲਈ ਕੀਮਤਾਂ ਅਤੇ ਫਲਾਈਟ ਦੇ ਵਿਕਲਪ ਬਿਲਕੁਲ ਉਹੀ ਹਨ ਜੋ ਤੁਸੀਂ ਆਮ ਤੌਰ ‘ਤੇ ਉਨ੍ਹਾਂ ਦੇ ਪਲੇਟਫਾਰਮ ‘ਤੇ ਦੇਖਦੇ ਹੋ। Skyscanner ਨੇ ਇਹ ਵੀ ਸੰਕੇਤ ਦਿੱਤਾ ਹੈ ਕਿ ਉਹ ਯਾਤਰਾ ਦੀ ਯੋਜਨਾ ਬਣਾਉਣ ਦੇ ਹੋਰ ਹਿੱਸਿਆਂ ਵਿੱਚ ਵੀ AI (ਆਰਟੀਫੀਸ਼ੀਅਲ ਇੰਟੈਲੀਜੈਂਸ) ਦੀ ਵਰਤੋਂ ਕਰਨ ‘ਤੇ ਕੰਮ ਕਰ ਰਿਹਾ ਹੈ, ਇਸ ਲਈ ਆਉਣ ਵਾਲੇ ਸਮੇਂ ਵਿੱਚ ਇਹ ਸਿਰਫ਼ ਫਲਾਈਟਾਂ ਤੱਕ ਹੀ ਸੀਮਤ ਨਹੀਂ ਰਹੇਗਾ।

ChatGPT ਦੀ ਮਦਦ ਨਾਲ ਕਿਵੇਂ ਲੱਭੀਏ ਸਸਤੀ ਫਲਾਈਟ?

ਐਪ ਅਪਡੇਟ ਕਰੋ: ਸਭ ਤੋਂ ਪਹਿਲਾਂ ਤੁਹਾਡੇ ਫ਼ੋਨ ਵਿੱਚ ਚੈਟਜੀਪੀਟੀ ਐਪ ਦਾ ਲੇਟੈਸਟ ਵਰਜ਼ਨ ਹੋਣਾ ਚਾਹੀਦਾ ਹੈ।

ਲੌਗ-ਇਨ: ਐਪ ਡਾਊਨਲੋਡ ਅਤੇ ਇੰਸਟਾਲ ਕਰਨ ਤੋਂ ਬਾਅਦ ਆਪਣੇ ਖਾਤੇ ਵਿੱਚ ਲੌਗ-ਇਨ ਕਰੋ।

Explore Apps: ਇਸ ਤੋਂ ਬਾਅਦ ਖੱਬੇ ਪਾਸੇ ਹੇਠਾਂ ਦਿੱਤੇ Plus (+) ਆਈਕਨ ‘ਤੇ ਟੈਪ ਕਰੋ। ਇੱਥੇ ਥੋੜਾ ਹੇਠਾਂ ਸਕ੍ਰੋਲ ਕਰਨ ‘ਤੇ ਤੁਹਾਨੂੰ ‘Explore Apps’ ਦਾ ਵਿਕਲਪ ਮਿਲੇਗਾ।

ਸਰਚ ਕਰੋ: ਐਕਸਪਲੋਰ ਐਪਸ ‘ਤੇ ਕਲਿੱਕ ਕਰਨ ਤੋਂ ਬਾਅਦ ਤੁਹਾਨੂੰ ਇੱਕ ਸਰਚ ਬਾਰ ਨਜ਼ਰ ਆਵੇਗਾ, ਜਿਸ ਵਿੱਚ ‘Skyscanner’ ਲਿਖ ਕੇ ਸਰਚ ਕਰੋ।

ਕਨੈਕਟ ਕਰੋ: ਸਰਚ ਰਿਜ਼ਲਟ ਸਾਹਮਣੇ ਆਉਣ ‘ਤੇ ਜਿਵੇਂ ਹੀ ਤੁਸੀਂ ਸਕਾਈਸਕੈਨਰ ਦੇ ਨਾਮ ‘ਤੇ ਕਲਿੱਕ ਕਰੋਗੇ, ਤੁਹਾਨੂੰ ‘Connect’ ਦਾ ਵਿਕਲਪ ਦਿਖਾਈ ਦੇਵੇਗਾ।

ਪ੍ਰੌਮਪਟ ਦਿਓ: ਕਨੈਕਟ ਕਰਦੇ ਹੀ Skyscanner ਤੁਹਾਡੇ ਚੈਟਜੀਪੀਟੀ ਖਾਤੇ ਨਾਲ ਜੁੜ ਜਾਵੇਗਾ। ਹੁਣ ਤੁਸੀਂ ਜਿਵੇਂ ਹੀ ਫਲਾਈਟ ਲੱਭਣ ਲਈ ਕੋਈ ਵੀ ਪ੍ਰੌਮਪਟ (ਜਿਵੇਂ: “ਦਿੱਲੀ ਤੋਂ ਅੰਮ੍ਰਿਤਸਰ ਲਈ ਸਭ ਤੋਂ ਸਸਤੀ ਫਲਾਈਟ ਲੱਭੋ”) ਦਿਓਗੇ, ਇਹ ਤੁਹਾਨੂੰ ਤੁਰੰਤ ਸਰਚ ਕਰਕੇ ਸਾਰੇ ਨਤੀਜੇ ਦਿਖਾ ਦੇਵੇਗਾ।